Ka Han Á Fatyô U Zuan A Ishimasurun I Mimi?
Ka Han Á Fatyô U Zuan A Ishimasurun I Mimi?
“Aôndo Ter u Ter wase Yesu Kristu . . . surun se asema sha atsan a ase cii.” —2 MBAKORINTE 1:3, 4.
1. Ka mbamlu mba nyi nahan alaghga vea na a sar ior kpishi u ma ve zough a ishimasurunu?
ALAGHGA angev mbù mbú nyoon or kpishi i tum nan iyol yô, mbua na nana hen ér uma u nan saa a saa ishe je. Ityar-tenger man uraahumbe man ijen i gban ka i gbihi ior ken ibanave. Alaghga ityav mbi nôngon mbia wua ior mbagen hen tsombor shin mbia vihi uya shin mbia na ior a yevese a undu uyaav vev. Alaghga ifer ia na ior a hen ér ma ijiir i môm i vea zua a myôhôryol je kpa ngi ga. Sar ior mba atsan amba ne nahan a bende a ve la u ma ve zough a ishimasurun je zua ga. Vea fatyô u zuan a mi hana?
2. Er nan ve ishimasurun i Yehova a ne la i hembe ciilii?
2 Ior mbagenev kua iniongo igen kpaa ka i nôngo kpoghuloo sha er ia na ior ishimasurun yô. Mkaanem ma kundu kundu ka ma doo kpen kpen. U nan ior akaa a kuren ugbayol vev la ngu a wase ve sha anshighe kpuaa tsô. Kpa ka Yehova u a lu Aôndo u mimi la tseegh una fatyô u sôron akaa a vihin la ye, shi ka un una fatyô u nan imba iwasen i kwagh a gbe sha mi la sha er mayange je akaatseren angan nahan aa kera kimbir ga ye. Bibilo ôr kwagh na nahan ér: “I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii. Un u A surun se asema sha atsan a ase cii, sha er se kpaa sé fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la.” (2 Mbakorinte 1:3, 4) Yehova ka a sur se asema nena?
U Sôron Mbamzeyol Ape Ve Hii La
3. Ishimasurun i Aôndo a ne se la i sôr mbamzeyol mba uumace ape ve hii la jighilii nena?
3 Tsombor u orumace cii ya dyako i myen sha ci u isholibo i Adam la, man kwagh ne va a mbamzeyol kpishi mba ve hingir u zan a ve ken ku yô. (Mbaromanu 5:12) Man mlu ve ne hemba vihin cii sha er Satan Diabolo a lu “tor u tar ne” yô. (Yohane 12:31; 1 Yohane 5:19) Yehova yange er kwagh hemba di u zungwen mlu u vihin tsung u uumace ve tagher a mi la. Á tindi Wan na u môm môm la sha u a̱ lu ipaa i nan myom, shi Á kaa a vese wener aluer se na Wan Na jighjigh yô, se fatyô u zuan a myôhôryol sha akaa a vihin a isholibo i Adam i ve a mi la. (Yohane 3:16; 1 Yohane 4:10) Aôndo shi tsengakaan wener, Yesu Kristu, u i ne un tahav mbu sha man mbu sha won cii la una tim Satan man tar na u ifer ungun ne cii.—Mateu 28:18; 1 Yohane 3:8; Mpase 6:2; 20:10.
4. (a) Kanyi kwagh Yehova a ne sha u taver vangertiôr wase ken uityendezwa nav mba á tende zwa u van a myôhôryol laa? (b) Yehova wase se u kaven shighe u myôhôryol la una va la nena?
