Ibaver I Mbayôôn Tartor

Iwasen sha u Tilen sha Mimi Her sha Kwagh u Mtsegh u Awambe

TAR sha won cii, mbacivir Yehova tese mtil sha mimi ve hen Aôndo sha kwagh u mtsegh u awambe. (Aerenakaa 15:28, 29) Wanakiriki u jighjigh man u fan kwagh la ngu a na anmgbianev Mbakristu iwasen. (Mateu 24:45-47) De ase se nenge kwagh u a dugh ker ken tar u Philippines la.

Gbaatom u ken tar u Philippines la na ibaver nahan ér: “Ken inyom i 1990 la, se zua a ibaver nahan ser, ior mba ve lu ashe a Betel u ken Brooklyn la vea lu teman imôngo i nan ityesen ken tar u Philippines heen. Yange i lôhô anmgbianev mba ken agbaatom agen imôngo aa ken veghertar u Ashia ne, ka tar u Korea man Taiwan kua Hong Kong je la. Awashima yô lu u wasen ve sha er vea ver Ijiir i nan Iwanger sha Kwagh u Iyouci ken ubranci vev shi vea sôr ian i veren Ukômatii mba Wasen sha Kwagh u Iyouci kpaa yô. Sha hiihii la, yange i ver Ukômatii mban ken tar u Philippines ken agar a vesen anyiin.” Lu u ukômatii mban vea nôngo sha u zuan a mbatwerev mba ve soo u eren tom ken ijoughave i môm a vese sha mtil u Mbakristu sha kwagh u awambe la yô. Lu u shi vea naan anmgbianev iwasen zum u mbamzeyol ve ve sha kwagh u awambe yô.

Yange i tsua Remegio ér a lu môm ken Kômatii u Wasen sha Kwagh u Iyouci ken gar u Banguio. Er shighe karen yô, mbatwerev gba nengen a iertom i Kômatii u Wasen sha Kwagh u Iyouci la. Remegio umbur shighe ugen u yange mbatwerev mbagen tema imôngo vea Kômatii u Wasen sha Kwagh u Iyouci man ve soo u fan er a sôr mbauangev mba ve lu Mbashiada man ve vende awambe a tan la twer yô. Remegio kaa wener: “Yange mbatwerev hii u pinen mbampin, kpa m mase kaven mer m fa er me na mbamlumun ga, sha ci u mbampin mbara taver kpishi.” Yange er msen hen Yehova ér a̱ na un iwasen sha er una nenge sha zayol la yô. Remegio za hemen kaa ér: “Yange a pinen hanma mpin a been yô, mbatwerev mbagenev ve kende ave sha ve ôr er yange ve nôngo a imba mlu la yô.” Yange saan Remegio iyol a iwasen la, hemban je yô lu sha er yange i tôô shighe kuma ahwa ahar jimin sha u pinen mbampin shi nan mbamlumun yô.

Hegen ne, ukômatii mban mba je kuma 21 ken tar la jimin cii, man kohol cii yô anmgbianev 77 mba eren tom ken ukômatii mban. Danilo, u á lu Orshiada shi á lu ortwer la kaa wener: “Mbatwerev kav nahan ér mbauangev mba ve lu Mbashiada yô mba zough a iwasen sha ikyev i nongo u ú nengen sha a ve sha dooshima yô.” Sha hiihii la taver ortwer ugen u paven anmgbian ugen a u tan un awambe shio kpen kpen. Nahan kpa, anmgbian la lu dông sha mtil na la her. Yange i pav un a zayol shio. Ijiir i nan Iwanger sha Kwagh u Iyouci la kaa nahan ér: “Yange kpiligh ortwer la iyol kpishi zum u á nenge anmgbian la zua a guda yô. Yange kaa ér: ‘Sha kwagh u a er heen ne yô, aluer gba u a pav ma or wen inja ipaven i tan awambe ga ne je kpa, a saan mo iyol kpishi u paven nan.’ ”