Ú Nenge Wer Mimi Je Kristu Ka Orhemen Wase Kpa?
Ú Nenge Wer Mimi Je Kristu Ka Orhemen Wase Kpa?
“Man I̱ de yer ne er, mbahemenev, kpaa ga, gadia Orhemen wen ngu môm tsô, ka Kristu.”—MATEU 23:10.
1. Ka an tseegh nan lu Orhemen u Mbakristu mba mimi?
LU TOMAHAR sha iyange i Nisan 11 la. Mase shin ayange atar tsô maa a wua Yesu Kristu. Lu kwa u masetyô u una za ken tempel je ne. Sha iyange shon ne, Yesu tese ikpelaior i i kohol her la man mbahenen nav cii ityesen i injaa. A kaa ér: “I̱ de yer ne er, rabi, ga, gadia Ortesen wen ngu môm tsô, man ne cii ne mba anmgbianev. Man shi de yer nen ma or shin tar ne ner ter wen ga, gadia Ter wen ngu môm tsô, ka u A lu Sha la. Man i̱ de yer ne er, mbahemenev, kpaa ga, gadia Orhemen wen ngu môm tsô, ka Kristu.” (Mateu 23:8-10) Ikyav tese wang ér Yesu Kristu ka Orhemen u Mbakristu mba mimi.
2, 3. U veren ato a Yehova shi lumun a Orhemen u a ver la una va a nyi ken uuma aseva?
2 Hemen u Yesu la ngu ve a mtsera u injaa ken uuma asev shighe u se lumun ú la kpen kpen! Yehova Aôndo yange ngur tsenganôron kwagh u mve u Orhemen ne sha ikyev i profeti na Yesaia yô, á kaa wener: “Ne mba imura i ker ne cii, va nen hen mnger, kua u nan lu a inyaregh je ga kpaa; va nen, va yam nen, ya nen, een, va nen, va yam nen wain kua atumbabua, á lu sha inyar ga, man sha ishe i wan kpaa ga. . . . Ver nen ato her a Mo, sule nen iyol sha u ungwan, ya nen kwagh u a lu u dedoo yô, man i̱ doo uma wen iyol a taryan u wan ahôm. . . . Nenge, M ver un Mer, a̱ lu shiada hen ior a̱ lu orhemen man orwan akuraior kwagh.”—Yesaia 55:1-4.
3 Yesaia yar tom a zarkwagh—inja er mngerem man atumbabua man wain nahan—sha inja i ikyokwaghôron, sha u tesen er ka sea ungwa imo i Yehova sea dondo Orhemen man Orwankwagh u a ne se la ve, kwagh la a bende a uuma asev yô. Kwagh u ka se zua a mi la ka a lu u kundunyol. Ka inja er ka wea ma kuca mnger u ndôhôr keghelee sha nom iyange ve i kundu ú iyol nahan. Imura i i ker se i kwagh u mimi man perapera la cii ka i bee. Er atumba nga a taver anikyundanev mba forototo shi a wase ve u vesen nahan, ‘atumba a kwaghôron’ nga taver se shi nga wasen se u vesen ken jijingi ken mlu wase vea Aôndo la. (1 Peteru 2:1-3) Man ka an je nana nyiman ér wain ne msaanyol hen iniongo ga sha wono? Kape mcivir u civir Aôndo u mimi man m-dondo u dondon Orhemen u a ver la kpa ka a na uma a “mgbough a iember dedoo” vough je la. (Duteronomi 16:15) Nahan ka hange hange u se cii—igyumior man mbabeenyol, nomso man kasev kpaa—se tese ser hemen u Kristu la ngu se kwagh u kpegh ga. Nahan se tese ken uuma asev ayange ayange ser Mesiya ka Orhemen wase nena?
Ikyaior—Yemen Nen “Hemen Hemen sha Mfe”
4. (a) Kanyi yange i er shighe u Yesu lu anyom 12 ve za ken Yerusalem sha shighe u Paseka laa? (b) Yesu yange lu a mfe kpishi, shighe u lu anyom 12 tseegh la nena?
