Kôr Iyol You Tsaha Sha Er U Zua A Uma U Tsôron yô!
Kôr Iyol You Tsaha Sha Er U Zua A Uma U Tsôron yô!
“Hanma or u wan iyol sha iniumbe yô, ka nan kôr iyol i nan tsaha sha akaa cii.”—1 Mbakorinte 9:25.
1. Ior umiliôn imôngo lumun ér vea er ishima i Yehova sha u eren tom sha kwaghwan u i we ken Mbaefese 4:22-24 la nena?
ALUER i er ú batisema ú hingir môm ken Mbashiada mba Yehova yô, ú tese ken igbar wer ú na iyol you sha gbashima wer ú gba gesa u ú va zua a injar i uma u tsôron yô. Ú lumun wer u er ishima i Yehova. Cii man se mbagenev kpishi se tsegha ayol ase sha ci u Yehova yô, se undu akaa kpishi a se eren la sha er se tsegha ayol ase sha mimi shi Aôndo kpa una lumun a iyoltseghan yase la yô. Yange se er sha kwaghwan u apostoli Paulu wa Mbakristu la, á kaa wener: “Er nen tseor la kera u a lu sha inja i zende u tsuaa la, u a vihi kera sha asaren a icughugh la. . . . haa nen orhe iyol u i gbe un sha inja i Aôndo ken perapera u mimi man mtsegh u mimi” la. (Mbaefese 4:22-24) U ôron sha gbenda ugen yô, cii man ve se lumun ser se tsegha iyol yase sha ci u Aôndo yô, se vande den uma wase u tse u shami ga la.
2, 3. 1 Mbakorinte 6:9-12 tese ér ka mbamgem uhar mba nyi i gbe hange hange u se gema ken uuma asev ve Aôndo una lumun se?
2 Mba i lu u vea hingir Mbashiada mba Yehova yô, gba kpee u vea palegh aeren ve a tse a Mkaanem ma Aôndo ma vende á jighilii la. Paulu tér akaa ne ken washika na u a nger hen Mbakorinte la, á kaa wener: “Mbadyarev shin mbasôronakombo shin mbavihin ivaa sha idya shin nomso mba ve yaven a ayol a ve shin mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga.” Á tese ikyav wener, Mbakristu mba sha derianyom u hiihii la yange ve undu aeren a ve a tse la, á kaa wener: “Kape ne mbagenev kpaa ne vande lun la.” Ver ishima wer, Paulu kaa ér, kape ve lu la ga, kpa á kaa ér kape ve vande lun la.—1 Mbakorinte 6:9-11.
3 Paulu tese ér ka hange hange u seer lun a mbamgem mbagenev kpaa, á za hemen á kaa wener: “M ngu a ian sha akaa cii, kpa ka akaa cii man a lu [a] iwasen ga.” (1 Mbakorinte 6:12) Nyian ne ior kpishi mba i sar ve u lun Mbashiada mba Yehova nenge ér doo u vea palegh akaa a ve lu a ian u eren kpa a gem a lu a iwasen ga, shin a lu a inja kpuaa tseegh la. Alaghga akaa ne a lu akaa a vihin shighe kpishi aa fatyô u wan ve agbe u eren akaa a a hembe lun a inja la.
4. Mbakristu mba ve tsegh ayol a ve lumun u eren nyi er Paulu kpa yange er nahan?
4 Iyoltseghan sha ci u Aôndo ka kwagh u or ka nan er a ishima i gbar gbar yô, nan eren zunguluu inja er nan de akaa saa nan kpishi yum ga. Mbakristu mba ve tsegh ayol a ve sha ci u Aôndo lumun a kwagh u Paulu ôr shighe u hingir orhenen u Kristu la, á kaa wener: “Ka sha ci [u Yesu] man m de akaa cii a saam ye, m nenge a hingir mo hôngor sha u Kristu Una lu mtsera wam yô.” (Mbafilipi 3:8) Paulu yange nyagh akaa a a lu a injaa ga la, sha u una za hemen u eren ishima i Aôndo yô.
