Ver Ishima Sha Jijingi Nahan Lu Uma!
Ver Ishima Sha Jijingi Nahan Lu Uma!
“Ishimaveren i jijingi ka uma.”—MBAROMANU 8:6.
1, 2. Bibilo pav “iyol” ver kposo a “jijingi” nena?
U LUN a aeren a wang sha ishigh ki Aôndo ken botar u asaren a iyolough a ze ve zwa yum ne ka kwagh u ican kpishi. Nahan kpa, Ruamabera pase mkposo u “iyol” man “jijingi,” shi a pase kwagh u una tser or u nan ne iyol i nan sha ikyev i iyol i í lu ken isholibo la wang, shi a pase iveren man mbamtsera mba or a lumun mkôôm u icighan jijingi u Aôndo ve nana zua a mi la kpa wang.
2 U tesen ikyav yô Yesu Kristu yange kaa ér: “Ka Jijingi A ne uma ye; iyol yô, ngi a inja sha ma kwagh ga. Mkaanem ma M er ne, ka jijingi man ka uma kpaa.” (Yohane 6:63) Apostoli Paulu yange nger kwagh tindi a mi hen Mbakristu mba ken Galatia la nahan ér: “Asaren a iyolough nga hendan a Jijingi, asaren a Jijingi di kpaa nga hendan a iyol, ve yô, mba hendan ayol a ve, nahan ne kera fatyô u eren akaa a i sar ne la ga.” (Mbagalatia 5:17) Shi Paulu kaa ér: “Or u nana lôô ken iyol i nan yô, ka di ken iyol i nan nana sunda kwagh u hôôn ye, kpa u nana lôô ken Jijingi yô, shi ka di sha Jijingi nana sunda uma u tsôron ye.”—Mbagalatia 6:8.
3. U̱ se̱ osough sha ikyev i asaren man mbamhen mbabov kera yô, kanyi i gbe u se ere?
3 Icighan jijingi u Yehova—ka tahav mbu tomov nagh je la—una fatyô u dughun “asaren a iyolough” a hôngorough a a tem tor ken iyol yase i isholibo la kera. (1 Peteru 2:11) U se̱ osough ken ikyangenev mbi mbamhen mbabov kera yô, ka hange hange u se zua a iwasen i jijingi u Aôndo, sha ci u Paulu lu nger ér: “Ishimaveren i iyolough yô ka ku, kpa ishimaveren i jijingi ka uma man bem.” (Mbaromanu 8:6) U lun a ishimaveren i jijingi la inja na yô ér nyi?
“Ishimaveren i Jijingi”
4. Inja i “ishimaveren i jijingi” yô ér nyi?
4 Shighe u Paulu nger kwagh u “ishimaveren i jijingi” la, a yar tom a ishemberti i ken zwa Grika i i tese ikyav i “gbenda u henen sha kwagh shin u haren ishima sha kwagh, . . . ishimaveren shin isharen shin iniôngon” la. Ishemberti i tesen ieren i̱ i̱ ze nahan la inja i i̱ yô ér “u henen sha kwagh, u geman ishima veren sha ma vegher kwagh.” Nahan ishimaveren i jijingi la inja na yô ka u tahav mbu tomov mbu Yehova kôôm or shin dumbur ken uma u nan shin hemen nan. Kwagh la tese ikyav ér se de a ishima yase ser mhen wase man ishimaveren yase man asaren ase cii a̱ hingir sha ikyev i icighan jijingi u Aôndo jighilii.
5. Gba u se wa iyol yase sha ikyev i icighan jijingi a za kighir nan je?
5 Paulu yange kume acin sha er i gbe u se wa ayol ase sha ikyev i icighan jijingi se za kighir la zum u lu ôron kwagh u hingir ‘sha ikyev i jijingi’ la. (Mbaromanu 7:6) I yima Mbakristu sha m-himbir u yange isholibo himbir ve la kera sha ikyev i jighjigh u ve ne naagh ku ipaan ku Yesu la, nahan ve “kpe” sha mlu u tse u yange ve lu ikpan la. (Mbaromanu 6:2, 11) Mba ve kpe sha injakwagh ken imba gbenda ingin la mba uma her sha iyol, man hegen yô mba a ian i dondon Kristu hingir “ikpan i perapera.”—Mbaromanu 6:18-20.
