Wase Mbagenev Ve̱ Zende Zende U U Kom Yehova Yô

“Se kera mem u eren msen man shi u zamber sha ci wen ga, ser, . . . ne̱ zende zende u u kom Ter, ne̱ doon Un ken akaa cii, ne̱ umen atam ken hanma tom u dedoo.”—MBAKOLOSE 1:9, 10.

1, 2. Kanyi jim ia fatyô u lun imbor i iember man mkomo?

 “SE MBA tse ken ityev ken iyou i lun a akaver i̱ á fatyô u moughon a mi yemen hen ijiir igen yô. Se hemba mban a ian i pasen ior loho u dedoo ne sha ci u uma wase wa kperegh kperegh ga. Se zua a iveren kpishi sha ian i civirigh i wasen ior kpishi u tseghan uuma vev sha ci u Yehova la.”—Orgen vea kwase na, mba eren tomshiren u keke shin tar u South Africa.

² Ú lumun wer u wasen mbagenev la ve a iember gaa? Mbagen ka ve zer nôngon hanma shighe sha u wasen mbauangev man mba ican i tser ve, shin ve lu a or ijime ga yô—man mba zough a mkom sha u eren kwagh nahan la kpaa. Mbakristu mba mimi fa tsô ér mpase u ve lu pasen mbagenev mfe u Yehova Aôndo man Yesu Kristu la ka iwasen i hemban cii i vea fatyô u nan je la. Ka kwagh ne tseegh una fatyô u nan mbagenev u lumun ipaan i Yesu la shi maan mlu u dedoo vea Aôndo, nahan va lun sha ian i zuan a uma u tsôron ye.—Aerenakaa 3:19-21; 13:48.

3. Ka imba iwasen i nan or i nyi nahan i doo u se nenge sha mini?

³ Nahan kpa, gema di sha u wasen mba ve lu vanden eren Aôndo tom kera, ve mba ve lu dondon “Gbenda la” di ye? (Aerenakaa 19:9) Isharen you sha a ve i̱ hemba vesen a vese je ka u nyiman ga, kpa alaghga ú fa gbenda u ú kar ve ú seer nan iwasen, shin ú za hemen a iwasen í í lu nan zan a mi hemen ne ga. Shin alaghga á lu inja er mlu wou la ngu yangen iwasen i ú fatyô u nan la nahan ú kera ngu zuan a mkom u ma ú zough a mi la ga nahan. (Aerenakaa 20:35) Sha igbenda ne cii kpa se fatyô u zuan a iwasen ken takerada u Mbakolose la.

4. (a) Ka nyi akaa nahan yange na ve Paulu nger Mbakolose washika? (b) Epafera lu a ci ker nena?

⁴ Shighe u apostoli Paulu nger Mbakristu mba ken Kolose washika la, lu uikyangen ken Roma, kpa ior vaan un inya. Er ú vande fan nahan, Paulu yar tom a ian i yange lu a mi la sha u pasen kwagh u Tartor u Aôndo je ka kwagh u henen a hen ga. (Aerenakaa 28:16-31) Mba yange ve lu Mbakristu a Paulu imôngo la ve lu a ian i zan un inya, je yô alaghga yange i wuhe mbagen ken gaadi a na imôngo sha ashighe agen je kpaa. (Mbakolose 1:7, 8; 4:10) Môm ken a ve yô lu orivangeli u tseen ishima Epafera u ken gar u Kolose hen Firigia, ken kpentar u lun agungu agungu vegher u ken Ityoughkitaregh ki Efese u ken Ashia u Kiriki (hen ape i lu tar u Turkey hegen) la. Lu Epafera je lu ityôu sha mtím u tiônnongo u í tím ken Kolose la ye, shi yange nôngo tsung sha ci u atôônanongo a a dondo ikyua ikyua hen Laodishia man Hierapoli la kpaa. (Mbakolose 4:12, 13) Kanyi yange i̱ na ve Epafera za sôr Paulu ken Roma, man se fatyô u henen nyi kwagh ken mlumun u Paulu yange na laa?

