Mnenge U Aôndo A Nengen Anza A Wang Yô
Mnenge U Aôndo A Nengen Anza A Wang Yô
“Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.”—YESAIA 48:17.
1, 2. (a) Ior tange nenge ieren i yaven a kwase shin nomsoor la nena? (b) Ka ieren i yaven a kwase shin nomsoor i nyi Mbakristu ve lu a mi?
SHA ajiir agen kpishi sha tar ainge yô, anza hingir kwagh u hanma or nana eren sha mnenge u nan yô. Ior tôô myav u yaven a kwase shin nomsoor la ér ka kwagh u sha gbaaôndo u tesen dooshima he’ shighe u ve soo cii, kera ka kwagh u i gbe u a eren ke’ ivese tseegh ga. Ka i lu ve inja er, kwagh u or nan tsough u eren cii aluer ka u hiin or iyongo ga di tsô yô ka u bo ga nahan. Sha mnenge ve yô, gba u ôron or ijir sha kwagh u anzaagh ga, hemban je yô, sha kwagh u yaven a kwase shin nomsoor la.
2 Ior mba ve va fe Yehova yô, mnenge ve ngu kposo. Mba dondon kwagh u Ruamabera a tese la sar sar je, sha ci u Yehova doo ve ishima shi ve soo u eren ishima na kpaa. Ve kav e̱r ve doo Yehova ishima shi a tesen ve kwagh u vea er i lu sha ci u mkpeyol ve nahan, ka mtese u una va ve a mtsera shi una na vea lu saan saan je la. (Isaiah 48:17) Er i lu Aôndo a lu Imbor i uma yô, ka un i doo u vea ver ashe a na ér a̱ tese ve er vea yar tom a ayol a ve ye, hemban cii je yô, sha kwagh u a gbe a zough sha msamber u samber a uma ne.
Iyua I Orgbanakaa u Lun a Dooshima A Ne Yô
3. I tese ior kpishi ke’ Mbakristu Mbaaiev ér nyi sha kwagh u yaven a kwase shin nomsooro, kpa kwagh ne zua sha ityesen i Bibilo ga nena?
3 Shin er mnenge u tar u ainge ne a kaha kposo nahan kpaa, mbagenev ke’ Mbakristu Mbaaiev tese ér myav u yaven a kwase shin nom ka kwagh u kunya shi ka isholibo, shi “isholibo i hiihii” i yange i er ke’ sule u Eden la kpa yange lu Ifa za mee Adam yav a na ye. Imba mnenge ne i̱ kaha kposo a kwagh u Ruamabera a kaa yô. Ngeren u Bibilo ôr kwagh u nom u hiihii man kwase u hiihii la ér “or la vea kwase na.” (Genese 2:25) Aôndo yange kaa a ve ér ve̱ mar ônov, a kaa ér: “Mar nen kpishi, seer nen ngeen, iv nen tar.” (Genese 1:28) I luun er Aôndo yange una we Adam man Ifa tindi ér ve̱ mar ônov kpa shi una hurugh una tsaha ve, sha ci u mba eren sha tindi u un we ve la yum yô, kwagh la ma a gbe iliam ga.—Pasalmi 19:8.
4. Hii nan Aôndo yange na uumace tahav mbu yaven a kwase shin nomo?
4 Se nenge a awashima u vesen u yaven a kwase shin nom la ke’ tindi u yange i na mbamaren asev mba hiihii mbara shi yange i va kimbir nan Noa man ônov nav la: ka u maren ônov je la. (Genese 9:1) Nahan cii kpa, Mkaanem ma Aôndo tese ér i kighir mbacivir un mba ve er ivaa mbara ér saa ve yaven a ayol a ve sha ci u maren ônov tseegh ga. Amba a myav la aa fatyô u kuren mgbe u ke’ ishima man u sha iyol shi aa fatyô u lun kwagh u saan mba ve er ivaa la iyol kpaa. Ka gbenda u hanma ve nana tese ugen la e̱r nan doo ngula ishima tsung yô.—Genese 26:8, 9; Anzaakaa 5:18, 19; 1 Mbakorinte 7:3-5.
