“Un Kpaa, Una Kporom Her A Ven”

“[Aôndo ngu] ica a hanmô wase ga.”—AERENAKAA 17:27.

1, 2. (a) Ka sea kende ashe sha kwavaôndo sea nenge asan aa cir sha ú kpulughuu nahan, ka nyi mpin ka se pine sha kwagh u Orgbanakaa? (b) Bibilo pase se gbar gbar ér uumace gba kwagh sha ishigh ki Yehova nena?

 Í LU nahan ú kende ashe sha tugh, ú kenger sha kwavaôndo shighe u uwer ú te i wanger wang, asan a dugh sha Aôndo kpishi vee? Nahan ikpela asan la ngi i kunda ú iyol ga he? M-cir u asan la nga a cir kpulughuu sha kwavaôndo la tseegh kpa ta hindi iyol. Aluer i tôô sha won cii í kar sha tar wase ne yô, ngu di kpuaa er ka anshangewua nahan tsô. Inja na yô ka u kaan ér Orgbanakaa, u a lu “Uhembansha sha tar cii” la, ngu sha tseng gande u kwagh a gba un a orumace, shin á gba ca gande u vea fa un shinii?—Pasalmi 83:18.

² Bibilo pase se gbar gbar ér uumace gba kwagh sha ishigh ki Yehova kpen kpen je. Jim je yô, Mkaanem ma Aôndo taver se ishima ér se̱ ker un, ma kaa ér ityôkyaa yô ka er “A lu ica a hanmô wase ga” yô. (Aerenakaa 17:27; 1 Kroniku 28:9) Sha mimi yô, aluer se ker gbenda ser se kporom hen Aôndo yô, un kpaa una gba den a de iniôngon yase la ga je. Sha nyi gbenda? Mkaanem ma ivur yase i ken inyom i 2003 ne ma na mlumun u kundun ken ishima ma kaa ér: “Una kporom her a ven.” (Yakobu 4:8) De se time sha averen agenegh a kpilighyol a Yehova a ne mba ve kporom ikyua hen a na la.

Iyua I̱ Yehova Iyol Na A Ne Yô

3. Ka nyi iyua Yehova a ne mba ve kporom ikyua hen a na laa?

³ Hiihii yô, mbacivir Yehova mba a iyua i injaa i á ver sha ci u ior nav yô. Tahav man inyaregh man mfetakerada u tar ungun ú lu a mi cii kpa ua fatyô u nan se iyua ne ga. Ka iyua i Yehova a ne sha uwegh nagh yô, man ka mba ve lu ikyua a na la tseegh a ne ve i̱ ye. Iyua ne kanyi kwagha? Mkaanem ma Aôndo na mlumun ér: “Aluer . . . wea genger imo sha u keren mkav yô, aluer wea  ker un er azurfa nahan, man wea ker un er akaa a injaa a i yer yô, nahan ú kav mcie u cian TER, mfe u fan Aôndo kpaa, ú zua a mi. Gadia TER ne kwaghfan.” (Anzaakaa 2:3-6) Nenge i kpilighyol u uumace mba ve yen ne nahan vea fatyô u kaven “mfe u fan Aôndo” la sha wono! Iyua shon la—ka mfe u a lu ken Mkaanem ma Aôndo je la—í tôô i̱ í kar sha “akaa a injaa a i yer yô.” Sha ci u nyi?

4, 5. Er nan ve a fatyô u tôôn “mfe u fan Aôndo” la karen sha “akaa a injaa a i yer yôô”? Tese ikyav.

⁴ Hiihii yô, mfe u Aôndo la ngu a inja je zua ga. Iveren na i hemban cii je yô, ka ian i va lun uma gbem sha won la. (Yohane 17:3) Shi hegen je kpaa mfe la ne uma wase hembe lun a inja. U tesen ikyav yô, se hen Mkaanem ma Aôndo zulee yô, ka mbampin mba vesen mbagenev mba se va hingir u zuan a mbamlumun sha mi je ne: Iti i Aôndo ér nyi? (Ekesodu 6:3) Mlu u mbakpenev ngu nena? (Orpasenkwagh 9:5, 10) Awashima u Aôndo sha ci u tar man orumace yô, kanyi? (Yesaia 45:18) Shi se fa kpaa ser gbenda u ú hembe doon u se eren a uma wase yô, ka u dondon kwaghwan u injaa u Bibilo la. (Yesaia 30:20, 21; 48:17, 18) Nahan, se zua a gbendatesen u injaa u ua wase se u nôngon a ishimanyian i se zough a mi ken uma la, shi se dondo gbenda u uma u ua va se a msaanyol u mimi man mkom kpaa yô. U hemban cii je yô, Mkaanem ma Aôndo ma se henen la maa wase se u fan aeren a kpilighyol a Yehova, shi kporom ikyua hen a na kpaa. Kanyi kwagh igen je i̱ lu a inja i hembe u lun vea Yehova ikyooso ikyooso, lun a “mfe u fan Aôndo” la sha wono?

