Kwagh u Ôô-ôô A Tese La

“ÔÔ-ÔÔ u sha aôndo je kpaa, fa ashighe na . . . kpa ior Av yô, ve fa tindi u TER ga.” (Yeremia 8:7) Profeti Yeremia yange ôr mkaanem man sha u yôôn ijirôron i Yehova sha ior i Yuda i vendan mimi mba yange ve undu Yehova Aôndo ve yem civir mbaaôndo mba akuraior agen la. (Yeremia 7:18, 31) Er nan ve Yeremia yange tsua ôô-ôô sha u a lu kwagh u tesen Mbayuda mba banen a jighjigh mban kwagha?

Mbaiserael yange ve nengen a ôô-ôô hanma shighe, sha ci u karen zende na u sha inyom la ken ityar i Bibilo la, hemban cii je yô ôô-ôô u pupuu la. Ken zwa u Heberu yô, zege inyon i lihen angahar i zenden shin mnger ne ngi a iti i í zou sha mlu u kwase yô, man inja na yô ér “u a til sha mimi la; u a lu a erdoo la.” Kwagh ne ka sha inja vough je, gadia kwagh môm paven nom man mgbian ôô-ôô u pupuu er inyon igenegh nahan ga, ka ve lu imôngo zan zan saa ku. Hanma inyom yô, uôô-ôô ka vea been fam ken ityar i iceenyolough la yô, ve kpishi ka ve hide sha ajiir a yange ve vande wan iya ve ve va mough ve yem la.

Kwagheren u ôô-ôô a eren sha marami la tese ikyav i ieren i sha mimi sha igbenda i kpilighyol igenegh kpaa. Nom man mgbian inyon ne cii ka ve uven sha aji imôngo shi ve koson ônov imôngo kpaa. Takerada u í yer ér Our Magnificent Wildlife la pase ér: “Uôô-ôô ka ve tese ieren i mimi kpishi sha mlu ve u lun mbamaren la. Nom ôô-ôô ugen ken tar u Jamani pulugh za ta sha waya u usu u latriki maa usu úma un nahan á kpe. Kpa ikyar na za hemen u uven sha aji her zan zan ayange atar, sha ayange ne cii á mough sha iya kwa môm tseegh á za ker kwaghyan kpa ngôôr ga. . . . Kwagh ugen u shi er yô, yange i ta ngô ôô-ôô ugen i wua, kpa nom na za hemen u nengen sha uôn her.”

Sha kpôô yô, ieren i mimi i sha marami i ôô-ôô ngu a tese hen ikyar na u ka ve lu imôngo zan zan ku la man ikyo i wan i ka ve lu a mi sha uôn la tese ér ka ve er kwagh sha inja i iti ve i̱ “u a til sha mimi la” vough. Sha nahan yô, ôô-ôô ngu a ityesen kpishi i̱ Mbaiserael mba banen a jighjigh shi taver ityough mban yange ma ve hen kwagh sha mi yô.

Ior kpishi nyian ne nenge ieren i mimi ér ka ieren i mbatsev—i í doo, kpa á fatyô u eren í ga yô. Mseer u ivaa paven man mtswenem man inyaregh ki yan sha ifer kua igbenda igenegh i sha anyighe cii tese ér ieren i mimi kera gba ior kwagh ga. Kpa Bibilo gema nenge ieren i mimi ne ér ka kwagh u injaa kpishi u i lu dooshima man erdoo ve̱ ve á mi yô. I̱ wa Mbakristu kwagh ér ve ‘haa orhe iyol u i gbe un sha inja i Aôndo ken perapera u mimi man mtsegh u mimi’ la. (Mbaefese 4:24) Sha kpôô yô, u haan orhe iyol la wase se u lun a ieren i mimi, kpa se fatyô u henen kwagh kpishi sha ieren i mimi i ôô-ôô la.