Mbamyange mba Aôndo
5. Ka mbamyange mba nyi Aôndo a yange ke’ myav u orumace yaven a ugen laa?
5 Shin er myav u yaven a kwase shin nom la i lu iyua i Aôndo a ne nahan kpaa, ú ngu wer ka u a eren kwagh ne a iyol kôron tsaha shio ga. Tindi ne ngu nahan he’ mba ve er ivaa je kpaa. (Mbaefese 5:28-30; 1 Peteru 3:1, 7) U yaven a kwase shin nomsoor ke’ won u ivaazuan yô, i tswer. Bibilo ôr kwagh ne sha ahen ahen ga. I kaa ke’ Tindi u yange Aôndo na ikyurior i Iserael la ér: “De eren idya ga.” (Ekesodu 20:14) Ke’ masejime yô, Yesu va seer ‘ijimba i eren’ man “idya” sha “akaabo a henen” a a dugh ke’ ishima i or á ne nan lu wang ga la. (Marku 7:21, 22) Yange i na apostoli Paulu tahav sha u a̱ nger a̱ wa Mbakristu mba ke’ Korinte kwagh nahan ér: “Yevese nen idya.” (1 Mbakorinte 6:18) Shi Paulu yange nger ke’ washika na u a tindi a mi he’ Mbaheberu la ér: “Ivaa i̱ lu kwagh u icivirigh hen ior cii, gambe u ivaagh kpaa a̱ de lu a acôghor ga, gadia Aôndo Una ôr mbaerenijimba man mbavihin ivaa sha idya la ijir.”—Mbaheberu 13:4.
6. Ke’ Bibilo yô, ishemberti i i yer ér “ijimba” la i̱ yisa sha nyi akaa?
6 Ikyav i ishemberti i i yer ér “ijimba” la kanyi? I̱ due ke’ ishemberti i ke’ zwa Grika i̱ i yer ér por·neiʹa la, man ashighe agen ka i yar tom a i̱ sha u tesen myav u mba ve lu a̱ er ivaa ga ve yaven a ayol a ve la. (1 Mbakorinte 6:9) I yar tom a ishember ne ke’ ajiir agenegh anza er Mateu 5:32 man Mateu 19:9 nahan, man ikyav i i̱ ngi wuee, i̱ yisa sha akaa e̱r idya man u or yaven a anngô u nan kua u yaven a zendenya nahan. Aeren agen a a zough sha kwagh u yaven a kwase shin nomsoor, a ior mba ve lu a̱ vôso ayol a ve ga ve eren amba er u ndiar or ilyeghegh ki mar shin u yaven a or shin ityô, shin u eren a ilyeghegh ki mar ki orgen ave la kpa a fatyô u yilan a ér por·neiʹa. Aeren ne cii i venda a ke’ Mkaanem ma Aôndo—kwa gen ka i venda gbar gbar, kwa gen di i lu ke’ mlu.—Levitiku 20:10, 13, 15, 16; Mbaromanu 1:24, 26, 27, 32. *
U̱ Zuan a Mtsera ke’ Atindi a Aôndo A Anza a Dedoo La
7. Aluer se kura ayol a ase sha anza a dang yô, kanyi mtsera se zua a mini?
7 U kuran atindi a Yehova a we sha kwagh u ieren i yaven a kwase shin nomsoor la a fatyô u taver orumace u nan yen ne kpen kpen. Ngise Oryuda u fankwagh tsura u duen iti u̱ lu ke’ derianyom u sha 12, u í yilan ér Maimonides la nger kwagh kaa ér: “Ke’ mbamyange mba ve lu ke’ Tora [Tindi u Mose] la cii, mô môm tsô kpa taver u kuran er u á tswer or u yaven a anngô u nan shin myav u yaven a kwase shin nomsoor sha tindi ga la nahan ga.” Nahan cii kpa, aluer se lumun gbendatesen u Aôndo yô, se zua a mtsera kpishi je. (Yesaia 48:18) U tesen ikyav yô, u wan ikyo sha gbaa ne una kura se sha ikyev i iangev mbi tsaren sha myav u yaven a kwase shin nomsoor la, mbigenev je yô, mba fetyô u sôron mbi ga man mbi woo or kpaa. * Í kura se sha ikyev i iyav mbu wan ke’ won u ivaazuan la. U eren kwagh sha kwaghfan u Aôndo la shi ne or lu a imoshima i wang. U eren nahan la ne or iciviryolough shi ne mbagenev mba ne or icivir kpaa, kua anmgbianev asev man mbakov wase man mbayev man anmgbianev asev mba ke’ Kristu mbanomso man mbakasev cii. Shi ne se mba lu a ieren i vough sha kwagh u yaven a kwase shin nom sha er se zua a msaanyol ke’ ivese yô. Kwasekristu ugenegh yange nger kwagh nahan ér: “Mimi u Mkaanem ma Aôndo la ka kwagh u hemban cii u a kuran or je la. M ngu veren ashe u va eren nom, man me eren nom cii yô, me kaa a Orkristu u me er la sha ihyagh je mer m kura iyol yam wang.”
