Mcivir u Mimi Zua Tsombor

ANMGBIAN u Maria pase un man anngô na u kwase u kiriki u i yilan un ér Lucy la kwagh u Yehova. Shi á pase un ishimaverenkeghen i va lun ken Paradiso shin tar la, shighe ne Maria lu anyom 13. Kwagh la doo ve gande tsô ve dondo un ve za ken Iyou i Tartor i Mbashiada mba Yehova. Kwagh u Maria ungwa i lu tesen la doo un kpen kpen. Kwagh u ve ungwa la lu kposo a kwagh u ken côôci ve gadia ken côôci ve yô, ve hemban wan a wa atsam! Ica gba ga tsô Maria man Lucy hii u henen Bibilo vea môm ken Mbashiada mba Yehova.

Anmgbian ve u vesen lu i yilan un iti ér Hugo, un yô, kwagh hemba gban un u timen sha kwaghfan u taregh man gbaduen tseegh. Á tôô ken ishima na wener Aôndo ngu ga. Kpa gbe eren tom vea shoja yô, á ôr takerada ugen, mba yer u ér Life—How Did It Get Here? By Evolution or by Creation?  * Á zua a ikyar sha mbampin mba ma kwaghaôndo môm lu a vande nan ikyar sha mi ga yô. Za been tom na u eren vea shoja la yô, á hii u eren akaa a taver jighjigh u nan u yange hii u nan Aôndo la sha u henen Bibilo shi zan mbamkombo vea anmgbianev nav mbakasev. Maria man Lucy ungwa mimi anyom nga karen ahar yô, i er ve batisema ken inyom i 1992 la, shi anyom nga karen ahar yô, anmgbian ve u nomso kpaa i er un batisema.

Kpa hen shighe ne mbamaren vev lu Mbakatoliko her man ve numben sha adua ve ga shi ve fa soon kwagh u mimi u ken Bibilo ne ga. Kwagh u Mbashiada mba Yehova vihi ve ishima kpen kpen, kpa kwagh u doo ve yô, lu iyolwuhan i sha inja kua ieren i dedoo i agumaior a Mbashiada mba Yehova mba yange mbayev vev van a ve hen ya la. Shi yange a tema kwaghyan ve, mbayev vev vea ôron akaa a ve hen ken mbamkombo nahan i doo mbamaren mban u ungwan je i zua ga.

Nahan kpa, mbamaren mban tim sha kwagh u mbatsav. Ter ve lu or u hunden msôrom, nahan á hunde msôrom a gbidye kwase na. Yange mase shin cukuu u ya la una sar yô. Maa kwagh va er, iyange igen ter ve per tindi u tar ve sha ci u hunden msôrom hingir zemba ze zemba la, nahan a za purusu sati uhar. A za hii u ôron Bibilo zum u lu ken purusu la. Ngur ôron Bibilo yô, á za nenge a mkaanem ma Yesu ôr sha kwagh u ayange masejime la. Kwagh la kpiligh un iyol, tsô dugh purusu yô, un man kwase na ve za mkombo ken Iyou i Tartor shi ve lumun ér i hen Bibilo a ve kpaa. Mba fe mimi yô, ve nande ityakerada i yange ve lu a mi sha kwagh u mbatsav la shi mba ngur yilan sha iti i Yehova yô, azôv kpaa mem u zan ve iyol. Shi hii hen shighe la je ve gema inja sha akaa kpishi.

Ú hen wer yange a lu Maria man Lucy ken ishima sha iyange i Hugo lu eren mbamaren vev batisema ken mkohol u vesen ugen ken tar u Bolivia ken inyom i 1999 la nena? Shighe u Maria man Lucy ve hii ungwan kwagh u Yehova man uityendezwa nav la tsa kuma hegen anyom ataankaranyiin. Maria man Lucy kua Hugo cii mba eren tom u pasen kwagh hanma shighe la hegen. Mba a iember kpishi er mcivir u mimi a zough tsombor ve ken mzough môm nahan!

[Footnote]