Mbampin mba Mbaôron Takerada Ne Ve Pin La

Ruamabera Lumun ér Orkristu Nana̱ Penda Uwegh sha Bibilo ken Atejir Nana̱ Bum ér Nana Ôr Kwagh sha Mimii?

Gba u hanma or nana tsua kwagh u nana er sha kwagh ne iyol i nan. (Mbagalatia 6:5) Nahan kpa, ma ijiir ngi ken Bibilo jighilii i i yàngè or u bumun ken atejir ér nana ôr kwagh u mimi, ga.

M-bum u bumun lu kwagh u i eren wuee sha ayange a tsuaa la yô. U tesen ikyav yô, Mbagrika yange ve kende uwegh sha, shin ve kôr uwegh sha atse a nanden nagh shighe u vea bumun yô. Orromanu yange nana̱ nguren bumun yô, nan kôr iwen ken uwe nan bum nan kaa ér: “Aluer mea nyie or sha apera er [aôndo] Jupiter a lu kuran gar man iyouutya ne yô, a̱ ta akaa a dedoo cica cii a̱ gba ica a mo di er m te iwen i m kusu ken uwe ne kera nahan.”—Cyclopedia of Biblical, Theological, and Ecclesiastical Literature, sha ikyev i John McClintock man James Strong, Tihi u sha uhar, peeji 260.

Aeren angan nahan lu akav a tesen isharen i orumace i i̱ tese ér nan kav ér aôndo ngu u á nengen aeren a uumace shi a lu a tahav mbu ôron ve ijir la. Hii sha ayange a tsuaa la je, mbacivir Yehova sha mimi kav er a fe kwaghôron man ieren ve kpaa yô. (Anzaakaa 5:21; 15:3) Yange ve bum sha ishigh ki Aôndo, shin á er shiada sha m-bum ve la. U tesen ikyav yô, Boashi man Davidi man Solomon kua Sedekia cii yange ve bum. (Rutu 3:13; 2 Samuel 3:35; 1 Utor 2:23, 24; Yeremia 38:16) Shi ior mbagenev yange ve kaa a mbacivir Aôndo ér ve bum a ve, nahan ve bum a ve je. Kape Aberaham man Yesu Kristu kpa ve er je la.—Genese 21:22-24; Mateu 26:63, 64.

Ashighe agen yô or u nan lu bumun sha ishigh ki Yehova la yange nan er ikyav shighe u nan lu bumun la. Aberam (Aberaham) kaa a tor u Sodom wener: “M kende uwegh agh sha, sha TER Aôndo Uhembansha u A gbe Sha man tar” la. (Genese 14:22) Ortyom u lu lamen a profeti Daniel la “kende uwegh nagh ku yanegh man uwegh nagh ku imesegh sha . . . bum Un u A lu uma gbem la.” (Daniel 12:7) Aôndo iyol na kpa i ôr kwagh na ér á kende uwegh nagh sha, á bum.—Duteronomi 32:40; Yesaia 62:8.

Ruamabera yàngè m-bum u bumun ga. Nahan kpa, saa Orkristu nana bum keng ve nana ôr hanma kwagh u nan soo u ôron ga. Yesu kaa ér: “ ‘Een’ wen a̱ lu ‘een’ heregh, man ‘ei’ wen kpaa, a̱ lu ‘ei’ heregh.” (Mateu 5:33-37) Orhenen Yakobu kpa ôr kwagh nahan. Zum u Yakobu kaa ér “de bumun nen ga” yô, lu tan a ta cin sha kwagh u gban di bumun sha akaa a ikyoo ga la. (Yakobu 5:12) Yesu shin Yakobu cii ve kaa ér u or bumun sha u ôron mimi ken atejir la ka kwaghbo ga.

Kpa, aluer i kaa a Orkristu ken atejir ér nana̱ bum ér nana ôr kwagh u mimi di ye? Aluer nana nenge a doo nan yô, nana bum. Shin a fatyô u nan na̱n ian ér nana̱ pase gbar gbar ér nana er aie ga.—Mbagalatia 1:20.

Shighe u i gbe u kenden uwegh sha shin pendan uwegh sha Bibilo ken atejir bumun yô, alaghga Orkristu nana soo u eren nahan. Nana fatyô u umbur akav a a lu ken Ruamabera a tesen ér ngise la kpa shighe u or a bumun yô nan er ikyav. Orkristu nana umbur ér kwagh u a lu tamen yô ka m-bum u nan lu bumun sha ishigh ki Aôndo ér nana ôr kwagh u mimi la, ú ngu wer ka ikyav i eren shighe u nan lu bumun la ga. Imba m-bum la ngi beerkwagh ga cii. Aluer Orkristu nenge ér nana na mlumun sha mpin u i pin nan yô, shi nana̱ umbur kpaa ér nan vande bumun ér nana ôr kwagh u mimi, man gba u hanma shighe cii kpa Orkristu nana ôron kwagh u mimi.