8. Ka sha nyi igbenda nahan man anza ase aa fatyô u seer mcivir u wang-na?
8 Aluer se mba zan hemen u lun a anza a wang yô, se fatyô u nôngon kwagh tsung sha u yangen anzughul a i ve a mi sha mcivir u mimi la shi se ulugh ior sha u ve kpa ve̱ va he’ Aôndo u se civir ne yô. Apostoli Paulu yange nger kwagh ér: “Zende wen u hen atôatyev u̱ lu wanger wanger, sha u aluer mba lamen sha a ven er ka mbaaferev yô, ve̱ nenge aeren a en a dedoo man ve̱ civir Aôndo sha iyange i Una va sôron ne la.” (1 Peteru 2:12) Aluer ior mba ve civir Yehova ga mbara vea kera nenge aeren a ase a wang la ga shin vea lumun a á ga je kpaa, se fa ser Ter wase u sha ngu nengen, shi saghen ishigh sha a vese, shi u ember je kpa ngu ember sha iniôngon i se nôngon u dondon gbendatesen na la.—Anzaakaa 27:11; Mbaheberu 4:13.
9. Hii nan ve i doo u se suur sha gbendatesen u Aôndo la, shin er alaghga se fa atôakyaa a i hii ve a tesen se nahan la ga je kpaa? Tese ikyav.
9 U se nan Aôndo jighjigh la kua u lun a vangertiôr ser a fa kwagh u a hembe lun se a inja la, shin aluer sea kera fa atôakyaa a i hii ve a hemen se u zan sha gbenda u a ze a vese la ga je kpaa. Nenge ikyav ke’ Tindi u Mose la. Yange i wa tindi ugen sha kwagh u haan afo utya ér zum u or nan dugh ke’ hua nan za ze akôngo yô, nana̱ cir á. (Duteronomi 23:13, 14) Alaghga yange lan Mbaiserael ishima sha ityôkyaa i yange hii ve i kaa a ve ér ve̱ er imba kwagh ne nahan la; alaghga mbagenev yange ve nenge ér kwagh la ka kwagh u ikyoogh ga. Kpa shighe la karen kera yô, twersôron u kwaghfan u sangen yeke mase kaven ér tindi ne yange kura amboramnger ve sha er aa kera lu a akaa a nan angev shimi ga yô, shi yange kura ve sha ikyev i mshiyol u i lu ankaam ma lun a ingyur ve ne ior la kpaa. Kape i lu je la, atôakyaa nga a ke’ jijingi man a he’ mbaior man a ke’ ishima man a sha iyol man a ke’ mhen a a ne ve Aôndo a yange ér myav u yaven a nomsoor shin kwase la a̱ saa ke’ ivese tseegh yô. Hegen yô, de se time sha akav a tesen a ke’ Bibilo a ior mba yange ve za hemen u lun wang la.
Yosev—Zua a Iveren sha Inja Na i Wang La
10. Ka ana yange nan nôngo u meen Yosev, man yange gema kaa ér nyi?
10 A shi nan kpa ú fa ngeren u Bibilo i nger sha kwagh u ikyav i Yosev, wan u Yakob yange tese la. Zum u a lu anyom 17 la, a hingir kpan u Potifar, orvesen u mbakuran Farao u Igipiti la. Yehova ver Yosev doo doo, ke’ masejime yô, i ver un orhemen sha ya u Potifar cii. Yosev kom anyom 20 yô, a ‘kuma ashe shi a doo ashe kpaa.’ A kôr kwase u Potifar sha mtema, man ngura nôngo ér una mee un. Yosev tese mtil na wang, pase wanger wanger nahan ér aluer un lumun yô, a lu u karen a kar orvesen na uwegh ijime tseegh ga kpa shi a lu u ‘eren Aôndo isholibo.’ Hii nan ve Yosev yange hen kwagh sha imba gbenda ne nahana?—Genese 39:1-9.
