Mbá Vérén Mbakuran Man Udiakon Sha Hemen U Aôndo
Mbá Vérén Mbakuran Man Udiakon Sha Hemen U Aôndo
“Kuran nen ayol a en man ikumuile i Icighan Jijingi A ver ne mbakuran sha mi cii kpaa.”—AERENAKAA 20:28.
1, 2. Yesaia 60:22 ngu ivin nena?
YEHOVA tsengakaan tsuaa je ér zegekwagh una va er ken ashighe a mkur ne. I nger sha ikyev i profeti Yesaia ér: “U kiriki una hingir kweior, man u hemban ndahar una hingir ikurior i ageegh; Mo TER, Me er kwagh ne fefa zum u shighe á kuma yô.”—Yesaia 60:22.
2 Mase zan anikyav war ngun u̱ tesen ér kwaghôron u profeti ne ngu ivin ainge je kpa? Een, ngi kpôô kpôô! Ken kwavanyom u 1870 la, tiônnongo u ior mba Yehova hii ken gar u Allegheny, ken Pennsylvania, U.S.A. Hii ken mhii u kpuaa la je atôônanongo udubu upue imôngo due ker gba samber sha tar cii. Mbayôôn Angwe u Tartor ior umiliôn imôngo—ikyurior i vesen—mba kohol imôngo hegen a atôônanongo a hemban 91,000 ken ityar 235 sha tar cii. Kwagh ne tese a ahon a gban shio ér Yehova ngu eren tom na ú kohol mbacivir un sha mimi mbara fese fese cii man mhii u “zegecan” i i lu ikyua ikyua ne ia mase van ye.—Mateu 24:21; Mpase 7:9-14.
3. Batisema u eren “ken iti i Ter man Wan man Icighan Jijingi” la inja na ér nyi?
3 Er ior miliôn imôngo mban mba tseghan iyol ve sha ci u Yehova kera, shi ka lun sha ityesen i Yesu a tese la yô, maa i er ve batisema “ken iti i Ter man Wan man Icighan Jijingi.” (Mateu 28:19) Inja i u eren batisema “ken iti i Ter” la yô ér ior mba ve tsegha ayol mban kav e̱r Yehova a lu Ter ve u sha man er i lu Un A ne Uma yô, shi ve lumun u wan ayol a ve sha ikyev i hementor na kpaa. Batisema u eren ‘ken iti i Wan’ la ngu tesen ér ve lumun ér Yesu Kristu ka Orpaan ve man Orhemen ve kua Tor ve kpaa. Shi ve lumun a tom u icighan jijingi u Aôndo, shin tahav mbu tomov nav la sha u kôôm uuma vev. Kwagh ne tese ér i er ve batisema ‘ken iti i icighan jijingi.’
4. Mba tsegh mbatomov mba Mbakristu nena?
4 Ka a̱ eren mbahenen mbahev batisema kera yô, i tsegha ve ve hingir mbatomov mba Yehova Aôndo. Ka an nan tsegh ve? Sha tindi yô, mkaanem ma i nger ken 2 Mbakorinte 3:5 la kuma sha a ve vough, ér: “Mkom wase [u lun mbatomov la] ka her Aôndo a dugh ye.” Mtsegh u Yehova Aôndo iyol na a tsegha ve la ka ve kwagh u civirigh je ve kera tôm kwagh ugen ga! Vea eren batisema kera cii, man er ve ze hemen u lumun a hemen u jijingi u Aôndo shi yaren tom a Mkaanem nam di tsô yô, vea za hemen u vesen ken jijingi er mbatomov mba “loho u dedoo” yô.—Mateu 24:14; Aerenakaa 9:31.
Ka Aôndo A Veren Ye —Ka Sha Ishangen Ga
5. Mba eren ishangen sha u tsuan mbakuran mba Mbakristu man udiakonoo? Na mpase.
5 Gba u hemen ua lu u ú vighe tsema tsema ú sha ikyev i mbakuran mba ve kom tsembelee kua udiakon mba wasen ve mbara yô, sha u nengen sha mbamgbe mba ken jijingi mba mbatomov mba ve eren tom tsevaa, ingyegh vev ki lu seer a seer la. (Mbafilipi 1:1) Mbá vérén ambaaior a ken jijingi la nena? Igbenda i ve yaren tom a min la ngi kwagh môm a i Mbakristu Mbaaiev la ga. Sha ikyav i tesen yô, ka sha ishangen i eren í veren mbakuran mba Mbakristu ga, inja na yô, ka u zuan a ingyegh ki hemban ken atô u ior mba ve kohol imôngo a tiônnongo je la. Kpaa, ka Aôndo a veren ior ye. Inja i kwagh ne yô ér nyi?
