Lu A Ishima I I Lu Sha Ishima I Yehova Yô
Lu A Ishima I I Lu Sha Ishima I Yehova Yô
“Gba ishima i wang ken a mo, Aôndo, shi ver jijingi u he u taver ken a mo.”—PASALMI 51:10.
1, 2. Er nan ve i doo u kwagh a gba se a ishima yasa?
YANGE tav ityaven sha dwasaa man kuma or ashe kpaa. Profeti Samuel zough ashe sha a na yô, a doo un ishima je yô a kure ken ishima na ér ka waniunda u Yese ne Aôndo a tsough ér a̱ lu tor sha ityough ki Saulu ye. Kpa Yehova kaa ér: “De kenger mluyol [u wan la] ga, shin ityaven na kpaa ga; gadia A kumam ga, . . . gadia or nengen mluashe u ken won, kpa TER yô, nengen ken ishima.” Or u Yehova tsua yô lu Davidi, wan u Yese u masetyô la,—lu ngun ne lu “or Na u sha ishima Na vough” ye.—1 Samuel 13:14; 16:7.
2 Aôndo una fatyô u nengen ken ishima i uumace, di er yange va pase ken masejime nahan, ér: “Mo TER M tev ishima, M kar ahi, sha u Me na hanma or sha igbenda i nan, sha inja i atam a aeren a nan.” (Yeremia 17:10) Een, “TER yô, karen asema.” (Anzaakaa 17:3) Nahan ishima i or i Yehova a tev la ka nyi? Man kanyi se er sha u lun a ishima i i lu sha ishima naa?
“Or u ken Myer u ken Ishima” La
3, 4. Ka sha nyi gbenda i hembe yaren tom a ishemberti i “ishima” la ken Bibilo-o? Na akav a tesen.
3 Ishemberti i “ishima” la i̱ due je kuma er kwa dubu nahan ken Icighanruamabera. Ashighe kpishi ka i yar tom a ishember ne sha injakwagh. Ikyav i tesen yô, Yehova yange kaa a profeti Mose ér: “Kaa Mbaiserael ve̱ vam a nagh; ngohol nagh Agh hen hanma or u i doo nan u nan yô.” Tsô mba yange ve lu van a naagh yô gba van a mi er “hanma or u ishima i tor nan ityô” la. (Ekesodu 25:2; 35:21) Kwagh u a til tseer tseer ken akaa a ishima i sha injakwagh la yô ka mgbegha u i̱ mgbeghan or la—ka tahav mbu ken atô mbu ka mbu mgbegha se u eren kwagh je la. Ishima yase i sha injakwagh la shi i tesen ikyav i mbamhen asev man er ishima i lun se ker la man asaren ase kua dooshima wase kpaa. Ishima ia fatyô u yeghen se shimi shin ia ta kwe sha mcie, shi ia iv a mzungu shin iember. (Pasalmi 27:3; 39:3; Yohane 16:22) Ia fatyô u kehen or ken vanger gayô lun legh legh, shin ia fatyô u lun a dooshima shin lun i̱ bo.—Anzaakaa 16:5; Mateu 11:29; 1 Peteru 1:22.
4 Sha nahan yô, ashighe kpishi ka i zua “ishima” vea mkende u kenden or ken vanger man mbamlu mba ken ishima, kpa “mfe” jighilii yô ka kwagh u a gbe a zough sha mhen yô. Kape i doo u kaven asemberatii ne shighe u á lu imôngo ken ivur Ruamabera i môm je la. (Mateu 22:37; Mbafilipi 4:7) Kpa ú ngu wer ishima man mfe mba a mba kangenaa je mkposo ngu ga ze. Ikyav i tesen yô, Mose yange kaa a Mbaiserael ér: “Fa ase nyian ne, koso ken ishima you kpaa, er i lu TER A lu Aôndo u Sha man u shin tar kpaa yô.” (Duteronomi 4:39) Yesu yange kaa a mbangeren mba ve lu henen akaabo sha a na la ér: “Ka nyi ne henen kwagh u bo ken asema a ene?” (Mateu 9:4) “Ishima i fan kwagh” man “mfe” man u “henen ken asema” cii a fatyô u zuan ve sha kwagh u ken ishima. (1 Utor 3:12; Anzaakaa 15:14; Marku 2:6) Nahan, ishima i sha injakwagh la ia fatyô u shi wan mfe wase—mbamhen asev shin mkav wase kpaa ker.
