Ibaver I Mbayôôn Tartor

Iyou i Tartor Tsua Tuta

GBAA Tom u Nengen sha Uikyasen u ken tar u Finland la tsua inyom i 2000 la ér ka “Inyom i Môôr Uimondon ken Akôngo.” Môm ken ior mba ve lu ityough sha kwagh ne kaa wener “awashima u tsuan inyom ne ér ka inyom i môôr uimondon ken akôngo yô, ka u umbur se cii ér uikyasen mba ve lu a uimondon shough shough la ka ve bende a uuma asev mba sha ayange ayange la kua mkpeyol wase kpaa.”

Sha iyange i Janawari 12, 2001 la, afishi a tom a Mbashiada mba Yehova aa ken tar u Finland la zua a washika u due hen Mzough u Ikyômpeni i Môôr Uimondon ken tar u Finland la. Washika la pase ér Iyou i Tartor i Mbashiada mba Yehova i ken gar u Tikkurila la tsua môm ken ityuta i môôr uimondon i ka í na sha inyom la, gadia i sôr uikyasen mba her mbara i ver hanma kwagh sha inja shi uimondon mba her kpaa i er a ve sha inja. Washika la seer kaan ér “mluashe u ikyasen i hen ijiir la doo, ka a lu sha shighe u fam shin sha shighe u iceenyolough kpaa, ikyasen la a doo ashe tsung.”

I na Mbashiada mba Yehova tuta ne ken iniongo i yange ior mba eren ityom kposo kposo kua mbakpengav 400 kohol ken hôtel ugen ken gar u Rosendahl ken Tampere, ken tar u Finland la. Mzough u Ikyômpeni i Môôr Uimondon ken tar u Finland la shi kaa a mbaabaver ér: “Ken avegher a tar ne kposo kposo cii, mba i nôngo u eren a Ayou a Tartor a Mbashiada mba Yehova sha gbenda u doon kpishi sha hanma shighe cii. Ikyo i ve we sha uikyasen vev ne ka kwagh u doon hanma or u nan lu karen gbenda cii. Iyou i Tartor i ken Tikkurila la jimin cii ka ikyav i doon kpishi i sule u uimondon. Iyou la man akôngo a i̱ a gbanger la zua kpiaan na ijiir la hingir kundu kundu shi hanma kwagh ngu vough kpaa.”

Ken tar u Finland cii Ayou a Tartor nga 233, man á kpishi nga a uimondon mba doon ashe kpen kpen. Kpa kwagh u a ne ajiir ne á hembe doon yô, ka sha ci u nga itine i mcivir u mimi man nga ajiir a henen Bibilo kpaa. Mbashiada mba Yehova mba ve hembe umiliôn ataratar sha tar cii ne nenge Iyou i Tartor—i í maa i̱ hanma kwagh a lu tsembelee shin i̱ lu akuma akuma—cii ér ka ijiir i doon ishima kpen kpen. Ka nahan ve ka i gba ve ishima u veren ishima vighe vighe shi wan ikyo sha i̱ ye. I bugh ihinda i Ayou a Tartor ne i ver sha ci u ior mba hen ityô you cii!