Ibaver I Mbayôôn Tartor

Hanmaor Nana Fatyô u Zan ken Ayou a Tartor

YESU KRISTU taver mbahenen nav asema shighe u lu tsaase ve sha tom u pasen kwagh ken igbar la wener ‘yôô nen sha ityoriyoughough.’ (Mateu 10:27) Een, lu u vea er tom u pasenkwagh u Mbakristu la ken igbar, ape ior vea nengen a ve yô. U dondon kwaghwan u i we heen ne yô, Mbashiada mba Yehova kpa mba eren tom ve ken igbar. Tom u ve eren ku ku ku ga ne wase Mbashiada u hemban ahendan shi zuan a ior mba tan ikyaa ken a ve kpaa.

Shin er mbamkombo mba ken tiônnongo mba Mbashiada mba Yehova i lu kwagh u ken myer ga nahan kpa, ishebo na yô ka i taver ior mbagen u nyôron ken Iyou i Tartor. Ka imba kwagh i i̱ er ken tar u Finland je ne. Ka i gba taver mbagenev u zan hen ajiir a a lu a he tsô. Shighe u i mar Iyou i Tartor i he shin i hide i sôr iyou i tse yô, ka i er iniongo i bughun i. Alaghga a nôngo u lôhôn ior ér ve va zende ve nenge Iyou i Tartor la shi ve fa kwagh u Mbashiada mba Yehova ve eren la kpaa.

Ken ijiir igen la, Mbashiada ver iyange i vea due magazin u nan sha iyange shon i vea lu bughun Iyou ve i Tartor i he la la. Mbashiada uhar za zua a organden ugen u ka i doo un ôron umagazin mba Iyoukura man Awake! yô. Anmgbianev mban ôr un kwagh sha kwagh u zenden nengen iyou ve la shi ve kaa ér una lumun yô vea za a na hen Iyou i Tartor la. Or la kaa ér a doo un kpishi u zan vea ve. Kwase na ongo kwagh la nahan yô, á kaa wener, “Mo kpa me za.”

Mba za nyer hen Iyou i Tartor la yô, or la kenger keen man keen, tsô a kaa wener: “Ngi côu côu ga cii. Uwu, iyou ne doo tsôô, ngi ker wang. I kaam ér Iyou i Tartor ne ia doo kenger ga!” Or la vea kwase na ve tema deghôô tsô ve ngohol ityakerada i yange i samber sha ci u ior ngohol la maa ve yem.

Tiônnongo ugen di yange soo u yôôn m-bugh u Iyou ve i Tartor sha iniongo i vea er u tseghan i la ken pipaabaver i hen tar ve. Kwase u hemen ipipaabaver shon la ongo kwagh u iniongo i ve soo u eren la yô, a due a mhen wener i nger kwagh sha kwagh ne. Anmgbianev mbara lumun, nahan ica gba ga je maa i due a kwaghôron u kuman tiôn peeji nahan ken pipaabaver la, i nger kwagh sha kwagh u iniongo shon shi i pase akaa a tiônnongo u Mbashiada mba Yehova hen ijiir la a eren yô.

Mba duen a ngeren la ken pipa la kera cii yô, Kwaseshiada u beenyol ne zua a orwanndor a na ugen, tsô or shon kaa a na wener: “M nenge i nger kwagh u dedoo ne sha Mbashiada mba Yehova ken pipaabaver nyian!” Anmgbian u kwase ne yange fatyô u pasen or la kwagh je na antakerada u i yer ér Jehovah’s Witnesses in the Twentieth Century (Mbashiada mba Yehova ken Derianyom u sha Ikyundu) la.

U seer sha u tan iwanger sha mbamtsum mba ior ve lu a mi sha kwagh u Mbashiada mba Yehova la yô, imba mserakaa u eren iniongo i bughun Ayou a Tartor a he shi tseghan a la nahan ngu a mgbegha mbapasenkwagh sha u taver ve asema ér ve seer lôhôn ior ve va mbamkombo. Er i lu ken tar u Finland nahan, kape ken itiar igen kpishi kpa i lu vough je la, ior fa er Ayou a Tartor a Mbashiada mba Yehova a lu sha ci u hanma or yô.