4 Aôndo na i koso akav kpishi a yange i nger a tesen ér hanma kwagh u a tsengeôron yô ka a kure vough sha er una taver vangertiôr wase ken uityendezwa nav yô. (Yosua 23:14) A na i nger akaa ken Bibilo a yange er sha u waren mbatomov nav mba yange ve tagher a akaa a tseren ve a sha iniôngon i orumace tseegh yô kwagh ma hemba ve la. (Ekesodu 14:4-31; 2 Utor 18:13–19:37) Yehova yange tese sha ikyev i Yesu Kristu ér awashima na wa u been ior “hanma inja . . . i mkpeyolga cii,” kua u nderen mbakpenev shin ku je kpaa. (Mateu 9:35; 11:3-6) Ka hanma shighe man akaa ne cii aa eree? Bibilo na mlumun sha mpin ne sha u pasen kwagh u ayange a masejime a tar u tse ne, aa a vande van cii man usha mbahev man tar u he u Aôndo ua va la. Mpase u Yesu yange na la zua sha ashighe a se lu uma ne.—Mateu 24:3-14; 2 Timoteu 3:1-5.
Ior Mba Ve Lu ken Ican La Vea Zua a Msurshima
5. Yehova yange urugh asema a Mbaiserael mba sha ayange a tsuaa la har sha nyi sha shighe u lu surun ve asema laa?
5 Gbenda u Yehova yange eren kwagh a Iserael u sha ayange a tsuaa la wase se u fan msur u yange á sur ve asema sha ashighe a ican la. Á umbur ve imba Aôndo u un lu yô. Kwagh ne taver vangertiôr ve ken uityendezwa nav. Yehova yange mgbegha uprofeti nav sha u ve yar tom a akaa a tesen mkposo u a lu wang hen atô u un Aôndo u mimi man u uma la man ieev mbi mayange je mbia fatyô u wasen iyol i mbi ga shi mbia fatyô u wasen ior mba ve civir mbi kpaa ga la. (Yesaia 41:10; 46:1; Yeremia 10:2-15) Shighe u Yehova lu kaan a Yesaia wener, “Sur nen ior Av asema, sur nen ve asema” la, yange mgbegha profeti ne sha u a̱ yar tom a anzaakaa man akaa a pasen ityom Na i igbetar sha u tesen mhembe u Yehova var var, un u a lu Aôndo u mimi tswen la.—Yesaia 40:1-31.
6. Kanyi kwagh ashighe agenegh Yehova yange a pase u tesen shighe u myom una va?
6 Sha ashighe agenegh yô, Yehova yange a na ishimasurun sha u tesen shighe jighilii, u a lu ikyua ikyua shin shighe u ken hemen u una yima ior nav yô. Sha shighe u myom u Mbaiserael mba i lu kighir ve la mgbôghom u vea due ken Igipiti kera yô, a kaa a ve, wener: “Mase shin ican i môm i Me er Farao kua Igipiti kpaa yô, tsô ken masetyô yô, una de ne, né mough heen, né yem.” (Ekesodu 11:1) Zum u akuraior atar zua va ta num sha Yuda sha ayange a Tor Yehoshafati la, Yehova kaa a ve wener “kper” je Una nôngo kwagh sha ci ve. (2 Kroniku 20:1-4, 14-17) Kpa gema myom u i yima ve sha ikyev i Mbababilon la yô, Yesaia tsengangeren kwagh ne war kuman anyom 200 ken ijime, shi i seer ôron akaa sha kwagh ne vighe vighe sha ikyev i Yeremia war kuman er anyom deri nahan cii man i va mase yiman ve ye. Akaaôron a profeti la yange taver mbatomov mba Aôndo ishima zum u shighe mgbôghom u a yima ve la je ka u ôron ga!—Yesaia 44:26–45:3; Yeremia 25:11-14.
7. Ashighe kpishi kanyi kwagh yange i lu ken uityendezwa mba myom mbara, man kwagh ne yange a bende a ior mba lun a jighjigh mba ken Iserael la nena?
