“Er Tom U Ivangeli”
“Er Tom U Ivangeli”
“Kundu ishima sha akaa cii, . . . er tom u ivangeli.”—2 TIMOTEU 4:5.
1. Ka tom u nyi Yesu wa mbadondon nava?
MBÁ yôôn iti i Yehova man mbaawashima nav tar sha won cii. Ior mba ve tsegh ayol a ve sha ci u Aôndo mba eren tom ne sha ci u ve wa ikyo sha tom u Yesu Kristu wa mbadondon nav ér ve er la, á kaa ér: “Za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je.”—Mateu 28:19, 20.
2. Ka kwaghwan u nyi yange i wa orkuran Timoteu, man ka sha nyi gbenda nahan mbakuran mba ken Kristu vea er tom u pasen kwagh vea kure ú doo doo?
2 Mbahenen mba Yesu mba sha derianyom u hiihii la na ayol a ve u eren tom la tsung. U tesen ikyav yô, apostoli Paulu taver Timoteu, orkuran u ken Kristu, u na jighjigh a na imôngo la ishima ér a̱ ‘er tom u ivangeli, a̱ kure u doo doo.’ (2 Timoteu 4:5) Gbenda môm u orkuran nana er tom u nan nyian yô, ka sha u yôôn angwe u Tartor sha gbashima, pasen kwagh hanma shighe cii. U tesen ikyav yô, ortamen u Hemen Takerada u Henen hen Tiônnongo ka nan er tom u wasen kpishi, ka nan hemen ken tom u pasen kwagh shi nan tsaase mbagenev kpaa. Paulu er tom u yôôn loho u dedoo kure ú doo doo, shi á tsaase mbagenev ken tom u pasen kwagh kpaa.—Aerenakaa 20:20; 1 Mbakorinte 9:16, 17.
Mbaivangeli mba Ve Er Tom sha Gbashima sha Ashighe a Tsuaa La
3, 4. Ka akaa a nyi nahan Filibu er ken tom ivangeli na laa?
3 Yange i fa Mbakristu mba sha ashighe a tsuaa mbara ér mbá mba eren tom ivangeli sha gbashima. Hen ase sha kwagh u orivangeli Filibu. Un lu môm ken “mbautaankaruhar . . . [mba] ve iv a Jijingi man mfe,” mba i tsua ve ér ve karen kasev mba côgholov mba ken Kristu, mba ve lu Mbagrika man Mbaheberu, mba ve lu ken Yerusalem la kwaghyan a msange shio yô. (Aerenakaa 6:1-6) Zum u tom u injaa u i na ve la bee kera, shi tôvacan sambe Mbakristu mbara kera cii mase shin mbaapostoli her tseegh yô, Filibu maa yem ken Samaria. Lu za yôôn loho u dedoo ker, shi jijingi u Aôndo na un tahav lu dughun ujijingi mbahôngorouv ken ior kera shi lu been mbasombon alegh man mbakpenalegh angev. Mbasamaria kpishi lumun loho u Tartor la, nahan i er ve batisema. Zum u mbaapostoli mba ken Yerusalem ungwa kwagh ne yô, ve tindi apostoli Peteru man Yohane ken Samaria sha u ve za er mbananjighjigh mba ve sember eren batisema la msen ve̱ ngohol icighan jijingi yô.—Aerenakaa 8:4-17.
4 Jijingi u Aôndo shi hemen Filibu, za a na sha gbenda u zan ken Gasa la sha u a za zua a or u Etiopia, u eren tom ken ya u tor yô. Filibu pase un inja i kwaghôron u profeti Yesaia tsengaôron la wanger wanger, been yô, “or u Etiopia, u eren tom ken ya u tor, [u] lu ititor u Kandasa, torkwase u Mbaetiopia” la maa na Yesu Kristu jighjigh, nahan i er un batisema. (Aerenakaa 8:26-38) Ka been yô, Filibu maa yem ken Asote, shi er va mough heregh u yemen ken Sesaria yô, lu “ôron Loho u Dedoo ken agar” a a lu sha gbenda la cii. (Aerenakaa 8:39, 40) Sha kpôô yô, Filibu ver ikyav i dedoo i eren tom ivangeli je ka ashe tugh ga!