6. (a) Ka nyi i lu hemen u sha ikyev i Aôndo u mimi? (b) Er nan ve mver u veren mbakuran man udiakon la i lu iniezwa i Aôndo?
6 U ngeen kwagh ga yô, hemen u ú lu ú Aôndo mimi mimi yô ka ú i lu Aôndo jighilii a hemen la. Mbashiada mba Yehova ka ve lumun a ishima ve u lun sha ikyev i hemen na ne shi ve lu ken ijoughave sha u eren icighan ishima na la. (Pasalmi 143:10; Mateu 6:9, 10) Mver u veren mbakuran mba Mbakristu shin mbatamen man udiakon la ka sha iniezwa i Aôndo, sha ci u gbenda u i karen sha mi sha u dughun ambaaior a vian la sha iti shi tseghan ve la ka i lu u zuan sha mserakaa u Aôndo er i nger ken Icighanruamabera nahan. Man er Yehova a lu “ityough sha akaa cii” yô, ngu a ian i tesen e̱r nongo na u i nengen a mi ne ua eren tom yô.—1 Kroniku 29:11; Pasalmi 97:9.
7. Mbá hemen Mbashiada mba Yehova nena?
7 Mbashiada mba Yehova mba veren ma gomoti u ken jijingi ayol ave u̱ vea lu sha ikyev na e̱r ukwaghaôndo kpishi ken Mbakristu Mbaaiev ve eren nahan la ga. Mbakristu mba lun a mimi iyol mban ka ve nôngo u varen a atindi a Yehova gbang gbang. Ma tiônnongo shin hemen ugen shin gomoti u iyough adua i mbapereshibi i̱ veren mbakuran mba ken atô ve sha tom ga. Aluer aeren a tar ka aa keren u nzughul a mbamver mbara yô, ior mba Yehova ve lumun ga kuaa. Ka ve tile jigh jigh, ve dondo mnenge u mbaapostoli kpa yange ve lu a mi ken derianyom u hiihii shighe u̱ ve kaa ér: “Ka u sé hemba ungwan imo i Aôndo keng a imo i ior” la. (Aerenakaa 5:29) Sha nahan yô, Mbashiada na ayol a ve sha ikyev i Aôndo ken akaa cii. (Mbaheberu 12:9; Yakobu 4:7) U dondon atindi a hemen u Aôndo la ve a icighan mlumun.
8. Atindi a hemen u ishangenegh kaha a á hemen u Aôndo la nena?
8 Er se lu mbacivir Yehova, Ihyemban Aôndo u Hemen la yô, doo u se wa ikyo u fan mbamkposo mba ve lu hen atô u atindi a ishangenegh man á sha hemen u Aôndo la. Gbenda u hemen u ishangenegh yô ka i gba u hanma vegher kpa una zua a ci vough, man ashighe kpishi ior ka ve er kyampen sha u zuan a tor u ve soo la shi or u nan hembe zuan a ishangen i ngeen la cii nan ya ishangen. Mba dondon imba gbenda la nahan ken ior mba Aôndo a tsough la ga. Mtsough ve la dugh ka lu hen ior ga; shin ka lu sha ikyev i ma mzough u i veren sha atindi a taregh kpaa ga. Er Paulu yange ngur ôron kwagh u ikyav i i tese ér lu mver u Yesu vea Yehova ver un ér una lu “apostoli u atôatyev” la a Mbagalatia yô, a kaa ér ka ‘or nan ver un ga, kpa ka Yesu Kristu A ver un ye, man shi Aôndo Ter u A nder un shin ku la.’—Mbaromanu 11:13; Mbagalatia 1:1.
Mver u sha Icighan Jijingi
9. Aerenakaa 20:28 kaa ér nyi sha kwagh u mver u mbakuran mba Mbakristuu?
9 Paulu umbur mbakuran mba ve lu ken Efese mbara ér Aôndo ver ve sha ikyev i icighan jijingi. A kaa ér: “Kuran nen ayol a en man ikumuile i Icighan Jijingi A ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol [i Wan] Na la.” (Aerenakaa 20:28, ka se se nger i yier ye.) Gba u icighan jijingi una za hemen u nengen sha mbakuran mba Mbakristu mban er ve lu eren ityom ve sha inja i mbakuran ilev i Aôndo la. Aluer or u̱ nan lu sha tom u i ver nan la nan kera kuma sha icighan tindi la ga yô, shighe a kuman yô, icighan jijingi una er tom sha u dughun nan sha tom la kera.