7 Doo kpishi u se fan ser uityendezwa mba yange ve na ior mba Aôndo ishimasurun la ashighe kpishi yange ve ôr akaa sha kwagh u Mesiya. (Yesaia 53:1-12) Akaa ne lu nan ior mbajighjigh ishimaveren sha ikyov ikyov je er vé lu tagher a ameen la. I ôr ken Luka 2:25 nahan ér: “Orgen lu ken Yerusalem, iti na er Shimion; or la lu or u perapera man u cian Aôndo a ishima i môm, lu keghen msurshima u Iserael; [shin ishimasurun; ka mve u Mesiya jighilii je] Icighan Jijingi kpaa lu sha a na.” Shimion yange fa ishimaverenkeghen i sha kwagh u Mesiya i í nger ken Ruamabera la, man mkegh u yange lu keghen shighe u kwagh ne una kure la bende a uma na. Yange fatyô u fan er akaa ne cii aa kure ga, shi lu uma her sha er una nenge myom u i tsengaôron la ga, kpa lu kwagh u saan un iyol kpishi zum u á nenge a Un shon u una lu gbenda u “myom” u Aôndo la yô.—Luka 2:30.
I Na Ishimasurun sha Ikyev i Kristu
8. Iwasen i Yesu yange na la kaha nena zum u i kar í sha kwagh u ior kpishi yange ve hen ér kwagh gba ve a mi la yôô?
8 Er Yesu Kristu lu eren tom na shin tar ne la, lu ashighe cii a na ior iwasen i yange ve hen ér kwagh gba sha mi la ga. Mbagen ve lu veren ashe a Mesiya u una pase ve sha ikyev i hemen u Roma ú yange ú vihi ve ishima yum la una tuhwa yô. Kpa Yesu ti yôô wener ior ve ker u ngohol tahav ga; a kaa a ve ér: “Na nen Shisar akaa a a lu a Shisar yô.” (Mateu 22:21) Awashima u Aôndo za shimi hemba di u yiman ior sha ma hemen u patii u ve lu sha ikyev i ú la. Ior cii ve soo u veren Yesu tor, kpa á kaa wener un una “na uma Na a̱ hingir ipaan sha ci u ior kpishi.” (Mateu 20:28; Yohane 6:15) Shighe lu a kuma u una tema tor ga, shi gba u a lu Yehova una na un tahav mbu hemen ye, ka ikpelaior i kwagh kuman i̱ ga la ga.
9. (a) Ka loho u ishimasurun u nyi Yesu yange yôô? (b) Yesu lu tese er loho la u lu kwagh u injaa u wasen sha mbamlu kposo kposo mba ior tagher a mi la nena? (c) Tom u Yesu la yange u bugh gbenda u nyi?
9 Ishimasurun i Yesu va a mi la lu ken “Loho u Dedoo u tartor u Aôndo” la. Lu loho u Yesu lu yôôn sha hanma ijiir i yange una za je la. (Luka 4:43) Yange tese kwagh u un Tor Mesiya una er sha ci u uumace sha u ôron var var er loho la u lu kwagh u injaa u wasen sha mbamzeyol mba ior lu a mi ayange ayange la yô. Yange hide na ior mba ve lu yan ican la ityôkyaa i he i vea lu uma yô, sha u bughun mbaapirashe ashe shi bughun mbakondonikyer ikyer (Mateu 12:22; Marku 10:51, 52) shi lu been mba kpen alegh angev (Marku 2:3-12), shi lu been mba ve lu Mbaiserael a na imôngo la iangev mbi ndôhôrshima (Luka 5:12, 13), kua iangev mbi genegh mbi vesen kpaa. (Marku 5:25-29) Yange va ior mba ken icombor igen mba ve lu zungwen kpishi la a myôhôryol sha u nderen mbayev vev shin ku. (Luka 7:11-15; 8:49-56) Á tese agee a na a á lu a mi la sha uraahumbe u vihin tsung man sha u kuren mbamgbe mba zege ikpelaior i̱ yange na ve kwaghyan la. (Marku 4:37-41; 8:2-9) Heela tseegh ga, Yesu yange tese ve atindiakaa a uma a a fatyô u wasen ve u nengen sha mbamzeyol vev dike dike yô, shi aa iv asema a ve a ishimaverenkeghen i hemen u perapera sha ikyev i Mesiya la. Nahan yô, er Yesu lu eren tom na la, lu ishimasurun tseegh na ior mba ve kegh ato a na sha jighjigh la ga, kpa shi á bugh gbenda u nan ior ishimataver anyom udubu imôngo ken hemen.