Iwasen I Injaa I sha ci u Mbakolose

5. Kanyi yange i na ve Paulu nger kwagh u lu nger hen Mbakolose la?

⁵ Epafera yange mough yem zende u ican tsung ken Roma sha u za teman idyu vea Paulu sha kwagh u mbamlu mba ken tiônnongo u ken Kolose la. A za na ibaver sha kwagh u jighjigh u nan u Mbakristu mbara man dooshima ve kua iniôngon ve sha tom ivangeli kpaa. (Mbakolose 1:4-8) Kpa alaghga yange shi una pase ishima i i lu nyian un sha udangmbaakaav mba yange ve lu nôngon u vihin mlu u ken jijingi u Mbakolose la kpaa. Paulu yange vengese sha u ngeren washika vendan mbamnenge mbagenev mba mbatesen mbaaiev ve lu samber a mi la. Yange hemba veren ishima sha tom u i gbe u Yesu Kristu una er jim la. * Iwasen na la yange i saa di sha u ôron mimi mba ken Bibilo zever zever tseeghlee? Shi yange ma fatyô u wasen Mbakolose nena, man se fatyô  u henen nyi sha kwagh u wasen mbageneve?

6. Ka nyi kwagh Paulu yange hemba kimbir gban gban ken washika na u a nger hen Mbakolose laa?

⁶ Ken mhii u washika u Paulu la, a ta iwanger sha imba iwasen i̱ alaghga se wa ikyo a mi ga yô. Lu gbenda u nan iwasen ú yange ú lu a inja ken ica yô, gadia Paulu man Epafera cii ve lu ica a Kolose. Paulu lumun ér: “Se mba sughun Aôndo Ter u Ter wase Yesu Kristu sha ci wen gbem zum u ka sea eren msen [ngeren u shin kpe la kaa ér, “eren msen hanma shighe” NW ] sha ci wen yô.” Een, mbamsen mban lu mba i eren sha ci u Mbakristu mba ken Kolose jighilii yô. Paulu seer ér: “Sha ci u nahan yô, hii sha iyange i se ungwa kwagh la je se kera mem u eren msen man shi u zamber sha ci wen ga, ser, ma i iv ne a mfe u fan ishima Na sha kwaghfan cii man mkav u ken jijingi kpaa.”—Mbakolose 1:3, 9.

7, 8. Mbamsen mba se eren asange asange man mba se eren ken tiônnongo la ashighe agen ka ve bende sha nyi kwagha?

⁷ Se fa e̱r Yehova a “ongo msen” yô, nahan se fatyô u suur sha mwe u ka a wa iyol a kegh a kegh u ungwan mbamsen asev mba se er sha ishima na vough la. (Pasalmi 65:2; 86:6; Anzaakaa 15:8, 29; 1 Yohane 5:14) Nahan kpa, zum u i ve sha kwagh u eren msen sha ci u mbagenev yô, mbamsen asev mba lu nena?

⁸ Alaghga ashighe kpishi se hen sha kwagh u ‘anmgbianev asev mba ve lu sha won cii’ la, shi se er msen sha ci ve kpaa. (1 Peteru 5:9) Shin alaghga se sôn Yehova sha ci u Mbakristu man mbagenev mba ve lu hen ma ningir u aahe a kese ve shin kwagh u kpilighyol a er ve yô. Zum u mbahenen mba sha derianyom u hiihii mba sha ajiir agen ve ungwa ér ijen gba ken tar u Yudia la yô, yange vea vande eren mbamsen kpishi sha ci u anmgbianev vev keng cii ve vea mase tindin inyaregh sha ci u myôhôryol ve ye. (Aerenakaa 11:27-30) Sha ayange ase ne kpa, ashighe kpishi se mba ongo mbamsen mba ka i er ken mbamkombo mba Mbakristu sha ci u anmgbianev sha won cii, shin sha ci u anmgbianev mba hen ma ijiir igen, hen ape i gbe u mbakpishiv vea kav shi vea fatyô u kaan ér “Amen” yô.—1 Mbakorinte 14:16.

Ôr Kwagh u Ú Lu Pinen ken Msen la Jighilii

9, 10. (a) Ka akav a nyi a tese ér u eren msen sha ci u ior jighilii la ka kwagh u sha injaa? (b) Yange i er msen sha ci u Paulu jighilii nena?

