Ibaver I Mbayôôn Tartor

Á Zua a Mimi Hen Ijiir i Á Hen Ér Una Zua a Mi Ga Yô

SAR Aôndo “u ior cii ve̱ war ve̱ ar sha mfe u fan mimi la.” (1 Timoteu 2:3, 4) Sha nahan yô, Mbashiada mba Yehova gber ukôpi mba Bibilo man ityakerada i wasen ior u henen Bibilo umiliôn imôngo je, shi mba samber a i̱ kpaa. Sha ashighe agen yô, ityakerada ne ka i wase mbaasemaamimi u henen mimi sha igbenda i ve hen ér ia wase ve ga yô. Sha gbaa ne yô, mbayôôn angwe u Tartor ken gar u Freetown ken tar u Sierra Leone ôr vàndè-èrèn u i nger a dondo shin heen ne.

Osman ka wan u sha uhar ken ônov utaankarunyiin mba ter na. Er vese hen tsombor u eren kwaghaôndo kpoghuloo yô, yange civir Aôndo vea ter na hanma shighe. Nahan kpa, ishima yange i za Osman iyol kpishi sha ityesen i kwaghaôndo na yange lu tesen sha kwagh u igyamusu la. Yange fatyô u kaven er i hii ve Aôndo u zungwen mhôônom una na mbaaferev ican sha u gbihin ve ken usu ér ve hia ga. Yange i pase Osman kwagh u igyamusu kpishi sha er a wase un a kav ityesen ne yô, kpa ishima gba un shi mi ga.

Tsô sha iyange igenegh shighe u Osman lu anyom 20 la, á nenge a takerada ugenegh u lun a igbende i kwer shin ikyagh ki haan ihyôghonough, i haa ihyôghonough sha ú. Er yange á soo u ôron takerada kpishi yô, á tôô ú, á ovur ú doo doo, tsô á nenge a itinekwagh i takerada ne, i i kaa ér The Truth That Leads to Eternal Life * la.

Kpiligh Osman iyol tsô á pine wener ‘kanyi i lu Mimi shon nee?’ Yange gba Osman ishima u fan kwagh ne, nahan á tôô takerada ne á yem a mi ken ya na á za tema á ôr ú zan zan a kaa been. Saan un iyol kpishi zum u á kav er iti i Aôndo jim jim i lu Yehova yô! (Ekesodu 6:3) Osman shi yange hen fa er dooshima a lu ieren i Aôndo i hemban cii yô, man er u eren ior ican ken usu la i lu kwagh u ndôhôr Un ishima nahan. (Yeremia 7:31; 1 Yohane 4:8) U masen yô, Osman yange ôr ken takerada ne fa er shighe a shi di cuku u Yehova una va a paradiso shin tar ne ior a tema ken ú gbem sha won yô. (Pasalmi 37:29; Mpase 21:3, 4) Nenge imba er mimi ne a lu mimi u kpilighyol u á dugh hen Aôndo u dooshima u zungwen ior mhôônom ne sha wono! Yange doo Osman kpishi nahan á sugh Yehova er á wase un, un zough a mimi hen ijiir i un hen ér una zua a mi her ga nahan.

Ayange nga karen kpuaa yô, azende a Osman agenegh tese un ape Iyou i Tartor i Mbashiada mba Yehova i̱ lu yô, nahan á za mkombo sha kwa na u hiihii. Sha shighe u á za mkombo la, á kaa a Orshiada ugen ér a hen Bibilo a na. Shin er tsombor na yange u tôv un a ican kpishi nahan kpa, Osman za hemen u zuan a mzehemen u ken jijingi zan zan kar eren batisema. (Mateu 10:36) Ngu ortamen nyian ken tiônnongo. Ka kwagh u kpilighyol er akaa ne cii yange hii sha shighe u yange zua a takerada u ú har sha Bibilo shin ikyagh ki haan ihyôghonough la yô!

[Footnote]