Ú Ngu Eren Sha Iyoltseghan You La Her Kpa?

“Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan, i̱ de kera lu sha ci u ior ga.”—MBAKOLOSE 3:23.

1. Sha mnenge u taregh yô, ishember i “iyoltseghan” la kanyi?

 MBAEREN anumbe ka ve er nan ve ve fa anumbe ve za kighir pe ve kighir laa? Kolo u gbidyen sha mbaanar mba lun ipe man bor u shin angahar man bor u yan ikyo shin ikyese man kolo u i gbidyi sha igyidô i ye ikyo ken ikyevwe la man ayem a gban man bor u í gbidyen sha gbo i we ikyo shin ihula la shin anumbe agenegh cii orhemban la ka nan kôndo nan nyôr sha azenger i lu sha ci u mne u nan ne ishima shamin nan tee ave sha la. Ka i gba u iyolkaren man ishimaveren ia lu hange hange. Kwagh ne kuma vough sha mpase u i ne ishemberti i i yer ér “iyoltseghan” la, man inja na yô ér “u or geman iyol i nan cii nan sha ma kwagh u sha mhen shin ieren, je tôôn ave sha.”

2. Ken Bibilo yô, ikyav i “tsegha” kanyi? Tese ikyav.

² Nahan cii kpa, sha mnenge u Bibilo yô, ikyav i “iyoltseghan” kanyi? Ishember i “tsegha” la i̱ due ken ishember i ken zwa Heberu i pasen ieren, man ikyav na yô ér “pav ver kposo; ver a̱ lu kwagh na; dugh kera.” * Sha ayange a Iserael u tsuaa la, Zegepristi Aron yange a kange atsar sha ityou, lu “icighantsar,” u yange lu anar u lun ipe u yange i er un sha zenaria u mondon seretete, í nger shamin ken zwa Heberu ér, “I tsegha Un sha ci u Ter” la. Kwagh la yange lu u umbur zegepristi la sha u a̱ fa ér gba u una palegh u eren nyityô kwagh i ia hôngor a icighanjiir la cii “gadia mtsegh u mkurem ma shighen u Aôndo [lu] sha a na.”—Ekesodu 29:6; 39:30; Levitiku 21:12.

3. Gba u iyoltseghan ia bende a uma wase nena?

³ Se fatyô u nengen sha kwagh u i nger heen ne ser, iyoltseghan ka kwagh u asenge ga. Í tese ikyav er gba u or a pase iyol i nan a ishima i nan ér nan ngu or u eren Aôndo tom, shi i soo ér nana̱ lu a anza a wang kpaa. Sha nahan yô, se kav er i hii ve apostoli Peteru yange ôr kwagh u ngise Yehova vande ôron nahan la ye, ér: “Lu nen uicighanmbaiorov, gadia Mo M ngu u Icighan je.” (1 Peteru 1:15, 16) Er se lu Mbakristu mba se tsegh ayol a ase yô, se mba a zegetom u i gbe u se er yô, ka u eren sha iyoltseghan yase la her, lun jighjigh zan zan mkur je la. Kpa iyoltseghan i Orkristu wa nyi man nyi kere?—Levitiku 19:2; Mateu 24:13.

4. Se mba za aren sha iaven i tseghan iyol la nena, man a fatyô u karen i̱ sha nyi?

⁴ Zum u se zough a mfe u vough u sha kwagh u Yehova Aôndo man mbaawashima nav shi se kav tom u Yesu Kristu a lu a mi ken mbaawashima mba shon cii se bee yô, se mase tsuan u civir Aôndo a ishima yase cii man a mhen wase cii man a uma wase cii kua a agee a ase cii. (Marku 8:34; 12:30; Yohane 17:3) Kwagh la je kpa a fatyô u tôôn ér ka iceghzwa i or, ka u or tseghan iyol i nan sha ci u Aôndo shín uwegh ga je la. Yange gba kénden se ken ishima gaagh tsô maa se tsegha ayol a ase ga. Yange se sule iyol a msen u eren se gbidye kwar se hen sha mi zulee. Sha nahan yô, yange lu kwagh u hila ga. Se fatyô u lun er or u nan hii u kahan sule sha ikyekye i kahan sule kpa nan tôndo nan undu ér tom la taver nan yum shin shighe u sunda ngu ca hiinii yum shin nan fa ga shin sunda ua va kpaa-o la ga. Time ase sha ikyav i ior mba yange ve ‘kôr ave a ve sha ikyekye i kahan sule’ i̱ tom u Aôndo ken ican tsung la.—Luka 9:62; Mbaromanu 12:1, 2.