10. Kanyi or á fatyô u zuan a mi sha ci u naagh ku Yesu kula?
10 Er anyom kar hemba 60 sha shighe u Yesu na naagh a uma na u inyam man awambe la man i̱ nder un shin ku kôndo yem za lu uma sha la, i na apostoli Yohane mkaanem man nger wener: “Mbayev av, akaa ne m ngu ngeren ne a sha u de kera eren nen isholibo ga yô. Aluer anti or nana er isholibo kpaa, se mba a Orwasen hen Ter, Yesu Kristu Orperapera. Ka Un je A lu iwom i asorabo ase ye, man ka a ase tseegh ga, kpa ka a tar cii je.” (1 Yohane 2:1, 2) Se zua a ishimasurun je zua ga, sha ci u mbamtsera mba naagh ku Yesu yange na sha uma na u vough u orumace la. Se fa ser se fatyô u zuan a mde u asorabo shi se lu a imoshima i wanger wanger man ikyaryan i dedoo vea Aôndo kua ishimaveren i zuan a uma u tsôron kpaa.—Yohane 14:6; Mbaromanu 6:23; Mbaheberu 9:24-28; 1 Peteru 3:21.
Mlu u Icighan Jijingi A Lu Orsurunshima La
11. Shi ka gbenda ugenegh u ishimasurun u nyi Yesu yange er ityendezwa sha mi cii man ku na?
11 Er Yesu lu vea mbaapostoli nav imôngo hen aikighe u masetyô cii man ku na u nan naagh la, á shi á ôr kwagh u gbenda ugenegh u Ter na u sha a ver sha u surun ve asema yô. Yesu kaa wener: “Me sôn Ter, man Una na ne Orsurunshima [zwa Grika, pa·raʹkle·tos] ugen u Una lu a ven gbem yô, ka Jijingi u mimi.” Yesu taver ve ishima wener: “Orsurunshima, ka Icighan Jijingi je la, . . . Una tese ne akaa cii, man shi Una umbur ne akaa a M er ne cii kpaa.” (Yohane 14:16, 17, 26) Ka nena jim yange icighan jijingi va ve a ishimasurunu?
12. Tom u icighan jijingi u wasen u umbur mbahenen mba Yesu akaa la wase u van ior kpishi a ishimasurun nena?
12 Mbaapostoli yange ve ngohol ityesen hen Yesu kpoghuloo je. Sha kpôô yô, ve hungur akaa a yange er la ga, kpa ve umbur akaa a yange ôr ve la jighilii je kpa? Ve hungur akaawan a hange hange sha er ve lu a mhen u vough u umbur hanma kwagh ga yum shinii? Yesu yange taver ve ishima wener icighan jijingi ‘una umbur ve akaa a Un er ve cii.’ Nahan er Yesu kpe anyom kar kuma er anigheni nahan je kpa, Mateu kôr cio u ngeren Ivangeli i hiihii la, i á nger kwagh u Ityesen i Yesu i sha Uwo i kundun iyol la man anzaakaa a na a sha kwagh u Tartor man shi kwagh u ikyav i m-ande na u yange ôr vighe vighe la. Sha shighe u anyom kar hemba 50 ken ijime la apostoli Yohane nger kwagh u a kom u haren sha mi, u a pase kwagh u anyangem kpuaa ma masejime ma uma u Yesu shin tar ne vighe vighe la. Nenge imba er akaa a yange i na i nger ne a lu kwagh u taver or ishima zan zan sha ayange a ase ne sha wono!
13. Icighan jijingi yange lu ortesen hen Mbakristu mba sha ayange a tsuaa la nena?
13 Dugh u umbur ve mkaanem ma yange i ôr la kera yô, icighan jijingi yange tese mbahenen shi wase ve u hemban kaven awashima u Aôndo cii. Shighe u Yesu lu vea mbahenen la, a ôr ve akaa a yange ve kav á hen shighe la wang ga yô. Nahan kpa, ken masejime sha shighe u icighan jijingi mgbegha Yohane man Peteru man Yakobu man Yuda man Paulu la yô, ve nger akaa a pasen iwanger i yange i seer van sha kwagh u awashima u Aôndo yô. Nahan icighan jijingi lu ortesen u nan ve ishimataver i injaa u tesen ér ka Aôndo je a lu hemen ve ye.
