Aôndo Ngu a Wa Wegh sha Akaa a Uumace

Nena?

KEN derianyom u sha anigheni Cii man Shighe Wase ne, i pase Hesekia Tor u Yuda ér ngu a angev mbu mbua wua un yô, hen shighe ne lu anyom 39. Loho ne za Hesekia iyol tsung nahan á er msen ér Aôndo a bee un angev mbun. Aôndo lumun msen na la sha ikyev i profeti na kaa ér: “M ungwa msen wou, M nenge mliam ou kpaa; yô, Me seer we anyom pue kar ataan sha ayange a ou.”—Yesaia 38:1-5.

Er nan Aôndo yange er kwagh sha kwagh hen shighe nee? Aôndo vande eren ityendezwa a Tor Davidi, u lu orperapera la, uderimbaanyomov imôngo ken ijime, á kaa ér: “Ya wou kua tartor wou vea tile dông sha ishigh yough gbem; ikônough  yough ki torough kia lu her gbem sha won.” Aôndo shi yange kaa kpaa ér a mar Mesiya ken tsombor u Davidi. (2 Samuel 7:16; Pasalmi 89:20, 26-29; Yesaia 11:1) Shighe u Hesekia gba angev la, lu a mar wannomso ga. Nahan kwagh ne na yô tsombor u tor Davidi la lu nôngon u timin. Myem u Aôndo yange yima Hesekia ne wase u kuran tsombor u Mesiya una va due ker la.

Ashighe kpishi Yehova yange a er kwagh sha ci u ior nav mba yange ve lu cii man shighe u Mbakristu la, sha er una kure uityendezwa nav yô. Mose lu ôr kwagh sha mwar u i war Iserael, kera lu kpan ken tar u Igipiti ga la kaa ér: “Ka sha ci u ne doo TER ishima man sha ci u A we ishima u kuren mbum u A bum a uter enev la, TER A dugh a ven sha uwegh ku ageegh” ye.—Duteronomi 7:8.

Ken derianyom u hiihii la kpaa, Aôndo yange a wa wegh sha akaa agen sha u kuren uityendezwa nav. U tesen ikyav yô, er Oryuda ugen u i yilan un ér Saulu la lu yemen ken Damaseku sha u za tôvon mbahenen mba Kristu a ican yô, á nenge mpase u sha mnenge u kpilighyol sha gbenda, nahan kwagh ne yàngè un u shi za tôvon ve a ican. Mgem u or ne yange gema ishima, un shon u va hingir apostoli Paulu ne, lu kwagh u wasen kpishi sha u samber a loho u dedoo ken akuraior.—Aerenakaa 9:1-16; Mbaromanu 11:13.

Ka Hanma Shighe Cii Aôndo Yange A Wa Wegh sha Akaa a Uumace Yee?

Lu hanma shighe cii Aôndo waan wegh sha akaa a uumace shin yange ver a ver akaa a una er kwagh sha mini? Ruamabera tese wanger wanger ér mayange je lu ieren na u wan wegh sha hanma kwagh ga. Shin er Aôndo yange war mbayevikyaior mba utar mba Mbaheberu la ken atô u atse a usu  u yeghen shi yima profeti Daniel shin ihungwa i ubegha nahan kpa, á yima uprofeti mbagenev sha ikyev i kuugh ga. (2 Kroniku 24:20, 21; Daniel 3:21-27; 6:16-22; Mbaheberu 11:37) Yange í dugh Peteru ken purusu sha ivande zum u Herode Agrippa u sha Môm la wuhe un ken purusu la. Kpa tor shon ne môm na zwa i wua apostoli Yakobu, kpa Aôndo er kwagh u yangen ku ne ga. (Aerenakaa 12:1-11) Aôndo yange na mbaapostoli tahav mbu been ior angev shi nderen mbakpenev je kpaa, nahan kpa á dugh “saa” u lu “ken iyol” i apostoli Paulu lu nan un ican la ga, man alaghga tsô saa ne lu ma angev mbu yange lu a mi yô.—2 Mbakorinte 12:7-9; Aerenakaa 9:32-41; 1 Mbakorinte 12:28.

Aôndo yange er ma kwagh môm u yangen tôvacan u Nero, Tor u Roma va a mi sha mbahenen mba Kristu kpoo la ga. Í er Mbakristu ican kpishi, í nande mbagen shi í kôr mbagen í gbihi inyamkyume ya ve. Nahan kpa, ahendan ne lu kwagh u kpiligh Mbakristu mba tsuaa mbara iyol ga, shi kwagh ne pande jighjigh ve u ve lu a mi ér Aôndo ngu la ga. Kera je kpa, Yesu lu vande wan mbahenen nav kwagh ér á kôr ve a za a ve hen mbaajiriv, shi á kaa a ve ér ve wa iyol ve kegh a kegh u yan ican shi kpen sha ci u jighjigh ve u nan.—Mateu 10:17-22.

Er Aôndo yange a yima ior nav sha ayange a tsuaa la nahan, nyian kpaa Aôndo ngu a tahav mbu yiman mbacivir un ken akaa a bo, nahan mayange je ka u se puu mba ve nenge ér a̱ kura ve sha ashighe wue wue la ga. Nahan kpa, se fatyô u kuren ikyaa jighilii ser Aôndo kura ve sha ashighe shon angan nahan shin kura ve ga ze ga. Mbacivir Yehova mbajighjigh kpishi yange ve vihi ayol shighe u ijiir igen bughur ken gar u Toulouse yô, shi yange í wua Mbakristu mbajighjigh udubu udubu sha ikyev i hemen u Nazi, mbagen kpe ken afo a Mbakwarev shin í wua ve sha igbenda igen i vihin kpishi, kpa Aôndo er ma kwagh u yangen kwagh ne ga. Er nan ve Aôndo ngu a er kwagh sha hanma shighe cii sha u waren mba á lumun a ve la ga?—Daniel 3:17, 18.