 Yange Ve Nyiman Jighjigh Ve u Nan Ga

5. Yeremia yange lu ikyav i tseer tseer i or u civir Aôndo u nan tsegh iyol i nan nena?

⁵ Yange tom u Yeremia u ôron kwaghôron u profeti la shi hemba anyom 40 (647-607 C.S.W.), man lu tom u kiriki ga cii. Yange fa mbamyina nav mbara dedoo. (Yeremia 1:2-6) Yange gba u una lu a ishimataver man ishimawan sha u tagher a ior i Yuda i cighir asema la hanma iyange cii. (Yeremia 18:18; 38:4-6) Nahan cii kpa, yange Yeremia suur sha Yehova Aôndo, u yange taver un agee ve hingir or u tseghan iyol na sha mimi civir Aôndo la.—Yeremia 1:18, 19.

6. Ka ikyav i nyi apostoli Yohane yange ver sha ci wasa?

⁶ Yohane, apostoli u jighjigh u yange lu shir ken iyolbeen na ken icile i Patemo i lun tswam tswam sha ci u “mkaanem ma Aôndo man sha ci u shiada u Yesu” la di ye? (Mpase 1:9) Yange wa ishima shi tile sha iyoltseghan na i Orkristu la her zan zan kuma anyom 60. Yange lu uma zan zan mtim u yange i tim Yerusalem sha ikyev i akumautya a Mbaroma la. Yange i na un ian i civirigh i ngeren Ivangeli man uicighan washika utar, man takerada u Mpase u yange tsenganengen ityav mbi Armagedon la. Yange fe wener Armagedon ngu van shighe u una lu uma la ga yô, maa gba uwer shinii? Yange vôr, uwer gba un shinii? Ei, Yohane yange lu jighjigh zan zan ku na, yange fa dedoo ér, shin e̱r ‘shighe yange mgbôghom’ nahan kpa m-iv u mpase u sha mnenge na la lu u una va iv ken hemen.—Mpase 1:3; Daniel 12:4.

Akav A Tesen Iyoltseghan Ainge

7. Anmgbian ugen yange tese ikyav i iyoltseghan i Mbakristu la nena?

⁷ Ainge ne, Mbakristu udubu udubu var ave sha iyoltseghan ve la her shin er ve lù uma u̱ va nengen Armagedon ga nahan kpaa. Môm ken ambaaior la yô, lu Ernest E. Beavor u ken Ingila la. Yange hingir Orshiada ken inyom i 1939 ken mhii u Ityav mbi Tar cii Mbi sha II la, maa gbihi kpenga u gberen ityakerada man foto u tôôn u yange lu inyaregh kpishi la sha u una tôô tom u shiren hanma shighe yô. Sha er yange kôr mtil sha mimi u Mbakristu la her yum yô, nahan i wuhe un ken purusu anyom ahar. Tsombor na ta ken a na, ken inyom i 1950 la ônov nav utar cii za Makeranta u Bibilo u Watchtower ken Gileadi sha u henen tom mishen la, ken gar u New York. Anmgbian Beavor yange lu a gbashima ken tom u pasen kwagh je yô, ahuraior a na hingir u yilan un ér Armagedon Ernie. Yange tile sha iyoltseghan na la her sha mimi, zan zan kar kpen ken inyom i 1986 la, yange yôô mgbôghom u ityav mbi Aôndo mbi Armagedon la. Yange tôô iyoltseghan na la ér ka iceghzwa i un tsegha vea Aôndo sha anshighe kpeghee tseegh tsô ga! *—1 Mbakorinte 15:58.

8, 9. (a) Ka ikyav i nyi igyumior kpishi i ken Ishpania yange i tese sha shighe u hemen u Franco laa? (b) Ka mbampin mba nyi i doo u á pine?

⁸ Ikyav igen i tesen ishimatseen i been ga la  i due ken tar u Ishpania. Zum u Franco tema tor la (1939-1975), agumaior uderi imôngo a lun Mbashiada tile paleghaa sha mtil u Mbakristu la. Mbagenev ken a ve tsa ken upurusu mba shojav kuma anyom pue shin hemba a hemba nahan je kpaa. Orshiada ugen la, i yilan un ér, Jesús Martín, anyom a yange i wuhe un ken purusu jimin cii kohol lu 22. Yange i gbidye un tsung zum u i wuhe un ken purusu u shoja ken Imbusutarimese i Afrika la. Akaa ne cii yange yina ga, nahan kpa a venda u nyiman jighjigh na u nan.

