Mhembe u I Hemba Ijir ken Atejir u Atindigh u Shin Tine La

MBASHIADA MBA YEHOVA mba ken tar u Jamani hemba ijir ken Atejir u Atindigh u Shin Tine ken gar u Karlsruhe je vaa kaa. Nahan ve zua a mzehemen ken mnenge u ve nôngon ér vea hingir mba tindi a lumun a ve la.

Mbashiada mba Yehova ndera pasen kwagh ken tar u Jamani tsa hegen hemba anyom 100. Yange ve wa ishima a tôvacan u vihin tsung sha ikyev i ugomoti uhar mba hemen sha nomor ken derianyom u sha ikyundu la—ka hemen u Gomoti u Tyemimôngo man ú Gomoti u Lun a Akaa Cii sha Ikyev je la. Hii ken inyom i 1990 la je tsô, Mbashiada zer keren igbenda sha u vea hingir ior mba i lumun ve sha ikyev i tindi u ken igbar yô. Er atejir kure ajir ahar na Mbashiada ishô kpa shi hide num i̱ môm kera yô, ve wa apii sha Atejir u Atindigh u Shin Tine, u yange mase kuren ijir shon sha uwer u Disemba 19, 2000 la.

I Gba Zwa Môm Gbiaa ken Mkur u Ijir i Mbashiada mba Yehova La

Mbaajiriv mba utaankaruhar mba ken atejir la cica cii kure ijir ta ikyaa a Mbashiada. Mbaajiriv mbara yange ve wua ijir i Atejir u Shin Tine u Nengen sha Iertom yange vande kuren ken inyom i 1997 la, ve hide ve kaa a atejir shon ér a̱ hide a time sha apelekeshen u yange Mbashiada nger la.

Atejir u Atindigh u Shin Tine la maa yar tom a ian la sha u wan zwa sha mzough u vesen u a lu hen atô u Taregh a iniongo i ukwaghaôndo la. Sha mimi yô, mba fe mlu u ma kwaghaôndo “ka lu sha akaa a a ne jighjigh a mi la ga kpa ka i lu sha aeren a na la.”

Shi atejir la kaa wener, zum u yange Mbashiada “tile paleghaa til i Mbakristu” la, yange ve gema ve lu “hendan a atindiakaa a gomoti u mbakpishiv la ga” shi ve “soo u geman ma gomoti ugen veren sha ityough ki gomoti u mbakpishiv la kpaa ga.” Sha nahan yô, mwe u Mbashiada ve we ave ken kwagh u patii ga la tseegh yô, a̱ de tagher kwagh ken mkaa u ve kaa ér ve mba ken myer ga la ze.—Yohane 18:36; Mbaromanu 13:1.

Shi atejir la kaa wener or u nan ne jighjigh di tsô yô—a̱ lu Orshiada shin a̱ lu or u ken kwaghaôndo ugen kpaa—shighe gen Tar u nan ka u ker kwagh hen a nan man i hingir nan haghelaa sha er jighjigh u nan u nan a lumun kwagh la ga yô. Man aluer or la tsua u eren sha imoshima i nan nahan nan “hemba dondon atindiakaa a kwaghaôndo u nan a atindi a taregh yô,” Tar la ua fatyô u nengen kwagh la ér nan ngu a ishô u̱ dondon ian i nan lu a mi u eren kwaghaôndo u sha ishima i nan la, nan aver ian shon ga.—Aerenakaa 5:29.

Ijir i yange atejir ne kure la hingir zege itinekwagh ken abaver wuee. Shi kpuaa hanma pipaabaver i ken tar u Jamani cii yange ma i̱ tôô abaver sha kwagh u ijir ne. Ityôv mbi televishen mbi vesen man mbi redio cii yange mbi tema imôngo sha kwagh ne. Er i gbe je mba a̱ vande samber a iti i Yehova wuee ken tar u Jamani imba ne ga.

[Picture Credit Line on page 31]

AP Photo/Daniel Maurer