“Nenge Mkaanem Ma Aôndo Ma Lu Aa Tahav Sha Wono!”

“MKAANEM ma Aôndo ma uma je, ma tem gbilin ga.” (Mbaheberu 4:12) U tesen ken igbar er Mkaanem ma Aôndo ma lu a tahav kpen kpen yô, 2003 Calendar of Jehovah’s Witnesses pase se akaa a a er ior jighilii sha tar kuma ataratar. Sha ityough ki kalenda la, i nger her ér “Before and After,” (Cii Or la Nan Hingir Orshiada man Shighe u Or la Nan Hingir Orshiada Kera La) ngeren u dondon la tese tom u Mbashiada mba Yehova ve lu eren u wasen ior ve sôr anza ve a dang la, shi mba tesen ior gbenda u vea seer taver uuma vev mba ken tsombor man er vea kura mbamlu vev vea Aôndo yô.

Se zua a uwashika kpishi mba ior ve nger u wuese kalenda u 2003 ne yô. Ka akaa i er ken uwashika mba shon je ne:

“Kalenda ne ka ikyav i tesen Mbakristu mba mimi ér ior mbagen mba er ve nahan mba ve lu nôngon ityav tsung sha kwagh u jighjigh ve u nan yô. Hegen vea nenge a ufoto mban nahan vea umbur ve mbamgem mba ior mbagen ve gem la.”—Steven, United States

“M soo u ngeren kwagh ne sha mimi wam cii sha er ne fa er kalenda u 2003 ne a kerem ken ishima i za kighir la yô. I lu je kalenda ngu a kôrom ken ishima imba er ngun ne a kerem nahan ga cii. Akaa a a er ior a i nger heen kôhô kôhô ne hingir môm ken ikyav mbi me gema wan ken ikpa yam i duen kwaghpasen a mi la sha er me tesen ior ve nenge ikyav i dedoo i tesen ér Bibilo ia fatyô u benden a ior yô.”—Marc, Belgium.

“Kalenda ne doom je gande. Mliam haam ashe u ôron shin nengen er Yehova yange gema uuma mba ior mban nahan. Kwagh ne na yô, ishima mgbegham ker u seer geman uma wam. Hegen m hemba ngun ken mzough u anmgbianev tar sha won cii.”—Mary, United States.

“Yange kunya kôr Yesu tsung er ikpelaior lu ijen ken jijingi nahan. M sugh ne kpishi sha er ne lu dondon ikyav i Kristu la sha u duen a a akaa a er ior kpôô kpôô ken kalenda wase u 2003 ne nahan. Ken uma wam cii kalenda môm ngu a nam m haa mliam ashe ma shighe môm môm er ngun nahan ga.”—Cassandra, United States.

“Shighe u yange m lu anyom 11 la, m hii u mán taav; ken masejime yô, m gba man mcimbim ma bov. Ashighe kpishi mbamhen av cii ve lu sha u keren gbenda u me wua iyol yam tseegh. Zum u m va fa Yehova yô, i wasem m de aeren a dang la cii. Kalenda ne ngu a inja hen a mo je gande. Akav a anmgbianev av mba nomso man mba kasev mba ve dugh ajiir kposo kposo sha tar ne nam ishima i taver kpen kpen. Hegen m fa mer m ngu mo tswen ken ityav mbin ga man kwagh u a hembe lun mo a inja je yô ka dooshima u Yehova man u eren un tom a ishima i môm la.—Margaret, Poland

“Uwu, nenge Mkaanem ma Aôndo ma lu aa tahav sha wono! Zum u i nam kalenda u 2003 ne yô, lu kwagh u me er ve me vaa ga cii je la. Uvàndè-èrèn mban ne cii kua ufoto mba i due a mi mbara vea fatyô u taver jighjigh u or kpen kpen.”—Darlene, United States.

“Uma u ior mban ve eren ne nôngo u zuan sha uma wam u tse je zua ga. Yehova nam tahav mbu hemban akaa a bo a a lu inja er ka akaa a me fatyô u hemban a ga la. M sugh ne kpishi sha akaa a a er ior jim jim a ne nger ne.—William, United States.