Kwaghaôndo u Kristu u Mimi Ngu Samber

YESU KRISTU yange kôr tom ave ken derianyom u hiihii la, er ú je tôndo iyol, tar cii lan ga. Loho na lu a tahav, shi lu loho u tan ior iwanger shi sagher ve asema ker, nahan ú kpiligh ior iyol je zua ga. Mkaanem nam bende a ior kpishi mba ve ungwa ma la sha gbenda u vesen.—Mateu 7:28, 29.

Yesu yange venda wanger wanger u nyôron nongo a mbakwaghaôndo man mbapativ mba sha ayange na mba ve kighir ior la un nzughul a ior ga, nahan ishamior vaan hen a na vangertiôr. (Mateu 11:25-30) Á pase ken igbar er ujijingi mbabov ve we ave sha a kaa a shin tar ne nahan, shi á yar tom a tahav mbu Aôndo na un la sha a ve. (Mateu 4:2-11, 24; Yohane 14:30) Yesu pase ior sha mfe er ican i yan man isholibo i zou kôôsôô yô, shi á tese ior sha dooshima ér ka Tartor u Aôndo ua va a mkpeyol u lun gbem sha won ye. (Marku 2:1-12; Luka 11:2, 17-23) Á kar a ime i yange i lu ior sha ishi shighe gôgônan, i̱ í yàngè ve u fan mlu u Ter na sha mimi la kera vindi vindi je, á pase ior iti i Aôndo, ve mba sar ve u lun a Aôndo ikyooso ikyooso la cii.—Yohane 17:6, 26.

Ka nahan ve shighe u mbahemenev mba kwaghaôndo man mbahemen tar tôv mbahenen mba Yesu a ican kpoghuloo je kpa, ve de ga ve za hemen u samber a loho na u ageegh ne zaar ye. Ken shighe u kuman anyom 30 tseegh, ve ver atôônanongo a Kristu a yange lu eren tom kpoghuloo ken Afrika man Ashia man Yuropa yô. (Mbakolose 1:23) Akaaôron a mimi a Yesu tese la wanger mbaasemaamimi mba hiden a ayol a ve ijime mba ve lu ken Zegetartor u Roma la cii.—Mbaefese 1:17, 18.

Nahan kpa, a er nan ve mbahenen mbahev mba yange ve due sha ajiir kposo kposo, a lun yôughyôugh man a lun yôughyôugh ga, shi ve due ken akuraior man ijô kua ukwaghaôndo kpa kposo kposo la vea lu ken mzough u mimi ken ‘jighjigh u nan môm’ er apostoli Paulu ôr nahana? (Mbaefese 4:5) Kanyi ia wase ve vea ‘lu zwa môm’ sha er mpav una nyôr hen atô ve ga? (1 Mbakorinte 1:10) Nyian ne mpav ngu kpishi hen atô u ior mba ve senge ér ve mba Mbakristu la, nahan ka a inja kpishi u se time sha kwagh u Yesu iyol na a er sha kwagh ne yô.

Ityôkyaa i i Ne Ve Mbakristu Ve Lu ken Mzough Yô

Zum u Yesu tile ken kwavjir sha ishigh ki Pontiu Pilatu yô, á ôr ityôkyaa i i ne ve Mbakristu ve lu ken mzough yô. Á kaa ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye. Hanma or u nan lu or u mimi yô, nan ongo imo Yam.” (Yohane 18:37) Sha nahan yô, kwagh u vesen u a zough  mbahenen mba Kristu mba mimi ve lu gungur môm yô, ka mngohol u ve ngohol ityesen i Yesu kua Bibilo, i i̱ lu Mkaanem ma Aôndo a ne i nger la.—1 Mbakorinte 4:6; 2 Timoteu 3:16, 17.

