Kanyi i Lu Kwaghyan U Masetyô La?

KANYI i lu Kwaghyan u Masetyô la, man ngu a inja hen ior mba ken derianyom u sha 21 ne nena? Uzegembaityakerada mba pasen asemberakaa mba i yer ér Encyclopedia la kpishi kua ityakerada i pasen asemberakaa igen kpaa ia kaa a we ér Kwaghyan u Masetyô u ka i yila kpaa ér Kwaghyan u Ter la ka kwaghyan u Yesu Kristu ya vea mbaapostoli nav hen aikighe u kpernan sev av ve mase kpen ku u nan naagh la. Er kwaghyan ne lu kwaghyan u aikighe u masetyô u Yesu ya vea mbadondon nav mbajighjigh mbara yô, mba i yila un ér Kwaghyan u Masetyô. Man er yange lu Ter Yesu Kristu iyolna je ver kwaghyan ne yô, ka i yila un vough nahan ér Kwaghyan u Ter.

Ken uderimbaanyomov mba ve kar ne, ior na naagh sha uuma vev sha akaa aa ve nenge ér ka akaa a injaa yô. Ikyu i mbagen ken ve yange ve kpe ne wase ior mbagenev sha anshighe kpuaa. Kpa aluer i tôô naagh ku yange ve na a uuma vev la i kar sha ku u Yesu Kristu la yô, kwagh u yange ve er la yina ica je, shin er yange ve er kwagh u a kom iwuese nahan kpaa. Heela tseegh ga, ma ku môm ken tar u orumace u ú ngee a mbamzeyol ne tsô kpa ngu u ua fatyô u benden a ior sha tar wuee ga. Sha ci u nyi?

Sha er ú zua a mlumun sha mpin ne shi ú fa mluainja u Kwaghyan u Ter la hen a we yô, se mba lôhôn we ser ôr kwaghngeren u a dondo ne.