Aôndo We Kwagh Wase Ikyo Kpa?

ÚTÔÔ ikyav mbi yuhwan we ken ishima sha ci u mbamzeyol mba hen tsombor wou, shin sha kwagh u mkpeyol wou shin sha ci u tom wou shin ityom igenegh i ú lu a mi i eren kpishi laa? Ior kpishi kape i lu ve je la. Nahan ka an je m-ban u ijirôron i mimi man ifer kua ipila i i eren nyian ne i bende a nan ga? Jighilii yô, ka vough er Bibilo i kaa nahan ér: “Gadia akaa a i gbe a sha won cii la nga kinen imôngo nga toghor zan zan hegen.” (Mbaromanu 8:22) Kape i lu je ve ior kpishi ka ve pine ér: ‘Aôndo we ikyo kpa? Una er kwagh u wasen se je kpa?’ je ne.

Tor u fan kwagh Solomon er msen hen Aôndo kaa ér: “Ka We tseegh U fe asema a ônov mba iorov ye.” Solomon na jighjigh ér Aôndo fa se tseegh ga kpa we hanma wase ikyo kpaa. Yange sôn Aôndo ér a ‘kegh ato Sha’ nahan a ungwa mbamsen mba hanma or u cian Aôndo u nan pase Aôndo “mvihi u nan, man ican i nan” yô.— 2 Kroniku 6:29, 30.

Nyian kpa Yehova we kwagh wase ikyo shi a lôhô se kpaa ér se sôn un ken msen. (Pasalmi 50:15) A tôndo zwa ér mbamsen mba ior ve er a ishima ve i môm mba ve lu sha ishima na yô, una ungwa ve. (Pasalmi 55:16, 22; Luka 11:5-13; 2 Mbakorinte 4:7) Een, Yehova ongo “hanma msen man zamber u hanma or shin ior [nav] cii.” Sha nahan yô, aluer se suur sha Aôndo, shi se sôn iwasen shi se kporom hen ana yô una nenge sha avese sha dooshima shi una kura se kpaa. (Anzaakaa 3:5, 6) Orngeren Bibilo Yakobu taver se ishima ér: “Kporom nen hen Aôndo, Un kpaa, Una kporom her a ven.”—Yakobu 4:8.