4 Time sha ikyav i tesen i Orhemen wase yange ver igyumior la. Shin er se fe fan kwagh u iyev mbu Yesu ga nahan kpa, kwagh ngu môm u se fe yô. Zum u Yesu lu anyom 12 la, mbamaren nav tôô un za zende u yange i zaan hanma inyom ken Yerusalem sha u za eren iniongo i Paseka la. Hen shighe ne a tume ityou lamen a ior ken Ruamabera, maa mena tsombor na ishima, ve undu un ken ijime ve yem. Ayange nga karen atar yô, mbamaren nav Yosev man Maria, mba ishima za ve iyol yum la, ve mase va zuan a na ken tempel, “tema her atô u mbatesen, lu ungwan ve, man shi lu pinen ve akaa.” Heela tseegh ga, “mba ve lu ungwan Un cii, kpiligh ve iyol sha mkav Na man sha mbamrumun Nav kpaa.” Nenge ase yô, er Yesu lu anyom 12 tseegh la je, kôr cio u pinen mbampin mba sagher ior ken asema mba sha akaa a ken jijingi tseegh ga, kpa shi lu nan mbamlumun sha kwaghfan kpaa! Yange zua a iwasen ken ityesen i mbamaren nav tese un la je ka u tunan ga.—Luka 2:41-50.
5. Igyumior ia gbidye kwar sha ieren ve i ve lu a mi sha kwaghhenen u hen tsombor la nena?
5 Alaghga ú ngu gumor. Aluer mbamaren ou ka mba civir Aôndo a uma ve cii yô, alaghga ve ver iaven i tsombor ua henen Bibilo hen ya wou hanma shighe yô. Ú nengen kwaghhenen u hen tsombor la nena? Er nan ú gbidi kwar sha mbampin mban ga, wer: ‘M suen mserakaa u i ser i ver sha u henen Bibilo hen tsombor la a ishima yam i môm kpa? M dondon un sha u eren ma kwagh môm u una nzughul mserakaa shon ga kpa?’ ‘M nyer iyol ken kwaghhenen la m shin uwegh ga kpa? Shighe u i gbe i doo yô, m pin mbampin sha kwagh u i lu henen la shi m we zwa m pasen e̱r a yar tom sha mi la kpa? Er m lu zan hemen ken jijingi la, m ngu maan isharen i “kwaghyan u taver [u a lu] sha ci u mbaganden” la kpa?’—Mbaheberu 5:13, 14.
6, 7. Bibilo i ôron hanma iyange la ia fatyô u lun a inja hen igyumior nena?
6 Iaven i ôron Bibilo hanma sev la kpaa ngi a inja. Orpasalmi wa icam kaa wener: “I saan or u nan zenden sha mhen u mbaaferev ga la iyol, . . . atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye.” (Pasalmi 1:1, 2) Yosua, u yange Mose va lu ga ve kar tile sha ityough nagh la, yange ‘zer timen ken ruamabera u atindigh tugh man atetan.’ Kwagh ne na un u eren kwagh sha kwaghfan, shi a zua a mzehemen sha u eren tom u Aôndo na un la kpaa. (Yosua 1:8) Orhemen wase Yesu Kristu kaa ér: “I nger er: Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.” (Mateu 4:4) Aluer se mba ye kwaghyan u ken iyol hanma sev yô, i̱ hemba gban se ishima u yan kwaghyan u ken jijingi la hanma shighe cii!