⁹ Ashighe kpishi agumaior ne yange a fa shighe u a dugh ve ga, shin a̱ lu u̱ a dugh ve sha won ga je kpa ve fa ga, gadia yange i kure ve ijir i na ve ibo atô wue wue. Nahan cii kpa, ve tile sha mimi ve her shi ve lu a ishimatseen sha kwagh u tom ken uikyangen her. Zum u yange mlu u akaa va hii u yôhôr ken inyom i 1973 la yô, i mase pasen kpishi ken Mbashiada mban tuhwan, mbagenev lu anyom 30-kar, maa ve yem ken tom u shiren hanma shighe la jighilii, mbagenev hingir ikpur pania man mbakuran mba ningir sha kpaa. Shighe u ve lu ken purusu la ve er sha iyoltseghan ve la vough, shi kpishi ken a ve za hemen u eren nahan zum u i pase ve i tuhwa la kpaa. * Se ainge di ye? Se mba eren sha iyoltseghan yase er mbajighjigh mban nahan kpa?—Mbaheberu 10:32-34; 13:3.

Mnenge u Vough u Nengen Iyoltseghan Yase La

10. (a) Gba u se nenge iyoltseghan yase nena? (b) Yehova nenge mcivir u se civir un la nena?

¹⁰ Se nenge iyoltseghan i se tsegha sha ci u Aôndo sha u eren un tom la nena? Ka kwagh u hiihii ken uma wase kpa? Sea lu ken nyityô mlu cii, sea lu igyumior shin mbabeenyol shin sea er ivese shin sea lu kwav, sea lu dedoo shin sea lu uange kpaa, se nôngo se eren nen sha iyoltseghan yase la sha er mbamlu asev ve lu la. Mlu u orgen una fatyô u nán nan ian i lun ken tom u shiren hanma shighe sha u eren tom pania shin nan iyol i nan u eren tom shin afishi a branci a Watch Tower Society shin lun ormishen shin lun ortom u ningir sha kpaa. Mbamaren mbagenev di yô, alaghga tom u nengen sha ugbayol mba ken jijingi man mba iyolough mba tsombor ve la una shile sha a ve. Ahwa a ve zough a mi cukuu u eren tom u pasen kwagh hanma uwer la yina, kera gba kwagh sha ishigh ki Yehova, igbe i ahwa kpishi a mbaeren tom hanma shighe ve zough a mi la ga shinii? Ei. Mayange Aôndo pinen kwagh her avese ka hembe kwagh u se fatyô u nan la ga. Apostoli Paulu yange ôr tindi ne nahan ér: “Gadia aluer gbashima una lu yô, á rumun un sha kwagh u or nan lu a mi la, ka sha kwagh u nan lu a mi ga la ga.”—2 Mbakorinte 8:12.

11. Myom wase har ka sha nyi?

¹¹ A lu nan kpa, myom wase har, ka sha nyityô kwagh i se fatyô u eren la ga, kpa á har ka sha mlumun u sha mhôôn u Yehova ken Kristu Yesu, Ter wase. Paulu pase wang nahan ér: “Gadia ior ca ca ve er isholibo nahan kera mba a iengem i Aôndo ga. Nahan mba ne ve ishô iwua sha mrumun u sha mhôôn Na, sha mpaa u a lu  ken Kristu Yesu la.” Nahan cii kpa ityom yase la gema ka ikyav i tesen ken igbar ér se na uityendezwa mba Aôndo mbara jighjigh.—Mbaromanu 3:23, 24; Yakobu 2:17, 18, 24.

12. Hii nan ve i gbe u se tôôn ior se karen sha mbagenev ga?

¹² Ityôkyaa ngi i i gbe u se tôô shighe wase se kar sha mbagenev ken mcivir u se civir Aôndo ne ga shin mne u se ne ior ityakerada i haren sha Bibilo la ga shin ingyegh ki ior mba se henen Bibilo a ve la kpaa ga. (Mbagalatia 6:3, 4) A̱ lu nyi i nyi je se er ken tomshiren u Mbakristu kpaa, se cii gba u se umbur mkaanem ma hiden a iyol ijime ma yange Yesu ôr nahan la, ér: “Kape ne kpaa, zum [u] nea er akaa a ikaa ne cii yô, kaa nen ner: Se mba mbashiren kpa se kuma injar ga, se er kwagh u ma se er keng la tsô.” (Luka 17:10) Ka acin a me je ve se fatyô u kaan ser, “se er hanma kwagh u i gbe u ma se er cii se bee”? Nahan mpin u a lu yô ér, Gba u mlu u tom u se lu eren Aôndo la una doo a kuma nena?—2 Mbakorinte 10:17, 18.

