U Timen sha Ukwaghhir Mbagen mba Sha Kwagh u Kuugh Vighe Vighe

ER I gbe je tsô, or ngu ken mlu u kondon iyol man u cier iyol kpaa sha ci u ishimaveren i yange nana kpe la. Kwagh u a seer kenden atôndo a mciem ma kuugh yô, ka atesen a ukwaghaôndo mba aiegh man aeren a uter a a dumbur ne man jighjigh u nan u ior ve̱ lu a mi ayol a ve hoghom hoghom ne. Kwaghbo u a lu ken mciem ma kuugh yô, ma a fatyô u nan or vôron nahan kera ember uma ga shi vihin vangertiôr u or sha u henen ér uma ngu a awashima ga.

Ka Kwaghaôndo u i fe un yum la je a hembe lun a ibo sha u duen a ukwaghhir mba sha kwagh u kuugh ne ye. Time sha ukwaghhir mban kpuaa man kar ve sha mimi u kwaghôron u Bibilo la, nahan nenge aluer ú zua a iwanger sha mbamhen ou mba sha kwagh u mciem ma kuugh la yô.

Kwaghhir 1: Ku ka gbenda u sha gbaaôndo u kuren uma.

Takerada u i yer ér Death—The Final Stage of Growth la kaa ér: “Ku . . . ka kwagh u a lu ken uuma asev hoghom hoghom yô.” Akaaôron a ngan lumun a jighjigh u i ne ér ku ka kwagh u gbaaôndo, ka gbenda u mkur u akaauma cii la. Nahan imba ityesen la va ior kpishi a mhen u kpeegh u nyiman er uma ka gbilin kwagh la man ityesen i aiegh kpaa.

Kpa mimi je, ku ka gbenda u sha gbaaôndo u mkur u umaa? Ka mbatôvon sha akaa cii ve ne jighjigh nahan ga. Ikyav i tesen yô, zum u i pine Calvin Harvey, ortôvonshaakaauma u a henen sha kwagh u iyolbeen i uumace mbampin yô, á kaa ér un na jighjigh ér “i gba uumace ér ve kpe ga.” William Clark, or u timen sha tahav mbu yangen angev la kpaa kaa wener: “Ku ka ilyeghegh ki uma ga.” Shi Seymour Benzer, u ken California Institute of Technology la kaa ér, “hemba doon u pasen iyolbeen er ka agogo nahan ga kpa er ka kwagh u se lu a ishimaveren u sôron yô.”

Zum u mbatôvonkwaghfan ka vea time sha mndera u i fe nderan iyol i uumace yô, ka i kpiligh ve iyol. Ve kav er i ne se akaa man agee a a hembe mtse u se hemban tsan anyom a 70 zan zan 80 la ca je yô. U tesen ikyav yô, mbatôvonkwaghfan kav ér mhirinim ma uumace ma a tahav mbu vesen kpishi mbu umbur kwagh. Or u timen sha akaa ugen kèr ahaba ér mhirinim asev ma a fatyô u ombon mkaanem ma “maa iv atihi a ityakerada er umiliôn ikyundu nahan ken ayou a koson ityakerada a a hembe gban ave shin tar la cii.” Ior mbagen mbatôvon sha igbila i ken iyol kaa ér, mtse u orumace cii ka nan yar tom a tahav mbu mhirinim ma nan kpuaa tsô. Nahan, ka vough u pinen ér, ‘Hii nan ve se lu a mhirinim ma ma lu a imba tahav mbu vesen mbun kpa ka se gema se yar tom a anivur kpuaa sha shighe u se lu uma laa?’

Hide shi gbidye kwar sha ieren i uumace sha kwagh u kuugh! Ior kpishi kwagh u a hembe  vihin ve ken uma yô, ka msar u kwase shin nom ve shin ku u wan ve la. Ior kpishi ishima ka i za ve iyol shighe naleghaa je, zum u or u doon ve ishima nan sar ku yô. Ior mba ve senge ér ku ka gbenda u sha gbaaôndo u mkur u uumace la je kpaa taver ve u lumun a mhen u kaan ér, msar u ve saan ku la ka mkur u hanma kwagh cii la. Takerada u i yer ér British Medical Journal la ôr kwagh u “mhen u sha kwaghfan u a lu wuee u i hen ér, hanma or cii soo u lun uma gbem la.”