‘Shighe man Aikyôr’

Zum u aahe a er yô, aahe la una fatyô u benden a hanma or cii, tsweren a tswer or ga, ngu a benda a or u nan ne Aôndo jighjigh man or u nan ne un jighjigh ga kpaa. Alain man Liliane yange ve war m-bughur u ken gar u Toulouse ne, kpa iorov mbagenev 30 kpe shi iorov uderi imôngo vihi ayol, shin er kwagh ne er lu ibo ve ga nahan. Sha tar jimin cii, ior udubu udubu ya ican sha ci u ifer, mbagen naha kwagh dang dang er aikyôr wua ayol a ve shin ve wua mbagenev, mbagen yô ican tser ve sha ci u ityav mbi nôngon, man sha mimi yô se fatyô u nan Aôndo ibo sha akaa a vihin a a tser ve nahan ne ga. Bibilo umbur se mkaanem man nahan ér “shighe man [aikyôr] mba ve sha gbenda” u hanma or cii.—Orpasenkwagh 9:11.

Heela tseegh ga, uumace shi mba yan ican i angev man iyolbeen man ku kpaa. Mbagen mba yange ve hen ér Aôndo yima ve sha ivande i kpilighyol shin á bee ve angev sha ivande je kpa ve va mase kpen er shighe va kar yô. Ka ken hemen una va kar a angev man ku shi una ‘ese ior mliam sha ashe’ kera ye.—Mpase 21:1-4.

Kpa cii man kwagh ne a er yô, gba u kwagh u vesen ua hembe di myem u Aôndo yiman ior sha ashighe ashighe yô una er. Bibilo ôr kwagh u iyange ikyaa igen, í yila iyange shon ér “iyange i vesen i TER.” (Sefanu 1:14) Sha shighe shon u Aôndo una wa wegh sha akaa a uumace sha gbenda u vesen ne, una bee a hanma inja ifer cii. A na uumace ian i lun uma gbem sha won ken mbamlu mba vough, sha shighe ne “á kera umbur akaa a tsuaa la ga, man shi aa kera va or ken ishima kpaa ga.” (Yesaia 65:17) Mbakpenev je kpaa á nder ve vea lu uma, nahan á bee a mzeyol u a hembe vihin u a lu zan uumace iyol ne. (Yohane 5:28, 29) Sha shighe la Aôndo una er kwagh sha dooshima na man erdoo na u been mayange ga la, nahan una bee a mbamzeyol mba uumace cii gbindigh gbindigh.

 Gbenda u Aôndo a Eren Kwagh Ainge sha u Yiman Ior La

Kpa kwagh ne tese ér hegen ne yô Aôndo gba teman tsô ngu kenger a kenger er akaa a un gbe á la a lu yan ican ga. Nyian ne, Aôndo ngu nan uumace cii ian i fan un shi yan ikyar a na ikyooso ikyooso, aluer ka nyi zwa je ve lamen shin ape ve dugh cii kpaa. (1 Timoteu 2:3, 4) Yesu lu pase kwagh ne sha mkaanem man, á kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yohane 6:44) Aôndo ngu a urugh ior mba asema a mimi sha ikyev i Loho u Tartor u mbatomov nav ve lu pasen sha tar jimin cii la a va a ve hen a na.

U seer yô, Aôndo ka a kôôm uma u mbara mba ve soo ér á hemen ve la. Aôndo ngu ‘bughun asema’ ve sha ikyev i icighan jijingi na sha er vea kav ishima na shi vea er kwagh u a soo ér ve er la yô. (Aerenakaa 16:14) Een, er Aôndo á ne ior ian i fan un shi fan Mkaanem nam kua mbaawashima nav yô, á tese ér kwagh gba un a hanma wase.—Yohane 17:3.

U masen yô, Aôndo wasen mbacivir un nyian sha u eren zege ivande waren ve ga, kpa wasen ve sha u nan ve icighan jijingi na kua “agee a hemban la” sha er vea wa ishima a nyityô kwagh i ve tagher a mi cii yô. (2 Mbakorinte 4:7) Apostoli Paulu nger wener: “M ngu a agee a eren akaa cii je ken Un [Yehova Aôndo] u A taver mo ne.”—Mbafilipi 4:13.

Nahan yô se mba a atôakyaa kpishi a lun a iwuese hen Aôndo sha hanma iyange sha uma wase man sha ishimaveren i a ne se i lun uma gbem sha won ken tar u ican i yan ia lu ga la. Orpasalmi pine wener: “Ka nyi me na TER sha ci u akaa a Na a dedoo a A erem cii laa?” A kaa ér: “Me ngohol iyongo i myom, me yila sha iti i TER.” (Pasalmi 116:12, 13) Aluer ú ngu ôron magazin ne hanma shighe yô una wase ú, nahan ú fa akaa a Aôndo a vande eren, shi á lu eren hegen shi una va er ken hemen yô, akaa ne a va ú a msaanyol hegen shi a na ú ishimaverenkeghen i akaa a ken hemen, i tenger mayange ga la.—1 Timoteu 4:8.

[Blurb on page 6]

“Á kera umbur akaa a tsuaa la ga, man shi aa kera va or ken ishima kpaa ga.”—Yesaia 65:17.

[Pictures on page 5]

Sha ashighe a i lu ngeren Bibilo la, Yehova de i ta Sekaria awen i wua . . .

shi á yàngè mwoo u Herode yange wua ior mbaishôôv kpishi la ga

[Picture on page 7]

Shighe u mkur u ican i yan mgbôghom hegen; mbakpenev je kpaa vea nder vea hide a lu uma