“Nenge, Ngun Ka Aôndo Wase”
“Nenge, Ngun Ka Aôndo Wase”
Akaa a í er ken akaangeren a ahar ne cii har sha takerada u Draw Close to Jehovah (Kporom Ikyua hen Yehova), u yange i due a ú ken mkohol u vesen u yange i er sha tar cii ken inyom i 2002 zan zan 2003 la.
“Nenge, ngun ka Aôndo wase u se lu veren ashe [a] Na ser, A̱ va yima se je ne; ka TER.”—YESAIA 25:9.
1, 2. (a) Yehova yange yila tertamen Aberaham ér nyi, man alaghga kwagh ne una na se hen ser nyi? (b) Bibilo i taver se ishima ér se fatyô u lun ikyooso ikyooso a Aôndo nena?
“HUROR WAM.” Kape Yehova, Orgban u sha man tar yange yila tertamen Aberaham je la. (Yesaia 41:8) Nenge ase sha wono—orumace u kaka nahan nan ngu huror u Ter Uhemban sha won cii! Alaghga a kpiligh we iyol u hen wer, ‘Mo me fatyô u lun ikyua a Aôndo imba la nahan je kpa?’
2 Bibilo taver se ishima ér se fatyô u lun ikyooso ikyooso a Aôndo. Aberaham lu zua a ian i lun ikyooso ikyooso a na imba la nahan sha ci u á “na Aôndo jighjigh.” (Yakobu 2:23) Nyian ne kpa, ‘mzough u Yehova ngu a mbaperapera.’ (Anzaakaa 3:32) Bibilo taver se ishima ken Yakobu 4:8 ér: “Kporom nen hen Aôndo, Un kpaa, Una kporom her a ven.” Ikyav tese wang ér, aluer se nôngo ser se kporom ikyua a Yehova yô, un kpa una gba teman a tema tsô ga. Sha kpôô yô, una kporom ikyua hen a vese. Kpa mkaanem ma Aôndo á ne i nger ne ma tese ér ka se—uumace mbaasorabo mba se yen ne—se vande hiin iniôngon ne yee? Ka nahan ga cii. Ka er Yehova a vande eren akaa a vesen ahar ve, i lu kwagh u se fatyô u lun ikyooso ikyooso a Aôndo wase u dooshima ne ye.—Pasalmi 25:14.
3. Ka akaa ahar a nyi Yehova a er sha er se fatyô u lun azende a na?
3 Hiihii yô, Yehova yange sôr ian ver sha u Yesu a̱ va “na uma Na a̱ hingir ipaan sha ci u ior kpishi yô.” (Mateu 20:28) Ka ipaan shon la i ne ve, i hingir u se fatyô u kporom ikyua hen Aôndo ye. Bibilo kaa ér: “Se mba a dooshima sha ci u se vande doon Un ishima je yô.” (1 Yohane 4:19) Nahan, er í lu se se “vande doon [Aôndo] ishima je yô,” nahan a wa imaagh ki se maa sha mi ve se kôr ijende a na yô. Kwagh u sha uhar yô, Yehova pase iyol na hen a vese. Hanma or u se ker ijende a nan yô, mlu u kangenaa u á lu hen atô wase la ka a har sha mfe u se fan or la sha mimi shi soon aeren a nan lu a mi la kpaa. Hen ase fa ikyav i kwagh ne jighilii. Luun er Yehova ka Aôndo u ken myer, u se fe kwagh na ga yô, mayange je ma i lu kwagh u se fatyô u kporom hen a na ga. Kpa, er Yehova ma a yer iyol na yô, á soo ér se̱ fa un. (Yesaia 45:19) A pase iyol na ken Bibilo, Mkaanem nam mara, sha gbenda u se kav yô—man kwagh ne tese ér se doo un ishima tseegh ga, kpa shi tese kpaa ér á soo ér se̱ fa un shi se̱ soo un ua lu Ter wase u sha la.