Kpa sha kpôô yô, lu u ashighe agen mbamzeyol shin anyiman a due hen atô u mbahenen mba Yesu. Nahan ka nyi ia wase ve? Yesu pase wener: “Zum u Un, Jijingi u mimi la, Una va va yô, Una hemen ne Una za a ven ken mimi cii; gadia Una gba ôron kwagh sha tahav Nav ga, kpa nyityô kwagh i Una ungwa yô, ka i je Una ôr ye, shi Una pase ne akaa a a lu van ken hemen la kpaa.” (Yohane 16:12, 13) Nahan yange gba u icighan jijingi u Aôndo una wase mbahenen mba Yesu mba mimi vea kav mimi u Aôndo lu pasen ve un kure kure la. Shi jijingi la una ume atam ken ve, er dooshima man msaanyol man bem nahan, man kwagh ne una gema a va a mzough hen atô ve.—Aerenakaa 15:28; Mbagalatia 5:22, 23.

Yesu na ian ér anyiman shin mbampav ve lu hen atô u mbahenen nav ga; shi á na ve tahav mbu geman mimi u ken Bibilo la sha u a zua sha aeren a ve a ityôô shin sha aeren a kwaghaôndo u ior mba hen ajiir a vea lu zenden zan la ga. E̱r ma er nahan yô, ken tugh mbu masetyô mbu lu a ve la, á er msen sha ishima i môm á kaa wener: “Man ka sha ci u mban tseegh M eren msen ga, kpa ka sha ci u mba vea va nam jighjigh sha kwaghôron u mban la kpaa, sha u ve cii ve̱ lu kwagh môm, er We Ter, U lu ken a Mo, Mo kpaa M lu ken a We nahan, sha u ve kpaa ve̱ lu ken a vese; sha er tar u̱ na jighjigh er U tindim yô.” (Yohane 17:20, 21) Nahan yô, lu u mbahenen mba Kristu vea zua ken jijingi kua ken mimi kpaa, man lu u a fa ve sha mzough u mimi ne hii sha ayange la zan zan va ar sha shighe wase ne. (Yohane 4:23, 24) Kpa, ucôôci mba sha ayange ne mba a mpav kpishi, mzough tsô ngu ga. Er nan man kwagh a lu nahana?

Er i Hii Ve Ucôôci Ve Lu a Mpav ker Yô

U ôron kwagh haan mbabov kera yô, ityôkyaa i i ne ve jighjigh u nan man aeren atô kposo kposo a lu hen atô u ior mba ve senge ér ve mba Mbakristu nyian ne yô ka sha ci u ve dondo atesen a Yesu ga. Orngerenakaa ugen kaa wener: “Mbakristu mbaainge ka ve tsua kwagh u ken Bibilo u a doo ve la tseegh—ve gema ve venda u yaren tom sha nyityô kwagh u a zough sha aeren a kwaghaôndo ve u ityôô ga la cii, kpa ngise la yô kwagh lu nahan ga.” Ka kwagh u Yesu man mbaapostoli nav tsengaôron ér una er vough je a lu eren ne.

U tesen ikyav yô, icighan jijingi u Aôndo yange mgbegha apostoli Paulu nahan á nger kwagh hen Timoteu u̱ lu orkuran a na imôngo la, á kaa ér: “Shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô. Vea tôô ato a ve sha kwagh u mimi la kera vea gema vea ver sha ukwaghhir.” A lu Mbakristu cii vea tsume yee? Ei. Paulu za hemen kaa ér: “Kpa we yô, kundu ishima sha akaa cii, taver ishima sha ican you; er tom u ivangeli, kure u doo doo.” (2 Timoteu 4:3-5; Luka 21:8; Aerenakaa 20:29, 30; 2 Peteru 2:1-3) Timoteu man Mbakristu mba jighjigh mbagenev yange ve yar tom sha kwaghwan u a dugh hen Aôndo ne.

Mbakristu Mba Mimi Mba Ken Mzough Heregh

Mbakristu mba mimi mba sha ayange ne kpa kundu asema ve shimi er Timoteu nahan, ve venda mbamhen mba uumace, ve gema ve har atesen a ve cii sha akaa a Ruamabera a tese la tseegh. (Mbakolose 2:8; 1 Yohane 4:1) Mbashiada mba Yehova dondo ikyav i Mbakristu mba sha derianyom u hiihii la, mba eren tom u pasen kwaghaôndo ken ityar je hemba 230, shi mba kuren tom ne doo doo kpaa, nahan mba van ior a loho u dedoo u Tartor u Yesu ôr ior la, sha hanma ijiir i ve zough a ve cii. Time ase sha igbenda i vesen inyiin i i lu shin heen, i ve cii ve lu dondon Yesu shi ve lu eren Kwaghaôndo u Kristu u mimi shin er ve dugh sha ajiir kposo kposo nahan kpaa.

