Ian You I Nan Ma Kwagh Jighjigh La

Alaghga ian you i tsuan u nan kwagh u ú soo u nan un jighjigh la i gba ú kwagh kpen kpen. Shi kpuaa hanma or cii kpa ma nan eren nahan. Er ior ubiliôn imôngo mba shin tar ne ve eren sha ian ve ne yô, kwagh la na jighjigh u nan hingir wue wue. Di vough er mluashe u akaa a i gbe a ne man guyolough u á man kwavyolough u á man mlu u á sha nombor man ihuma i á man imo i á a lu kposo kposo nahan, kape jighjigh u a lu wue wue la kpa ka a na uma a hemba lun a isharen shi a hemba lun yar yar shi a hemba saan iyol je la. Sha mimi yô, imba mlu u kwagh lun kposo kposo la una fatyô u nan sha u tar u̱ hôm kpaa.—Pasalmi 104:24.

 KPA gba u or a er teghelee. Jighjigh u nan ugen ngu a ngu di kposo tseegh tsô ga, ka u bo jim jim. U tesen ikyav yô, ken mhii u derianyom u sha 20 la, ior mbagenev na jighjigh ér Mbayuda man ior mba yange i yilan ve ér Freemasons la cii ve wa kwagh ishima u̱ va “numun ibughashe i Mbakristu geman veren gomoti shin tar sha er ve cii vea hemen yô.” Kwagh u yange na ve ior lu a imba jighjigh u nan ne yô, lu ankwatakerada u yange hendan a kweior u mba Shem i yilan ér Protocols of the Learned Elders of Zion la. Ankwatakerada ne yange senge wener mbaawashima mba nongo la lu u yôôn angwe ér kpandegh ku taver ishe i̱ gande ave shi i̱ var ikyav mbi utyaav i̱ seer shi i̱ ngohol mba yamen kasua cii i̱ lu a mi sha ikyev sha er ‘á vihi inyaregh ki Atôatyev kera kwa môm yô.’ Shi i kaa er ve nzughur a mlu u imakeranta sha er vea ‘na Atôatyev a̱ gema henen kwagh er inyamtoho nahan yô,’ je yô shi vea dugh igbenda i girgi dogo shin inya i̱ za asegh ken agar a vesen sha er mbatamen mba Mbayuda vea ‘hemba ior mba vea hendan a ve cii vea tim ve gburu gburu yô.’

Kpa akaa ne cii yange lu mbaaie—í er mbaaie mban sha er a kende ior asema ker ve̱ kôr kweior u mba Shem la ihom yô. Mark Jones u eren tom ken British Museum kaa wener: ‘Bo kwaghngeren u yange lu aie ne yange samber wuee ken tar u Russia’ ape yange i hii gberen un ken gbaa kwaghngeren u ken pipaabaver igen ken inyom i 1903 la. Antakerada la va nyôr a pipaabaver i ken London i í yer ér The Times la ken uwer u Mei 8, 1920 la. Ka tse ka hembe inyom i môm nahan yô, The Times pon un ér ka jebu kwagh. Kpa heen nahan yô, antakerada la vihi tar yem ca kera kpaa. Jones kaa wener: ‘Amba a aie angan nahan ka a taver u kighir a kpen kpen.’ Ior ka vea naan a jighjigh yô, bee, a na ior ve gba lun a imor ishima, asema a gba gban ve megh shi ve lu a asema a bo kpaa—ashighe kpishi kwagh ne ka a va a uaahe, vough er tsegh ku mbayiase ku ken derianyom u sha 20 la ku tese nahan.—Anzaakaa 6:16-19.

Jighjigh u Nan Ya Gaduga a Mimi

Nahan cii kpa, saa ka sha mbaaie mba i er sha apera la tseegh jighjigh u kpeegh una due ga. Ashighe agenegh ka i lu se se tsume a ayol a ase ye. Ka iorov u me je ve tende ku ve kpe kôugh sha ci u ve lu eren kwagh u ve na jighjigh  ér ka u shami laa? Shi, ashighe kpishi ka se na kwagh jighjigh í lu sha er se soo u nan un jighjigh yô. Ikpurorfantakerada ugen kaa ér mbatôvonkwaghfan u sangen yeke je kpa “ashighe kpishi kwagh u i lu ve ayol a ve ve dugh a mi la ka a za ve zwa kpen kpen.” Jighjigh ve u nan la ka a kar a yisa mhen u injaa la. Tsô ken ayange a uma ve cii ve gbaa gboron ave u suen jighjigh u nan u kpeegh la tsô.—Yeremia 17:9.

Ambaakaa ne er sha gbaa u jighjigh u nan u ukwaghaôndo la kpaa—ape anyimanakaa a de ishar la. (1 Timoteu 4:1; 2 Timoteu 4:3, 4) Orgen ka nan na Aôndo jighjigh tsung. Orgen di nan kaa ér ior mba gbe di nan Aôndo jighjigh tsô, mba a ma ityôkyaa i suen jighjigh ve la ga. Mbagenev ka ve kaa ér or ngu a uma u kpen ga, u or ka nana kpe ve a due yô. Mbagenev di na jighjigh ér zum u or kpe yô, nan kera ngu mape môm môm ga, nan kpe kpum kpum. Sha mimi yô, imba jighjigh u nan u i ne igbenda wue wue ne ka un cii a lu mimi ga. Sha nahan yô, kera ka kwagh u sha kwaghfan u veren ishima nengen sha er kwagh u ú ne un jighjigh la una lu u mimi una kera gba lun di kwagh u ú soo wer ú na un jighjigh tsô la ga zee? (Anzaakaa 1:5) Ú fatyô u eren kwagh ne nena? Gbaa kwaghngeren u a dondo ne una time sha itinekwagh ne.

[Picture on page 3]

Kwaghngeren u ken inyom 1921 u yange pon antakerada u i yer ér “Protocols of the Learned Elders of Zion” la