5. Ka gesa u nyi Paulu yange gba shi kure un tsembelee, se kpaa se fatyô u gban gesa la vough er un nahan nena?
5 Paulu yange kôr iyol tsaha gba gesa u a yem a ken jijingi kure vough, nahan á ôr wener: “M nôngo ityav mbi dedoo ve. M kure ayem am vough, m saa a jighjigh u nan. Mase shin tsar u mhembe u perapera u i verem, u Ter Una nam sha iyange la yô, man ka mo tseegh ga kpa ka mba m-ande Na a doo ve la cii.” (2 Timoteu 4:7, 8) Se kpa yange sev a av yô se ôr kwagh ier i Paulu nahan kpa? Se fatyô, aluer se gba gesa u a yem a Mbakristu ne a jighjigh u nan se gba uwegh ga zan zan mkur yô.
Gba u Se Lu a Iyol Kôron Tsaha sha u Eren Akaa a Dedoo
6. Kanyi i lu iyol kôron tsaha, man ka avegher ahar a nyi nahan se tsaha iyol yase sha mini?
6 Asemberatii a ken zwa Heberu man Grika a i gem ken Bibilo ér “iyol kôron tsaha” la inja i a kpôghôô yô ér, or ngu a tahav sha iyol i nan shin nana fatyô u kôôm iyol i nan. Ashighe kpishi asember ne nga a tese mwe u or wan iyol i nan ikyo sha er nana er kwaghbo ga yô. Heela tseegh ga, gba kpee u se lu a iyol kôron tsaha ve se er akaa a dedoo ye. I jire se uumace mba se yen ne a isharen i eren kwaghbo, nahan gba u se nôngo kwagh avegher ahar. (Orpasenkwagh 7:29; 8:11) Gba u se nôngo se kôr iyol tsaha se palegh u eren kwaghbo, shi gba u se nôngo se tsaha ayol a ase sha u eren akaa a dedoo kpaa. Sha kpôô yô, gbenda u ú hembe doon u se kar sha mi ve se palegh kwaghbo yô ka u se eren akaa a dedoo.
7. (a) Gba u se er msen se sôn nyi er Davidi kpa er nahana? (b) Ka akaa a nyi nahan i doo u se hen sha mi ve aa wase se se seer kôron iyol tsaha?
7 Sha kpôô yô, gba hange hange u se lu a iyol kôron tsaha aluer se soo ser se er sha iyol tseghan i se tsegh sha ci u Aôndo yô. Nahan doo u se er msen er Davidi kpa yange er nahan, á kaa wener: “Gba ishima i wang ken a mo, Aôndo, shi ver jijingi u he u taver ken a mo.” (Pasalmi 51:10) Doo u se hen sha mbamtsera mba se zua a mi aluer se palegh akaa a vihin aeren a ase shin a vihin se iyol yô. Aluer se palegh akaa a vihin aeren a ase shin a vihin se iyol la ga yô, se sunda akaa a bo, inja er: uicôron mbauangev, shi se vihi mlu wase vea mbagenev shi se kpe sha ayange a ase ga. Kpa gema hen ase sha akaa a dedoo kpishi a se zua a mi aluer se dondo gbenda u uma u Yehova a tese se la yô. Kpa sha kpôô yô, ishima yase wa atseregh, mayange kwagh ne a de hungur se ga. (Yeremia 17:9) Nahan gba u se kange ishima se hendan a mbamhen mba ken ishima mba vea hide se a ishima jime u eren sha atindi a Yehova la.
8. Kanyi jim se hen sha mfe u se zough a mi sha akaa a a vande eren se laa? Tese ikyav.
8 Se mbagenev kpishi se zua a mfe sha akaa a a vande eren se yô, nahan se fa ser ashighe kpishi iyol i i vôr ne ka i nôngo u hiden a ishima yase i tseen la ijime. Se tese ikyav sha tom u pasen kwagh u Tartor. Ka i doo Yehova kpishi a ior mba ve ne ayol a ve sha gbashima u eren tom u waren uma la. (Pasalmi 110:3; Mateu 24:14) Se mbagenev kpishi yange i taver se u henen u pasen ior kwagh ken igbar. Hii shighe la zan zan hegen je kpaa alaghga ka i gba u se kôôm iyol yase se ‘gbidye i’ shi se ‘ver i ken kpan’ sha u i de yangen se u pasen kwagh ga yô.—1 Mbakorinte 9:16, 27; 1 Mbatesalonika 2:2.
‘Kôr Iyol Tsaha sha Akaa Cii’
9, 10. ‘Iyol kôron tsaha sha akaa cii’ la kua nyi man nyi nahan kereghe?