11, 12. Shin er yange Aôndo lu a̱ na i nger tindi u yangen ijimba man idya ga nahan kpaa, ka sha ci u nyi ve alaghga yange Yosev hen ke’ ishima sha imba gbenda la nahana?
11 Ikyav tese ér er yange hii ve Yosev tsua u eren kwagh u yange er la yô, lu sha ci u uumace vea va fa yum ga. Tsombor u Yosev yange ú lu ca, shi ter na kpa hen ér a kpe. Aluer Yosev yange una er ijimba kpa tsombor na yange ma ú fa kwagh sha mi ga. Shi alaghga yange ma i yer Potifar man nomso mba shiren un mbara kpa a imba isholibo la, sha ci u ashighe agen yange ve lu he’ ya ga. (Genese 39:11) Nahan cii kpa, Yosev fa je ér a fatyô u yeren Aôndo a imba isholibo la ga.
12 Alaghga yange Yosev hen ke’ ishima sha kwagh u yange fa sha kwagh u Yehova yô. Yange fa kwagh u Yehova ôr ke’ sule u Eden la je ka u tunan ga, u yange kaa nahan la, ér: “Ka sha ci u nahan man or ka nan undu ter u nan kua ngô u nan, nan var ken kwase u nan, ve hingir iyôgh i môm ye.” (Genese 2:24) Heela tseegh ga, alaghga yange Yosev fa kwagh u Yehova ôr a tor u Mbafiliti u yange hanger ér saa una mee Sara, ngô u Yosev u tamen tamen la. Yange Yehova kaa a tor la ér: “Nenge, ú kpe sha ci u kwase u u koo a mi ne; gadia ka kwase u or je . . . Mo kpaa M yange u sha u de kera eren Mo kwaghbo ga; ka nahan man M rumun Mer bende a na ga ye.” (Genese 20:3, 6, ka se se nger i yier ye.) Nahan, shin er yange Yehova lu a̱ na tindi u i nger a nger la ga nahan kpa, mnenge na sha kwagh u ivesegh lu wang. Mhen u lun a inja i wang u Yosev yange lu a mi la, kua isharen i eren ishima i Yehova la kohol cii yange un dang u eren.
13. Ikyav tese ér kanyi alaghga yange i̱ na ve taver Yosev u palegh kwase u Potifar-a?
13 Kpa kwase u Potifar lu hanger her di tsô, lu zamber un “ayange ayange” ér a̱ yav a na. Hii nan ve Yosev yange palegh un ér maa kwagh a̱ bee ga? Er yange lu kpan yô, a lu a ityom i eren, nahan gbenda lu u una gema kwagh la kposo ga. Akav a i za dugh shin inya la tese ér yange i maa ayough a Mbaigipiti sha gbenda u yange i gba u saa or a nyôr he’ tembe youghough u vesen la cii ve nana za ar he’ ajiir a koson kwagh la ye. Nahan alaghga yange lu u Yosev a fatyô u palegh kwase u Potifar ga.—Genese 39:10.
14. (a) Kanyi yange i er Yosev zum u a yevese a undu kwase u Potifar laa? (b) Yehova yange ver Yosev doo doo sha jighjigh na la nena?
