Ve Bugh Ashe Ibugh Ve

INJAKWAGH igen ken Najeria kaa ér: “Mbaganden fa kwagh, kpa mbayev bugh ashe sha ibugh ve.” Edwin, ortamen u ken Kristu ugen ken Najeria kav mimi u kwaghôron ne.

Yan gen yô, Edwin nenge a akwati u iyôô shin ityô tebul ken ya na.

Edwin pine mbayev nav mbautar wener: “Kwagh ne ka u ana?”

Emmanuel, wan na u lu anyom anigheni la gema kaa ér: “Ka u wam.” A seer fese wener anakwati u iyôô u a te nduran iyol a lu aseva 12 sha azongo a anyiin shi a lu a ian sha ityo ne ngu sha ci u iyua i tom u Mbashiada mba Yehova ve eren tar sha won cii la. A pase wener: “Er m ze ken Iyou i Tartor hanma sev ga yô, m er akwati sha ci u hanma shighe u m vihi inyaregh ki i nem ér m yam kuese a mi la ga cii yô, me gbihi ki shin akwati ne.”

Ter u Emmanuel kpa lu a akwati ken ya u koson inyaregh ki zan mkohol u vesen u sha inyom la. Kpa aburabur kohol ve hen tsombor yô, nahan ve vihi inyaregh kira. Emmanuel ti soo ér i̱ vihi inyaregh nagh ki eren iyua a mi la sha ma awashima ugen ga yô, a tôô an tse panpan a za na or u nyaden inyelegh ér a̱ cir un zwa na la. Or u nyanden inyelegh la fe awashima u Emmanuel yô, maa a er anakwati sha abamber a iyôô a na un. Michael, anmgbian u Emmanuel u lu anyom ataan la di kpaa za er anakwati.

Kwagh u mbayev mban er ne kpiligh Edwin iyol, tsô a pine ve ityôkyaa i i ne ve ve er mbaakwati mbara yô. Michael kaa wener: “M soo u eren iyua!”

Emmanuel man Michael man Uchei, anmgbian ve u kwase u lu anyom ataankaranyiin la, ve cii ve lu vanden tôndon inyaregh ki yange a̱ na ve ér ve̱ yam kuese a mi la koson shin mbaakwati mbara, kpa mbamaren vev fa ker ga. Yange ve zua a mhen la hana? Er mbayev mbara yange mba vesen mba ngur kôron inyaregh ave ve je tsô, mbamaren vev maa tese ve u wan inyaregh shin akwati u eren iyua u ken Iyou i Tartor la. Sha mimi yô, mbayev mbara yange ve hen kwagh la ve fa dedoo je gande.

Yange mbaakwati mba shonov mba ivin yô, maa i bugh ve. Kwagh u yange i koso la cii lu $3.13 (er ₦350 nahan)—ka zege inyar ken tar u inyaregh ki ior ve zough a mi sha inyom jimin kpa ki lu di udubu kpuaa tseegh yô. Ka amba a iyua a nan a mkighir shio angan nahan a lu suen tom u pasen kwaghaôndo ú Mbashiada mba Yehova ve lu eren hegen ken ityar 235 tar sha won cii la ye.