7 Zum u Nicole u lu anyom 13 la va kav ibanave na i ken jijingi yô, maa hii u ôron Bibilo hanma sev. * Hegen u a lu anyom 16 ne, á ôr Bibilo jimin cii a bee kwa môm, shi a hii u ôron i̱ kwa u sha uhar je a za a mi gba atô. Gbenda u a lu eren kwagh ne u taver ga. Á kaa ér: “M ngu a gbashima mer a̱ bunde kpa me ôron ityough i môm hanma iyange.” Bibilo na i ôron hanma iyange la i̱ wase un nena? Á na ikyar ér: “Akaabo dumbur ainge. Ka m tagher a akaa a zan mo iyol sha makeranta man sha ajiir agen kpaa a ka a hendan a jighjigh u nan wam yô. U ôron Bibilo hanma iyange la ka a wasem u umbur atindi a Bibilo kua akaawan fese a ka a taver mo ishima u hendan a mbamkighir mban yô. Kwagh ne na yô, m hen mer m hemba ngun ikyua a Yehova man Yesu cii.”
8. Ka ieren i nyi yange Yesu lu a mi sha kwagh u shinagoge, man igyumior ia hen u dondon un nena?
8 Yange lu ieren i Yesu u keghen ato shi lun a ci ken Ruamabera u ôron u ken shinagoge la. (Luka 4:16; Aerenakaa 15:21) Doo u igyumior ia dondo ikyav la sha u lun ken mbamkombo Mbakristu hanma shighe, hen ape i er Bibilo shi i timen ken i̱ la! Richard u a lu anyom 14 la wuese mbamkombo mban, á kaa ér: “Mbamkombo mban mbam a inja je zua ga. Hanma shighe u m ze ve yô, ka i umbur mo kwagh u a lu u dedoo man u bo la , kua inja i dedoo man inja i dang, man kwagh u a lu sha inja i Kristu man u a lu ga kpaa. Ka u kwagh a va tserem cii ve, me mase kaven kwagh ne ga.” Een, “mpase u TER ka u jighjigh, ka a na orlanenkwagh nan hingir orfankwagh.” (Pasalmi 19:7) Nicole kpaa ver ishima u zan mbamkombo mba utaan mba i ze ken tiônnongo sha hanma sati la cii. Shi ka a tema i kuma je er ahwa ahar zan zan atar nahan sha u wan ago iyol sha ci u mbamkombo.—Mbaefese 5:15, 16.
9. Igyumior ia yem “hemen hemen sha mfe” nena?
9 Ka shighe u or lu iyev la i hembe doon u nana ‘fa Aôndo u mimi tswen, man shi Yesu Kristu, Un u a tindi la, la’ ye. (Yohane 17:3) Alaghga ú fa igyumior i ka i tôô shighe gôgônan u ôron ityakerada i hômon kwagh shi nengen televishen shi eren anumbe a sha vidio shin keren akaa sha Intanet yô. Á e̱r nan ve ú dondo ve aluer ka u ú fatyô u dondon gbenda u vough u Orhemen wase yôô? Er Yesu lu wanye la je, kwagh u hemba saan un iyol yô lu u henen kwagh u Yehova. Man lu nyi i̱ va ken kwagh laa? Er akaa a ken jijingi doo Yesu ishima yum yô, “lu yemen hemen hemen sha mfe.” (Luka 2:52) We kpa ú fatyô u eren nahan.
“Ungwan Nen Ayol A En”
10. Kanyi ia wase uma u hen tsombor una lu ijiir i bem man msaanyolo?
10 Ya una fatyô u lun ijiir i bem man mkom a lu her yô, shin una lu ijiir i iyongo man num. (Anzaakaa 21:19; 26:21) Mngohol u se ngohol hemen u Kristu la seer nan se bem man msaanyol ken tsombor. Sha kpôô yô, kwagh u Yesu er la ka ikyav i tesen hen ior mba hen tsombor cii. Ruamabera kaa ér: “Ungwan nen ayol a en sha ci u cian Kristu. Kasev, ungwan nen imo i noov enev er ka Ter nahan, Gadia nom ka ityough ki kwase di er Kristu kpaa A lu ityough ki nongo Na nahan man ka Un je A lu Oryiman u iyol Na la kpaa ye. . . . Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan.” (Mbaefese 5:21-25) Apostoli Paulu yange nger hen tiônnongo u ken Kolose la, ér: “Ne ônov kpaa ungwan nen imo i mbamaren enev ken akaa cii, gadia ka kwagh u doon Ter je ne.”—Mbakolose 3:18-20.