10. Er nan ve yange icighan jijingi va lu a tom u hange hange u eren ken mtsegh u tseghan ior ken nongo u Aôndo?
10 Er nena ve icighan jijingi a eren imba tom u hange hange la nahana? Kwagh u hiihii yô, ka icighan jijingi yange mgbegha ior u ngeren atindiakaa a i ver sha ci u or á kuma sha mi ve nana lu orkuran u ken jijingi la ye. Ken uwashika mba Paulu nger hen Timoteu man Titu la, a nger atindiakaa a mbakuran man udiakon vea kuma sha mi yô. Kohol cii yô, a nger atindiakaa a or á kuma sha á la kposo kposo kuma 16. Ikyav i tesen yô, yange lu u mbakuran vea lu a acôghol iyol ga keng shi vea lu mba kundun ishima, man mba lun tsev tsev, man mba eren kwagh sha inja man mba eren a mbavannya dedoo, man mba fan ityesen, shi vea lu mbayaav mba lun ikyav i dedoo kpaa. Lu u vea lu mba ve me msôrom akuma akuma yô, vea lu mba inyaregh ki doo ve ishima tsung kpaa ga man mba lun a iyol kôron tsaha kpaa. Shi kape yange i ver atindiakaa a tseng ne sha ci u mba ve lu keren u lun udiakon la kpaa je la.—1 Timoteu 3:1-10, 12, 13; Titu 1:5-9.
11. Ka ikyaren i nyi nahan i gbe u saa ior mba ve lu keren u lun a ityom i tiônnongo sha ikyev la vea kuma sha mini?
11 U hiden nengen sha igbenda i mkom ingin ne tese ér mba ve hemen ken mcivir u Yehova ne saa vea lu a ikyav i̱ aeren a Orkristu keng. Ior mba ve lu keren u lun a ityom i ken tiônnongo sha ikyev la cii saa vea tese ikyav ér icighan jijingi ngu yaren tom ken a ve. (2 Timoteu 1:14) Saa ikyav ia lu i̱ tesen ér jijingi u Aôndo ngu umen atam a “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha” ken ior mban. (Mbagalatia 5:22, 23) Atam ne aa fatyô u duen ken igbar sha aeren a ve eren a mbananjighjigh a ve imôngo man a ve eren a mbagenev la kpaa. Kpa, alaghga mbagenev vea hemba tesen m-úm u umen atam a ken jijingi ne, shi mbagen yô alaghga vea lu a igbenda i ve kom u lun mbakuran je i hembe cii yô. Ken mlu u uma u mba ve lu a ishimaverenkeghen ér ma í ver ve mbakuran shin udiakon la jimin cii, gba u vea tese ér ve mba ior mba ken jijingi, mba ve kom sha atindiakaa a Mkaanem ma Aôndo cii yô.
12. Ka uno nahan a fatyô u kaan ér ka icighan jijingi a ver ve?
12 Shighe u Paulu kaa a mbagenev ér ve̱ lu mbakaven un yô, yange fatyô u kaan nahan a vangertiôr je gadia un lu kaven Yesu Kristu u ‘A ver se ikyav i se dondo Un ijime’ kpiligh kpiligh la. (1 Peteru 2:21; 1 Mbakorinte 11:1) Nahan mba ve kom sha atindiakaa a Ruamabera a tese sha shighe u i lu veren ve ér ve̱ lu mbakuran shin udiakon la, a fatyô u kaan ér ka sha icighan jijingi je i ver ve ye.
13. Icighan jijingi wasen mba ve tem sha u tsuan ior mba vea er tiônnongo tom la nena?
13 Gbenda ugen ngu u tesen er icighan jijingi a eren tom sha mtsough man mver u veren mbakuran cii yô. Yesu yange kaa ér ‘Ter wase u a lu Sha la ne mba ve sen Un la Icighan Jijingi.’ (Luka 11:13) Nahan shighe u mbatamen mba ken tiônnongo ve tem u̱ tsuan ior mba nan ve ityom i ken tiônnongo yô, ka ve er msen sha ci u jijingi u Aôndo a̱ hemen ve yô. Ka ve har mtsough ve sha kwagh u a lu ken Mkaanem ma Aôndo a ne i nger la, shi icighan jijingi ka a wase ve u kaven shin or u í lu nôngon sha u veren nan sha ian tom la nana̱ kuma sha atindiakaa a Ruamabera a tese la vough yô. Ka u mluashe man mfetakerada shin mfe u marami una dan ior mba ve tem u tsuan ior la kwagh ga. Kwagh u ve hembe veren ishima sha mi jighilii yô, ka u fan shin or la nana̱ lu a mlu u ken jijingi, shi nana̱ lu or u a za ior mba ken tiônnongo iyol u za keren kwaghwan u ken jijingi hen a nan ga yô.