5. Ishima i sha injakwagh la i̱ tile sha ityough ki nyi?
5 Sha kwagh u ngeren u tom ugenegh a pase yô, ishima i sha injakwagh la tile sha ityough ki “vegher u hemban lun a inja jimin cii, ka mbamhen mba ken atô u or je la, man sha nahan yô, or u ken atô la duen tseer tseer ken hanma ityom cii anza er asaren a nan man u doon a or man mlu u ken ishima man dooshima u usan ken ishima man mbaawashima mba or man mbamhen man mbamnenge man kwargbidyen man kwaghfan man mfe man mfe u tomavee man jighjigh u nan man mhen u eren man mbamumbur man mbamkav mba orough cii.” Ka i̱ tile sha ityough ki kwagh u se lu ken atô yô, ka “or u ken myer u ken ishima” je la. (1 Peteru 3:4) Ka kwagh u Yehova a nengen shi a karen kpaa je la. Nahan, Davidi lu er msen ér: “Gba ishima i wang ken a mo, Aôndo, shi ver jijingi u he u taver ken a mo.” (Pasalmi 51:10) Se fatyô u zuan a ishima i wang nena?
“Ver Nen ishima” sha Mkaanem ma Aôndo
6. Kanyi kwaghwan yange Mose wa Iserael zum u ve haa afo shin Ukpuunkpuun mba Moabi laa?
6 Yange Mose ngur wan ônov mba Iserael kwagh zum u ve kohol shin Ukpuunkpuun mba Moabi cii man ve mase nyôron ken Tar u Ityendezwa la yô, a kaa a ve ér: “Ver nen ishima sha akaaôron a m pase ne nyian ne cii; sha er [ne] wa ônov enev kwagh, ve̱ waan akaaôron a tindi ne cii iko, ve̱ eren sha mi yô.” (Duteronomi 32:46) Lu u Mbaiserael vea “ver ato dedoo.” (Mgem u Bibilo i Knox la) Lu sha u hoghol a atindi a Aôndo la tsembelee man vea fatyô u tesen ônov vev ye.—Duteronomi 6:6-8.
7. Kwagh u ‘veren ishima yase’ sha Mkaanem ma Aôndo la wa nyi kere?
7 Kwagh u vesen u i lu u or a lu a mi ve nana zua a ishima i wang yô, ka u zuan a mfe u vough u ishima i Aôndo man mbaawashima nav la. Gbenda u zuan a mfe la ngu di môm tseegh tsô, ka Mkaanem ma Aôndo ma a ne i nger la je la. (2 Timoteu 3:16, 17) Nahan mfe u ken ityou la tseegh yô, una fatyô u wasen se u zuan a ishima i i lu sha ishima i Yehova la ga. U̱ mfe a̱ bende a kwagh u a lu ken a vese la yô, saa se ‘ver ishima yase’ sha kwagh u se lu henen la shi se “koso” un “ken ishima” kpaa. (Duteronomi 32:46, Bibilo i̱ í yer ér An American Translation la) Mba eren kwagh ne nena? Orpasalmi Davidi pase wener: “M umbur ayange a ngise la, m hen kwagh sha aeren a Ou cii, m hen kwagh ken ishima sha tom u ave Ou je.”—Pasalmi 143:5.
8. Zum u se lu henen kwagh yô, ka mbampin mba nyi se fatyô u gbidyen kwar sha mi?
8 Se kpa se henen sha tom u Yehova a iwuese. Shighe u se lu ôron Bibilo shin ityakerada i í har sha Bibilo la yô, gba u se gbidye kwar sha mbampin amba ne, ser: ‘Kwagh ne tesem nyi sha kwagh u Yehova? Ka aeren a Yehova a nyi m nenge a mi heene? Kwaghngeren ne tesem nyi sha kwagh u a lu sha ishima i Yehova shin sha ishima na ga laa? Ka injar i nyi i̱ lu ken m-dondo u dondon gbenda u ú lu sha ishima i Yehova la, man ka di i̱ nyi i̱ lu sha u dondon u ú lu sha ishima na ga laa? Kwaghôron ne zua sha kwagh u m vande fan kera la nena?’
