Ú Nenge Kwagh u Kuugh Nena?

SEA lu gbong gbong shin sea lu yôughyôugh, sea eren ityom yase i sha ayange ayange la je kpaa, or kaan aa ku ga. Ku ua fatyô u wuan se shighe u̱ se lu peren godobi shin se yav ken iyou yase je kpaa. Uaahe imba er num tan u nongo u wan tswam yange ve ta sha gar u New York City man Washington, D.C. sha uwer u Setemba 11, 2001 la, na se fa ser mimi je, “orihom u masetyô,” ku, ngu wuan ior hanma ijiir cii man u ver a ver anyom a mar ga, ashighe agen je yô, ngu u wua ior i kuma udubu imôngo ken miniti kpuaa tseegh.—1 Mbakorinte 15:26.

Er kwagh a lu nahan kpaa, ka inja er kwagh u kuugh ngu a maa ior iyol u ungwan nahan. Ma kwagh ugen u una er ve una na ior a yam upipambaabaver kpishi shin una na ior a ver ishima sha u ungwan abaver sha televishen er abaver a kuugh nahan kpa ngu ga, hemban cii je yô ku u ikpelaior kpishi i kpe ken uaahe mba ve kpilighyol yum la. Ka i hemba hangen ior u ungwan abaver a kuugh seer cii, ka a̱ lu mtim u timin ior ken uitya man aahe u igbetar man ipila shin angev je kpaa. Mlu u kwagh u kuugh a lu ior ken asema kpishi ne na yô, ior ka ve vaa ku u ashagbaaior shin mbaduenati ve sar la je i gande.

Anyiman a gban nga sha kwagh ne ga. Kwagh u ku u ior mbagenev ngu a maa ior iyol u ungwan kpishi. Nahan kpa, u henen kwagh u aluer ka ku ve di ye la yô ka i cier ve iyol. Kwagh u se mbagenev kpishi se soon u henen sha mi ga yô, ka ku wase.

Ku Ka Kwagh u Cier Se Iyolo?

Or môm u i doo nan u henen kwagh u ku u nan kpa nan ngu ga, man kwagh la una za hemen u lun nahan. Er nan ve kwagh a lu nahana? Ka sha ci u Aôndo wa isharen i lun uma gbem sha won la ken a vese ngi taveraa je. Orpasenkwagh 3:11 kaa ér: “A ver mtsôr ken asema a [ase].” Mlu u i lu kwagh u or a kpe keng ne, va uumace a haghelaa ken ishima, ka mzeyol u ka ve zer henen sha mi hanma shighe yô. Nahan, u wanger a haghelaa u ken ishima ne kera man kuren isharen i gbaaôndo i lun uma la yô, uumace due a atesen atô kposo kposo, hii sha ityesen i uma kpen ga la zan zan ar sha ityesen i or ka nan kpe shi i hide i mar nan la.

Aluer kwagh ngu nahan je kpaa, ku ka kwagh u nan zayol shi u tan hindi iyol kpaa, man mciem ma kuugh ma tser tar cii. Nahan i̱ de kpiligh se iyol ga, ku ka kwagh u a taver tsombor u uumace jimin cii yô. Kwagh ugen u a lu yô, ku tese ér u keren uyôughyôugh mbaakaav man tahav ken uma la cii ka gbilinkwagh dang je.

Ku Ngu Palegh Or a Ioro?

Tsuaa la yô, i lumun ér oruange u nan zulum ken ku shin or u nan vihi iyol kehelee yô, nana kpe hen ijiir i i hoghol nan her man hen ya u  nan la. Kape sha ashighe a i nger Bibilo la kpaa lu la, zan zan hegen je kpaa akuraior agen nga eren aeren ne her. (Genese 49:1, 2, 33) Mba i lu ieren ve u eren nahan ne yô, tsombor ka u kumba imôngo u lamen, mbayev kpa ve lu her. Ierkwagh ne ka i tese ér hanma or hen tsombor nan ngu ken mzungu tswen ga, shi kwagh ne a na ve msurshima ér ma or ngu a ibo sha ku la ga shi mba zungwen imôngo kpaa.

Ieren ne kaha kposo a kwagh u i eren sha ajiir a í tswer u ôron kwagh u kuugh yô, shi í nenge ér ka kwagh u kondon iyol, shi ka í soo ér mbayev ve̱ de fe kpaa ga, sha ci u í hen ér “a cier ve iyol je a gande yô.” Gbenda u ior ve saan ku sha ayange a ase ne ngu kposo sha igbenda kpishi man ashighe kpishi ior ka ve sar ku shighe u ve lu ve tswen yô. Nahan kpa, a hemba doon ior kpishi u ma ve sar ku hen ya ve ken bem ape tsombor ve ua lu nengen sha a ve sha dooshima yô, kpa kwagh u vihin yô, mbagenev kpishi mba hembe saan ku ken iyouci a u or lun her shio man i lu ken ican shighe u i lu eren ve twer u cier iyol u sha iwavaren la. Ken gbenda ugen yô, ior umiliôn kpishi ka ve gba kpen di imôngo icin i môm tsô—ka ve kpe ku u tìm-ikurior man ijen i gban man AIDS man ityav shin ma ibanave i vesen.

Hen sha Kwagh La

Bibilo venda mhen u henen sha kwagh u kuugh ga. Takerada u Orpasenkwagh 7:2 kaa ér: “Guda u zan hen ya u mlia a u zan hen ya u iniongo, gadia ngura ka mkur u ior cii.” Shighe u kwagh a er se je i zulum shin ku yô, alaghga kwagh a kera gba se sha mbamhange asev shin sha ityom yase i se eren ayange ayange la ga, ishima ia hemba haren se sha mlu u uma a lu tiônôô ne. Kwagh ne una wase se u eren a uma wase sha gbenda u injaa, se kera nzughul a mi shin se er a mi dang kpaa ga.

Ka mnenge u nyi ú lu a mi sha kwagh u kuugh? Ú time sha mbamhen ou man jighjigh man ishimaverenkeghen you man mciem ma sha kwagh u mkur u uma wou vee?

Er i lu kwagh u or nana fatyô u pasen kwagh u uma ga nahan, kape kwagh u kuugh kpaa a gande or u pasen man fan je la. Or u i lu nan tseegh nan lu a tahav mbu ôron kwagh u a kom yô, ka Orgban wase. Ka un a lu “imbor i uma” ye “iku i waren kpaa” ka hen a na i lu ye. (Pasalmi 36:9; 68:20) Er i lu inja er kwagh ne ka kwagh u kpilighyol nahan kpaa, u timen ken Mkaanem ma Aôndo sha kwagh u atesen a vesen agenegh a i tesen sha kwagh u kuugh la una va se a msurshima man myôhôryol. Ma pase ér ku ka mkur u hanma kwagh ga.

[Blurb on page 4]

Mve u ku ua fatyô u van hanma shighe ne wase se u lun a uma wase ken gbenda u u hembe lun a inja cii yô