14. Ka nyi se hen ken Aerenakaa 6:1-3?
14 Er mbamzough mba mbatamen ka ve kohol vea mbatamen mba ningir sha sha u tsuan anmgbianev sha u ve̱ er tom u mbatamen man ú udiakon nahan kpa, u veren a ver jighilii yô mba dondon ikyav i yange i ver ken derianyom u hiihii la. Sha shighe ugen la, kwagh va gba sha ior mba ve kom ken jijingi yô, sha er vea nenge sha ityom i i lu i injaa yô. Yange mbahemenev mba shin tine wa kwaghwan u i nger heen nahan ne, ér: “Ker nen ior utaankaruhar ken a ven, mba i wuese ve, man ve iv a Jijingi man mfe kpaa yô, sha u se̱ ver ve sha tom ne” yô. (Aerenakaa 6:1-3) Er yange lu ior mba ve lù her mbara ve tsua ior mban nahan kpa, lu ior mba ve lu a tom la sha ikyev ken Yerusalem la ve ver ve ye. Ainge kpaa ka imba gbenda ne í lu dondon ye.
15. Mbahemenev mba Shin Tine mba we uwegh sha kwagh u mver u veren ior sha ityom la nena?
15 Mbahemenev mba Shin Tine mba Mbashiada mba Yehova mbá vérén ior Mba Nengen sha Branci ayol a ve jighilii. Shighe u ka vea nôngon u tsuan or u nana tôô imba tom i yuhwan ngin ne yô, Mbahemenev mba Shin Tine ka ve lu a mkaanem ma Yesu ken ishima ma a kaa nahan la, ér: “Hanma or u i ne nan kpishi, á ker di her a nan kpishi man shi u i ver nan akaa kpishi sha ikev, ka her a nan á hemba keren kwagh ye.” (Luka 12:48) U seer sha mver u veren Mba Nengen sha Branci la yô, Mbahemenev mba Shin Tine ka ve ver mbatamen mba shin Betel man mbakuran mba ningir sha mbara. Nahan kpa, ka ve tindi anmgbianev mba ve kom vough yô sha u eren tom u veren ior sha ityom igen la sha ci ve. Kwagh ne kpaa ngu a ishuen ken Ruamabera.
‘Na Ior Ityom Er Lu M Kaa U Nahan’
16. Hii nan ve Paulu yange undu Titu ken Krete, man kwagh ne tese nyi sha kwagh u ityom i nan ior ken hemen u Aôndo ainge?
16 Paulu yange kaa a or u eren tom a na imôngo Titu ér: “Kwagh u m undu u ken Krete yô, ka sha u sôr akaa a kwagh a shi sha mi yô, shi ver mbatamen sha agar agar er lu m kaa u nahan.” (Titu 1:5) Paulu maa na Titu akaa a una nenge a mi ken or ve una fa ér nan kuma sha tom la yô. Ainge ne kpaa, Mbahemenev mba Shin Tine ver anmgbianev mba kuman sha ubranci sha u ve̱ lu ashe ve sha u veren mbatamen man udiakon. Mba ve eren tom sha ci u Mbahemenev mba Shin Tine mbara vea kav atindiakaa a ken Ruamabera a a lu sha u nan amba a ityom la wanger wanger shi vea dondo á kpaa. Sha nahan yô, ka sha gbendatesen u Mbahemenev mba Shin Tine i ne ior mba ve kom mbara tom u eren ken atôônanongo a Mbashiada mba Yehova sha tar cii ityom i eren ye.
17. Afishi a nengen sha gbaatom ka a nenge sha kwagh u mba i tsough ve u lun mbakuran man udiakon la nena?
17 Shighe u ka a̱ tindin a ati a mba i tsough sha u veren ve mbakuran man udiakon shin afishi a nengen sha gbaatom u Watch Tower Society kera cii yô, ior mba ve tse ken tom ne ka ve har sha jijingi u Aôndo sha u a̱ tese ve u nan ityom ne. Ior mban ka ve kav ér ka u vea va pase kwagh u ve er la, shi ka ve kav kpaa ér ka u vea gba veren or ave sha ityou gagh ga, ga yô vea va nyôr nongo a ma or sha isholibo i nan la.—1 Timoteu 5:22.
18, 19. (a) Ka i tindi a ityom igen i í ne la nena? (b) Gbenda u tsuan or shi veren nan sha tom la mba eren ú nena?
