“Yehova Er a Mo Doo Je Zua Ga!”

KEN aikighe ugen u kundun iyol tsung ken Maaci 1985 la, nomsombaiorov man kasev mba ve lu ken Gbaatom u Ngeren Kwagh, u a lu ken ijiirtamen i Mbashiada mba Yehova ken New York, U.S.A. la, ver ishima nenge mzehemen u vesen ugenegh. Karl F. Klein shile tom u eren hanma shighe la kuma anyom 60 hen shighe la. Anmgbian Klein kaa sagher sagher nahan wener: “Yehova Er a Mo Doo Je Zua Ga!” Yange kaa wener Pasalmi 37:4 lu ivur i kôron un sha mtema tsugh tsugh. Ken masejime yô, a kuhwa ityogholough sha adiguve na, kwagh doo ior cii u ungwan.

Ken anyom 15 a yange dondo la cii, Anmgbian Klein za hemen u eren tom imôngo a mba ngeren kwagh mbara shi lu môm ken Mbahemenev mba Shin Tine mba Mbashiada mba Yehova la. Tsô sha uwer u Janawari 3, 2001 yô maa Karl Klein mase kuren tom na u shin tar ne la doo doo zum u a tsa sha won anyom 95 yô.

Yange i mar Karl ken tar u Jamani. Tsombor na mough twev yem ken tar u United States, nahan Karl vese ken won gar u Chicago, ken Illinois. Er Karl man anmgbian na Ted lu mbayev la je tsô kwagh u Bibilo hange ve ishima tsung. Yange i er Karl batisema ken inyom i 1918 la, man akaa a sagher iyol a yange i ôr sha mkohol u Mbahenen Bibilo ken inyom i 1922 la mough isharen i mdoom ma tom u kwaghpasen ken a na sha ayange a uma na cii. Yange na ian ér sati môm tsô kpa a̱ kar aa u̱ un pasen kwagh shio ga, man yange er nahan zan zan ar ken ayange a masetyô a uma na la je kpaa.

Karl yange hingir or u eren tom imôngo a mba shin ijiirtamen la ken inyom i 1925, hii eren tom ken ijiir i gberen ityakerada la. Kwagh u ityogholough yange doo un ishima mimi, shi yange kuhwan adiguve na vea mba kuhwan kwagh mba yange ve kuhwan ityogholough i samber a mi sha ityôugh ki rediô ki Mbakristu la. Yange er kwagh ne anyom kar imôngo. Been heela kera yô, a er tom ken Gbaatom u Nengen sha Tomshiren la, hemban je yô, saan un iyol a T. J. Sullivan, orhemen u gbaatom la kpishi je. Ted di gema er kwase nahan un vea kwase na Doris cii, ve tôô tom mishen u eren ken tar u Puerto Rico.

Karl Klein er tom ken Gbaatom u Ngeren Kwagh la kuma vegher derianyom jimin, a wase tom tsung hen ijiir la sha ci u yange i doo un u keren iwanger sha kwagh kpishi shi lu a mfe u Bibilo za shimi tsung je. Ken inyom i 1963 la, Karl vôso Margareta, kwase mishen u ken Jamani u yange lu eren tom ken Bolivia yô. Er kwase na sue un sha dooshima, hemban cii je yô shighe u yange kera lu gbong gbong ga la yô, a er tom her taveraa je za kar iaven i ior kpishi ve memen tom la. Mimi u Karl u sha marami la man msoo u yange soo ityogholough la kohol cii wase u duen a akaaôron a doon tsung ken atôônanongo man sha mbamkohol mbavesen kpaa. Er shi kpuaa u una kpe la, a hemen mkombo u timen sha ivur pepe u i eren hanma iyange la hen tsombor u vesen u Betel u ken gar u New York la, saan ior cii iyol shi ve zua a mtsera kpaa.

Ior kpishi mba ve ôron Iyoukura hanma shighe yô, vea umbur kwaghôron u i nger sha akaa a yange za hemen ken uma u Anmgbian Klein, u í nger ken mgber [u ken zwa Buter] u Oktoba 1, 1984, á doo ôron kpishi la. A doo ú ôron kwaghngeren la shin kimbir ôron un, fan ken ishima je wer or u yange nger kwagh shon ne hide tsa sha won pueanyom kar môm cir tiôn shami sha inja i Orkristu u jighjigh u nan ishima sha mimi.

Er Anmgbian Klein lu môm ken mba Ter a shigh ve mkurem mbara yô, yange sar un ishima i môm ka hemen vea Kristu sha. Se mba a hanma ityôkyaa i nan jighjigh ser Yehova iv isharen na la hegen.—Luka 22:28-30.

[Picture on page 31]

Karl ken inyom i 1943 la vea T. J. Sullivan man Ted kua Doris

[Picture on page 31]

Karl man Margareta ken Oktoba 2000