U Nan sha u Hanma Iyange I̱ De Saan Ishe Ga

13. Se nguren eren sha iyoltseghan yase la yô, ka ieren i nyi kwagh a gbe se sha mini?

¹³ Er Paulu we kasev man noov man mbayev man mbamaren kua ikpan kwagh cii been kera yô, a kaa ér: “Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan, i̱ de kera lu sha ci u ior ga, gadia ne fa ka hen Ter man né va zua a injar i sha dyako ye. Ka Ter Kristu ne eren Un tom ye.” (Mbakolose 3:23, 24) Se mba eren tom ka sha u i̱ doo ior a tom u se shire wuee la ga kpa ka kwagh u se eren ken tom u Yehova la. Se mba nôngon u eren Aôndo tom sha u dondon ikyav i Yesu Kristu lu ver la. Yange er tom na u yange ú lu tiônôô la torough torough.—1 Peteru 2:21.

14. Ka icintan i nyi yange Peteru ta sha kwagh u ayange a masejime?

¹⁴ Apostoli Peteru kpa yange lu a mlu u torough torough la ken ishima. Yange ta icin ken washika na u sha uhar la ér, ken ayange a  masejime yô, mbanahantar vea lu—mbavendan mimi man mbanyimanaakaa cii—vea har sha asema a ve tseegh vea lu nyiman m-ande u Kristu la. Nahan kpa Peteru kaa ér: “Ter ngu eren negh negh sha ityendezwa Na la er mbagenev ve nenge er ngu eren negh negh nahan ga, kpa we ishima a ven, mayange sar Un u mbagenev ve̱ tim ga, kpa ior cii ve̱ gema asema. Kpa iyange i Ter ia va er ormbaiv nahan.” Een, iyange i Yehova ia va keng a bunde ga. Sha nahan yô, mtaver u jighjigh u se ne uityendezwa mba Aôndo la á taver shi se fe ser ka u vea bunden ga la i̱ lu kwagh u gban se ishima ayange ayange.—2 Peteru 3:3, 4, 9, 10.

15. Se nenge hanma iyange i ken uma wase nena?

¹⁵ U se eren sha iyoltseghan yase vough yô, gba u se yar tom a hanma iyange sha ci u iwuese i Yehova. Zum u hanma iyange i̱ bee yô, se fatyô u hiden kenger ken ijime nengen ma gbenda u se we uwegh sha u tseghan iti i Aôndo man sha mpase u pasen loho u dedoo u Tartor la kpa? Alaghga shen í lú sha inja yase i dedoo shin iliam i maan a maa shin gbashima u sha dooshima u kwagh u mba hen tsombor wase man azende a ase a gbe se ishima la. Se yar tom a ian i i dugh la sha u karen jighjigh wase u nan la hen mbagenev kpa? Se wase or sha u nana hen sha kwagh u uityendezwa mba Aôndo tsung kpa? De se lu nen a kwagh u dedoo u kôron ken we hanma sev sha gbaa u akaa a ken jijingi la, nahan a lu inja je er se mba kôson inyaregh ken bam u ken jijingi nahan.—Mateu 6:20; 1 Peteru 2:12; 3:15; Yakobu 3:13.

Kenger Kera Wanger Wanger

16. Ka ken nyi igbenda nahan Satan a nôngon u vôron iyoltseghan i se tsegh sha ci u Aôndo la?

¹⁶ Se mba ken shighe u a hemban taver a taver Mbakristu cii yô. Satan man nongo na mba nôngon  ér mkposo u á lu hen atô u kwagh u dedoo man u bo kua kwagh u wang man u a lu wang ga man inja i dedoo man i bo la man kwagh u i lumun a mi man u i lumun a mi ga la a̱ hingir cing. (Mbaromanu 1:24-28; 16:17-19) A nôngo nahan heghem u̱ hôngor asema ase sha u nengen utashan mba televishen kposo kposo a iyolnyoon shio shin nengen akaabo ken kômputa kpaa. Ashe ase a ken jijingi la aa fatyô u hingir cing, shin kera kenger vough ga, nahan se kera fatyô u nengen a ayom a na la ga. Aluer se tuse a mluainja wase u ken jijingi la yô, mkange u se kange ishima ser se eren sha iyoltseghan yase la una kera taver ga shi ave aa se gbe sha “ikyekye i kahan sule” la kpaa aa oghom.—Luka 9:62; Mbafilipi 4:8.