4. Se nguren fan aeren a Yehova seer yô, ishima ia lu se ker sha kwagh na nena?
4 Í lu nahan ú nenge wanye u kiriki tese uwegh sha ter u nan, girim nan iyol nan kaa a azende a nan sha iember ér, “Baba wam ngula,” vee? Mbacivir Aôndo kpa mba a hanma ityôkyaa i a girim ve iyol nahan sha kwagh u Yehova yô. Bibilo tsengaôron shighe u mbananjighjigh vea ngor amo vea kaa ér: “Nenge, ngun ka Aôndo wase” je ne yô. (Yesaia 25:8, 9) Se nguren fan aeren a Yehova seer yô, kape a lu hemban lun se er ka se se̱ lu a Ter u hemban doon cii man Ijende i varen a vese je la. Een, aluer se fa aeren a Yehova yô, kwagh la una na se atôakyaa kpishi a kporom ikyua hen a na. Nahan de se nenge nen ase er Bibilo i̱ pase aeren a Yehova a duen tseer tseer la yô—aeren shon yô ka tahav man ijirôron i sha mimi man kwaghfan man dooshima je la. Ken kwaghngeren ne yô, se ôr kwagh u aeren atar a hiihii aa ken aeren ne.
“A Hemba Agee”
5. Er nan ve i lu shami u kaan ér ka Yehova tswen a lu “Uhembanagee,” man ka sha nyi igbenda nahan á yaren tom a tahav nav mbù mbú te hindi iyol yum laa?
5 Yehova “hemba agee.” (Yobu 37:23) Yeremia 10:6 kaa ér: “Ma or môm ngu er We nahan ga TERE! We U hemba cii, iti You kpaa ngi a agee hemba cii.” Tahav mbu Yehova ti mbu a ikighir er tahav mbu akaa a i gbe á a gba la mbu lu nahan ga. Sha nahan yô, ka un tswen á lu “Uhembanagee” ye. (Mpase 15:3) Yehova yaren tom a tahav nav mbù mbú te hindi iyol yum ne sha u gban akaa shi timin akaa man sha u kuran shi sôron akaa kpaa. Time ase sha akav a tesen a ahar ne—tahav nav mbu gbanakaa man tahav nav mbu kuran la.
6, 7. Iyange ngi a tahav nena, man ka mimi u injaa u nyi i̱ seer tesene?
6 Oo u inyom ka ua ta gera gera, man wea due wea tile ker nahan, ka i lu ú iyol nena? Mtseenem ma iyange mara ka ma bende a we. Nahan kpa sha mimi yô, ka i lu kwagh u a dugh ken tahav mbu Yehova je a lu benden a we ye. Iyange ngi aa tahav kuma nena? Mtsee u ken atô u iyange la kuma er udigirii miliôn 15 nahan sha ikyaren i Celcius la. Aluer i tsever ivulugh ki mtsee u ken atô u iyange la cukuu er zwa mshir nahan tsô, í va ver shin tar ne kpa, ma or nana fatyô u kporom ikyua a anivur kwagh u nan mtsee la kuman ukilomita 150 tsô kpaa ga! Hanma sekônd yô, tahav ka mbu due ken iyange mbu ngee je i kuma er ubom umiliôn uderi uderi kohol bughur icin i môm nahan. Kpa ape tar ú lu ve ú lu ningir ivuen usu i cieryol ne gba ica akuma akuma. Ua war kporom ikyua hemban er ú lu hegen ne yô, mngerem ma sha tar cica cii maa uma fese je; kpa ua gba di ica a hemba nahan yô, mngerem ma sha tar cii maa kundu a gba akpo. Aluer ua gba ica a iyange shin ua kporom ikyua a iyange kpa, kwagh a kera shi uma sha tar wase ne ga.
7 Er uuma mba iorov ve har sha iyange nahan cii kpa, ior kpishi nenge ér i̱ gba ma kwagh ga. Sha nahan yô, ityesen i se zough a mi ken iyange la í kar ve. Pasalmi 74:16 ôr kwagh u Yehova kaa ér: “U ver . . . iwanger sha, kua iyange kpaa.” Een, iyange i̱ ve Yehova a iwuese, un “u A gbe Sha man tar” la. (Pasalmi 146:6) Nahan je kpa, ngi a ngi di môm ken akaa a i gbe á a gba aa a tese se tahav mbu Yehova mbu kpilighyol mbula tsô. Se seer henen fan kwagh u tahav mbu Yehova mbu gbanakaa yô, kape hindi ia hemba tan se iyol kpaa je la.
8, 9. (a) Ka mkaanem ma tesen mhôônom ma nyi ma tese se gbashima u Yehova a lu a mi u kuran se shi wan ikyo a vese laa? (b) Ka sha nyi gbenda nahan orkuranilev u sha ayange a i lu ngeren Bibilo la yange a wa ikyo a iyôngo na, man kwagh ne tese se nyi sha kwagh u Orkuranilev wase u Tamen laa?