9 Kwaghwan u Bibilo i we ér se ‘kôr iyol tsaha sha akaa cii’ la tese ér ka u se kôr iyol tsaha sha ishimanyoon man aeren a hôngorough tseegh tsô ga. Alaghga se nenge ser se mba ker iyol tsaha sha akaa ne cii, man aluer ka nahan mimi yô, doo. Kpa gema di sha akaa agen a i lu inja er ka hange hange u or nana kôr iyol tsaha sha a ga la di ye? U tesen ikyav yô, aluer or ngu ken tar u ú lu yôughyôugh, ape akaa a doo ishe nahan a hemba doon u nana kôr iyol tsaha sha inyaregh ki vihin dang dang sha akaa a a lu a ikyoogh ga la gaa? A doo kpishi aluer mbamaren wa mbayev vev kwagh ér ve de u vihin inyaregh sha hanma kwagh u ve nenge a mi a sar ve, shin ve lu a inyaregh ki yamen un la yô. Kpa cii man kwaghwan la a kôr mbayev vev ken ishima yô, saa mbamaren vea ver ve ikyav i dedoo.—Luka 10:38-42.
10 Aluer akaa ban se kpa se hen u wan ishima a a shio yô, kwagh ne una taver ishimawan yase la. Shi kwagh ne una wase se se wa ikyo sha akaa a se lu a mi la, shi mhôônom ma a kôr se a ior mbagenev mba ve lu a kwagh ga sha ci u tahav yina ve la. Sha kpôô yô, or u nan lu a uma u akuma akuma yô, nan eren ieren i ior ve lu a mi, i ka ve kaa ér “ya kwagh, ma kwagh, ember uma” la, ga. Ior mbayôôn akaa a kasua ka ve yôô akaa sha u vea urugh isharen i ior sha kasua ve la, kpa awashima ve jighilii yô, ka i lu u vea zua a liba sha kasua ve la tseegh. Kwagh ne una fatyô u yangen iniôngon yase i kôron iyol tsaha la. Magazin ugen u ken tar ugen ú ú lu yôughyôugh ken Yuropa yô, sember ôron kwagh kaa ér: “Aluer taver ior mba ve lu ken ibanave tsung u kôron iyol ve tsaha sha asaren a bo yô, a hemba taver ior mba ve lu a kwagh ave ve lu ken ityar i i lu yôughyôugh nyian ne cii!”
11. Er nan ve u se wan ishima sha akaa a a ban se la i lu kwagh u injaa, kpa kanyi ka i na ve i taver se u eren kwagh ne?
11 Aluer ka i taver se u paven akaa a se soo la kposo a akaa a a hembe gban se hange hange la yô, a gba u se ker gbenda u se kar sha mi ve se er kwagh sha ibume ga yô. U tesen ikyav yô, aluer sar se tsung u ma se palegh ieren i vihin inyaregh dang dang la yô, se kange ishima se de u yamen kwagh sha injô, shin shighe u i gbe u se za kasua yô, se tôô inyaregh ki i gbe u se yam akaa a kwagh a gbe se a mi la tseegh. Umbur kwaghwan u Paulu a we ér “u civir Aôndo man kwagh a kuman we yô, mtsera ngu sha mi vese” la. Á shi a za hemen á kaa ér: “Se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i̱ kuma se.” (1 Timoteu 6:6-8) Kwagh u se lu a mi la kuma se kpa? U se lun a uma u akuma akuma yô, gba u se nôngo tsung shi se kôr iyol yase tsaha se palegh nyityô uma u yan tar ember dang dang la. Kwagh ne ka kwagh u i doo u se hen u eren yô.
12, 13. (a) Ka ken igbenda i nyi nahan i doo u se kôr iyol tsaha sha kwagh u mbamkombo mba Mbakristu? (b) Shi ka igbenda igen i nyi nahan i gbe u se kôr iyol tsaha?
12 Gba u shi se tese iyol kôron tsaha sha gbaa u Mbamkombo mba Mbakristu man mbamkohol mbakiriki man mbavesen kpaa. U tesen ikyav yô, gba hange hange u se kôr iyol tsaha shighe u i lu nan kwaghôron sha er se yem henen akaa ken ishima ga yô. (Anzaakaa 1:5) Iyol kôron tsaha ia wase se se ker ato zulee a or u nan kwaghôron la, se de u zeren ôron kwagh a mbagenev ken to sha er se dan ve asema sha kwagh u i lu ôron la ga yô. Iyol kôron tsaha shi ia wase se se sôr ashighe ase se ver sha er se van mbamkombo sha shighe yô. Heela tseegh ga, iyol kôron tsaha ia wase se se ver shighe u se wan ago sha mbamkombo, shi zum u se ze mbamkombo kpaa se wa zwa sha akaa a i lu ôron la.