⁵ Shi ityôkyaa igen kpa ngi i í ne ve a fatyô u tôôn mfe u fan Aôndo la karen sha “akaa a injaa a i yer yô.” Mfe ne za ihyen sha tar kpen kpen, di er akaa a injaa kpishi ka a za ihyen nahan. Ior mbá sha tar je kuma ingyegh biliôn ataratar, kpa ken atô u ikpelaior ne cii, ka iorov miliôn ataratar, shin or 1 ken atô u iorov 1,000 nahan tseegh nan civir Yehova, nan zough a “mfe u fan Aôndo” la ye. U tesen er u fan mimi u ken Mkaanem ma Aôndo la í lu zege ian u icivirigh u numben a mi ga yô, time ase sha mpin u ken Bibilo môm ne tseegh, ér: Kanyi ka i̱ er or shighe u nan kpe kera laa? Se fa Ruamabera kaa ér or ka nana̱ kpe yô nan kera fa ma kwagh je ga. (Pasalmi 146:4; Orpasenkwagh 9:5, 10) Nahan kpa, ityesen i aiegh i í tesen ér or ka nana̱ kpe yô kwagh ugen ken iyol i nan a due a za hemen u lun her uma la í ngohol í ken ukwaghaôndo mbaaiev wuee sha tar. Ka í je í lu ityesen i vesen ken ukwaghaôndo mba Mbakristu Mbaaiev ye. Ityesen ne dumbur ken kwaghaôndo u Buddha man u Hindu man u Mbamusulumi man u Mbajain man u Mbayuda man u Shinto man u Sikh man u Tao kpaa. Time ase sha mi tsô ú nenge—ityesen i aiegh ingin tseegh kpa mba tsughun ior ubiliôn ubiliôn a mi!

6, 7. (a) Ka unô tseegh vea fatyô u zuan a “mfe u fan Aôndo” laa? (b) Ka nyi kwagh i̱ tese ér Yehova na se mkav kpa “mbafankwagh man mbakavenkwagh” kpishi yô, mkav la gema kar ve?

⁶ Er nan ve ior mba keren “mfe u fan Aôndo” zuan a mi la ve ngee í hembe iyenge i ve lu hegen ne ga? Ityôkyaa yô, or nana fatyô u kaven inja i Mkaanem ma Aôndo vindi vindi a iwasen Na shio ga. Umbur wer, mfe ne ka iyua. Ka mba ve soo u timen ken Mkaanem nam sha mimi man a iyol i hiden a mi ijime la tseegh a ne ve iyua ne ye. Alaghga ambaaior la aa lu “mbafankwagh sha inja i iyolough” ga. (1 Mbakorinte 1:26) Shi alaghga sha mnenge u taregh yô mbagenev kpishi ken atô ve vea “lu ior mba fan takerada yum kpaa ga.” (Aerenakaa 4:13) Nahan kpa ka kwagh u kwagh a gbe sha mi la ga. Yehova ne se “mfe u  fan Aôndo” la sha ci u aeren a á nenge a mi ken ishima yase la.