⁹ Nahan kpa, Bibilo na se akav a tesen a mbamsen mba yange i er sha ci u mbagenev mba yange i jimin a jimin ga, í ter ior sha ati jighilii yô. Gbidye kwar sha kwaghôron u Yesu u i nger ken Luka 22:13, 32 la yôô. Yange Mbaapostoli 11 mba nan jighjigh kase un. Ve cii gba u Aôndo una sue ve ken ashighe a ican a a lu van ken hemen la, nahan Yesu er ve msen. (Yohane 17:9-14) Nahan cii kpa, Yesu ter Peteru sha iti, er msen sha ci u orhenen la jighilii. Akav agenegh kpa nga: Elisha yange er msen ér Aôndo a̱ wase or môm jighilii, lu wanakiriki na je la. (2 Utor 6:15-17) Apostoli Yohane yange er msen ér Gayu a̱ lu doo doo, i̱ kpe un iyol i̱ kua ken jijingi kpaa. (3 Yohane1, 2) Shi yange i er mbamsen mbagenev lu sha ci u iniongoior igen jighilii.—Yobu 42:7, 8; Luka 6:28; Aerenakaa 7:60; 1 Timoteu 2:1, 2.

¹⁰ Uwashika mba Paulu nger la ve due a kwagh u mbamsen mba yange i er i ter ityôkyaa jighilii yô. Yange kaa ér i̱ sôn sha ci na shin sha ci na man mba ve lu eren tom a na imôngo la. I nger ken Mbakolose 4:2, 3 ér: “Taver nen asema sha msen u eren, lu nen per sha mi sha ishughun. Eren nen msen sha ci wase kpaa ner, Aôndo A̱ bugh hunda sha kwaghôron wase sha u sé ôr kwaghmyer u Kristu u i wuhem sha mi la” yô. Shi nenge akav agen kpaa: ken Mbaromanu 15:30; 1 Mbatesalonika 5:25; 2 Mbatesalonika 3:1; Mbaheberu 13:18.

11. Shighe u Epafera lu ken Roma la, lu eren msen sha ci u unô ioro?

¹¹ Kape ortom u Paulu u ken Roma la kpa yange er vough je la. “Epafera, . . . u a lu or u ken a ven la ngu sughun ne. Ngu eren msen sha gbashima sha ci wen gbem.” (Mbakolose 4:12) Ishemberti i̱ í nger ér “sha gbashima” ne ia fatyô u tesen “kwagh u nôngon tsusee,” er or u eren anumbe a ka i tsue í gema mene mene, amba a yange i eren sha shighe u mbayiase la nahan. Epafera lu gban eren msen gbang sha ci u mba nan jighjigh mba sha tar cii tsô shinii, shin lu sha ci u mbacivir Aôndo mba mimi mba ken kpentar  u Ashia u Kiriki la ciilii? Paulu yange tese ér Epafera lu eren msen sha ci u mba ve lu ken Kolose la jighilii. Epafera yange fa mlu ve. Se fa ve cii sha ati ati ga, shin mbamzeyol mba yange ve tagher a mi mbara kpaa ga, kpa hen ase sha akaa a alaghga yange er la yôô. Alaghga gumor Lunu lu nôngon a mzeiyol u kwaghfan u taregh, man alaghga Rufu di lu keren agee a hendan a akaa na a tse a yange vanden eren ken Kwaghaôndo u Mbayuda la. Shi, er nom u Perse lu or u nan jighjigh ga yô, mase zan yange gba u una taver ishima shi una zende sha kwaghfan sha u yesen mbayev nav ken Ter yôô, shin er Asunkritu gba angev mbu mbua wua un yô, alaghga yange gba u á hemba nan un msurshima shinii? Een, Epafera yange fa mba ve lu ken tiônnongo u ken ijiir na la dedoo, nahan a er msen sha ci ve sha gbashima sha ci u un vea Paulu cii ve soo ér mba nan jighjigh mbara ve̱ zende zende u u kom Yehova yô.

12. Se seer yilan ior sha ati ken mbamsen asev mba ken iuv mbara nena?

¹² Ú nenge a ikyav i tesen se gbenda—u se kpa se wase mbagenev kpa? Er i vande ôron nahan, mbamsen mba eren ken mbamkombo mba Mbakristu kpishi mba hembe jimin a jimin sha ci u mlu u ior mbaungwan mbara a lu kposo kposo yô. Kpa mbamsen asev mba se eren se tseegh shin mba ken tsombor yô, vea fatyô u hemban teren akaa jighilii. Er ashighe agen se lu pinen Aôndo ser a̱ ver mbakuran mba azende-azende cii doo doo, shin mbakuranilev mba ken jijingi mbara nahan kpaa, ashighe agen se fatyô u dughun ve sha ati jighilii gaa? U tesen ikyav yô, er nan ú er msen ú yer sha iti i ortamen u sôron atôônanongo u a ve tiônnongo wou inya la, shin sha iti i orhemen Takerada u Henen hen Tiônnongo wou la ga? Mbafilipi 2:25-28 man 1 Timoteu 5:23 tese ikyo i wan i yange Paulu tese sha mkpeyol u Timoteu man Epafroditu jighilii la. Se fatyô u tesen imba ikyo i wan la sha mbauange mba se fe ve sha ati la kpa?