14. Ka sha nyi igbenda nahan icighan jijingi yange wase ior mba Yehova?
14 Uiyua mba kpilighyol mba icighan jijingi na la kpa yange ve wase u tesen wang ér mlumun u Aôndo kera ka sha Iserael u sha iyol a lu ga, kpa ngu sha tiônnongo u Kristu. (Mbaheberu 2:4) Ityamegh ki icighan jijingi shon ki ior asange asange lu a mi la kpaa lu kwagh u hange hange u wasen u kaven mba ve lu mbahenen mba Yesu mimi mimi la. (Yohane 13:35; Mbagalatia 5:22-24) Shi jijingi yange taver ior mba ken tiônnongo u eren shiada vangertiôr man a mciem shio.—Aerenakaa 4:31.
Iwasen i í Ne Shighe u Mkighir A Lu Je i Gande Yô
15. (a) Ka mbamzeyol mba nyi Mbakristu mba sha ayange a karen la man mbaainge ve tagher a mini? (b) Er nan ve mba ve ne ior mbagenev ishimataver la, alaghga a gba u ve kpa a taver ve ishima?
15 Mba ve lu civir Yehova kua mba ve til sha mimi hen a na cii ka ve zua a tôvacan sha ma gbenda keng. (2 Timoteu 3:12) Nahan kpa, Mbakristu kpishi zua a mkighir sha gbenda u vesen je zua ga. Ken ayange a ainge ne, ikpelaior i toron asema nzughul a mbagen kpishi sha u gbihin ve ken afo a mbakwarev, man ken purusu man ken afo a tom, ken mbamlu mba vihin kpishi. Ugomoti hingir mba van a tôvacan kpoghuloo je shi ve de ér ior mba eren kwagh sha tindi ga ve er tswam sha ishima ve a myange shio. U seer yô, Mbakristu tagher a mbamzeyol mba vesen mba mkpeyolga shin mbamzeyol mba hen tsombor mba ganden ikyaa inya. Alaghga Orkristu u nan vie tsor tsor, u nan wasen mbananjighjigh a nan kposo kposo u sôron mbamzeyol mba taver tsung la je kpa nana zua a akaa a nan nàn mzeyol ken ishima. Shighe u kwagh a er nahan yô, or u nan lu taver mbagen ishima la, alaghga a gba u nan kpaa a taver nan ishima.
16. Zum u Davidi lu ken mzeyol tsung la, yange ngohol iwasen nena?
16 Zum u Tor Saulu lu zendan Davidi ityô ér una wua un la, Davidi gema hen Aôndo sha u a wase un yô, a zamber a na wener: “Ungwa msen wam, Aôndo, ver ato sha akaaôron a ken zwa wam ne.” (Pasalmi 54:2, 4; 57:1) Davidi yange zua a iwasen kpa? Een, yange zua a mi. Yehova yange yar tom a profeti Gadi man pristi Abiatar sha shighe la sha u ve tese Davidi kwagh u una er yô, shi yar tom a Yonatan wan u Saulu sha u a taver gumor ne ishima yô. (1 Samuel 22:1, 5; 23:9-13, 16-18) Yehova shi de Mbafiliti ve haa ityav ken tar la, nahan á dan Saulu u zendan un ityô.—1 Samuel 23:27, 28.
17. Yesu yange ker iwasen hana sha shighe u lu ken ican tsung laa?
17 Yesu Kristu iyol na kpaa yange lu ken ican tsung sha shighe u mkur u uma na shin tar mgbôghom la. Yange fa doo doo er ieren na ia fatyô u benden a iti i Ter na u sha man er kwagh ne una fatyô u benden a mlu u ken hemen u uumace cica cii yô. Á er msen a ishima i môm, je yô, á hingir u ‘lun ken ican’ tsung je. Aôndo nenge wener Yesu ngohol iwasen i kwagh gba un a mi sha shighe u lu ken ican la.—Luka 22:41-44.