11. Nom nana tese ér mimi je Kristu ka orhemen u nan nena?
11 Inja i kwaghwan ne yô ér noov ve̱ hemen ken tsombor, kasev vev di ve̱ ungwan imo i noov vev, shi mbayev kpa ve̱ ungwan imo i mbamaren vev. Hemen u or ka ú va a msaanyol zum u i hemen sha inja la tseegh. Gba u nom u fankwagh una hen u hemen sha u dondon ikyav i un u a lu Ityough nagh man Orhemen na la, ka Kristu Yesu je la. (1 Mbakorinte 11:3) Shin er ken masejime yô Yesu va hingir “ityough sha akaa cii ken nongo u Kristu” nahan kpa, a va shin tar, “lu sha u i̱ er Un tom ga, kpa sha u Un Una er mbagenev tom.” (Mbaefese 1:22; Mateu 20:28) Kape i lu u nom u nan lu Orkristu kpa nana er vough je la, nana hemen sha u keren kwagh u nan iyol i nan tseegh ga, kpa nana ker kwagh u sha ishima i kwase u nan man mbayev mba nan—een, kwagh u sha ci u tsombor cii. (1 Mbakorinte 13:4, 5) Imba nom la keren u dondon aeren a sha inja i aôndo a Yesu Kristu, un u a lu ityough nagh la. Ka nan lu a ishima i legh legh shi nan kehen ityough kpaa ga, di er Yesu nahan. (Mateu 11:28-30) Ka taver nan u ôron kwaghôron u legh legh imba er u kaan ér, “Yam a nyi,” shin “ú kaa vough,” shighe u nan er kwagh u shami ga la ga. Ikyav i nan i dedoo la ka i wase kwase u lun “or u wasen” u “lun er un nahan” man “ijende” i nan kpaa, u nan henen kwagh sha ikyev i nan shi nan eren tom ikyooso ikyooso vea nan kpaa yô.—Genese 2:20; Malaki 2:14.
12. Kanyi ia wase kwase u kuran tindi u i we sha kwagh u hemen laa?
12 Gema sha vegher u kwaseya yô, nana ungwan imo i nom u nan la. Nahan kpa, aluer jijingi u tar ne bende a nan yô, alaghga kwagh ne una hii u vihin mnenge u nan nengen tindi u hemen la, maa mhen u ungwan imo i or la una kera lu sha ishima i nan ga. Ruamabera kaa ér or a̱ de tesen mhembe ga, kpa a gema a soo ér kasev ve̱ ungwan imo i noov vev. (Mbaefese 5:24) Shi Bibilo wa nom shin ter tom sha ikyev, man shighe u i dondo kwaghwan u i ne la yô, kwagh ne una wase u van a bem man mkpeyol hen tsombor.—Mbafilipi 2:5.
13. Ka ikyav i̱ ungwan mbamaren i nyi Yesu a tese mbayeve?
13 Ka u Mbayev vea ungwan imo i mbamaren vev. Yesu yange ver ikyav i dedoo sha gbar ne. Kwagh u yange er ken tempel shighe u Yesu lu anyom 12 ve i undu un ken ijime kuma ayange atar la, yange karen kera yô, “A yem a [mbamaren nav], A va ken Nasareti, A lu ungwan imo ve.” (Luka 2:51) M-ongo u mbayev ve ongo imo i mbamaren vev la wasen u van a bem man mzough u dedoo ken tsombor. Hanma or u ken tsombor ka nana̱ na iyol i nan sha ikyev i hemen u Kristu yô, tsombor u lu saan saan.
14, 15. Kanyi kwagh ia wase se shighe u se tagher a mzeyol ken ya yôô? Tese ikyav.