8 Yehova kor mba civir un shi we ve ikyo sha tahav nav mbù mbú gandeôron la. Bibilo yar tom a mkaanem ma kôron ken ishima ma Yehova a ôr wanger wanger sha u pasen mkor u una kura ior nav shi una wa ve ikyo la. Ikyav i tesen yô, nenge ase kwagh u a lu ken Yesaia 40:11 la. Hen ijiir la Yehova tôô iyol na kar sha orkuranilev, shi tôô ior nav di gema kar sha iyôngo. Í nger her ér: “Una koso ilev Nav er orkuranilev nahan, Una kohol ônovmbaiyôngov sha uwegh Nagh, Una tôô ve Una wa sha ikum Na, Una za a mbiambenônov tegh tegh.” Ú fatyô u gbidyen kwar nengen a kwagh u i pase hen ivur ne ken ishima you kpa?
9 Zendenya ugen u lun humee er iyôngo nahan yô, fa ngun ga. Orkuranilev u sha ayange a i lu ngeren Bibilo la yange i gba u una tsoghor ishima sha u kuran iyôngo na sha ikyev i ugbaseela man dwem, kua sha ikyev i ubegha je kpaa. (1 Samuel 17:34-36; Yohane 10:10-13) Kpa shi ashighe agen yô, yange i gba u a kura iyôngo sha gbenda ugen, a eren a í sha ue. Ikyav i tesen yô, yange iyôngo ia za mar ica a ityôr yô, orkuranilev a kura waniyôngo u i mar la nena? Yange a kôr anwaniyôngo shon a wa sha “ikum” na—a hule un ken ikyondo na i cirin iyol la. Nahan kpa, a er nan ve waniyôngo la una hingir u va lun sha “ikum” i orkuranileve? Alaghga anwaniyôngo la una kporom ikyua hen orkuranilev la, alaghga je yô una kpoghor nan shin nguhar kpaa. Nahan kpa, ka orkuranilev la iyol na una shiligh una kôr waniyôngo la ve, una wa sha ikyum i nan ye. Nenge er kwagh ne a tese gbashima u Orkuranilev wase u Tamen la a lu a mi u kuran se shi wan ikyo a vese la sha wono!
10. Ka mkor u nyi Yehova a ne se nyiana, man er nan ve imba mkor ne i̱ lu a inja yumu?
10 Kpa Yehova er a er ityendezwa ér una kura ior nav tseegh ga, a er kwagh hemba nahan. Sha ayange a i lu ngeren Bibilo her la, Yehova tese sha uivande wue wue wener una fatyô u ‘yiman mba ve civir Aôndo la ken imeen.’ (2 Peteru 2:9) Nyian di ye? Se fa e̱r a yaren tom aa tahav nav mbura sha u kuran se sha ikyev i hanma kwaghtseren cii hegen ga yô. Nahan kpa, a na se kwagh u a hembe imba mkor la yô—ka mkor u ken jijingi je la. Aôndo wase u dooshima ne kor se sha iyolvihin i ken jijingi sha u nan se kwagh u i gbe u se lu a mi ve, se wa ishima a ameen shi se kura mlu wase u se lu a mi vea na la yô. Ikyav i tesen yô, Luka 11:13 kaa ér: “Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” Jijingi u ageegh shon ne una fatyô u nan se aeren a i gbe u se lu a mi sha u tagher vanger a nyityô ameen shin mbamzeyol mba se tagher a mi cii. (2 Mbakorinte 4:7) Sha nahan yô, Yehova ngu kuran uma wase hegen tseegh ga, kpa una kura un gbem sha won. Sha mimi yô, er se lu a ishimaveren ne ken ishima nahan yô, se nenge nyityô ican i yan ken tar ungun cii ser ka kwagh u “peesa u sha anshighe kpeghee.” (2 Mbakorinte 4:17) Imba Aôndo u a yaren tom aa tahav nav sha ci wase sha dooshima imba ingin ne nahan, sar se pe kporom ikyua hen a na ga he?