5. Ka akaa a nyi nahan yange i hemba fan ônov mba Filibu mba kasev mba unyiin mbara sha mini?
5 Anyom yange kar kuma er 20 nahan kpa Filibu lu eren tom ivangeli ken Sesaria her kpoghuloo tsô. Paulu man Luka ve tsaan hen ya u Filibu, hen shighe la “lu a ônov mba kasev unyiin, anuunaukase, ve ôron kwaghôron u profeti.” (Aerenakaa 21:8-10) Ikyav tese ér, yange i tese ve akaa a ken jijingi tsema tsema, shi ve lu a gbashima sha tom ivangeli, shi ve ôron akaaôron a profeti kpaa. Nyian kpaa, aluer mbamaren mba a gbashima sha tom u pasen kwagh yô, gbashima ve la una wase ônov vev mba nomso man mbakasev kpen kpen, una mgbegha ve u eren tom ivangeli ne sha gbashima ken uma ve cii.
Mba Ve Lu Eren Tom Ivangeli sha Gbashima Nyian Ne
6. Tom ivangeli ne yange u za ikyura sha derianyom u hiihii la nena?
6 Yesu Kristu ôr kwaghôron u profeti u vesen sha kwagh u ayange ase ne man mkurtar, á kaa wener: “Á vande ôron akuraior cii Loho u Dedoo ne keng.” (Marku 13:10) Saa a pase loho u dedoo ua “lu mpase hen akuraior cii” man mkur una va ye. (Mateu 24:14) Paulu man mbaivangeli mbagen sha derianyom u hiihii la ve yôô loho u dedoo, nahan ior kpishi hingir mbananjighjigh, shi i bugh atôônanongo kpishi ken zege Tartor u Roma la. Mbatamen mba yange i ver ve ken atôônanongo ne er tom ivangeli a anmgbianev vev mbanomso man mbakasev imôngo, nahan ve samber a kwaghpasen yem ajiir a icaa. Mkaanem ma Yehova ma za hemen u samber shi geman ior kpishi sha ayange la, nyian kpaa kape i lu vough je la, sha ci u Mbashiada mba Yehova umiliôn imôngo mba eren tom ivangeli ne. (Aerenakaa 19:20) Ú ngu môm ken ior mba i saan ve iyol u wuese Yehova la kpa?
7. Ka tom u nyi mbayôôn angwe u Tartor ve lu eren nyiana?
7 Mbayôôn angwe u Tartor mba sha ayange ne yar tom a aan a ve lu a mi la sha u seer eren tom ivangeli ne. Ior udubu imôngo nyôr tom mishen, mbagenev udubu uderi imôngo mba eren tom u pania u keke shin mba ushuen pania mba eren tom ivangeli hanma shighe. Nomso man kasev kua mbayev cii mbá pasen kwagh u Tartor sha gbashima, tom u ve lu eren ne kuma iwuese! Sha kpôô yô, Yehova ngu veren mbacivir un mba ve lu Mbakristu mba pasen ivangeli la cii doo doo sha mcivir u ve lu civir un a ishima i môm la.—Sefania 3:9.
8. Ka tom u veren akav sha atsul a ior u nyi i lu eren hegene, man ka unô ve lu eren tom shono?
8 Aôndo na mbadondon Yesu mba i shigh ve mkurem la tom ér ve yôô angwe u loho u dedoo i tser tar cii. “Iyôngo igen,” i Kristu i i lu seer ngeen a ngee la kpaa ngi suen mba i shigh ve mkurem u eren tom ivangeli ne. (Yohane 10:16) Kwaghôron u profeti ugen kar tom u waren uma ne sha tom u veren akav sha atsul a ior mba ve lu shirin asema shi ve lu vaan sha ci u akaa a ndôhôrshima a ior ve lu eren nyian ne. Shi ciôn tsô a tim aferaior kera. Hegen u mkur a lu a va ga ne, nenge er i doo tsung u se pasen ior loho u waren uma ne sha wono!—Esekiel 9:4-6, 11.
