Jighjigh U Nan U Mimi La—Shi Or A Fatyô u Lun a Mi Kpa?

“Jighjigh u nan yô, ka u lun a vangertiôr gbar gbar sha ci u mhôônom ma Aôndo, ka kwagh u mimi shi ka kwagh u kpôô kpôô hen or u nan jighjigh, je yô, nana fatyô u teen uma u nan sha kwagh shon kwa dubu je kpaa.”—MARTIN LUTHER, 1522.

“Shi kpuaa tsô tar wase cii ma ú vande lun ú eren aeren a tyôô, nahan jighjigh u nan u Mbakristu man aeren a ve cii ma a kera lu a lu ga kuaa.”—LUDOVIC KENNEDY, 1999.

 MBAMHEN mbà sha kwagh u jighjigh u nan mbá kposo kposo. Tsuaa la mne u nan Aôndo jighjigh la lu kwagh u henen a hen ga. Ainge u tar ú iv a mpuu u puun akaa tsung shi ican i yan i̱ lu ne yô, mne u nan Aôndo jighjigh kua Bibilo la gbe ndiir fioo je.

Jighjigh u Nan u Mimi

Hen mbagenev kpishi yô, “jighjigh u nan” ka di u nan ma kwaghaôndo jighjigh shin dondon ma mciviraôndo tsô. Inja i “Jighjigh u nan” jighilii er i yar tom a mi ken Bibilo yô ér ka ishuur—u suur sha Aôndo man uityendezwa nav a ishima i môm man a vangertiôr u tenger shio. Ka ieren i i tese ikyav i or u nan lu orhenen u Yesu Kristu yô.

Sha shighe ugen la Yesu ôr kwagh sha er i gbe u eren msen “gban uwer ga” yô. Nahan pine mpin ér shin jighjigh u nan u mimi una lu sha ayange a ase ne je kpa-o? Yange pine ér: “Shighe u Wan u or Una va la yô, Una zua a jighjigh u nan sha wonoo?” Yange pine imba mpin la sha ci u nyi?—Luka 18:1, 8.

Jighjigh U Nan U A Saa La

Akaa nga kpishi a aa na ior vea fatyô u gbihin jighjigh ve u nan la yô. Akaa shon ne kua haghelaa man ameen a sha use use la. Ikyav i tesen yô, ken inyom i 1958 zum u ikpurorfantakerada Michael Goulder lu pristi hen parish ugen ken Manchester ken England la, igirgi i purugh i Munich er aikyôr tim ior kpishi ken kwe borough u Manchester la. Joan Bakewell, kwase u nan abaver shin ityôugh ki televishen ki BBC la yange pase kwagh u Goulder ér, “ishima yange i gba un awambe sha mzungu u ior zungwe yum la.” Kwagh môm u yange va ker yô, yange gbihi jighjigh na u yange na ér Aôndo ngu u á cirin uwegh nagh sha uumace  la.” Goulder pase jighjigh na u nan wener: “Bibilo ka mkaanem ma Aôndo ma ma . . . gbe kpe ga ze,” kpa “ka mkaanem ma orom ma ma gbe inya, kpa alaghga ajiir a Aôndo a ne i nger la aa lu ker acile acile yô.”

Ashighe agen jighjigh u or ka a gba usen kera tsô. Ka kwagh shon u yange er orngeren takerada shi ôron abaver Ludovic Kennedy je la. Á kaa wener “zum u un lu wanye la je, anyiman man akperan a tan a sha [kwagh u Aôndo] yange cinge sha a [na] maa m-ban u jighjigh u nan maa seer a seer ken a [na].” Yange i lu inja er or môm kpa ngu u nana fatyô u nan un mbamlumun mba injaav sha mbampin nav ga nahan. Ku u ter na yange sar shin zegemnger la yange lu ityagher kwagh u yange shi na mvôr u jighjigh na u nan, u̱ kera kpa vande vôron la yô. Msen u yange i sônon Aôndo ér, “kura se sha ikyev i akaabo a shin mnger man ipila i mbaihyomov” la kpa Aôndo ungwa ga, igirgi i mnger i kuran ior í ter na nyôr la ngi ngur yemen yô, igirgi mnger i uitya i Jamani va ta num sha í ve cii ve tim, zum u i lu nôngon Ityav mbi Tar cii Mbi Sha II la.—All in the Mind—A Farewell to God.

Ambaakaa angara nahan ka kwagh u he ga. Apostoli Paulu kaa ér: “Ka ior cii ve lu a jighjigh u nan ga.” (2 Mbatesalonika 3:2) We ú nenge nena? Ka zange u shi nan Aôndo man Mkaanem nam jighjigh shin tar u anyimanakaa a lu seer a seer nee? Time ase sha kwagh u kwaghngeren u a dondo ne a er sha itinekwagh ne yô.