13. Ka mbamlu mba nyi nahan ve lu mba injaav mba a doo u se wa ken msen wase u ken iuv laa?

¹³ Sha mimi yô, doo u se palegh u amber sha akaamyer a ior mbagenev la, kpa doo u mbamsen asev vea tese ér mimi je kwagh u ior mba se fe ve la gba se ishima, man se wa ve ikyo kpaa. (1 Timoteu 5:13; 1 Peteru 4:15) Alaghga i de ma anmgbian tom, man ka u se fatyô u nán nan tom ugen ga. Kpa, se fatyô u umbur mzeyol u nan la ken mbamsen mba se eren se tseegh la jighilii. (Pasalmi 37:25; Anzaakaa 10:3) Se fa ma anmgbian u kwase u nan lu kwav iyev je zan zan nan kar ganden iyol, shi wan kpa nan lu a mi ga sha ci u gbashima u nan lu a mi u eren nom “ken Ter tseegh” yôô? (1 Mbakorinte 7:39) Er nan se sen Yehova ken mbamsen asev mba ken iuv mbara ser a̱ ver nan doo doo shi a̱ wase nan nana̱ za hemen ken tom u nan a mhidi ijime shio ga? Shi ikyav igen yô, alaghga mbatamen uhar za kôôm anmgbian u a nenge gbeev yô. Er nan hanmô ve nan ter iti i nan ken mbamsen vev mba ken iuv mbara sha ashighe a ashighe ga?

14. Mbamsen mba eren sha ci u or jighilii la ve zua sha u wasen orgen nena?

¹⁴ Akaa nga kpishi a ú wa ken msen wou iyol you inja er ior mba ú fe ve ve lu keren iwasen i Yehova man mba i gbe u a sur ve ishima man mba i gbe u ma ve zough a kwaghfan man icighan jijingi, shin ma ityamegh nagh la nahan. Alaghga ú fatyô u nan iwasen i sha inyar shin ma iwasen igen jighilii ga sha ci u mgbe u ú gbe ica a nan la. Kpa i̱ de hungur we u eren msen sha ci u anmgbianev ou ga. Ú fa er i gbe ve ishima u zenden zende u ú kom Yehova yô, kpa alaghga sha mimi yô gba u a na ve iwasen sha u vea fatyô u eren kwagh la gbem yô. Gbenda u vesen u ú wase yô ka sha mbamsen ou.—Pasalmi 18:2; 20:1, 2; 34:15; 46:1; 121:1-3.

Er Tom sha u Taver Mbagenev

15. Er nan ve i gbe u kwagh a gba se sha mkur u takerada u Mbakolose laa?

¹⁵ Kpa ka msen u eren sha gbashima teren or jighilii  la tseegh i lu gbenda u wasen mbagenev ga, hemban je yô mba ve lu ikyua a vese shi ve doo se ishima tsung kpaa la. Takerada u Mbakolose pase kwagh la wang. Mbafantakerada kpishi kaa ér Paulu yange ne ityesen shi tesen gbenda u á kar sha u eren akaa cii been yô, a mase baan di a baa ishughun tsô. (Mbakolose 4:7-18) Nahan kpa, se vande kaven kera ser vegher u masen kuren u takerada la ngu a kwaghwan u vesen, shi kwagh ngu u henen hen vegher ne hemba nahan.

16, 17. Se ôr kwagh u anmgbianev mba i ter ve ken Mbakolose 4:10, 11 la ser nyi?

¹⁶ Paulu yange nger ér: “Aristareku u i wuhe un a mo imôngo ngu sughun ne man shi Marku anmgbian u Barnaba la kpaa (wen yô, i vande wan ne kwagh sha kwagh na. Aluer una nyôr ken ven yô, rumun nen un). Man shi Yesu kpaa u i yer un er Yusetu. Ken mba ve lu eren tom u tartor u Aôndo a mo imôngo yô, ka ve tseegh ve lu mba ken icôngo ye. Ve surum ishima kpishi je.”—Mbakolose 4:10, 11.