9. Kwaghhenen u sha tseeneke man mhen u henen ken ishima la ngu a inja nena?
9 Wanyekwase u lu anyom 32 u i yilan un ér Lisa * la pase er yange un va hingir u lun a iwuese sha mluainja u kwaghhenen u sha inja man u henen ken ishima la, wener: “M eren batisema ken inyom i 1994 la kera yô, m lu tsevaa ken mimi je kuma anyom ahar. Yange m zaan mbamkombo mba Mbakristu cii, m pase kwagh ken uwer môm i kuma je er ahwa 30 ga yô 40 nahan, shi m teman imôngo vea mba ve lu Mbakristu a mo imôngo la. Tsô, maa m gba hiden ijime tegh tegh. Yange m hide ijime je yô, m hingir u peren tindi u Aôndo kpaa. Kpa yange m tile a ishima nahan m hide m sôr uma wam doo doo. M ngu a iember kpishi er Yehova á lumun a mgemshima wam man á hidi a ngohol mo nahan! Ka m shi henen hanma shighe mer: ‘Er nan yange m hide ijime jimi?’ Ka mea pine iyol yam mpin ne kwa ne kwa ne je m zua a mlumun mer, yange m undu kwaghhenen u sha inja man mhen u henen ken ishima la. Yange mimi u ken Bibilo la lu a̱ kôrom ken ishima ga. Hii hegen yem hemen, kwaghhenen u sha tseeneke wam man u gbidyen kwar sha mi ken ishima la una lu tagher tagher ken uma wam hanma shighe.” Er se lu seer u fan Yehova man Wan na kua Mkaanem nam yô, nenge i lu a inja u se ver ian i hiden gbidyen kwar a ishima yase sha inja sha wono!
10. Hii nan i lu kwagh u torough torough u se ver ian i kwaghhenen u sha tseeneke man u gbidyen kwar sha kwagh u se hen laa?
10 Ken tar u or nan lun gbilin sha won ga ne, u zuan a ian i henen kwagh shi hiden gbidyen kwar sha mi ken ishima ka kwagh u ican kpishi. Nahan kpa, ainge Mbakristu tile sha kur ú Tar u Ityendezwa ú kpilighyol—ka tar u he u perapera u Aôndo je la. (2 Peteru 3:13) Akaa a kpilighyol, anza er mtim u “Zegebabilon” man ityav mbi “Gogi, u ken tar u Magogi” una va ta sha ior i Yehova la, akaa ne cii mgbôghom. (Mpase 17:1, 2, 5, 15-17; Esekiel 38:1-4, 14-16; 39:2) Kwagh u a lu van ken hemen la una fatyô u karen mdoo u Yehova a doo se ishima la. Ka torough torough u̱ hegen se wa ian yase ikyo se ver ishima yase sha Mkaanem ma Aôndo yô!—Mbaefese 5:15, 16.
‘Ver Ishima You u Timen sha Mkaanem ma Aôndo’
11. A fatyô u karen asema a ase sha inya nena?
11 A fatyô u karen ishima i sha injakwagh la sha inya i í lôô ivor i mimi la sha mi yô. (Mateu 13:18-23) Inya gbem mba kahan í sha u iyiagh ki vese ken mkpeyol yô. Kape asema a ase kpaa a sôr á a kegh a kegh sha er Mkaanem ma Aôndo ma a hemba vesen je la. Yange Esera u lu pristi la “ver ishima na u timen sha atindi a TER, man u eren sha a” kpaa. (Esera 7:10) Sé sôr asema ase nena?
12. Kanyi ia wase se u veren ishima sha kwaghhenene?
12 Msen u eren a ishima i môm ka ago a wan iyol tsembelee a veren ishima zum u se lu timen ken Mkaanem ma Aôndo yô. Mba hiin mbamkombo mba Mbakristu mba ior mbacivir sha mimi sha msen, shi mba kur sha msen kpaa. A lu kwagh u injaa kpishi u hiin hanma ian i henen Bibilo sha tseeneke la sha msen shi nan ishima sha kwaghhenen wase!
13. U se lu a ishima i Yehova yô, kanyi kwagh i gbe u se ere?
13 Gba u or a wa ishima i nan i sha injakwagh la ago sha u gbihin mkase u ka i kase nan shin ishima bough bough la kera. Mbahemenev mba ukwaghaôndo mba sha ayange a Yesu la yange ve venda u eren kwagh ne. (Mateu 13:15) Nahan kpa Maria, ngô u Yesu ti yô, yange koso mimi u akaa a yange ungwa, yange har sha mimi la cii “ken ishima.” (Luka 2:19, 51) Yange hingir orhenen u jighjigh u Yesu. Lidia u ken Tiatire yange ver ato a Paulu, “Ter kpaa bugh un ishima sha u una ver ishima” yô. Un kpa hingir kwase u jighjigh. (Aerenakaa 16:14, 15) Mayange se kôr nen a ve gbang gbang sha mbamhen asev shin sha atesen a ma kwaghaôndo a á doo se yum la ga. Kpa guda yô, se lumun u den ser “Aôndo A̱ lu u mimi shin er ior cii ve lu mbaaiev nahan kpaa.”—Mbaromanu 3:4.