Mgem u Kpilighyol
6. Mba ve hingir “ikpan i perapera” la mba zough a nyi mgeme?
6 Sha mimi yô u kera lun “ikpan i isholibo” ga kpa geman civir Aôndo hingir “ikpan i perapera” la ka mgem u kpilighyol kpishi. Paulu yange nger kwagh u mbagenev mba yange ve gema sha imba gbenda ne la nahan ér: “I ôô ne, i tsegha ne, i na ne ishô ken iti i Ter Yesu Kristu man sha Jijingi u Aôndo wase.”—Mbaromanu 6:17, 18; 1 Mbakorinte 6:11.
7. Er nan i lu hange hange u lun a mnenge u Yehova a nengen akaa laa?
7 U̱ se̱ zua a imba mgem u kpilighyol ne yô, saa se vande henen fan mnenge u Yehova á nengen akaa la. Ken uderimbaanyomov mba karen tsuaa tsuaa la, orpasalmi Davidi zamber a Aôndo tsung nahan ér: “TERE, nam, m̱ fa igbenda You . . . Hemen mo ken mimi Wou, tesem.” (Pasalmi 25:4, 5) Yange Yehova ungwa zamber u Davidi la, man kape nyian kpa aluer mbacivir un e̱r imba msen la yô, Una ungwa je la. Er igbenda i Aôndo man mimi na a lu icighan yô, u timen sha ve la una wase se aluer i mee se ér se̱ dondo asaren a iyolough a hôngorough yô.
Tom u Injaa Ú Mkaanem ma Aôndo Ma Eren La
8. Er nan ve i lu hange hange u se henen Bibilo?
8 Í nger Bibilo, i i̱ lu Mkaanem ma Aôndo la, sha jijingi na. Sha nahan yô gbenda u injaa ugen u den ser jijingi la a̱ yar tom sha a vese yô, ka sha u ôron shi henen Bibilo—aluer se fatyô yô i̱ luun hanma sev. (1 Mbakorinte 2:10, 11; Mbaefese 5:18) U ivin mhen wase man ishima yase a atesen a mimi a Bibilo man akaawan a i̱ la una wase se u tilen dông hendan a num u ua va sha mlu wase u ken jijingi la. Een, shighe u ameen a ve u eren idya yô, jijingi u Aôndo una hide a umbur se akaa a i nger ken Ruamabera la, kua akaawan a nan mkôôm a aa wa mtil u se til dông ser se er ishima i Aôndo la inya tine yô. (Pasalmi 119:1, 2, 99; Yohane 14:26) Sha nahan yô, a kera bume se u dondon gbenda u bo ga.—2 Mbakorinte 11:3.
9. U henen Bibilo la taver ishimaveren yase i se ver ser se kura mlu wase vea Yehova la nena?
9 Ka sea nguren timen ken Ruamabera sha gbashima zulee sha iwasen i ityakerada i i har sha Bibilo yô, jijingi u Aôndo a bende a mhen wase man ishima yase, nahan ikyo i se we atindiakaa a Yehova la i̱ hemba zan shimi cii. Hen shighe la, mlu wase vea Aôndo ka a lu kwagh u hemban cii ken uma wase. Shighe u imeen i ve yô, se mba kera henen sha er a kpe se iyol u eren kwagh u a lu u bo la ga. Kpa, kwagh u ka a hemba gban se ishima yô, ka i lu u ma se lu perapera sha ishigh ki Yehova la. Iwuese i se lu a mi taveraa sha mlu wase vea na la ka i núm se u nôngon ityav a nyityo mhen u una nzughul shin una vihi mlu la cii.
“Atindiakaa a Ou, Doom Ishima Zee!”
10. Er nan i lu hange hange u dondon tindi u Yehova sha u lun a ishimaveren i jijingi?
10 Aluer ka u ishimaveren yase ia lu sha jijingi yô, u lun a mfe u Mkaanem ma Aôndo la tseegh kuma ga. Tor Solomon yange fa atindiakaa a Yehova tsema tsema, kpa kera dondo á ken ayange a masejime a uma na la ga. (1 Utor 4:29, 30; 11:1-6) Aluer ishima yase har sha akaa a ken jijingi yô, se nenge a mluainja u fan kwagh u Bibilo i̱ kaa la tseegh ga, kpa shi se nenge er i doo u se dondo tindi u Aôndo a ishima yase cii yô. Inja i kwagh ne yô ka u timen sha atindiakaa a Yehova vie vie shi nôngon tsung sha u se dondo á yô. Ka imba ieren i orpasalmi yange lu a mi je la. Yange wa icam nahan ér: “Atindiakaa a Ou, doom ishima zee! Kam kwagh u shin henen sha mi didi.” (Pasalmi 119:97) Shighe u i gbe se ishima sha mimi u dondon tindi u Aôndo yô, kwagh la ka a mgbegha se u eren aeren a civir Aôndo. (Mbaefese 5:1, 2) U gban haan iyol inya tsô den ser kwaghbo a̱ udugh se yô, se gema se ume ityamegh ki jijingi, shi isharen yase i eren ishima i Yehova la ia goom a vese sha “aeren a iyolough” kera.—Mbagalatia 5:16, 19-23; Pasalmi 15:1, 2.