⁷ De se tese ikyav. Mbafantakerada mba ken Mbakristu Mbaaiev kpishi time ken Bibilo vie vie je gber ityakerada i pasen akaa a ve tim ker ve, ve zough a mi la kpaa. Ityakerada la igen pase tsegh ku mbayiase man inja i asemberatii a ken zwa Heberu man a ken zwa Grika, kua akaa agenegh kpaa. Er mbafantakerada mban ve hen kwagh ve bee ave kua angahar cii nahan kpa, sha mimi yô ve zua a “mfe u fan Aôndo” la kpa? Ve kav itinekwagh i Bibilo i̱ til sha mi la wang kpa—ve fa er itinekwagh shon i lu u paan hementor u Yehova la iyol sha ikyev i Tartor na u sha la kpa? Er Yehova Aôndo a lu ma vegher u Mbautar ga nahan, ve fa kpa? Nahan kpa se yô, se gema se mba a mkav sha akaa ne. Er nan ve se lu a mini? Ka Yehova a ne se mkav u mimi u ken jijingi u a kar “mbafankwagh man mbakavenkwagh” kpishi ne ye. (Mateu 11:25) Nenge imba er Yehova a veren mba ve lu ikyua a na doo doo la sha wono!

“TER Kor Mba A Doo Ve Ishima la Cii”

8, 9. (a) Davidi yange pase iveren igen i mba lun ikyua a Yehova ve zough a mi la nena? (b) Er nan ve kwagh a gbe Mbakristu mba mimi sha mkor u Aôndo?

⁸ Mba ve lu ikyua a Yehova yô, mba zough a iveren igen kpaa—ka mkor Na je la. Orpasalmi Davidi, u un kpa yange kwagh laha tseren un ga la, yange nger wener: “TER ngu ikua ikua a mba ve yer Un cii, mba ve yer Un sha mimi la cii. Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa. TER kor mba A doo ve ishima la cii.” (Pasalmi 145:18-20) Een, Yehova ngu ikyua ikyua a mba a doo ve ishima la, nahan una ungwa ve mliam yô, una mough sha fese je una timbir ga.

⁹ Er nan ve i gbe se ishima u Aôndo a̱ kura se? Dugh er Mbakristu mba mimi kpa “ashighe a ican” a á nyoon tsung ne a lu benden a ve kera la kpa, shi ka ve je Orihyom u Yehova u vesen, Satan Diabolo a hôn ashe sha a ve ye. (2 Timoteu 3:1) Orihyom shon u wan atseregh ne wa ishima ér saa una kôr se una “ya” keng ve, ishima ia pever un shimi ye. (1 Peteru 5:8) Satan ka a tôv se a ican shi a kighir se, shi a mee se kpaa. Shi ka a keren sha u una fa ieren i or man ishima i nan kpaa, sha er una kôr ave sha mi una er ishima na yô. Kwagh u a we ishima u eren yô ka un je ne: ka u una na jighjigh u nan wase a̱ ndôhôr sha er una tim se ken jijingi yô. (Mpase 12:12, 17) Er se lu nôngon kwagh a imba orihyom ngun nahan, se zua a ishimataver er se fe ser “TER kor mba A doo ve ishima la cii” nahan ga he?

10. (a) Yehova kor ior nav nena? (b) Ka nyi mkor i hembe lun a inja ciilii, man ka sha ci u nyi?

¹⁰ Nahan kpa, Yehova kor ior nav nena jimi? Ityendezwa i̱ a er wener una kura se la, a bum a bum ér mayange se lu a ma mzeyol shio shin tar u ú mgbough a mzeyol ne ga; shi ú ngu wer ka u tar a̱ kôr a̱ gema a̱ cir inya kpa, saa una er uivande sha ci wase keng ga. Kpa, nongoior u Yehova jimin cii yô, gem kor ú kpôô kpôô nahan. Kera ga je kpa, mayange una de ér Diabolo a̱ tim mba ve civir un sha mimi la sha tar kera ga! (2 Peteru 2:9) Kpa hemban cii yô, Yehova kor se ken jijingi. Ne se kwagh u i gbe u se lu a mi ve, se wa ishima a ameen shi se kura mlu wase vea na la. Kohol cii yô, ka mkor u ken jijingi la a hembe lun a inja cii ye. Sha ci u nyi? Ityôkyaa yô, aluer se ya ikyar a Yehova her di tsô yô,  ma kwagh môm kpa una bura se gbem sha won ga, ku je kpa ua kôr cio ga.—Mateu 10:28.