Atesen a ve har sha Mkaanem ma Aôndo. (Yohane 17:17) Pristi u hen parish ugen ken tar u Belgium nger kwagh sha Mbashiada mba Yehova ér: “Kwagh u se hen hen ve yô, mba a gbashima u ungwan Mkaanem ma Aôndo shi mba a ishimataver i pasen ma kpaa.”

Mba veren ashe a Tartor u Aôndo ér u̱ va bee a mbamzeyol mba tar ne jimin cii. (Luka 8:1) Orshiada ugen yange lam a Antonio, icôr or u suen kwe patii ugen ken gar u Barankwila ken tar  u Kolombia. Ken iliam i Orshiada ne a na cii á ôr ma kwagh u tan ikyaa a kwe patii na la shin ma kwe patii ugen ga. Kpa á gema a kaa a Antonio ér una hen Bibilo a na man anmgbianev nav mba kasev gbilin. Á hii Bibilo i henen a Antonio ica i lu a gba ga je tsô maa Antonio kav er i lu Tartor u Aôndo tseegh u lu ishimaveren i mimi i mbaatsanev mba ken tar u Kolombia man ajiir agenegh sha tar cii yô.

Mba ne iti i Aôndo icivir. (Mateu 6:9) Zum u Mbashiada mba Yehova hii zuan a Maria, u a lu ken tar u Australia, a ze adua u katoliko kpoghuloo la yô, á lumun ér Mbashiada mban ve tese un iti i Aôndo ken Bibilo. Mba tesen un yô á er nena? Á kaa ér: “Zum u m nenge a iti i Aôndo ken Bibilo sha kwa hiihii yô, m vaa. Doom kpen kpen sha er m fe iti i Aôndo kpôô kpôô shi i lu kwagh u me fatyô u yilan í iyol yam nahan.” Maria za hemen u henen Bibilo, nahan ken uma na cii lu hiin je fa Yehova la, tsô á ya ikyar a na sha gbenda u ikyaryan la ia bee mayange ga yô.

Dooshima zua ve mba gungur môm. (Yohane 13:34, 35) Kwaghngeren ugen ken ipipaabaver i ken tar u Kanada i i yer ér The Ladysmith-Chemainus Chronicle la kaa ér: “Aluer ka nyityô kwaghaôndo ú lu eren, shin wea eren kwaghaôndo môm môm ga kpa, wuese Mbashiada mba Yehova mba kuman iorov 4,500 mba ve maa Iyou i Mkohol i kehen kuman umita 2,300 a uwer gban shio ken gar u Kasidi ken sati môm man tiôn u a kar ne la. . . Ve er tom ne saan saan a anyiman man mpav shio, shi or môm nan ker iwuese sha tom ne ga, nahan kwagh ne tese ér mba Mbakristu mba mimi.”

Hen ase sha akav a i er sha heen ne iyol you. Mbatimen sha akaa a kwaghaôndo man mbamishen man mba zan adua mba ve senge ér ve mba Mbakristu la mba nôngon kwagh a ayôôso a a lu hiar van ken ucôôci vev la, kpa Mbakristu mba mimi yô mba ken mkpeyol, mba samber sha tar cii. Sha kpôô yô, Mbakristu mba mimi mba eren tom ve u i ne ve u pasen shi tesen ior Mkaanem ma Aôndo la. (Mateu 24:14; 28:19, 20) Aluer we kpa ú ngu ‘shirin ishima man ú ngu vaan’ sha ci u akaa a ndôhôrshima a a lu eren ainge ne, man ishima za ú iyol sha ci u mpav u a lu hen atô u ukwaghaôndo kposo kposo mba Mbakristu Mbaaiev ne yô, se mba lôhôn we ser kohol Mbashiada mba Yehova ken mcivir ve u Mbakristu u ve lu civir Yehova Aôndo u mimi tswen la.—Esekiel 9:4; Yesaia 2:2-4.