‘Solomon Haa Akondo Er Mô Ve Môm Nahan Ga’

UIMONDON mba ken toho er mba ú lu nengen a mi heen ne nahan, ve dumbur sha akpe a igbenda i shin imbusutariyan i Afrika la. Mba yer ve ér cosmos man ve due ken ityar i Amerika i i̱ tsee kpishi la. Uimondon mba doonashe mban nahan alaghga vea umbur se ityesen i Yesu yange tese yô. Ior kpishi mba ve lu ungwan a na la lu atsanaior, nahan asema lu nyian ve sha kwagh u mbamgbe vev mba yolough, er kwaghyan man akondo nahan.

Yesu pine wener: “Inja na nan man asema a nyian ne sha kwagh u akondo? Nenge nen er ityombo i ken toho i vesen yô; ngi eren tom ga, mou kpaa ngi te ga, kpa M kaan ne ne, Solomon a iengem na cii je kpaa, mayange haa akondo er mô ve môm nahan ga.”—Mateu 6:28, 29.

Ior due a mbamhen kposo kposo sha u vea fa imondon i ken toho i Yesu yange ôr kwagh u i̱ jighilii la yô. Nahan kpa, Yesu yange kar imondon ne sha ahu a a dumbur ken toho, kaa ér: “Yô, aluer Aôndo Una wuhan ahu a ken toho iyol doo doo nahan, a a lu uma nyian, kper a haa ken atse la, man hire ne mba ne lu a anjighjigh u nan nee?”—Mateu 6:30.

Shin er uimondon mba i yer ér cosmos ne ve lu ken tar u Iserael ga nahan kpa, ve sue ityesen i Yesu tese ne. Aluer or kenger ve ken ica shin nan kenger ve ikyua ikyua je kpa, ve dooashe je gande, shi ior mba tôôn ufoto man mba kperan akaa kpa ka ve saa ôron kwagh ve didi. Sha mimi yô, Yesu yange lu kehen a kwaghôron zum u á kaa ér: “Solomon a iengem na cii je kpaa, mayange haa akondo er mô ve môm nahan ga,” la ga.

Kanyi ityesen se zough a mi sha kwagh ne nyiana? Mbacivir Aôndo cii vea fatyô u lun a vangertiôr ér sha ashighe a ican je kpa una wase ve vea zua a mbamgbe vev mba hange hange. Yesu pase wener: “Ker nen tartor [u Aôndo] man akaa ne cii [á kwagh a gbe se a mi er kwaghyan man akondo nahan] á seer ne a ye.” (Luka 12:31) Een, ka se zua a mbamtsera mba mimi sha u keren Tartor u Aôndo. Kpa ú fa kwagh u a lu Tartor u Aôndo man kwagh u ua er sha ci u orumace kpa? A saan Mbashiada mba Yehova iyol u wasen we sha er ú zua a mbamlumun sha kwagh ne ken Bibilo yô.