11. Ka mbamne mba nyi Yehova a ne sha u kuran ior nav ken jijingi?

¹¹ Yehova na akaa a ken jijingi kpishi sha u kuran mba ve lu ikyua a na yô. A na se kwaghfan na ken Bibilo, i̱ i̱ lu Mkaanem nam la sha u maa wase se, se nôngo a ameen atô kposo kposo yô. (Yakobu 1:2-5) U dondon kwaghwan u injaa u a lu ken Ruamabera la ka mkor. Heela tseegh ga, Yehova ne “mba ve sen Un la Icighan Jijingi.” (Luka 11:13) Jijingi la ka tahav mbu hemban sha won cii, nahan una fatyô u wan se ago iyol sha er se tagher a nyityô mtaver shin imeen cii kpa se hemba yô. Yehova na “ior mba i ne ve lu uiyua” la sha ikyev i Kristu. (Mbaefese 4:8, NW ) Ior mba ve kom ken jijingi mban ka ve nôngo u tesen mhôônom ma zungwen ma Yehova a lu a mi la sha gbashima, sha u wasen mba ve civir a ve imôngo la.—Yakobu 5:14, 15.

12, 13. (a) Yehova ne se kwaghyan u ken jijingi sha ashighe ashighe sha nyi igbenda? (b) We ú nenge akaa a Yehova a ne se ken jijingi sha ci u mkpeyol wase la nena?

¹² Shi Yehova na kwagh ugen kpaa sha u kuran se: ka kwaghyan u ken jijingi u a ne sha ashighe ashighe la. (Mateu 24:45) Yehova ne se kwagh u i gbe u se zua a mi la ken ityakerada i í gber la, amba er Iyoukura man Awake! nahan, kua mbamkombo man mbamkohol mba kiriki kua mba vesen kpaa cii. Ú fatyô u umbur shighe u yange ú ungwa ma kwagh ken mkombo u Mbakristu shin sha mkohol u kiriki shin u vesen, man kwagh la kôr ú ken ishima shi seer nan we iyoltaver, shin sur ú ishima kpa? I lu nahan ú ôr ma kwaghngeren ken magazin mba í ter ati ve sha heen ne, maa ú kaa ken ishima wer ka sha ci wou jighilii je í nger kwagh shon kpa?

¹³ Ityumugh ki Satan kì kí hembe tsaase cii yô, ka iyol kpen, man se kpa ngi lahan benden a vese ga. A fa dedoo je ér, aluer ashe yina se ikyôr se ure se mba zuduu, se zer zungwen gbem yô, kwagh la una na se ivôron iyolough, alaghga je yô se kera lu tsevaa kpaa ga. (Anzaakaa 24:10) Er Satan a lu keren ér una kôr ave sha akaa a á ne se iyol kpen la una bura se yô, gba u saa se zua a iwasen mape. Magazin u Iyoukura man Awake! la ka ve due a  akaangeren ashighe kpishi, a aa wase se u nôngon a iyol kpen yô. Kwase Kristu ugen yange nger kwagh kaa sha imba kwaghngeren la wener: “Ḿ er kwaghngeren la hanma sev, shi ka mea ôr un je mliam ma haam ashe keng. M ver un hen kpe gambe wam sha er shighe u ishima i̱ yenem cii yô, me tôô me ôr yô. Akaangeren angan nahan na yô, kam er Yehova kôrom kuve, m ngu un ken ikyum gir gir nahan.” * Er Yehova a ne se kwaghyan u ken jijingi sha shighe vough nahan, doo se ga he? Umbur wer, mne u a ne se akaa a ken jijingi sha ci u mkpeyol wase la ka ikyav i tesen ér ngu ikyua a vese shi ngu kuran se kpaa.

U Aren hen Un u A “Ongo Msen” La

14, 15. (a) Ka iveren i nyi Yehova a ne mba ve lu ikyua a na la asange asanga? (b) Er nan ve ian i í ne se gbanger gbanger i zan hen Yehova ken msen la í lu ian i icivirigh í kpilighyolo?

¹⁴ Ú ver ishima ú nenge er ashighe kpishi orumace ka nana zua aa tahav, nana luun sha kwarkyaa yô, maa i gba taver mba ve lu nan sha ikyev la u zan ikyua a nan kpa? Nahan kpa, Yehova Aôndo di ye? A gba ica gande u kwagh a gba un sha akaa a uumace di nahan ve lu ôron un la shinii? Mayange ga cii! Iyua i msen u eren la kpa shi ka iveren igenegh i Yehova a ne mba ve lu ikyua a na yô. Sha mimi yô, mne u i ne se ian gbar gbar u zan hen un u a “ongo msen” la, ka ian i icivirigh kpen kpen. (Pasalmi 65:2) Sha ci u nyi?