“Kwagh u Mimi Doon TER Ishima”
11, 12. (a) Er nan ve ijirôron i sha mimi i Yehova la i urugh se i ve a vese hen ana? (b) Davidi yange mase kuren ikyaa ér nyi sha kwagh u ijirôron i sha mimi i Yehova laa, man mkaanem nam ma yange i na un nger ne ma a sur se asema nena?
11 Yehova eren kwagh ua lu u vough shi a lu u shami yô, shi gem ga, sangen a sange kpaa ga. Ú ngu wer ijirôron i sha mimi í Aôndo la ka kwagh u a fe or ga, a we ma or ikyo kpaa ga, u una vihi se ishima ga, kpa gema ka ieren i injaa tsung i̱ ia urugh se, se kporom a kporom ikyua hen Yehova yô. Bibilo pase mdoo u ieren ne gbar gbar. Nahan yô, de se time ase nen sha igbenda itiar i Yehova a er ijir sha mimi yô.
12 Hiihii yô, ijirôron i sha mimi i Yehova la í na yô, eren a mbacivir un sha gbenda u perapera, shi te ikyaa ken a ve kpaa. Orpasalmi Davidi yange va kav ijirôron i sha mimi i Yehova ne sha ashe na. Kwagh u Davidi iyol na yange nenge a mi, kua kwagh u yange hen sha igbenda i Aôndo ve zua a mi la yange na yô, mase kuren ikyaa ér nyi? A kaa ér: “Kwagh u mimi doon TER ishima, man shi te mba i doo Un a ve la kera ga. Mba koson ve gbem.” (Pasalmi 37:28) Nenge imba ishimataver i surun or ishima la sha wono! Mayange Aôndo wase una ta mba i doo un a ve la kera ga. Sha nahan yô, se fatyô u lun a vangertiôr ser una wa se ikyo sha dooshima na la. Ijirôron na i sha mimi la tese ér kwagh ne una er nahan kpee, kwagh u geman sha mi kposo una lu ga!—Anzaakaa 2:7, 8.
13. Ikyo i wan i Yehova a lu a mi sha mba i yen ve iyol la i̱ due tseer tseer ken Tindi u yange na Iserael la nena?
13 Kwagh u sha uhar yô, ijirôron i sha mimi la ngi we ikyo sha kwagh u ior mba kwagh a tser ve la. Yehova tese ken Tindi u yange na Iserael la ér kwagh gba un sha mba i yen ve iyol la. Se nenge yô, yange i wa Tindi u una na ve ancôgholov kua kasev mba côgholov kpa vea kpe ijen ga yô. (Duteronomi 24:17-21) Er Yehova fa ér ican a er icombor ingira nahan yô, un iyol na hingir Orjir ve man Orkuran ve kpaa. (Duteronomi 10:17, 18) Yange ta Mbaiserael icin ér aluer ve er kasev man mbayev mba ve lu a or ijime ga mbara ican, man mbara vaa mliam yô, una ungwa mliam vem kpee. Er i er ken Ekesodu 22:24 nahan, a kaa ér: “Ishima i vihin Yam ia yegh a yegh.” Shin er ishimavihin i̱ lu ken aeren a Aôndo a tseer tseer ga nahan kpa, ishima ka i̱ vihi un sha gbenda u perapera zum u ior ka vea er aeren a banen a mimi sha apera yô, hemban cii yô aluer imba ieren la i bende a mba ve lu a mpe iyol shio yô.—Pasalmi 103:6.
14. Kanyi i lu ikyav i kpilighyol i i̱ tese er Yehova a sangen a sange ga laa?
14 Kwagh u sha utar yô, Bibilo pase ken Duteronomi 10:17 gbar gbar ér Yehova “sangen a sange ga, ngohol inyaregh kpaa ga.” Yehova ngu er uumace mba ve lu sha utaha shin ve dugh ati la nahan ga, mba tee inyaregh shin mlu u or nan lu sha mnenge u ashee la mba bumen un a mi ga. Un te ikyaa ken ma or sha icugh ga shi sangen a sange kpaa ga. Ikyav i kpilighyol i i̱ tese er á sangen a sange ga yô, ka i̱ je ne: A ver ian i kpilighyol i hingir mba civir un sha mimi, mba ve lu a ian i va lun uma gbem sha won la sha ci u asande a ior kpuaa tsô ga. Kpa, er Aerenakaa 10:34, 35 a pase nahan: “Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” Ian ne ngi sha ci u hanma or cii, wea lu zegeor shin icanor kpaa, shin wea lu ornyian shin oril, shin wea due ken ma nyi ijiir sha tar cii kpaa. Ngula ka ijirôron i mimi í hemban cii ne ga zee? Sha kpôô yô, or ka nana̱ kav ijirôron i sha mimi í Yehova la a̱ wanger nan yô, kwagh la ka a urugh nan, nan kporom ikyua hen a na!