14 Tsô iyange igen sev mbu hongo mbu aven yô, ve lu ke’ iyou ve tseegh. Tsô kwase u Potifar gese uwegh kôr Yosev kaa a na ér: “Va yav a mo.” Kpa orti yevese. Er sôô kwase la ke’ ishima er ngura a vende un yum yô, maa a wa Yosev kwagh iyol ér a soo u kighir un yaven a na. Lu nyi i ere? Yehova yange na un injar sha ci u mtil sha mimi na la her ave ave jee? Ei. Yange i gbihi Yosev ke’ purusu shi i mande un agbe kpaa. (Genese 39:12-20; Psalm 105:18) Yehova nenge m-er u yange i ôr ijir sha inja ga la nahan ke’ masejime yô a dugh Yosev ke’ purusu kera a kende a na sha a za ver un ke’ dwer u tor. A hingir or u sha uhar u hemban ke’ Igipiti cii shi i na un iveren sha kwase man mbayev kpaa. (Genese 41:14, 15, 39-45, 50-52) Heela tseegh ga, i nger kwagh u mtil sha mimi u Yosev la tsa kuma anyom 3,500 hegen, man hii shighe la je tsô mbacivir Aôndo zer timen sha mi. Averen a i na un sha mdondo u a dondo atindi a Aôndo a perapera ne ka a dedoo je zua ga! Kape se kpa i lu ainge je la. Alaghga se kpa ka ashighe cii se nenge a iwasen i zan hemen u lun a anza a wang la fese ga, kpa se lu a vangertiôr ser Yehova ngu nengen shi shighe a va kuma yô una ver se doo doo.—2 Kroniku 16:9.
‘Ikyuryan i Yobu Ya a Ashe Na La’
15. ‘Ikyuryan i yange Yobu ya a ashe na’ la lu nyi?
15 Or u tilen sha mimi ugen yô, lu Yobu. Shighe u Diabolo lu eren un atsan la, Yobu hide gbidye kwar sha uma na nahan a kaa ér aluer un vihi atindiakaa a Yehova a we sha kwagh u myav u yaven a kwase, man atindiakaa agenegh yô, un lumun u yan ican tsung je. Yobu yange kaa ér: “M ya ikur a ashe am; nahan á er nan man me kenger sha iniunkwasa?” (Yobu 31:1) Ikyav i kwagh u Yobu kaa heen ne yô ér, ke’ mnenge u un lu nôngon sha u tan ikyaa a Aôndo ne yô, un kange ishima na wener u̱ kenger kwase a isharen shin ishima tsô kpa una kenger ga. Kpa sha mimi yô, una nengen a kasev ke’ uma u ayange ayange la shi kwagh a̱ gba ve a iwasen je kpa una wasen ve. Kpa u veren ishima sha gbaa u keren saaka u ukase la yô, lu kwagh u teren sha iyol na ga. Cii man atsan na la hii yô, lu or u lun a inyaregh kpishi, “hemba ior mba ken ityoughkitaregh cii.” (Yobu 1:3) Nahan cii kpa yange yar tom a tahav mbu inyaregh nagh sha u meen kasev imôngo ga. Yange er asenge sha inja i una lu a ishimaveren i eren dang u yaven a igyumukase mayange ga cii.
16. (a) Hii nan ve Yobu a lu ikyav i dedoo he’ Mbakristu mba ve vese ayol laa? (b) Ieren i nomsombaiorov mba sha ayange a Malaki la yange i kaha a i̱ ior mba sha ayange a Yobu la nena, man nyian di ye?
16 Nahan sha ashighe a dedoo man a bo cii, Yobu kusu mimi na her. Yehova nenge kwagh ne nahan a ver un doo doo. (Yobu 1:10; 42:12) Ikyav i Yobu ne i doo u nomsombaiorov man kasev Mbakristu mba ve er ivaa cii vea dondo je zua ga! Kape i lu je ve yange doo Yehova ishima yum ne! Kpa inja i ior mbagenev kpishi ainge ngi nahan ga, i hemba been kwagh u yange er sha ayange a Malaki la. Yange ishima vihi profeti la ker a noov mba ashighe kpishi yange ve gbihi kasev vev, sha u vea vôso igyumukase la. Atse a nanden naagh a Yehova yange iv a mliam ma kasev mba i gbihi ve la, nahan Aôndo huna ior mba ve ‘er a kasev vev sha mimi ga la.’—Malaki 2:13-16.