¹⁵ U tesen ikyav yô: Or u nan lu ityough sha zege kômpeni cica cii yô, ka nan lu a ityom sha ave i eren kpishi. Ka nan tsua ityom i nana er iyol i nan, man í nana gema a na mbagenev ér ve̱ er yô. Kape Orhemen Uhemban sha won cii la kpa á lu a ian i tsuan akaa a una er iyol na, man á una gema á na mbagenev ér ve̱ er je la. Time ase sha ikpelaakaa i̱ Yehova á gem á ne Yesu, Wan na u ishima ishima ér a̱ er la. A na Wan na ne “tahav mbu ôron ijir.” (Yohane 5:27) Mbatyomov mba shaav je kpa “i wa Un sha ikev.” (1 Peteru 3:22) Icighan jijingi u Yehova u a lu aa tahav je i gande ôron la kpa Yesu una fatyô u tindin un shighe u a soo cii, sha u a̱ hemen mbahenen nav shin tar yô. (Yohane 15:26; 16:7) Ka nahan ve Yesu yange ôr kwagh nahan ye, ér: “Tahav mbu Sha man mbu sha won cii i wam sha ikev.” (Mateu 28:18) Nahan kpa, hide sha kwagh u mbamsen asev yô, Yehova gema wa ma orgen sha ikyev ga, ngu ityough sha mi iyol na. Ka nahan ve Bibilo i̱ we se kwagh ér se̱ eren mbamsen asev hen Yehova tseegh, shi se̱ eren ve ken iti i Yesu ye.—Pasalmi 69:13; Yohane 14:6, 13.

16. Er nan ve se fatyô u lun a vangertiôr ser, mimi je Yehova ongo mbamsen aseva?

¹⁶ Mimi je Yehova ongo mbamsen asevaa? Luun er kwagh a gbe un sha mbamsen asev ga yô, mayange ma a taver se ishima ma a kaa ér, “taver nen ishima sha msen u eren,” ga. (Mbaromanu 12:12; Pasalmi 55:22; 1 Peteru 5:7) Mbaciviraôndo mba jighjigh mba sha ayange a Bibilo la yange ve lu a vangertiôr ér Yehova ongo msen. (1 Yohane 5:14) Nahan orpasalmi Davidi nger ér: “[Yehova] ungwa imo yam.” (Pasalmi 55:17) Se kpa se mba a ityôkyaa i vesen i lun a vangertiôr ser Yehova ngu ikyua ikyua, shi a wa iyol a kegh a kegh u ungwan hanma kwagh u a lu nyian se ishima cii.

Yehova Ne Mba Ve Civir Un Mbara Injar

17, 18. (a) Yehova nengen mcivir u akaa a lun a mkav a un gbe la a civir un sha jighjigh u nan la nena? (b) Pase gbenda u Anzaakaa 19:17 a tese ér Yehova nengen mhôônom asev ma zungwen mara la.

¹⁷ Nyityô kwagh i̱ uumace mba kaka ne ve er, shin ve vende u eren cii kpa, i̱ bende a ian i Yehova a lu sha mi, í a lu Tor u Hemban Cii la ga. Nahan kpa, Yehova ka Aôndo u á nengen ieren i dedoo ashe ashe ga yô. Mcivir u akaa a lun a mkav a Yehova á gbe la á civir un sha jighjigh la, gba kwagh sha ishigh nagh kpen kpen je. (Pasalmi 147:11) Nahan ngun kpa shi ka mtsera ugen u mba ve lu ikyua a Yehova ve zough a mi je ne: Ne mba ve civir un la injar.—Mbaheberu 11:6.