Er se nenge ieren i or sha kwagh u kuugh man tahav mbu nan mbu kpilighyol mbu umbur kwagh man henen kwagh kua isharen i lun uma gbem i i lu ken nan la nahan, kwagh ne tese ér i er or ér nana lu uma gbem ga he? Sha kpôô yô, Aôndo gba uumace a ishimaveren i ve kuren ken ku ga, kpa ér ve lu gbem sha won. Nenge ase mlu u ken hemen u Aôndo yange ver sha ci u ior mba hiihii la, ér: “Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” (Genese 1:28) Nenge ase er mlu u ken hemen la i lu kwagh u kpilighyol, u tsôron sha wono!

Kwaghhir 2: Ior ka vea kpe yô Aôndo a yem a ve ér ve̱ za lu vea na.

Ngô ugen u lun anyom 27 u lu kpen man undun mbayev utar uma la kaa a kwase ugen u a eren tom ken adua u Katoliko ér: “De va kaan a mo wer, ka awashima u Aôndo a we sha ci wam ne ga. . . . Orgen ka a ôrom kwagh ne nahan ishima i vihim a vihi.” Nahan kpa, ka kwagh u ukwaghaôndo kpishi ve tesen sha kwagh u kuugh je la—ér Aôndo ka a yem a ior ér ve za lu vea na.

Mimi je, kape Orgbanakaa a lu iferor u una gba wuan se a shin ishima shio, shin er a fe ér kwagh ne ka kwagh u vihin se ken ishima tsung nahan nee? Ei, ka Aôndo u Bibilo ga. 1 Yohane 4:8 kaa ér “Aôndo ka dooshima.” Ver ishima wer i kaa ér Aôndo ngu a dooshima shin ér Aôndo u lun a dooshima ga, kpa i kaa ér Aôndo ka dooshima. Dooshima u Aôndo ka u hemban cii man u wang man u vough, shi a dumbur ken mlu na man aeren a na kpaa, man a fatyô u ôron jighilii ér un ka dooshima. Tôôn ior ken ku yemen a ve ér ve za lu ikyua a na ga.

Kwaghaôndo u aiegh gbihi ior ken mtsum sha kwagh u ijiir i mbakpenev ve lu man mlu u ve lu ker la. Sha man hel man pugatori man Limbo—ajiir ne man agen amba ne nahan kposo kposo cii taver u fan kwagh u a man á kpilighyol kpaa. Bibilo i kaa a vese ér mbakpenev yô fa ma kwagh ga; a fatyô u tôôn mlu ve karen sha mnyam ma or yaven mem-mem la. (Orpasenkwagh 9:5, 10; Yohane 11:11-14) Sha ci u nahan yô, doo u se za ishima yase iyol sha kwagh u ka a er shighe u se kpe kera la ga, di vough er ka sea nenge or a yav mem-mem kpa ishima i za se iyol ga nahan. Yesu ôr kwagh u shighe u ior “mba ve lu shin iwar cii “ “vea due” a uma u he ken paradiso shin tar yô.—Yohane 5:28, 29; Luka 23:43.

Kwaghhir 3: Aôndo ka a yem a mbayev mba kiriki ér ve̱ za hingir mbatyomov mba shaav.

Elisabeth Kübler-Ross u a hen kwagh u ior mba ve lu uange ve zulum ken ku la tér mhen ugen u a dumbur hen atô u ior mba ve eren kwaghaôndo yô. A pase kwagh ugen u a er mimi yô, á kaa ér “ka kwagh u vihin u ôron a anyekwase u kiriki u anmgbian na u nomso a sar ku la wer kwagh u mbayev mba kiriki doo Aôndo ishima kpishi, ka nahan man a yem a anye u kiriki Johnny sha ye.” Imba kwaghôron ne ka u vihin Aôndo iti man tese ieren na man gbenda u a eren kwagh la kpaa ga. Dr. Kübler-Ross za hemen u kaan ér: “Shighe u anyekwase ne lu iyev je zan zan va hingir kwase ganden je kpaa, ishima lu vihin un a Aôndo her, anyom yange nga karen ikundugber wan na u kiriki va kpen yô, maa zua aa angev mbu shimav.”