Gumkwase u Lun Wang
17. Anshulam la yange lu inja er “sule u i kase u igyar” nahan nena?
17 Or u tilen sha mimi ugen u sha utar yange lu wankwase u Shulam. Er yange lu gumkwase shi doo ishima yô, nahan a kôr wannomso u kuran ilev sha ishima tseegh ga shi a kôr Solomon, tor u Iserael u lun a inyaregh la iyol kpaa. Ke’ kwagh u doon ungwan u i er ke’ Icam i Hemban la yô, Anshulam la za hemen u lun wang, nahan lu a icivir sha ishigh ki mba ve fa un la. Shin er yange wankwase la venda Solomon nahan kpa, i iv Solomon a tahav ér a̱ nger kwagh u yange er ne. Shi wannomso u yange doo un ishima la kpa na un icivir sha mlu na u wang la. Shighe ugen la wannomso ne hen gbang kende kaa ér Anshulam ngu er “sule u i kase u igyar” nahan. (Icam i Hemban 4:12) Sha ayange a Iserael u tsuaa la, ishule i doon ashe yange i lu a ikyayue i menden atô kposo kposo man uimondon mba human doon man ikyon i tilen geng kpaa. Yange i hemban wan amba a ishule la igyar i kasen sha imendenev mbigenev shin i maan a maa i̱, nahan or nyôron ker ga saa sha hunda u yange i gesan la tseegh. (Yesaia 5:5) He’ wan u kuran ilev la yô, inja i Anshulam la man mdoom nam mara yange lu un er ka imba sule i mdoom ma i yange ma za ihyen la nahan. Yange lu wang a mshi shio. Yange lu a dooshima u gban ulum u una va lu u nom u una va vôso ke’ hemen la tseegh yô.
18. Kwagh u Yosev man Yobu man Anshulam la a umbur se nyi kwagha?
18 Sha gbaa u lun perapera, saan ishe ga la yô, Anshulam la tese ikyav i dedoo sha ci u kasev mba ve lu Mbakristu ainge yô. Yehova yange nenge inja i Wankwase u Shulam la shi ver un doo doo kpaa di er yange vande veren Yosev man Yobu doo doo nahan. I nger kwagh u aeren a perapera ve ne ke’ Mkaanem ma Aôndo sha u tesen se gbenda. Shin er i ngeren iniôngon i se nôngon ser se tile sha mimi ne ke’ Bibilo ga nahan kpa, Yehova ngu a “ruamabera u umbur akaa” sha ci u mba ve keren u eren ishima na la. Mayange se hungur nen ga, se umbur nen ser Yehova ‘ngu veren ishima’ shi ka saan un iyol er se nôngon sha gbashima ser anza a ase a̱ lu a wang nahan.—Malaki 3:16.
19. (a) Gba u se nenge kwagh u anza a wanger wang nena? (b) Kanyi kwagh i gbe u a time sha mi ke’ kwaghngeren u a dondo nee?
19 Shin er alaghga mba ve lu a jighjigh u nan ga mbara vea naha se tar nahan kpaa, saan se iyol sha m-ongo u se ungwan imo i Orgban se u a lu a dooshima ne. Se mba a anza a lun sha tseng, ka anza a Aôndo a lun tseng je la. Ka kwagh u tan ihagh a mi, kwagh u i lu u una gba se kwagh tsung yô. Aluer se mba a anza a wang yô, se ember averen a Aôndo shi se za hemen u lun a ishimaverenkeghen i wanger wang i va zuan a averen a ke’ hemen la. Nahan kpa, kanyi kwagh i gbe u se er ve se za hemen u lun wang sha igbenda igenegh jighilii? Kwaghngeren u dondon ne una time sha mpin u injaa ne.
[Footnotes]
^ Nenge ke’ Iyoukura [zwa Buter] i Maaci 15, 1983, peeji 29-31 la.
^ Kwagh ka a er i vihi yô, ashighe agen Orkristu u lun a ishô ka nan zua a angev mbu tsaren sha myav u yaven a kwase shin nomsoor la he’ or u nan vese nan kpa nan ne jighjigh ga shi nan dondon akaawan a Aôndo ga yô.
[Study Questions]
[Picture on page 21]
Yange Yosev yevese ijimba
[Picture on page 22]
Wankwase u Shulam la yange lu er “sule u i kase u igyar” nahan
[Picture on page 23]
Yobu yange ‘er ikyuryan a ashe na’
Ú Fatyô u Pasen Kpa?
• Bibilo tese kwagh u yaven a kwase shin nomsoor nena?
• Ishemberti i i yer ke’ Bibilo ér “ijimba” la wa nyi man nyi kere?
• Aluer anza ase za hemen u lun wang yô, kanyi ia lu mtsera wasa?
• Hii nan ve Yosev man Yobu man wankwase u Shulam la cii ve lu akav a dedoo he’ Mbakristu ainge?