¹⁸ Bibilo tese gbar gbar ér kwagh u mba ve civir Yehova ve eren la gba kwagh sha ishigh nagh kpen kpen. U tesen ikyav yô, i nger ér: “Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la.” (Anzaakaa 19:17) A fatyô u nengen a mhôônom ma zungwen man ikyo i Yehova a we mba i yen ve iyol la ken Tindi u sha Ikyev i  Mose la. (Levitiku 14:21; 19:15) Ka sea kav Yehova sha gbenda u sha mhôôn u a eren kwagh a mba i yen ve iyol la nahan, ka i lu un ken ishima a vese nena? Ka sea na icanor kwagh, sea ver ishima ser nana̱ hide a̱ kimbi se ga yô, Yehova ka a tôô ér ka Un iyol na se ne un injô ye. Yehova er ityendezwa ér una hide a kimbi se injô la sha u nan se iveren. (Anzaakaa 10:22; Mateu 6:3, 4; Luka 14:12-14) Sha mimi yô, ka sea er erdoo a or u nan civir Aôndo a vese imôngo man nan lu ken ibanave yô, kwagh la ka a doo Yehova ken ishima je i zua ga. Er se fe ser Ter wase u sha ngu nengen mhôônom asev ma zungwen mara nahan, doo se je gande!—Mateu 5:7.

19. (a) Er nan ve se fe dedoo ser tom u pasen kwagh shi geman ior hingir mbahenen u se eren ne, ú doo Yehova ishima? (b) Yehova kimbin injar sha tom u se eren sha u suen Tartor na la nena?

¹⁹ Hemban cii je yô, akaa a se eren sha ci u Tartor u Yehova la doo un kpishi. Zum u se kporom ikyua hen Yehova yô, hingir u se soo u eren tom u pasen kwagh u Tartor shi geman ior hingir mbahenen la sha er se fetyô u eren la cii, shi se er kwagh ne a shighe u se zough a mi la cii, kua sha agee ase cii man a inyaregh yase kpaa cii. (Mateu 28:19, 20) Ashighe agen yô, alaghga a lu se inja er se mba eren kwagh yum ga nahan. Alaghga ishima yase i i̱ yen ne ia lu tan se akpelan ér, shin Yehova ngu nengen a iniôngon i̱ se lu nôngon ne je kpaa-o? (1 Yohane 3:19, 20) Kpa hanma iyua i se er cii, ia lu kpuaa nan nan kpa, aluer ka dooshima a mgbegha se ve se er i̱ yô, i̱ gba kwagh sha ishigh ki Yehova. (Marku 12:41-44) Bibilo na se ishimataver ne nahan, ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.” (Mbaheberu 6:10) Sha mimi yô, Yehova umbur hanma ivulugh ki tom u se er sha u suen Tartor na cii, shi ne injar sha mi kpaa. U seer sha ikpela averen a ken jijingi a se lu zuan a mi hegen ne yô, se fatyô u veren ashe keghen iember i se va zua a mi ken tar u he ú ú lu van la, shighe u Yehova una bugh uwegh nagh una na mba ve lu ikyua a na cii isharen ve, a kuma ve la!—Pasalmi 145:16; 2 Peteru 3:13.

20. Se er nan ve se lu umbur ivur yase i sha inyom ne ken inyom i 2003 ne ciilii, man kanyi ia va kere?

²⁰ Ken inyom i 2003 ne cii, de se zer gbidyen nen kwar pinen ayol ase aluer sea lu nôngon her kpoghuloo ser se kporom ikyua hen Ter wase u sha yô. Aluer se mba nôngon her yô, se fa je ser un kpa una er a vese vough er a tende zwa nahan kpee. Kera ga je kpa, “Aôndo . . . eren aie ga.” (Titu 1:2) Aluer ú kporom hen a na yô, un kpaa, una kporom her a we. (Yakobu 4:8) Nahan kanyi ia va kere? Se zua a iveren mgbeghaa hegen, shi se lu a ian i va hemban kporom ikyua a Yehova gbem sha won kpaa!

[Footnote]

Baver We Kpa?

• Ka nyi iyua Yehova a ne mba ve kporom ikyua hen a na laa?

• Ka nyi akaa Yehova a ne sha u kuran ior nav ken jijingi?

• Er nan ve ian i í ne se gbanger gbanger i zan hen Yehova ken msen la i lu zege ian u icivirigh je i gande ôronô?

• Ka sha nyi gbenda Bibilo i̱ tese ér Yehova lumun a mcivir u sha perapera u akaa a lun a mkav a un gbe la a civir un laa?

[Study Questions]

[Picture on page 13]

Yehova na se iveren i kaven mimi mba ken jijingi

[Pictures on pages 14, 15]

Yehova ne mkor u ken jijingi

[Picture on page 17]

Yehova ngu ikyua ikyua, shi a wa iyol a kegh a kegh u ungwan hanma msen wase