17. Kwaghwan u Paulu la una fatyô u wasen se u kôron ikyaryan yase vea Aôndo saan a mi nena?

¹⁷ Sha nahan yô, mkaanem ma Paulu yange nger hen Mbatesalonika mara ka ma sha shighe vough. Yange nger nahan ér: “Gadia ishima i Aôndo yô, ka i ne, ka mtsegh wen; nyagh nen idya. Hanma or ker a ven nana̱ fa er nana er kwase u nan iyol i nan sha icighanmlu man iko i wan kpaa. I̱ de luun sha ishima i kenden i isharen i bo er atôatyev a a fe Aôndo ga la nahan ze.” (1 Mbatesalonika 4:3-5) Idya i eren na i dugh ior mbagenev ken tiônnongo u Kristu kera—mba ve kenger iyoltseghan i ve tsegh sha ci u Aôndo ashe ashe la. Ve na ian ér ikyaryan ve a Aôndo la i̱ oghom, nahan á kera gba ve kwagh ken uuma vev ga. Nahan cii kpa, Paulu kaa ér: “Gadia Aôndo yila se ka sha ci u hwanger ga kpa ka sha icighanmlu je. Nahan yô, or u nan vende kwagh ne yô, kera ka or nan vende ga, kpa ka Aôndo je u A ne ne Icighan Jijingi Na yô.”—1 Mbatesalonika 4:7, 8.

Ú Kange Ishima Wer Ú Er Nyi?

18. Kanyi i gbe u se kange ishima u erene?

¹⁸ Aluer iyoltseghan i se tsegh sha ci u Yehova Aôndo ne i gba se kwagh yô, kanyi kwagh se kange ishima u erene? Se kange ishima u lun a imoshima i dedoo sha kwagh u anza a ase man tom wase kpaa. Peteru lu wa kwagh ér: “Shi lu nen a imo i wang ken ishima sha er kwagh u i lu lamen sha a ven dang dang la je kpaa, ve̱ va ahenge yô, ka ve mba ve lu teren mlu wen u dedoo u ken Kristu sha dang la.” (1 Peteru 3:16) Alaghga se ya ican sha uityuhwan sha ci u ieren yase i Mbakristu la, kpa kape Kristu kpa í er a na je la sha ci u lu jighjigh shi lu suur sha Aôndo yum yô. Sha nahan yô, Peteru kaa ér: “Er Kristu A ye ican ken iyol yô, ne kpaa, kange nen ishima sha mhen ne, gadia u nan ya ican ken iyol yô, nan de isholibo ve.”—1 Peteru 4:1.

19. Kanyi kwagh se soo ser i̱ ôr sha iyol yasa?

¹⁹ Sha mimi yô, mkange u se kange ishima ser se er sha iyoltseghan yase vough la una kula se se palegh uhôn mba tar u Satan u ú lu uange ken jijingi man sha anza man sha iyol kpaa ne. Kpa ka heela tseegh ga, se lu vangertiôr ser Aôndo lumun a vese, man kwagh ne hemba nyityô kwagh i Satan man nongo na vea fatyô u nan se cii yem zende zende je. Sha nahan yô, mayange de ne i̱ kaan ér se undu dooshima u yange se lu a mi shighe u se fa mimi hiihii la ga. Kpa guda yô, i̱ ôr kwagh wase di er ngise i ôr kwagh u tiônnongo u Tiatire u ken derianyom u hiihii la nahan, ér: “M fa aeren a ou man dooshima wou man jighjigh u nan wou man tom wou man ishima i taver you, man er aren a ou a masetyô la hemba ngeen a a hiihii la” yô. (Mpase 2:4, 18, 19) Een, se sagh nen a sagh sha kwagh u iyoltseghan yase ga, kpa se “luun nen mbatseen asema,” se taver nen asema zan zan mkur—man mkur zurum.—Mbaromanu 12:11; Mpase 3:15, 16.

[Footnotes]

Baver We Kpa?

• Iyoltseghan wa nyi man nyi kere?

• Ka akav a nyi a mbacivir Aôndo mba ngise man mba ainge mba tseghan ayol a ve a kom u se dondoo?

• Se nenge mcivir u se civir Aôndo ne nena?

• Kanyi kwagh se kange ishima u eren sha gbaa u iyol i se tsegh sha ci u Aôndo ne?

[Study Questions]

[Picture on page 19]

Shin er yange i er Yeremia atsan nahan kpaa, á lu jighjigh her

[Picture on page 20]

Ernest Beavor yange ver ikyav i tesen i Orkristu u tseen ishima la sha ci u mbayev nav

[Picture on page 21]

Agumaior a lun Mbashiada uderi uderi ken upurusu mba ken Ishpania tile sha mimi ve her

[Pictures on page 22]

Hanma sev cii de se zuan a kwagh u dedoo u kôron ken uwe sha gbaa u ken jijingi la