14 Zum u ashighe a taver a mough hen ya je kpaa, kwagh u vesen u nan zakera yô ka u dondon Yesu shi lumun ityesen na la. Ikyav i tesen yô, ivese i Jerry u lu anyom 35 er vea Lana u lu ngô u anyekwase ugen u yinan anyom ikundu la, va a mzeyol u mô ve môm yange nan vande henen sha mi ga yô. Jerry pase wener: “M fa je mer u lun orya u dedoo yô, gba u me dondo atindiakaa a ken Bibilo a a ne icombor igen mzehemen la. Kpa ica gba ga tsô m kav er í gbe u me hemba yaren tom a atindi shon sha kwaghfan man mkav yô.” Kwagh na yange vihi wan u kwase na yange mar u kwase la ishima je, a nengen ér ka un un til hen atô na vea ngô na ye. Yange gba u Jerry una gbidye kwar sha mkav ve, una nengen e̱r ieren ne i bende a kwagh u wankwase la ôron shi eren la ye. Yange er sha kwagh ne nena? Jerry kaa ér: “Lana man mo se lumun ser hegen di tsô yô, Lana una nengen sha vegher u tsaha u ormaren la, nahan mo me ver ishima sha u maan mlu u dedoo vea wan u kwase wam ne. Ka ze deghôô yô, kwagh ne kure doo doo.”
15 Zum u se tagher a mbamzeyol hen ya yô, gba u se ver ishima se fa kwagh u a ne ve ior mba hen tsombor mbara ve lu lamen shi eren kwagh u ve lu eren la yô. Shi gba u se lu a mfe u yaren tom a atindiakaa a Aôndo sha inja. Ikyav i tesen yô, Yesu yange kav wang er yange hii ve kwase u lu yan ican a imborawambe la bende a na yô, shi er kwagh a na sha mfe man sha mhôôn kpaa. (Levitiku 15:25-27; Marku 5:30-34) Kwaghfan man mkav ka aeren a Orhemen wase. (Anzaakaa 8:12) A saan se iyol kpishi aluer se er kwagh sha gbenda u un kpa ma a er la yô.
“Vande Keren Nen Tartor Na”
16. Kanyi kwagh i lu kwagh u vesen ken uuma aseve, man Yesu tese kwagh ne sha ikyav na la nena?
16 Yesu yange tese kwagh u una lu tamenkwagh ken uuma mba ior mba vea lumun hemen na la wanger wanger. A kaa ér: “Vande keren nen tartor [u Aôndo] man perapera Na, man akaa ne cii á seer ne a ye.” (Mateu 6:33) Man lu sha ikyav i tesen na je, tese se u eren kwagh ne ye. Zum u Yesu er batisema bee yô, a hôr kwaghyan shi lu henen ken ishima shi eren msen zan zan ayange 40 nga been yô, a tagher a imeen. Satan Diabolo yange na un hementor sha “ityartor i sha won cii.” Gbidye ase kwar sha er uma u Yesu yange ma lu, luun er yange ngohol kwagh u Diabolo na un la yô! Kpa, Kristu yange ver ishima sha u eren ishima i Ter na. A kav kpaa ér uma u ken tar u Satan ka kwagh u tsan ga. A venda naagh ku Diabolo la fese je, a kaa ér: “I nger er: Civir Ter, Aôndo wou, ka Un tseegh er Un tom ye.” Ica i gbe ga tsô maa, Yesu “hii u ôron kwaghaôndo, gba kaan er: Gema nen asema, gadia tartor u Sha mgbôghom ve.” (Mateu 4:2, 8-10, 17) Ken uma u Kristu shin tar cii, lu or u yôôn angwe u Tartor u Aôndo hanma shighe.
