Se Mba Lôhôn We Saan Saan

INIONGO i Kwaghyan u Masetyô u Ter Yesu Kristu yange ver i̱ anyom a kar ken ijime i kom 2,000 la, gban ngin di iniongo i sha ayange a tsuaa i̱ kwagh u i̱ a doo ôron tsô la ga. Hii shighe u yange i ver iniongo ne la je, i̱ bende a ior sha gbenda u vesen je zua ga. Ior kpishi mba ve ôr kwagh u yange za hemen ken tugh mbu i ver iniongo shon la ken ityakerada i Ivangeli yô, ishima i mgbegha ve ker ve nôngo ve er iniongo i Kwaghyan u Ter ne sha igbenda kposo kposo je.

Se kav er i hii ve kwagh a lu nahan yô, gadia Yesu Kristu iyolna yange wa mbahenen nav kwagh ér ve eren iniongo ne sha ashighe ashighe. Yange kaa a ve jighilii nahan wener: “Eren nen kwagh ne sha u umbur Mo.”—Luka 22:19; 1 Mbakorinte 11:23-25.

Nahan kpa, aluer ka u iniongo ne ia lu kwagh u injaa hen or u nan lu eren i̱ la sha mimi yô, saa nana lu a mfe u vough u inja i iniongo ne er i tese ken Bibilo i i̱ lu Mkaanem ma Aôndo la. Heela tseegh ga, ka a inja u fan kwagh u Bibilo i er sha kwagh u shighe man gbenda u a er iniongo shon ne kpaa.

Sha u eren sha imo i Yesu yô, Mbashiada mba Yehova sha tar cii vea lu kohol imôngo hen aikighe u iyange i Tomatar, Aipor 16, 2003 ne, sha u umbur ku u Yesu. Iniongo ne ia lu shighe u vea time ken Ruamabera shi vea seer nyôôso jighjigh man dooshima u ve lu a mi sha Ter Yesu Kristu la, un u yange kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron” la. (Yohane 3:16) Se mba lôhôn we saan saan ser we u va kohol a vese hen aikighe shon ne, sha er we kpa u taver jighjigh wou man dooshima wou sha Yesu Kristu man Yehova Aôndo u a lu Ter u sha la yô.