A er nan ve Aôndo una yem a wanye sha u nan  za hingir ortyom—inja er kwagh gba Aôndo a wan la hemba mbamaren mba wan shon la nahana? Aluer mimi je Aôndo yemen a mbayev yô, hingir inja er ngu Orgbanakaa u a lu a dooshima ga, a lu or u wan hua kpaa ga zee? Bibilo ôr kwagh kposo a imba mhen la, i kaa ér: “Dooshima yô, ka her Aôndo a dugh ye.” (1 Yohane 4:7) Aôndo u dooshima una fatyô u tôôn or ken ku yemen a nan aluer uumace mba ve yen ne je kpa vea lumun a imba ieren ngin nahan ga yôô?

Nahan tsô hii nan ve mbayev ve kpene? I nger mlumun môm u Bibilo i ne yô ken Orpasenkwagh 9:11 ér: “Shighe man [aikyôr] mba ve sha gbenda ve cii.” Shi Pasalmi 51:5 kaa a vese ér, se cii se mba vough ga, se mba mbaasorabo hii shighe u i jile se ken uya la je, man kwagh u a dugh ken kwagh ne yô ka ku sha ci u ior cii ú ú ve sha igbenda kpishi la. Ashighe agen yô, ka i lu a mar wanye ga je maa nan kpe ken uya. Ashighe a gen yô, mbayev ka ve kpe sha ci u aahe shin aikyôr. Ka Aôndo a ne ve amba akaa ne a eren ga.

Kwaghhir 4: Ior mbagenev ka vea kpe kera cii yô, i za eren ve ican.

Ukwaghaôndo kpishi tese ér mbaaferev vea yem ken igyamusu shi a er ve ican i tsôron. Ityesen ne ka i mimi man i Ruamabera a tese kpa? Uma u uumace ngu a tsa je er anyom 70 shin 80 nahan tseegh. Shin aluer or ngu a ibo sha ci u kwaghbo u vihin tsung u nan er ken uma u nan jimin cii la kpaa, ka ican i tsôron i lu mtsaha u vough u nán nan yee? Ei. A lu shami ga aluer i na or ican gbem sha won sha ci u asorabo a nan er ken ayange kpuaa a uma u nan la yô.

Ka Aôndo tswen una fatyô u pasen kwagh u ka a er shighe u or nan kpe kera la ye, man a pase kwagh ne ken Mkaanem nam ma i nger la, ka Bibilo je la. Ka kwagh u Bibilo i kaa je ne, ér: ‘Er [ishôso] i kpe nahan, kape [or] kpaa a kpe la; een, ve cii iôôn ve ngi môm . . . Ve cii ka ijiir i môm vea za ye, ve cii ka shin vuulevu ve dugh, shi ka shin vuulevu kpaa vea hide ye.’ (Orpasenkwagh 3:19, 20) I jiir ne ôr kwagh tér igyamusu ga. Uumace mba hidi shin vuulevu—ka mlu u kera lun uma ga—shighe u ve kpe kera la.

Cii man i na or ican yô, nana lu a mfe u nan her. Mbakpenev mba fe ma kwagh kpa? Shi Bibilo na ikyar ér: “Mbaumav fa er vea kpe yô, kpa mbakpenev yô, fa ma kwagh ga, kera mba a ma injar kpaa ga, u umbur ve tsô kpaa mba kera umbur ve ga.” (Orpasenkwagh 9:5) Taver u mbakpenev mba ve ‘fe ma kwagh ga’ la u zuan a mnyoon ijiir igen.

 Kwaghhir 5: Ku ka mkur u mlu wase sha won vindi vindi je la.