14. Se ver ishima u keghen ato ken mbamkombo mba Mbakristu nena?
14 U veren ishima keghen ato ken mbamkombo mba Mbakristu la ka kwagh u hange hange. Alaghga akaa agen aa dan se ishima sha kwagh u i lu ôron la. Aluer se iv a akaa a shen a ze hemen la ken ishima, shin kwagh u kpernan se er la yô, se fatyô u kôron mkaanem ma i lu ôron se la saan a mi ga. Aluer ka u se zua a mtsera sha kwagh u i lu ôron se la yô, doo u se kange ishima se kegh ato shi se hen kpaa. Aluer se kange ishima se kav avur a ruamabera a i lu timen sha mi shi i lu pasen se la yô, se zua a mbamtsera je a zua ga!—Nehemia 8:5-8, 12.
15. Iyol hiden a mi ijime ka i wase se u hemban ngohol ityesen nena?
15 Di vough er u wan icigh ki injaagh ka i wase inya i kpôô kpôô nahan, kape se kpaa iyol i hiden a mi ijime man isharen i akaa a ken jijingi man u nan or jighjigh man mciem ma Aôndo man mdoo u Aôndo doon se ishima la, akaa ne cii aa fatyô u sôron ishima yase i sha injakwagh je la. Iyol i hiden a mi ijime ka i na ishima i legh legh, shi i wase se u hingir mba hemban ungwan ityesen cii. Yehova yange kaa a Tor Yoshia u hemen tar u Yuda la wener: “Er u lu a ishima i legh legh u hire a iyol you ijime sha ishigh ki TER, zum u u ongo kwaghôron . . . shi u vaa sha ishigh Yagh kpaa, nahan, Mo kpaa M ungwa u, kape TER A kaa la.” (2 Utor 22:19) Yoshia yange lu a ishima i legh legh man i ungwan kwagh kpaa. Ishima i legh legh la yange i na mbahenen mba Yesu “mba fan takerada yum kpaa ga” la u ungwan shi yaren tom a mimi u ken jijingi u yange yende ior “mbafankwagh man mbakavenkwagh” la. (Aerenakaa 4:13; Luka 10:21) Se “hide a ayol a ase ijime sha ishigh ki Aôndo wase” er se lu nôngon u lun a ishima i doon Yehova la.—Esera 8:21.
16. Hii nan ve i gbe u or a nôngo sha u isharen i kwaghyan u ken jijingi i̱ lu ken a nana?
16 Yesu yange kaa ér: “Saan mba ve lu mbaibanave ken jijingi la iyol, gadia tartor u Sha ka u ve je.” (Mateu 5:3) Er i ne se tahav mbu lun a mlu u ken jijingi nahan kpa, alaghga mbamkighir mba ken tar u ifer ne shin anzaakaa er hwev nahan aa na se kera kav kwagh u a gbe se la ga. (Mateu 4:4) Saa isharen i kwaghyan u ken jijingi ia lu ken avese. Shin aluer sha hiihii la Bibilo i ôron man kwaghhenen u sha tseeneke la a̱ lu akaa a doon se ishima ga je kpa, aluer se gba uwer ga yô se kav er mfe ‘una doo uma wase’ yô, tsô se hingir u veren ashe keghen a kegh ashighe a kwaghhenen.—Anzaakaa 2:10, 11.
17. (a) Er nan Yehova a kom u se suur sha a na se hunde ishima kera? (b) Se fatyô u suur sha Aôndo nena?