13 U se kôron iyol tsaha sha akaa a a lu a kiriki la ka a taver se ishima u kôron iyol tsaha sha akaa a a lu a vesen la kpaa. (Luka 16:10) Ka kwagh u injaa kpishi u se tsahan iyol yase u ôron Mkaanem ma Aôndo shi ôron ityakerada i i har sha Bibilo la nduuruu, timen sha i shi gbidyen kwar sha kwagh u se hen la kpaa! Shi ka kwagh u injaa kpishi u se kôron iyol tsaha vendan ser se er tom u sha uwer u ú doo u kom ga la, shi kôron iyol tsaha sha uijende mba se ye la man sha aeren a ase a ior mbagenev man inja yase, shi tsahan iyol yase u vendan akaaeren aa yange se u civir Aôndo la kpaa! Aluer se mba shiren Yehova tom kpoghuloo yô, se kura ayol ase sha akaa a a due a vese ken paradiso u ken jijingi u tiônnongo u Yehova ua lu tar sha won cii la.
Se Hingir Nen Mbavesen sha Iyol Kôron Tsaha
14. (a) Gba u mbayev vea hen u kôron iyol tsaha nena? (b) Mbayev ka vea hen u kôron iyol tsaha iyev yô, ka mbamtsera mba nyi ka ve zua mini?
14 Wanikyundan u i sember maren un yô ker iyol tsaha ga. Mbafankwagh tsor tsor gber antakerada sha kwagh u uma u anikyundanev, ve kaa ér: “Iyol kôron tsaha ngi gbe van iyol i i tsô ga. Ka i gba u mbamaren vea yese anikyundanev shi vea tsaha ve vé vea hen u kôron iyol tsaha ye. . . . Myese u mbamaren ka ve yese mbayev vev nahan ne ka a wase ve, nahan sha anyom a ve lu ken makeranta la cii ve seer lun a iyol kôron tsaha.” Kwaghtôvon u i tev sha kwagh u mbayev mba ve kom anyom anyiin nahan tese ér mbayev mba ve hen u kôron iyol tsaha ka ve “vese ve hingir mbayev mba vea fatyô u kôôm ayol a ve man mba ior ve soo kwagh ve, mba ve lu a ishima i henen akaa a he shi ve lu a ishimataver sha kwagh man mba afatyô lun a vangertiôr ken a ve kpaa yô.” Kpa mbayev mba ve lu a hii u henen u kôron iyol tsaha ga yô, ka ve va hingir “mbayev mba lun tswen, mba kwagh a tem duen ve ishima ga shi ve taver ityough yô. Ve soo ican ga shi ve soo u tagher vanger a mtaver kpaa ga.” Aluer wanye soo ér nana vese a hingir igyandenor u nana fatyô kôôm uma nan yô, gba kpee u nana hen u kôron iyol tsaha er nan lu iyev la je.
15. Aluer se ban a iyol kôron tsaha yô kwagh ne tese ér nyi, man kwagh ne gema kaha kposo a ishimaveren igen i i nger ken Bibilo la nena?
15 Aluer se soo ser se hingir Mbakristu mba ve vie ken jijingi yô, se hen u kôron iyol tsaha. Aluer se ban a iyol kôron tsaha yô, kwagh ne una tese ér se mba mbayev ken jijingi her di tsô. Bibilo wa se kwagh ér se ‘lu mbavesen sha mhen wase.’ (1 Mbakorinte 14:20) Ishimaveren yase yô, i lu u “sé va kuma sha mzough u ken jighjigh u nan, man mfe u fan Wan u Aôndo man sha mlu u igandenor man ikaren i mluyol u m-iv u Kristu la.” Sha ci u nyi? Sha er “sé kera lu mbayev mba ka i daase a ve i yem a ve wue wue sha ahumbe a ityesen, sha atseregh a ior, sha mtsugh u tsughun ior tsumen a ve sha wayo la ga” yô. (Mbaefese 4:13, 14) Sha kpôô yô, u henen u kôron iyol tsaha ka kwagh u hange hange u una wase se se vese ken jijingi yô.