9. Se wase ior mbahev u eren tom u pasen kwagh nena?
9 Aluer se mbá vanden eren tom ivangeli kera yô, ka keng je se fatyô u wasen ior mbahev ken tiônnongo. Doo u ashighe agen se lôhô ve ve due kwaghpasen a vese. Gba u mbatamen vea nôngo sha afatyô ve cii vea taver mbananjighjigh a ve imôngo asema ve vese ken jijingi. Iniôngon i mbakuran mba hiden a ayol a ve ijime la ia wase mbagenev kpishi u eren tom ivangeli sha gbashima, shi vea lu mba tom ve ua ume atam kpaa yô.—2 Peteru 1:5-8.
U Pasen Kwagh sha Uya Uya
10. Ka ikyav i nyi Kristu man mbadondon nav mba tsuaa mbara ve ver sha kwagh u tom u pasen kwagha?
10 Yesu Kristu yange er tom ivangeli, nahan á ver mbadondon nav ikyav i dedoo i eren tom ne. Mkaanem ma Aôndo ôr kwagh u̱ tom kwaghpasen ú Yesu man mbaapostoli nav ve er la, ma kaa ér: “A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo; mba pue kar uhar lu a Na ityô.” (Luka 8:1) Mbaapostoli di er tom ne nena? Shighe u icighan jijingi haa sha a ve sha iyange i Pentekosti u inyom i 33 S.W. la yô, “hanma iyange kpaa ve lu gban uwer ga sha u tesen man u ôron ken tempel man ken uya er Yesu ka Kristu.”—Aerenakaa 5:42.
11. Sha kwagh u Aerenakaa 20:20, 21 a er yô, ka nyi jighilii apostoli Paulu er ken tom na u pasen kwagh laa?
11 Apostoli Paulu lu or u eren tom ivangeli sha gbashima, nahan á ôr a mbatamen mba ken Kristu mba ve lu ken Efese la wener: “Ityough yuhwam sha u pasen ne hanma kwagh u lun a inja ga, man u tesen ne akaa ken igbar man ken uya enev kpaa ga.” Zum u Paulu lu ‘tesen akaa ken uya uya’ la, lu zenden sôron mbacivir Yehova mba ve na jighjigh a na imôngo mbara, waan ve kwagh sha u yaav vev shinii? Ei, Paulu pase wener: “M lu pasen Mbayuda man Mbagrika kwagh u ishima i geman hen Aôndo man kwagh u jighjigh u nan Ter wase Yesu Kristu la.” (Aerenakaa 20:20, 21) Mba ve vande tseghan ayol a ve sha ci u Yehova kera yô, ityôkyaa kera ngi i a wa ve kwagh ér ve ‘gema asema hen Aôndo shi ve na Ter wase Yesu Kristu jighjigh’ ga. Paulu yange tese mbatamen mba ken Kristu mba ve lu ken Efese la tom u pasen kwagh sha uya uya, kpa mba ve lu mbananjighjighga la yô, á tese ve ér ve gema asema shi ve na jighjigh. Lu ikyav i Yesu ver la Paulu lu dondon ve lu eren tom ne ye.
12, 13. U eren sha kwagh u Mbafilipi 1:7 a er la yô, kanyi nahan mbacivir Yehova ve er sha u suen ian ve i pasen kwagh laa?