Zum u se kpe yô, ka se kera lu uma mape ga, kpa kwagh ne tese ér ka mkur u hanma kwagh cii la ga. Orjighjigh Yobu yange fa ér una kpe yô, una yem shin uwar, shin Sheol. Kpa gema ungwa ase msen u yange er hen Aôndo la, ér: “Kpe ahii, ma U yerem shin Sheol, ma U yerem zan zan iyugh You ma i kar kera, ma U verem shighe, ma U shi U umbur mo! Aluer or á kpe yô, shi nana lu uma? . . . Ú yila, mo me gema me vengese.—Yobu 14:13-15.

Yobu yange fa wener aluer un na jighjigh zan zan ku yô, Aôndo una umbur un man shighe a kuma yô, a nder un shin ku. Ka jighjigh u mbatomov mba Aôndo mba tsuaa cii lu a mi je ne. Yesu iyol na tese mimi u ishimaverenkeghen ne shi a tese ér Aôndo una yar tom a na u nderen mba ve kpe la. Mkaanem ma Kristu ma na se vangertiôr ne ér: “Shighe ngu van u mba ve lu shin iwar cii vea ungwa imo [i Yesu], vea due kpaa; mba ve lu eren akaa a dedoo, vea za ken mnder u uma, kpa mba ve lu eren ifer yô, vea za ken mnder u ijirôron.”—Yohane 5:28, 29.

Shi ciôn tsô, Aôndo una kar a aferakaa cii kera shi una ver tar u he sha ikyev i mtemtor u sha la. (Pasalmi 37:10, 11; Daniel 2:44; Mpase 16:14, 16) Tar cii ua hingir paradiso, a lu ior mba ve civir Aôndo vea lu sha u ye. Se ôr ken Bibilo sér: “M ungwa zegeimo due ken ikônough ki torough kira kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.

I Pase Se Sha Ikyev i Mciem i Tuhwa

U lun a mfe u ishimaverenkeghen i mnder u shin ku man mfe u Or u a lu imbor i ishimaverenkeghen la ia sur ú ishima. Yesu e̱r ityendezwa ér: “Né fa mimi, mimi kpaa una pase ne una tuhwa.” (Yohane 8:32) Kwagh ne kua mpase u pasen se tuhwan sha ikyev i mciem ma kuugh kera. Ka Yehova tseegh una fatyô u karen a mlu u iyolbeen man ku man geman nan se uma u tsôron ye. Ú fatyô u nan uityendezwa mba Aôndo jighjigh kpa? Een, ú fatyô, sha ci u Mkaanem ma Aôndo ma eren aie ga yô. (Yesaia 55:11) Se mba taver we ishima ser seer henen kwagh u mbaawashima mba Aôndo a we sha ci u orumace la. A doo Mbashiada mba Yehova u wasen we.

[Blurb on page 6]

Mzeyol u a lu sha mcie u cian ku yô, ka myange u kwagh ne una fatyô u yangen or u ember uma la

[Chart on page 7]

UKWAGHHIR MBAGENEV MBA VE DUMBUR RUAMABERA ÔR ÉR NYI? SHA KWAGH U KUUGH YÔ

● Ku ka gbenda u sha gbaaôndo Genese 1:28; 2:17; u kuren uma Mbaromanu 5:12

● Ior ka vea kpe yô Aôndo a yem Yobu 34:15; Pasalmi 37:11, 29; a ve ér ve̱ za lu vea na 115:16

● Aôndo ka a yem a mbayev mba Pasalmi 51:5; 104:1, 4; kiriki ér ve̱ za lu mbatyomov Mbaheberu 1:7, 14 mba shaav

● Ior mbagenev ka vea kpe yô, Pasalmi 146:4; i na ve ican Orpasenkwagh 9:5, 10; Mbaromanu 6:23

● Ku ka mkur u mlu wase sha won Yobu 14:14, 15; Yohane 3:16; vindi vindi je la 17:3; Aerenakaa 24:15

[Picture on page 8]

U fan mimi sha kwagh u kuugh la ngu a pase se sha ikyev i mciem a tuhwa

[Picture Credit Line on page 5]

Barrators—Giampolo/The Doré Illustrations For Dante’s Divine Comedy/Dover Publications Inc.