18. Ka ishimasurun i nyi Aôndo yange na Mbakristu mba sha ayange a tsuaa mba i tôv ve a ican kpoghuloo laa?
18 Sha shighe u i wa imaagh ki tiônnongo ken derianyom u hiihii i bee la, i tôv Mbakristu a ican je gande hanma or yevese undu Yerusalem mase shin mbaapostoli tseegh. I kôr nomso man kasev hen uyaav vev i kpera inya i yem a ve. Ka ishimasurun i nyi Aôndo yange na ve? Ka ibumun i ken Mkaanem nam ma ma kaa ér mba “a kwagh u hembandoon man u lun gbem,” u a lu dyako i been mayange ga i vea va lu sha a Kristu imôngo la. (Mbaheberu 10:34; Mbaefese 1:18-20) Er ve lu pasen kwagh zan a mi her la, ve nenge a ikyav i tesen ér jijingi u Aôndo ngu a ve, man akaa a yange er ve ne cii lu ityôkyaa i seer nan ve iember.—Mateu 5:11, 12; Aerenakaa 8:1-40.
19. Shin er Paulu ya ican kpishi nahan kpa, yange nenge ishimasurun i Aôndo a ne la nena?
19 Ken hemen yô, Saulu (Paulu) u un iyol na tôvon mbagen a ican sha tswam la va hingir Orkristu, sha nahan yô i tôv un a ican kpishi. Or u eren ahir ugen lu ken icile i Shiperu, lu nôngon wener una yange tom u Paulu la sha aeren a na a sha icugh man sha u goom a gbenda u mimi. Shighe u Paulu lu ken Galatia la, i ta un awen zan zan je yô, i hen ér a kpe nahan i undu un. (Aerenakaa 13:8-10; 14:19) Ken Masedonia di yange i gbidye un sha mbaakpa. (Aerenakaa 16:22, 23) Sha shighe u ikpelaior i toron asema er ayôôso ken Efese bee kera yô, a nger wener: “I kighir se je gande, hemba agee ase ken inya je, se kera fa mwar wase ga. Se yô, i lu se je er i ôr se ijir i kuugh kera ve yô.” (2 Mbakorinte 1:8, 9) Kpa ken washika shon ne môm, Paulu nger mkaanem ma nan ishimasurun ma i ter ma ken ikyumhiange i sha 2 ken kwaghngeren ne la.—2 Mbakorinte 1:3, 4.
20. Kanyi kwagh se nenge sha mi ken kwaghngeren u una dondo nee?
20 Ú fatyô u lun a ci sha u nan mbagen ishimasurun ne nena? Ior mba kpishi sha ayange a ase ne mba kwagh a gbe ve a ishimasurun ne sha shighe u ve lu zungwen sha ci u ma aahe u a bende a ior udubu imôngo, shin sha ci u ma ican i ve lu yan i i̱ bende a ve tseegh yô. Ken kwaghngeren u una dondo ne, se nenge er sha igbenda i ihiar ne cii se na ior ishimasurun yô.
Baver We Kpa?
• Er nan ve ishimasurun i hen Aôndo la i hembe ciilii?
• Ka ishimasurun i nyi i ne sha ikyev i Kristu?
• Icighan jijingi ka orwasen nena?
• Na akav a tesen ishimasurun i Aôndo yange na mbashiren un tom shighe u i kighir ve je gande la?
[Study Questions]
[Pictures on page 21]
Bibilo tese se ér Yehova yange va ior nav a ishimasurun sha u waren ve
[Pictures on page 22]
Yesu yange na ior ishimasurun sha u tesen ve man sha u been ior angev shi nderen mbakpenev kpaa
[Picture on page 24]
Yesu yange ngohol iwasen i i dugh sha yô