11. Ú pase er tindi u Yehova a we u tsweren ijimba i eren la a lu sha ci u kuran se la nena?
11 Se er nan ve se lu a ikyo i wan man dooshima sha atindiakaa a Yehova tsung nu? Gbenda môm u eren kwagh ne yô ka u timen sha inja i atindiakaa shon. Time ase sha tindi u Aôndo a we ér i̱ yaven a kwase shin nomsoor ken ivese tseegh, shi a tswer ijimba man idya la. (Mbaheberu 13:4) U dondon tindi ne yangen se ma kwagh u a lu u dedoo yôô? Ter u sha u dooshima una wa tindi u una yange se u eren kwagh u a lu a inja yôô? Mayange ga cii! Nenge ase kwagh u a lu zan hemen ken uuma mba ior mba ve lu dondon atindi a Yehova a we sha kwagh u aeren ga la. Iyav mbu wan sha ishima ve ga la ashighe kpishi ka mbu na ve dugh iyav shin ve er ivese kôgh shi msaanyol kpa a lu ken ivese shon ga. Ka i gba u ior kpishi vea yese wan a nom shin kwase shio. Heela tseegh ga, mba ve eren ijimba yô, mba tsenen ayol a ve sha iangev mbi tsaren sha yavaor. (1 Mbakorinte 6:18) Shi aluer or u civir Yehova nan er ijimba yô, mzeyol u ka nan lu a mi ken ishima la ka a vese kpishi. U nôngon ér nana kighir ibo i imoshima i nan i ne nan la una fatyô u yangen nan mnyam shi nán nan mnyoon u ken ishima kpaa. (Pasalmi 32:3, 4; 51:3) Nahan er Yehova a we tindi u tsweren ijimba i eren man í lu sha ci u kuran se la nahan shi ka kwagh u henen a henee? Een, sha mimi yô u lun wang sha aeren la ve a mtsera kpishi!
Er Msen Yehova A̱ Wase Ú
12, 13. Er nan i lu a inja u eren msen shighe u asaren a isholibo a te sha avese yôô?
12 Sha kpôô yô u or lun a ishimaveren i jijingi yô gba u nana eren msen tsung. Ka a inja u sônon ser jijingi u Aôndo a̱ wase se, gadia Yesu yange kaa ér: “Aluer ne . . . je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:13) Se fatyô u pasen ken msen er se har sha jijingi sha u a̱ wase se ken isheer yase yô. (Mbaromanu 8:26, 27) Aluer se kav ser asaren shin aeren a isholibo nga benden a vese, shin aluer or u civir a vese imôngo u se doo nan ishima nan pase se ér kwagh ngu nahan yô, a lu ieren i sha mkav u teren mzeyol la jighilii ken mbamsen asev shi sônon ser Aôndo a̱ wase se se hemba isharen shon.
13 Yehova una fatyô u wasen se sha er se ver ishima sha akaa a á lu a perapera man a a lu a wang, man a a hembe lun a inja man a a kom iwuese yô. Shi u zamber un taveraa ser “bem u Aôndo” ma a kor asema ase man mbamhen asev kpaa la ka kwagh u vough kpekpe! (Mbafilipi 4:6-8) Nahan de se sôn nen Yehova a̱ na se iwasen sha er se “dondo perapera ityô kua u civir Aôndo man jighjigh u nan man dooshima man ishima i wan man ishima i legh legh kpaa” yô. (1 Timoteu 6:11-14) Sha iwasen i Ter wase u sha yô, ishimanyian man ameen aa kera vese je a gande ave ga. Kpa, uuma asev vea gema a zua a mkunduyol u Aôndo a ne la.
De Vihin Jijingi Ishima Ga
14. Er nan ve jijingi u Aôndo a lu tahav mbu wang na?
14 Mba civir Yehova mba ve vie tsung yô mba dondon kwagh u Paulu yange wa ér: “De pirin nen Jijingi ga” la. (1 Mbatesalonika 5:19) Er jijingi u Aôndo a lu “Jijingi u mtsegh” yô, ngu wang ngu a acôghol iyol ga, shi ngu icighan kpaa. (Mbaromanu 1:4) Nahan jijingi la ka una nguren yaren tom sha avese yô, a lu icighan utaha, shin tahav mbu lun wang. Ka a wase se u lun sha gbenda u wang u uma u i eren ishima i Aôndo sha ú la. (1 Peteru 1:2) Nyityo ieren i i hôngor cii yô ka u huren jijingi kera je la, man u eren nahan la una fatyô u van a aahe. Sha nena yô?
