Ibaver I Mbayôôn Tartor

‘Mkaanem ma Aôndo ma Tem Gbilin Ga’

BIBILO hoghol ior kpishi ken tar u Jamaica u ú lu ken icile i Caribbean, ape oo ka u ta ibugh ibugh la. Jim je yô, hanma diôya nôngo u lun a Bibilo i i yer ér King James Version la, nahan ior mbagenev kav e̱r ‘mkaanem ma Aôndo ma lu uma, ma tem gbilin ga yô.’ (Mbaheberu 4:12) Ma a fatyô u geman uuma mba iorov sha mtem u ma tem gbilin ga la, er i tese ikyav ken vande-eren u a dondo ne nahan.

Orgen u i yer un ér Cleveland sember za kurun tom, tsô môm ken Mbashiada mba Yehova za va u nengen a na. Er Orshiada la pase un atôakyaa agen ken Ruamabera been yô, a na un takerada u i henen Bibilo a mi u i yer er Mfe u Una Va a Uma u Tsôron La la. Cleveland fatyô u fan ér Mkaanem ma Aôndo ma a yar tom ken uma na kpishi ga.

Cleveland yange a er msen kwa tar ken iyange, a sônon ér Aôndo a tese un gbenda u vough u una civir Un yô. Cleveland kav wang e̱r mbamaren nav yange ve civir Aôndo kpa i lu sha gbenda u vough ga nahan, man er a kar ukwaghaôndo mbagenev a nenge yô iyol kpe un. Shin e̱r vande ungwan kwagh u Mbashiada mba Yehova nahan kpa, taver un u lumun ér mba tesen mimi. Shin er taver un nahan kpa, Cleveland lumun u henen Bibilo vea Orshiada u za un inya la. Lu sha ci u nyi? Lu sha ci u soo u tesen Mbashiada e̱r ve fe kwagh u ve lu eren ga yô!

Ica gba ga tsô Cleveland mase kaven e̱r mlu na u ijimbagh vea kasev kposo kposo uhar la i lu sha ishima i Aôndo ga yô. (1 Mbakorinte 6:9, 10) Er henen kwagh ka kom kwa har tseegh tsô maa kange ishima pav ikyaryan na aa kasev mbara. Shi yange hii u zan mbamkombo mba Mbakristu ken Iyou i Tartor. Kpa kwagh ne hingir a hingir ikyaren igen tsô.

Cleveland yange nyôr iyol cou cou ken kwebolugh u ityô na, man anumbe a bolugh ne lu tagher un mbamkombo mba zan. Una er nena? Cleveland undu kwebolugh la, shin e̱r mba gbidyen bol a na imôngo man or u tesen ve bol kua ahuraior a na jimin cii ve kighir un tsung nahan kpaa, Cleveland tsua u undun kwebolugh la. Mimi je, Mkaanem ma Aôndo ma hii u eren tom ken a na, ma bende a na sha gbenda u dedoo!

Shi Mkaanem ma Aôndo er tom ken a na je ikpur via shighe u Cleveland hii u pasen mbagenev mfe u un zou a mi ken Bibilo la yô. (Aerenakaa 1:8) Sha nahan yô, iorov uhar mba ve vanden gbidyen bol vea na yô hii u zan mbamkombo mba Mbashiada mba Yehova. Zum u Cleveland hingir or u pasen loho u dedoo kera yô, a zua a mkom kpishi ken tom la, lu yaren tom a Mkaanem ma Aôndo sha u wasen mbagenev.

Er Mkaanem ma Aôndo ma ma lu eren tom ken a na la lu mgbeghan un her yô, Cleveland maa tese ikyav i iyoltseghan na hen Yehova sha u eren batisema, shi a zua a ian i injaa sha u lun ortom u shiren tom hanma shighe, shi ngu diakon ken tiônnongo.

Ken tar u Jamaica man tar sha won cii, ior udubu imôngo va kav ér, mimi je, Mkaanem ma Aôndo “ma uma je, ma tem gbilin ga.”

[Map/Picture on page 3]

JAMAICA

[Credit Line]

Map and globe: Mountain High Maps® Copyright © 1997 Digital Wisdom, Inc.