“Kpash! Mze u . . . Kwaghfan u Aôndo . . . Za Kweng Ne!”
15. Kanyi i lu kwaghfana, man Yehova tesen kwaghfan nena?
15 Yange kwagh gande apostoli Paulu tsô á gbidye iwer, er i nger ken Mbaromanu 11:33 la nahan, á kaa wener: “Kpash! Mze u . . . mfe man kwaghfan u Aôndo . . . za kweng ne!” Een, aluer se time sha avegher kposo kposo a kwaghfan u Yehova u a gandeôron la se nenge yô, kape a kondo se iyol je la. Nahan kpa, se pase inja i ieren ne ér nyi? Kwaghfan ka a kohol mfe man mkav man iwanger i or zough a mi sha kwagh yô, nahan a wase nan na̱n er kwagh sha inja. Yehova ngu a yar tom a mfe na u a lu a mi kpishi la kua mkav na u a ze kweng la, nahan hanma shighe yô, ngu a tsua akaa a a hembe doon a una er yô, shi á er a sha gbenda u ú hembe doon cii yô.
16, 17. Akaa a Yehova a gbe la tese kwaghfan na ua fe je i gandeôron la nena? Tese ikyav i môm.
16 Ka akav á nyi jighilii nahan á lu a tesen kwaghfan u Yehova ua gandeôron nee? Pasalmi 104:24 kaa ér: “Kpash! TERE, ityom You ngi atô kposo kposo, U er i cii sha kwaghfan, tar iv a akaa a U gbe la.” Sha mimi yô, se nguren henen sha akaa a Yehova a er la seer yô, kape kwaghfan na la una lu hemban tan se hindi iyol je la. Nenge ase yôô, mbatôvonkwaghfan ndera timen sha akaa kpishi a Yehova a gbe la! Gbaa kwaghhenen ugen ngu a ngu jim u tom na yô i lu u henen akaa a igbetar yô.
17 U tesen ikyav yô, alaghga ú vande tilen kenger ikyar i tetange i doonashe nahan kpiligh we iyol, ú jingir ityough. Sha kpôô yô, ikyar ne ka mndera u kpilighyol je zua ga. Anikyarev mba ver ver mba ve lu inja er ve taver ga la nahan ve taver hemba iyôgh, shi ve taver iyol je hemba igbende kurugh. Mtaver ne kuma nan je? Tôô ase wer í kehe a ikyar i tetange je í kehe ngi indi er kper u kôron ishu a mi nahan. Imba kper la una taver je a fatyô u tan un kôron igirgi i purugh sha ahumbe la a mi kpaa! Sha mimi yô, Yehova gba akaa ne cii “sha kwaghfan.”
18. Se̱ nenge a kwaghfan u Yehova a lu a mi la sha myar u á yar tom a uumace u ngeren Bibilo i i lu Mkaanem nam la nena?
18 Ikyav i tesen kwaghfan u Yehova i̱ hemban cii yô, ka i̱ je i̱ lu ken Bibilo, Mkaanem nam la. Sha mimi yô, kwaghwan u injaa u i nger ker la tesen se gbenda u hemban cii ú i doo u se kar yô. (Yesaia 48:17) Kpa, shi a fatyô u nengen a kwaghfan u Yehova ua hembe cii ne ken gbenda ú i nger Bibilo la kpaa. Inja nena? Er Yehova a lu a kwaghfan je i gande yô, lu uumace de na ve tom ér ve̱ nger Mkaanem nam ye. Luun er ka mbatyomov mba shaav yange una ne ve tom u ngeren Mkaanem nam ma icighanegh ne nahan, Bibilo ma i̱ ker ken ishima tsung er i̱ ker se nahan ne kpa? Ka mimi mbatyomov mba shaav ma ve er kwagh u Yehova sha mnenge u ve lu shaala tseng ve ve nenge la, shi ma ve pase mcivir u ve civir un la kpaa. Kpa se di yô ma se nenge kwagh la er akaa a ken jijingi a lun vough a i gbe á la a nenge nahan kpa? Gadia mfe ve man ibughashe ve man tahav vev cii hemba mbu asev yem zende zende.—Mbaheberu 2:6, 7.