15, 16. (a) Se er nyi ve a lu u vihin jijingi u Aôndo ishima? (b) Se palegh u vihin jijingi u Yehova ishima nena?
15 Paulu yange nger kwagh nahan ér: “De vihin nen Icighan Jijingi u Aôndo ishima ga u i ver ne ikav sha a Na sha ci u iyange i mpaa la.” (Mbaefese 4:30) Ruamabera pase ér hen Mbakristu mba jighjigh mba i shigh ve mkurem mbara yô, jijingi u Yehova ka ikyav, shin ‘ibumun i kwagh u a lu van la.’ Ka uma u tsôron u sha je la. (2 Mbakorinte 1:22; 1 Mbakorinte 15:50-57; Mpase 2:10) Jijingi u Aôndo una fatyô u hemen mba i shigh ve mkurem la kua akar a ve a á lu a ishimaverenkeghen i uma u perapera shin tar la, shi una fatyô u wasen ve u palegh ityom i isholibo kpaa.
16 Apostoli la yange ta icin sha kwagh u lun a ishima i eren aie man i iin man i eren hwanger, kua akaa agenegh kpaa la. Aluer se haa iyol inya se mba kuan yemen u za eren ambaakaa angara yô, se lu eren kwagh u a lu kposo a kwaghwan u jijingi u Aôndo a ne i nger ken Mkaanem nam la. (Mbaefese 4:17-29; 5:1-5) Aluer se er nahan yô, ka keng se lu panden vihin jijingi u Aôndo ishima, man sha mimi yô ka kwagh u se soo u palegh je la. Kwagh ugen yô, aluer mô wase nan hii u gbihin kwagh u ken Mkaanem ma Yehova yô, alaghga se hii u lun a aeren shin anza a aa na se se er isholibo sha apera, maa Aôndo una kera saan a vese ga kuaa. (Mbaheberu 6:4-6) Shin er se lu eren isholibo hegen ave ave ga nahan kpa, alaghga se wa ityough se mba yemen u za eren i̱. Aluer se de u zenden sha er jijingi a tese la gbem yô, se lu vihin un ishima. Shi se lu hendan a Yehova shi vihin un ishima kpaa, un u a lu imbor i icighan jijingi la. Er se lu mba Aôndo a doo se ishima yô, mayange se soo u eren nahan ga. Kpa, se gema se sôn Yehova a̱ wase se sha er se vihi jijingi na ishima ga, kpa se fatyô u van a icivir sha icighan iti na sha u zan hemen veren ishima sha jijingi yô.
Za Hemen u Veren Ishima sha Jijingi
17. Ka akaa agen a ken jijingi a nyi nahan se fatyô u tsuan ser se ere, man er nan ve u nôngon ser se er á la a lu ieren i sha kwaghfana?
17 Gbenda u tseer tseer ú se za hemen u veren ishima sha jijingi yô, ka u tsuan akaa a ken jijingi a se soo ser se er la, shi nôngon sha er se er á yô. Alaghga kwagh u se tsough ser se soo u eren la a lu u nyôôso gbenda u se henen kwagh la, shin u seer ci wase ken tom u kwaghpasen ne, shin u aren ave sha ma ian tom, imba er u eren tom pania nduuruu shin u za eren tom shin Betel shin u eren tom mishen nahan. Kwagh ne una wase se se iv a akaa a ken jijingi ken ishima yase shi una wase se se venda u vôron haan iyol inya a isheer yase shin den ser isharen i lun yôugh yôugh man asaren a bo agen a a dumbur ken tar ungun yum ne a̱ hemba se la. Sha mimi yô u eren nahan la ka ieren i sha kwaghfan, gadia Yesu lu wa kwagh ér: “De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga, kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la. Gadia ape kwaghinjaa wou a lu yô, ka her man ishima you kpaa ia lu ye.”—Mateu 6:19-21.
