Ibaver I Mbayôôn Tartor

Ityôugh ki Televishen Tese Kwagh u Wase Kwase Ugen Hingir u Civir Aôndo Yô

APOSTOLI Paulu lu kaa wener: “Mbagenev mba pasen kwagh u Kristu kpa ka sha iwuhe man ahendan, mbagenev di yô, ka sha mimi ve lu pasen ye.” (Mbafilipi 1:15) Sha ashighe agen, ior mba nôngon ér vea puu ior mba Yehova ka ve wase mbaasemaamimi sha u va fan mimi, shin er ka i lu awashima ve la ga nahan kpaa.

Ken uwer u Novemba 1998 la, i tese iyaagh ki Betel, ki ki lu afishi a Mbashiada mba Yehova á á lu ken gar u Louviers ken tar u France la sha ityôugh ki televishen ki tar u France. Shin er ior ôr akaa kposo kposo sha kwagh u i tese la nahan kpa, kwagh shon gema va a akaa a injaa sha gbenda u kpilighyol.

Môm ken ior mba ve nenge kwagh u i tese sha televishen ne yô lu Anna-Paula, ya na lu ica a Betel kuma di ukilomita 60 tseegh. Anna-Paula lu ngô u pav ivaa vea nom na yô, lu a mbayev mba nomso uhar, shi lu keren tom. Nahan kpernan sev mbu aven yô, maa á gbidye waya shin Betel u pinen ér a lu pe una zua a tom her yô. Á kaa ér, “kwagh u mnenge sha televishen la wasem u fan mer, ijiir la ka ijiir i dedoo man tom u i eren her la kpa ka tom u lun a iwasen.” Shighe u va mase fan er ior mba ve eren tom shin Betel cii ve lu mbatomov mba nan ayol a ve man shighe ve yô, kwagh la kpiligh un iyol je zua ga! Er i lam a na tiônôô sha akaaeren a Mbashiada mba Yehova yô, maa á lumun ér Orshiada nana za un inya.

Zum u Léna u lu kwase u eren tom u pasen kwagh hanma shighe ken tiônnongo za un inya yô, maa Anna-Paula ngohol takerada u Mfe u Una Va a Uma u Tsôron La * hen a na. Hidi ve kwagen yô, Anna-Paula ôr takerada ne bee, shi lu keghen un a mbampin kpishi. Á lumun Bibilo i henen je ngôôr ga. Anna-Paula kaa nahan ér: “Mo yô, lu ian i m va zua a Mkaanem ma Aôndo je ne. Mayange je m vande lun a Bibilo ga cii.”

Ken uwer u Janawari, 1999 la, Anna-Paula er zende za shin Betel, hidi yemen yô maa za mkombo u Mbakristu sha kwa na u hiihii. Ica i gbe ga yô, á hii u henen Bibilo aa ônov nav shi pasen ahuraior na kwagh kpaa. Á kaa wener: “Me fatyô u koson kwagh u m lu henen la saan a mi mo tswen ga. M soo u pasen mbagenev mimi u ken Bibilo la shi surun ve asema kpaa.” Er Anna-Paula nôngo kar a mbamzeyol nav mbagenev kera yô, maa á hii u zan mbamkombo nduur nduur je. Á za hemen kpishi, í mase eren un batisema ken uwer u Mei 5, 2002.

U seer yô, er Anna-Paula ver ikyav i dedoo shi lu pasen kwagh kpoghuloo yô, ngô na kpa maa hii u henen Bibilo man ica gba ga tsô á er batisema. Anna-Paula mase kaan ér: “Saan mo iyol ngee gande, m fa kwagh u me ôr ga. Ka m sugh Yehova sha hanma iyange sha er á nem ian i m fa un shi m civir un nahan, shi ka m sugh un sha averen a á lu nan mo la kpaa cii.”

[Footnote]

[Pictures on page 3]

U hen atô ne ka: Anna-Paula

Shin ka: Hunda u nyôron ken afishi a branci u ken France