17. Se tese ser akaa a Tartor nga hiihii ken uuma asev nena?
17 Se dondo nen Orhemen wase, shi mayange se na nen tar u Satan ne ian ser u̱ mee se ga, se de ser u̱ ver se tom u van a inyaregh kpishi, shi u keren tom kpaa i̱ lu tamen kwagh ken uuma asev ga. (Marku 1:17-21) Aluer se kange iyol yase ken kper u akaa a taregh ne je se gema akaa a Tartor se gbihi ken ijime yô, a vihi kpishi! Yesu wa se tom u pasen kwagh u Tartor shi geman ior hingir mbahenen la sha ikyev. (Mateu 24:14; 28:19, 20) Een, alaghga se lu a tsombor shin ityom igen i nengen sha mi, kpa saan se iyol u yaren tom a aan a se lu a mi aikighe kua ken m-bee u sati la sha u eren tom wase u Mbakristu u pasen ior kwagh shi tesen la gaa? Ken inyom i tom i 2001 la, iorov 780,000 er tomshiren u keke shin tom pania, nahan kwagh ne kpa taver se ishima tsung!
18. Kanyi ka i wase se u zuan a iember ken tom nee?
18 Ngeren u Ivangeli la tese ér Yesu eren kwagh sha ishima i taver shi ngu a ishima i kundu kundu kpaa. Zum u a nenge mgbe u ken jijingi u ior mba ve kase un la yô, mhôônom kôr un a ve, maa a na ve iwasen sha gbashima je. (Marku 6:31-34) Tom wase ka u lu tom u iember zum u i lu mdoo u mbagenev ve doo se ishima, man isharen i̱ se lu a mi sha mimi ser ma se wase ve la i̱ mgbegha se yô. Kpa se zua a imba isharen la nena? Gumor ugen u i yer iti na ér Jayson yô ôr wener: “Shighe u m lu anyom pue kar a kar la, tom ne fa doon mo ga.” Kanyi yange i wase un u maan dooshima sha tom nee? Jayson na mlumun ér: “Tsombor wam yange ú ver hanma iyange i sati pepe sha ci u kwaghpasen. Kwagh ne doom kpishi, ityôkyaa yô, er yange mea seer a seer duen kwaghpasen la, kape shi m hemba nengen a kwagh u dedoo u a lu ker, shi ú hemba doon mo u eren kpaa je la.” Se kpaa se er nen tom ne hanma shighe cii shi se er nen ú sha gbashima kpaa.
19. Se kange ishima u eren nyi sha kwagh u hemen u Kristu laa?
19 U lumun a hemen u Kristu la ka kwagh u kundun iyol man u injar kpaa. Zum u se er nahan yô, iyev asev mbua lu shighe u seer mfe man kwaghfan kpaa. Uma u hen tsombor la una hingir u nan se bem man msaanyol, man tom ne di ua hingir u̱ van se a iember man mkom. Se kange nen ishima sha afatyô wase cii sha er se tese ken uma wase u hanma iyange la man ken hanma kwagh u se tsough u eren cii ser mimi je Kristu ka orhemen wase. (Mbakolose 3:23, 24) Yesu Kristu ngu hemen se sha gbenda ugen kpaa—ka tiônnongo u Kristu je la. Kwaghngeren u a dondo ne una time sha er se fatyô u zuan a iwasen sha mne u i ne se ne yô.
[Footnote]
^ I gema ati agen.
Ú Umbur Kpa?
• U se dondon Orhemen wase u Aôndo a ver la ve se a mtsera nena?
• Ikyaior ia tese ér ka ve ape dondon hemen u Yesu la nena?
• Hemen u Kristu la bende a uma u hen tsombor u mba ve lu sha ikyev i ú la nena?
• Tom wase u se lu eren la ua tese ér mimi je hemen u Kristu gba se kwagh nena?
[Study Questions]
[Pictures on page 11]
Shighe wase u uye la ka u dedoo u zuan a mfe u Aôndo man u Orhemen wase u a ver la
[Picture on page 12]
U lun sha ikyev i hemen u Kristu la ve a msaanyol hen tsombor
[Pictures on page 14]
Yesu yange ver Tartor hiihii. We kpa ka nahanaa?