18. Er nan ve i lu hange hange u zan hemen u veren ishima sha jijingi ken ayange a masejime nee?
18 Sha mimi yô u veren ishima sha jijingi geman kighir asaren a taregh la ka ieren i sha kwaghfan ken “ayange a masejime” ne. (2 Timoteu 3:1-5) Kera je kpa, “tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:15-17) U tesen ikyav yô aluer gum Orkristu nan tsua u eren tomshiren u nduuruu la yô, kwagh ne una fatyô u lun iwanger i tesen nan gbenda ken anyom a ican a nan lu hian a hia la. Zum u i kighir nan ér nana pase kwagh u mimi nana tuhwa yô, imbaor la ia fatyô u nengen a kwagh u nan soo u eren ken mcivir u Yehova la ken ishima wang. Imbaor u veren ishima sha kwagh u ken jijingi la nana nenge ér, u tan akaa a ma nan er ken jijingi kera sha ci u uyôugh yôugh mbaakaav mba keren, shin nyityo msaanyol u isholibo ka i tôndo zwa u van a mi la ka lanegh, shin ka ibumegh je kpaa. Umbur wer Mose u yange lu or u veren ishima sha akaa a ken jijingi la yange ‘lu un guda u i̱ er a na dang a nongoior u Aôndo imôngo a u ma un lu ken mdoom ma isholibo ma ma lu sha anyangem kpeghee la.’ (Mbaheberu 11:24, 25) Sea lu iyev shin sea bee iyol kpaa, se mba tsough u eren nahan vough shighe u se ze hemen u veren ishima sha jijingi a u veren ishima sha iyol i í yen yum ne yô.
19. Aluer se za hemen u veren ishima sha jijingi yô, ka mbamtsera mba nyi se zua a mi?
19 “Ishimaveren i iyolough la ngi ihom a Aôndo,” kpa “ishimaveren i jijingi ka uma man bem.” (Mbaromanu 8:6, 7) Aluer se za hemen u veren ishima sha jijingi yô, se zua a bem u injaa. Se hemba kuran asema ase man mbamhen asev sha ikyev i mlu wase u isholibo ne. Se hemba kôron cio u hendan a ameen a eren kwaghbo la. Shi Aôndo una na se iwasen sha u wan ishima a num u ú lu zan hemen hen atô u iyol man jijingi la kpaa.
20. Er nan ve se lu a vangertiôr ser a fatyô u hemban ityav mbì mbí lu hen atô u iyol man jijingi nee?
20 Aluer se za hemen u veren ishima sha jijingi yô, se lu vea Yehova kangenaa, un u a lu imbor i uma man icighan jijingi la. (Pasalmi 36:9; 51:11) Satan Diabolo man mbatomov nav mba nôngon sha afatyô ve cii ér ma ve vihi mlu wase vea Yehova Aôndo la. Ka ve nôngo ér vea kar a kôr mbamhen asev vea lu a mi sha ikyev, sha ci u ve fa je ér aluer se de ve er nahan yô, ken masejime kwagh ne una va se a ihyom vea Aôndo, shi una va se a ku kpaa. Kpa se fatyô u hemban ityav mbì mbí lu zan hemen hen atô u iyol man jijingi ne. Kape hen Paulu kpa kwagh ne yange lu je ne, gadia yange ngur ngeren kwagh u ityav mbi yange un iyol na nôngo la yô, a hii pinen ér: “Ka an nana shi yimam sha ikev i iyol i kuugh nee?” Tsô, u tesen ér a fatyô u zuan a myom yô, maa a kaa nahan ér: “I̱ wuese Aôndo sha Yesu Kristu Ter wase!” (Mbaromanu 7:21-25) Se kpa se wuese Aôndo sha ikyev i Kristu, er a ne gbenda u nôngon a isheer i iyolough nahan, shi se za hemen u veren ishima sha jijingi a ishimaverenkeghen i kpilighyol i uma u tsôron la.—Mbaromanu 6:23.
Baver We Kpa?
• Inja i u veren ishima sha jijingi yô kanyi?
• Se de ser jijingi u Yehova a̱ yar tom sha avese nena?
• Pase ityôkyaa i i ne ve, ken ityav mbi se nôngon a isholibo ne, i lu hange hange u henen Bibilo shi dondon atindiakaa a Yehova shi eren msen hen a na kpaa yô.
• U tsuan akaa a ken jijingi a se soo u eren la una wase se ken uma nena?
[Study Questions]
[Picture on page 14]
Bibilo i henen i wasen se u sôghor a num u i te sha mlu wase u ken jijingi la
[Picture on page 15]
Ka a inja u eren msen ér Yehova a̱ na iwasen i hemban asaren a isholibo la
[Pictures on page 16]
U tsuan akaa a ken jijingi a se soo u eren la una wase se u veren ishima sha jijingi