18 Ityom igen yô alaghga á tindi a mi ken washika u lun a ikyav i utaha sha mi. A fatyô u yaren tom a imba washika la sha u veren anmgbianev imôngo ken tiônnongo sha tom.
19 Ityom i nan sha atindi a Aôndo la ngi ve hen Yehova sha ikyev i Wan na man gbenda u Aôndo a lu yaren tom a mi ken igbar shin tar la, ka “wanakiriki u jighjigh man u fan kwagh” je la, man Mbahemenev vev mba Shin Tine mbara kpaa. (Mateu 24:45-47) Igbenda i amba a mtsough u tsuan or sha u nán nan tom ne cii ka i lu sha ikyev i gbendatesen shin hemen u icighan jijingi. Kwagh ne ngu nahan sha ci u atindiakaa a kuman shami ne cii i nger á ken Mkaanem ma Aôndo, ma i lu icighan jijingi a mgbegha ior ve nger la, shi or u i ver nan la ka nan tese ikyav i umen atam a ken jijingi kpaa. Nahan, ka u nengen ityom i nán ne ér ka sha icighan jijingi í ne í ye. Di er yange i ver mbakuran man udiakon sha mnenge u Aôndo ken derianyom u hiihii la nahan, kape ainge kpa i lu vough je la.
U Lun a Iwuese sha ci u Hemen u Yehova
20. Ka sha ci u nyi se dondo mnenge u Davidi u i nger ken Pasalmi 133:1 laa?
20 Ken shighe u mlu u ken jijingi u yôugh yôugh man mvese u a lu lun ken tom u kwaghpasen u Tartor ne nahan, se mba a iwuese sha er í hii lun tom u Yehova jighilii u veren mbakuran man udiakon nahan. Mserakaa u a har sha Ruamabera ne wasen se Mbashiada mba Yehova u kuran atindi a wang a Aôndo a perapera la. Bee kera yô, jijingi u Mbakristu man iniôngon i ior mban ve nôngon a ishima i môm la wase kpishi sha u nan se bem u kpilighyol man mzough sha inja i mbacivir Yehova. Ishima mgbegha se u kaan ikyaa i orpasalmi David nahan ér: “Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa.”—Pasalmi 133:1.
21. Yesaia 60:17 ngu ivin ainge nena?
21 Se mba a iwuese kpishi sha ci u gbendatesen u Yehova á ne sha ikyev i Mkaanem nam kua icighan jijingi la! Man u hemban lun sha ikyav jim je yô, ka mkaanem ma i nger ken Yesaia 60:17 la, ér: “Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen. Me ver bem a̱ lu orkurantar wou man perapera a̱ lu ityoor wou” la. Er í lu zan hemen u yaren tom a ieren i sha hemen u Aôndo ne kure kure ken Mbashiada mba Yehova yô, se zua a averen angan ne kpishi ken nongo u Aôndo ú shin tar ne.
22. Ka nyi kwagh se lu a iwuese sha mi man i lu voughlo, man ka nyi i doo u se kange ishima u erene?
22 Se mba a iwuese tsung sha ci u mserakaa mba sha hemen u Aôndo mba ve lu ken a vese ne. Shi se wuese tom u ú taver kpa ú lu ú kuman, ú mbakuran man udiakon mba i ver ve sha atindiakaa a Aôndo ve lu eren ne. Se wuese Ter wase u sha u doon se ishima la ishima i môm, u á ne se yôugh yôugh u ken jijingi shi a ne se iveren na ngôgh la. (Anzaakaa 10:22) Nahan yô, de se kange nen ishima sha u dondon nongoior ú Yehova kpiligh kpiligh. Kohol cii yô, de se za nen hemen u eren tom imôngo kwagh môm sha u nan zege icighan iti u Yehova la icivir man iwuese, kua iengem kpaa.
Ú Na Mlumun Wer Nyi?
• Er nan ve se kaa sér mver u veren mbakuran man udiakon la ka kwagh u hemen u Aôndo, ka u̱ ishangenegh ga?
• Icighan jijingi ka a ver Mbakristu mba vian la sha tom nena?
• Ka tom u nyi Mbahemenev mba Shin Tine ve lu a mi sha mver u veren mbakuran man udiakono?
• Sha gbaa u veren or sha tom ken hemen u Aôndo yô, ka sha ci u nyi i doo u se lu a iwuese hen Yehova?
[Study Questions]
[Pictures on page 6]
Mbatamen man udiakon mba a ian i civirigh i eren tom sha mver u sha hemen u Aôndo la