U Lun a Iyol Kôron Tsaha
16. Yehova ne se iwasen nena?
16 Cii man se lu a iyol kôron tsaha yô, gba u se ker iwasen hen Aôndo, man iwasen la ban ga. Mkaanem ma Aôndo ma er ka ijingi i engem wang nahan, ka ma tese se ajiir a i gbe u se kôôm uuma asev yô, shi ka ma tese se gbenda u se kar ve se er kwagh ne yô. (Yakobu 1:22-25) Shi anmgbianev asev kpaa wa iyol kegh a kegh u wasen se. Mbatamen mba Mbakristu kpaa ka ve tese ikyo i wan sha u wasen se. Yehova kpaa ka sea sôn icighan jijingi na yô, á na se mgbeghaa je. (Luka 11:13; Mbaromanu 8:26) Nahan se yar nen tom a mbamne mban a iember. Igbenda i i tese sha peeji u sha 17 la kpaa ia lu se a iwasen.
17. Ka kwaghwan u nyi i we se ken Anzaakaa 24:16?
17 Ka kwagh u taver se ishima kpishi u se fan ser ka sea nôngo u eren ishima i Yehova yô i doo un! Kwagh ne a taver se ishima se seer lun a iyol kôron tsaha. Aluer sea nôngo gbev acin imôngo kpaa mayange je se gba nen uwer ga. “Orperapera ka nan gba kwa taankaruhar kpa nan mough.” (Anzaakaa 24:16) Hanma kwa u se er kwagh u doon Yehova ishima yô, i̱ saan se iyol. Shi se lu a vangertiôr ser doo Yehova avese. Orshiada ugen kaa wener, cii man un tsegha iyol na sha ci u Yehova yô, hanma sati u un ker iyol tsaha un me taav ga cii yô, un tôô inyaregh ki un ker iyol tsaha ve un me taav ga la un yam kwagh u injaa a mi.
18. (a) Mnènge u se lu nôngon ser se lu a iyol kôron tsaha ne wa nyi man nyi igen nahan kpa kere? (b) Ka ishimataver i nyi nahan Yehova a ne se?
18 Kohol cii yô, doo u se umbur ser, iyol kôron tsaha wa ishima yase man mhen wase kpa ker. Kwagh ne zua sha kwagh u Yesu yange ôr la, á kaa wener: “Hanma or u nana kenger kwase sha u nana tôm un yô, nan er idya a na ken ishima je ve.” (Mateu 5:28; Yakobu 1:14, 15) Or u nan hen u kôron iyol tsaha sha mbamhen mba nan yô, a er nan ican u kôron iyol i nan jimin cii tsaha ga. Nahan se kange nen ishima se palegh nen u eren kwaghbo tseegh ga kpa shi se palegh nen u henen akaabo ken ishima kpaa. Shighe u mbamhen mba bov ve ve se ken ishima yô, se dugh ve kera ave ave la je. Aluer se mba eren msen dondon Yesu ikyooso kyooso yô, se fatyô u palegh ameen. (1 Timoteu 6:11; 2 Timoteu 2:22; Mbaheberu 4:15, 16) Se za nen hemen u nôngon sha afatyô wase cii, nahan se dondo nen kwaghwan u i we ken Pasalmi 55:22 la, ijiir la kaa ér: “Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.”
Baver We Kpa?
• Ka igbenda ihiar i nyi nahan i gbe hange hange u se lu a iyol kôron tsaha sha mini
• Inja i ‘iyol kôron tsaha sha akaa cii’ yô ér nyi?
• Ka hanma gbenda nahan ú hembe kôron we ken ishima sha igbenda i kôron iyol tsaha i se hen kwagh sha mi ken kwaghhenen nee?
• Iyol kôron tsaha ka i hii hana?
[Study Questions]
[Box/Pictures on page 17]
Er Se Seer Kôron Iyol Tsaha Yô
• Kôr iyol tsaha sha akaa a kiriki
• Hen sha mbamtsera mba ú zua a mi hegen sha u kôron iyol tsaha la man mba ú zua a mi ken hemen la
• Palegh akaa a Aôndo a vende la, gema er akaa a á kaa ér u er la
• Dugh mbamhen mba bov ave ave u ve nyer ú ken ishima la je
• Iv ishima you a mbamhen mba vea maa ú a maa yô
• Ngohol kwaghwan u Mbakristu mba ve vie ve ne ú yô
• Palegh akaa a a na ú gbeev mbu nôngon la
• Er msen hen Aôndo shighe u ú tagher a ameen yô
[Pictures on pages 14, 15]
Iyol kôron tsaha ka i mgbegha se u eren akaa a dedoo