17 Tor Solomon yange wa kwagh ér: “Suur sha TER a ishima you cii, de yier sha mkav wou ga.” (Anzaakaa 3:5) Ishima i suur sha Yehova yô, hanma shighe ka i fa ér nyityô kwagh i A kaa shin á tese ken Mkaanem nam cii ka u shami. (Yesaia 48:17) Yehova kuma u se suur sha a na se hunde ishima kera. Una kôr cio u eren hanma kwagh u a we ishima cii. (Yesaia 40:26, 29) En he, ikyav i iti na jim jim la ér “Gem Ne Kwagh Lu,” man i̱ na se mba a vangertiôr ken agee a na a kuren kwagh u a tendezwa la! Un “eren perapera sha igbenda Na cii, man shi eren dedoo ken ityom Na cii kpaa.” (Pasalmi 145:17) Kpa, u se̱ suur sha a na yô, gba u se ‘bende se nenge er TER a lu u doon’ yô, sha u yaren tom sha akaa a se hen ken Bibilo la ken uuma asev man sha u gbidyen kwar sha akaa a dedoo a kwagh la una va a mi la.—Pasalmi 34:8.
18. Mcie u cian Aôndo la una wase se u lun a ishima i dondon gbendatesen u Aôndo nena?
18 Er Solomon shi ngur ôron kwagh teren ieren igen i̱ ka i na asema a ase u dondon icighan kwaghwan la yô, a kaa ér: “Cia TER, pav a ifer.” (Anzaakaa 3:7) Yehova lu ôr kwagh u Iserael u sha ayange a tsuaa la kaa ér: “Ma ve lu ase a imbashima i cian Mo waan atindi Am cii iko gbem la, sha er á kpe ve iyol a ônov vev cii gbem sha won yô.” (Duteronomi 5:29) Een, mba ve cie Aôndo yô, mba ongo un. Yehova ngu a tahav mbu “Una pase agee Na hen mba asema a ve a lu jighelaa her a Na” la, shi una va a mtsaha sha mba ve hembe un ato la kpaa. (2 Kroniku 16:9) Mciem ma cian ser se va er kwagh u sha ishima i Aôndo ga la ma hemen se sha akaa a se eren la man mbamhen asev man mlu wase u shin shima kpaa.
“Ter Aôndo Wou A̱ doo u Ishima a Ishima You Cii”
19. Ka nyi tom dooshima a yaren ken asema a ase, a ne se dondon gbendatesen u Yehova?
19 Ken aeren a ka a na ishima yase i dondo gbendatesen u Yehova la cii ka dooshima a hembe ye. Ishima i Aôndo a doo i̱ yô ka í na i̱ girim or iyol u henen kwagh u una lu sha ishima i Aôndo man u una lu sha ishima na ga la. (1 Yohane 5:3) Yesu yange kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37) Mdoo u Aôndo a doo se ishima la a̱ seer i hemba nahan, a̱ na i̱ hingir ikye yase u gbidyen kwar sha erdoo na shi lun a iliam i sôngo sôngo vea na er ka huror wase u ishima ishima nahan, shi a̱ na i̱ sasen se iyol u ôron mbagenev kwagh na kpaa.
20. Se zua a ishima i doon Yehova nena?
20 Sha u hiden kpiligh kwagh u i vande ôron yô: U lun a ishima i doon Yehova la kua u nan Mkaanem ma Aôndo ian sha u ma̱ bende a kwagh u se lu ken atô la kpaa, ka or u ken myer u ken ishima je la. Ka hange hange u lun a kwaghhenen u sha tseeneke u injaa ken Ruamabera man u henen kwagh ken ishima a iwuese kpaa. Mba hembe eren kwagh ne a ishima i vanden wan ago iyol la—ishima i i̱ vande koson mbamhen mbagen kera ga yô, ishima i i̱ mgbough a aeren a aa na se fatyô u henen kwagh yô! Een, sha iwasen i Yehova yô, or a fatyô u zuan a ishima i dedoo. Nahan kpa, kanyi kwagh se fatyô u eren sha u kuran asema a ase?
[Footnote]
^ I gema iti ne.
Ú Na Mlumun Wer Nena?
• Ka ishima i sha injakwagh i nyi Yehova a karene?
• Se ‘ver ishima yase’ sha u ungwan Mkaanem ma Aôndo nena?
• Se wa asema a ase ago iyol u timen sha Mkaanem ma Aôndo nena?
• Er ú time ken kwaghngeren ne ú bee nahan, ishima i mgbegha ú ker u eren nyi?
[Study Questions]
[Picture on page 9]
Davidi yange hen sha akaa a ken jijingi a iwuese. We di ye?
[Picture on page 10]
Wa ishima you ago cii man ú hen Mkaanem ma Aôndo ye