¹⁷ Heela la Paulu ter anmgbianev mba ve kom u a hemba umbur ve yô. A kaa ér ve mba ken Mbayuda mba ken icôngo. Yange Mbayuda mba ken icôngo lu ken Roma kpishi man hen shighe ne mbagen hingir Mbakristu. Kpa, mba Paulu ter ati ve ne lu mba ve na un iwasen yô. Alaghga yange ve timbir u kohol imôngo vea Atôatyev ga, shi ve kohol Paulu sha u pasen Atôatyev kwaghaôndo saan saan keng.—Mbaromanu 11:13; Mbagalatia 1:16; 2:11-14.

18. Paulu yange wuese mbagen mba ve lu a na la nena?

¹⁸ Ungwa kwaghôron u Paulu ne: “Ve surum ishima kpishi je.” (Ka se se nger i yier ye.) A yar tom a ishemberti i ken zwa Grika i̱ í lu kwa môm heen ne tseegh i̱ dugh ken Bibilo yô. Mbageman Bibilo kpishi gema i̱ ér “msurshima.” Nahan kpa, ishemberti igen ngi ken zwa Grika i̱ í yer ér (pa·ra·ka·le’o) yô, mba hembe geman i̱ ér “msurshima.” Paulu yange yar tom a ingin ne mape gen ken washika shon ne, kpa lu ken Mbakolose 4:11 ga.—Mateu 5:4; Aerenakaa 4:36; 9:31; 2 Mbakorinte 1:4; Mbakolose 2:2; 4:8.

19, 20. (a) Inja i kwaghôron u Paulu yange yar tom a mi kar sha iyol i anmgbianev mba ve lu wasen un ken Roma la yô ér nyi? (b) Anmgbianev mbara yange vea wase Paulu sha nyi igbenda?

 ¹⁹ Mba Paulu yange yila sha ati la yange vea er kwagh a hemba di u surun un ishima sha ityumbuzwaagh tseegh la. Ishemberti i ken zwa Grika i̱ í nger ér ‘sur ishima’ ken Mbakolose 4:11 la ashighe agen yange i yar tom a i̱ ken ngeren mbagenev sha kwagh u icigh ki panden mnyoon. I nger ken Bibilo i̱ í yer ér New Life Version la ér: “Nenge iwasen i yange ve wasem ne sha wono!” Bibilo i̱ í yer ér Today’s English Version la i̱ nger ishemberkwaghôron ne ér: “Ve lum a iwasen kpishi je.” Kanyi kwagh alaghga anmgbianev Mbakristu mba ve lu ikyua a Paulu ne yange ve er sha u wasen unu?

²⁰ Paulu yange luun a mbavannya, kpa akaa agen kpishi yange lu á una fatyô u eren iyol na ga yô, inja er u yamen akaa a kuren ugbayol nav a mi nahan—ambaakaa er kwaghyan man ikyondo i cirin sha ci u fam u ndôhôr keghelee la nahan. Una zua a ityakerada i ôron shin una yam akaa a ngeren kwagh a mi nena? (2 Timoteu 4:13) Ú fatyô u gbidyen kwar nengen er yange anmgbianev mbara vea lu wasen Paulu a amba a ugbayol nav mbara, vea lu eren ambaakaa er u za yamen un akaa shin zan un ityom ga zee? Alaghga á sar un u sôron ma tiônnongo shi taver i̱ ishima kpaa. Kpa er yange i wuhe un yô lu u una fatyô u zan ga, nahan alaghga anmgbianev mbara yange ve za sôr atôônanongo sha ci u Paulu, ve za a ilyoho na shi ve hide un a abaver kpaa. Kwagh la yange una sur un ishima kpen kpen!

21, 22. (a) Er nan ve i doo u kwagh a gba se sha mkaanem ma i nger ken Mbakolose 4:11 laa? (b) Ka ken igbenda i nyi se fatyô u yaren tom a ikyav i tesen i mba yange ve lu vea Paulu laa?

²¹ Kwagh u Paulu yange nger sha kwagh u ‘surun ishima’ la na se mkav sha er se fatyô u lun a iwasen hen mbagenev yô. Alaghga vea lu zenden zende u ú kom Yehova sha gbaa u aeren a wang, vea zaan mbamkombo mba Mbakristu, shi vea lu a ci ken tom u kwaghpasen kpaa. Sha nahan yô, ve kuma iwuese yase. Nahan kpa, se fatyô u eren kwagh hemban nahan, sha u lun kwagh u ‘surun ishima’ er mbara kpa lu hen Paulu nahan kpa?

