Ikyon I I tse Anyom a Anyom La

ALAGHGA KURUGH KU IJEM KUA LU IJIIR I DEDOO I MAAN YA WOU GA, HEMBAN CII JE YÔ ALUER KURUGH KU SHON KU SHA UWO GENG YÔ. SHIN ER MBAMTAVER MBAN VE LU NAHAN JE KPAA, IKYON IGEN I SHA IWO KA I ZER SHA AMBUSU AWEN GBANG, FAM A̱ GBA WUHE UA KÔR A̱ NDÔHÔR ZUZU SHIN ICEGH IA ZA A UMA INYA KPUGHO KPUGHO KPA KWAGH A ZA Í IYOL GA.

KERA keke yô, ikyon i vian iyol ne ngi taven sha geng er í í lu shin inya i lun shambe shambe la nahan ga. Atine a í ka a lu anundu anundu shi a zômon kpaa, shi ivesen ka i ta í icul tsung je. Mlu u ahumbe u ican man m-ban u inyaagh ka a na í tsor agbar í kera lu yigha yigha ga.

Er amba a ikyon ne a ye atsan hen ajiir a a hembe lun ican u lun her shin tar ungun yô, alaghga ú hen wer ia tsaan ku ga. Kpa kape kwagh a lu la ga. Mbagenev kaa ér kon u i yer ú iti ér Metusela, ú lu ikya ver ver, ú mende sha igyungu i taven kuman umita 3,000 sha Iwo I Pupuu i ken California la, tsa kuma anyom 4,700. Takerada u i yer ér The Guinness Book of Records 1997 la dugh kon ne ér ka ú ú lu iti kon i hemban tsan sha won shin tar ungun ye. Edmund Schulman, un u a hen kwagh u utse mba ikyonov mban ne pase wener: “Ka inja er kon u lun ikya ver ver ne ngu lu uma gbem ka lu sha ci u mtsoghul u kwagh a tsoghul ú la nahan. Ikyon igen [i lun ikya ver ver], i i lu sha Iwo I Pupuu la cii ngi sha agungu a a tav a war kuman umita 3,000 nahan, sha utaaikyôngo mba uman tseghe tseghe shi lun awen awen kpaa la.” Shi Schulman yange mase kaven wener atô a ikyon a lun ikya ver ver ne agen kpa nga menden hen ajiir a tsoghul.

Shin er i gbe u ikyon i tesen ikyav i ishimataver ne ia tagher a mtaver nahan kpaa, ka i zua a mtsera ken akaa a wasen í igbenda ihiar ne. Mlu u í lu tswen ape toho u mende ga la kor í, usu u hian mkôngo mkôngo la ngu hie í ga, man ka kwagh u a hembe zan ikyon i vesen iyol tsung je la. Shi amise a í la ka a sôghor ken ambusu a awen la gban je yô, saa ka tar-tenger tseegh ua môugh í kera ye.

Ken Bibilo yô, i kar mbacivir Aôndo sha mimi mbara sha ikyon. (Pasalmi 1:1-3; Yeremia 17:7, 8) Ve kpa alaghga vea tagher a kwaghtseren sha ci u ma mlu u vea lu ker la. Tôvacan man mkpeyolga  man ibanave i tumen inya ia fatyô u karen jighjigh u nan ve la, hemban je yô aluer ican shon ngi zan hemen anyom anyom yô. Nahan cii kpa, Orgban ve, u a gbe ikyon i i taver ishima ken ican tsembelee la, a taver mbacivir un ishima ér una sue ve. Bibilo tôndo zwa a ior mba ve sôghul her la ér: “Una taver ne man shi Una tim ne né lu dông kpaa.”—1 Peteru 5:9, 10.

U̱ or ‘sôghor dông, tenger ga shin tilen her’ la ka jiminkwagh u a lu ken ishemberti i ken zwa Grika i tesen ieren, i í yer ken Bibilo ér “taver ishima” la je la. Er kwagh u ikyon i sha iwo ne a lu nahan, kape msôghor u sôghor angahar dông la a lu tamen kwagh ken ishimawan je la. Sha vegher u Mbakristu yô, gba u vea wa amise ken Yesu Kristu gbang sha er vea tile dông yô. Paulu yange nger kwagh kaa wener: “Er ne rumun Kristu Yesu ner ka Ter yô, shi zenden nen ken a Na nahan vough, er ne we amishe ken a Na shi i maa ne ken a Na kpaa, man i taver jighjigh wen u nan er i tese ne nahan vough, shi lu nen a iwuese wuee” yô.—Mbakolose 2:6, 7.

Paulu yange kav mluainja u wan amise a taver ken jijingi la. Un iyol na yange nôngo kwagh a “saa ken iyol,” shi yange ya ican a tôvacan u bo ken tom na u shiren la cii. (2 Mbakorinte 11:23-27; 12:7) Kpa yange kav wener ken agee a Aôndo yô, una fatyô u zan hemen her. Yange yôô wener: “M ngu a agee a eren akaa cii je ken Un u A taver mo ne.”—Mbafilipi 4:13.

Di vough er ikyav i Paulu ne i̱ tese nahan, mwe u Orkristu wan ishima hemban la har ka sha mdoo u akaa ga. Di er ikyon i sha iwo í ker cio u tagher a uraahumbe u taver sha anyom uderi uderi nahan, kape se kpa aluer se wa amise ken Kristu shi se har sha tahav mbu Aôndo a ne mbura yô, se fatyô u tilen dông je la. Heela tseegh ga, aluer se wa ishima zan zan mkur yô, se lu a ishimaveren i va nengen m-iv u ityendezwa i Aôndo igenegh i a tende nahan la ér: “Er ayange a ikon a lu nahan kape ayange a ior Av kpaa aa lu la.”—Yesaia 65:22; Mateu 24:13.