19. Ka ikyav i nyi i̱ tese ér mne u i ne uumace ér ve̱ nger Bibilo la na yô ngi aa ulum kpen kpene?
19 Mne u i ne uumace ér ve̱ nger Bibilo la na yô ngi aa ulum kpen kpen. Ior mba yange ve nger i̱ la kpa mba a ishima ker di er se nahan. Er ve kpa yange ve lu mba yinan yô, ve kpa ve tagher a mbamtaver vev, di er se kpa se tagher a mba asev nahan. Ashighe agen je yô, yange ve nger kwagh sha ayol ave, ve pase ishima ve kua atsan a ve kpaa. (2 Mbakorinte 12:7-10) Nahan ve nger akaa a mbatyomov ma ve fetyô u ngeren ga yô. U tesen ikyav yô, nenge ase mkaanem ma Davidi ma i nger ken Pasalmi 51 la. Sha kwagh u ngeren u sha ityou u Pasalmi ne a tese yô, Davidi dugh Pasalmi shon ne zum u a er asorabo a vesen kera cii la. A pase ishima na gbar gbar, a zungwe tsung shi a zamber Aôndo ér a̱ de un a asorabo na kpaa. Ivur i sha 2 man i sha 3 la, kaa ér: “Ôôm iferkwagh yam kera ca ca, wanger mo sha isholibo yam. Gadia mo m fa akaabo am, isholibo yam ngim sha ishi gbem.” Ver ishima sha ivur i sha 5 ne, í kaa ér: “Shi nenge, i marem ken ifer, ka ken isholibo je, ngôm wa iyav av ye.” Ivur i sha 17 la shi i̱ seer ér: “Nagh ku Aôndo A rumun yô, ka jijingi u zamber; ishima i zamber, i uren tsung yô, Ú laha ga, Aôndo.” Ú nenge a mnyoon u orngeren la yange lu a mi ken ishima la ga he? Or u nan lu a myen shio nana fatyô u ôron kwagh imba ne mayange kpa?
20, 21. (a) Er nan ve se fatyô u kaan ser, er Yehova a yar tom a uumace u ngeren Bibilo nahan je kpa, ngi a kwaghfana? (b) Kanyi se ôr kwagh sha mi ken kwaghhenen u a dondo nee?
20 Er Yehova yange yar tom a uumace mba ve yen la yô, nahan a na se kwagh u kwagh a gbe se sha mi la vough—ka ngeren u i lu “Aôndo A ne i nger” je la, nahan kpa i nger un sha mlu u orumace. (2 Timoteu 3:16) Een, lu icighan jijingi lu hemen mbangeren mbara ye. Sha nahan yô, lu kwaghfan u Yehova ve nger ye, lu u̱ ve ga. Nahan kwaghfan la ngu a acôghor iyol shin ahon a gban sha mi mayange ga. Kwaghfan la hemba u wase yem zende zende, je yô Aôndo taver se ishima sha dooshima na nahan ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” (Anzaakaa 3:5, 6) Aluer se dondo kwaghwan u injaa ne yô se kporom ikyua hen Aôndo wase u a hembe kwaghfan cii ne.
21 Ieren i Yehova i i̱ hembe kôron se ken ishima shi i̱ hembe doon se ken atô u aeren na cii yô, ka i dooshima la. Se ôr kwagh sha gbenda u Yehova a tesen dooshima la ken kwaghngeren u a dondo ne.
Ú Fatyô u Umbur Kpa?
• Ka akaa a nyi Yehova a er sha er se fatyô u lun a na ikyooso ikyooso?
• Ka akav a nyi a tese tahav mbu Yehova mbu gbanakaa man tahav nav mbu kuran kwagh laa?
• Ka sha nyi igbenda nahan Yehova a tesen ijirôron na i sha mimi?
• Se fatyô u nengen a kwaghfan u Yehova sha akaa a a gbe la man ken Bibilo nena?
[Study Questions]
[Picture on page 22]
Yehova we ikyo a iyôngo Na sha mhôôn er orkuranilev u nan ker anwaniyôngo nan we sha ikyum i nan nahan
[Picture on page 25]
Yehova tese kwaghfan na sha gbenda u i nger Bibilo la