²² Aluer ú fa anmgbian u kwase u nan ker ave sha  1 Mbakorinte 7:37 gban gban sha kwaghfan, kpa hegen nan kera lu a tsombor u lun a nan kôôsôô ga nahan, ú fatyô u wan nan ken akaa agenegh a ne eren hen tsombor, alaghga ú lôhô nan kwaghyan shin ú lôhô nan wer nana̱ dondo ú ne za ma iniongo i ahuraior shin anterev ou ve lu zuan la kpa? Man u lôhôn nan wer nana za mkohol u vesen vea tsombor wou imôngo, shin ma memyol di ye? Ga yô lôhô nan nana̱ kohol we sha shighe u a hembe lun sha inja la, zum u ú lu za yamen kwaghyan yô. A fatyô u ôron kwagh ne nahan sha kasev mba côgholov shin nomso mba côgholov, shin alaghga mba hegen ve kera fetyô u nahan mato ga la kpaa. A fatyô u lun we a inja u ungwan akaa a a yange er ve la, shin ú zua a mfe sha akaa hen a ve, inja er u yamen atam a ikyon a injaa shin yamen akondo a mbayev nahan, akaa a i eren ayange ayange la. (Levitiku 19:32; Anzaakaa 16:31) Kwagh u una due ker yô alaghga ne hingir ikyooso ikyooso. Nahan aluer gba ve u yamen icigh ki man shin ma kwaghgen kpaa, a kera taver ve u pinen we iwasen ga. Anmgbianev mba ve lu̱ vea Paulu ken Roma la yange ve na un ishima surun sha igbenda i injaa, di vough er we kpa ú fatyô u eren nahan. Sha shighe la man hegen kpaa, iveren i í seer zuan a mi yô ka mtaver u i taver ikyor í dooshima la, shi ka se tsua a ishima yase i môm ser se er Yehova tom imôngo sha mimi kpaa.

23. Doo u se cii se wa ityough u eren nyi kwagha?

²³ Hanma wase cii nana fatyô u gbidyen kwar sha akaa a i ter ken kwaghngeren ne la. Ka di akav a tesen tsô, kpa aa fatyô u umbur se akaa a á lu zan hemen jim jim, á se fatyô u hemban ‘surun ishima’ i anmgbianev asev mbanomso man mbakasev yô. Kwagh ne ka u kaan ér se̱ lu a awashima u ior mba tom ve i lu u̱ keren mkpeyol u mbagen la kpee ga. Yange lu awashima u anmgbianev mba i ter ve ken Mbakolose 4:10, 11 la ga. Yange ve lu mba “eren tom u tartor u Aôndo” a na imôngo. Mtaver la yange lu sha kwagh la jighilii. Hen a vese kpa ma i lu nahan vough.

24. Ityôkyaa jighilii í í ne ve se eren msen sha ci u mbagenev shi se keren u taver ve yô kanyi?

²⁴ Se mba teren mbagenev sha ati ken mbamsen asev mba ken iuv mbara shi se mba nôngon sha u taver ve asema sha ci u ityôkyaa ne: Se na jighjigh ser ka ishima i anmgbianev asev mbanomso man mbakasev u ma ve “zende zende u u kom Ter, [sha u] doon Un ken akaa cii” yô. (Mbakolose 1:10) Kwagh la zua sha kwagh ugen u Paulu yange ter zum u lu ngeren kwagh sha kwagh u mbamsen mba Epafera er sha ci u Mbakolose la yô. Yange er msen ér ma ve ‘tile ma ve lu vough, ma ve kera tenger ga sha er vea eren ishima i Aôndo cii’ yô. (Mbakolose 4:12) Se er nan ve se fatyô u eren kwagh ne iyol yase? De se nenge nen.

[Footnotes]

Ú Ver Ikyav Kpa?

• Se er nan ve se hemba seer lun a iwasen ken mbamsen asev mba ken iuv mbara?

• Mbakristu mbagenev yange ve lu mba ‘surun ishima’ i Paulu sha nyi gbenda?

• Se fatyô u ‘surun ishima’ sha ashighe a nyi nahana?

• Ityôkyaa i i ne ve se eren msen sha ci u anmgbianev asev mbanomso man mbakasev shi se keren u taver ve yô kanyi?

[Study Questions]

[Picture on page 10]

Ú fatyô u wan Orkristu ugen ken ijende i tsombor wou ú lu zan la kpa?

[Picture on page 10]

I zua a mi sha ikyev i Green Chimney’s Farm

[Credit Line]