12 Tom u pasen kwagh sha uya uya ne ka tom u zange ga. U tesen ikyav yô, ior mbagenev ka ve vihi ishima a vese zum u ka sea za u za pasen ve loho u Bibilo yô. Ka i doo se u vihin ior asema ker ga. Nahan kpa, kwagh u a ne ve se eren tom u pasen kwagh ne yô, ka sha ci u Ruamabera lumun ú, shi se mba eren ú sha ci u mdoo u Aôndo a doo se ishima man ahuraior ase la. (Marku 12:28-31) Sha u se nôngo yô, se ‘palegh loho u dedoo iyol shi se tim u’ sha tindi sha u suen ian yase i pasen kwagh sha uya uya la yô, se yila ajir ken mbaatejir, kua ken Atejir u Tamen u ken tar u United States la kpaa. (Mbafilipi 1:7) Hanma shighe u se ze a ijir hen atejir la tsô yô, ka i nôngo u nan se ishô keng. Nenge ase mkaanem ma ma lu shin heen ma atejir ne yange kure ijir igen ve ôr yô:
13 “Mbamishen hii u zenden nan ior ityakerada i kwaghaôndo ka kwagh u nyian a mi ga, ve hii kwagh ne sha shighe u i due a akeke a gberen ityakerada la je. Ukwaghaôndo kpishi lu gbenda u vesen u ve hemban samber a ivangeli ken anyom a karen la je la. Nyian kpaa mbaivangeli mba ve lu ken ukwaghaôndo kpishi ka ve zende ve na ior udubu ubudu ityakerada, shi ve hide ve za sôr ve sha u yaav vev sha u vea gema ve ve er kwaghaôndo ve yô. . . . Tindi u Hiihii u ken [Atindi a ken tar u United States] a yange i hide i sôr la na ior ian gbar gbar u zenden nan ior ityakerada i kwaghaôndo, shi civir Aôndo ken ucôôci shi kumban ior pasen ve kwagh kpaa.”—Murdock v. Pennsylvania, 1943.
Er Nan Ve i Gbe u Se Za Hemen u Pasen Kwagha?
14. Tom wase u pasen kwagh ne ua gema or nana?
14 Atôakaa nga kpishi a a ne ve se pasen kwagh sha uya uya yô. Hanma kwa u se pase or kwagh yô, ka se nôngo u lôôn vor u mimi u ken Ruamabera ken nan. Shi ka sea hide sea za sôron nan yô, se mba urun vor la. Nahan m-ur u se lu urun vor u se lee ken nan la una na yô, nana vesen kure kure, ka nahan ve Paulu nger ôr kwagh ne ye, wener: “Mo m môôr. Apolo gema ur mngerem, kpa ka Aôndo A ne mvese ye.” (1 Mbakorinte 3:6) Nahan se za nen hemen u ‘môôr, shi urun,’ shi se lu nen a vangertiôr ser, Yehova ‘una na mvese.’
15, 16. Hii nan ve se sôron ior sha uyaav vev hanma shighe?
15 Se mbá eren tom ivangeli ne sha ci u uuma mba iorov mba sha zongo. Aluer se mba pasen ior kwagh yô, se yima iyol yase man mba ve ongo loho wase la cii. (1 Timoteu 4:16) Aluer se nenge kwagh tsule or je ngu nôngon u wuan nan nahan, se timbir u yiman nana? Mayange ga cii! Cii man ior mba se pase ve kwagh la ve zua a myom yô, gba u se za sôron ve sha u yaav vev hanma shighe cii. Akaa nga tem geman ga. Alaghga or nana lu a ian i ungwan loho u ken Bibilo hen shighe u se ze u za pasen nan kwagh la ga, kpa alaghga kwagen yô a sar nan tsung u ma nan ongo u. Alaghga se hide se za u za pasen kwagh hen ya ugen u yange se vande zan her yô, nahan se zua a orgen hen tsombor la u nana lumun ér se lam a nan ken Ruamabera yô.
16 Ka mbamlu mba ior mba se ze u za pasen ve kwagh la tseegh ve gem ga, ieren ve a vese kpa i gem. U tesen ikyav yô, mnyoon u ku u or u doon ishima una na or u ku u er nan la nana kegh ato nana ungwa loho u Tartor. Shighe u se zough a imba or la yô, se suur nan ishima, shi se pase nan nana fa er i gbe u nana zua a mfe u kwagh u ken jijingi, man er nana kure mgbe ne yô.—Mateu 5:3, 4.
17. Ka ityôkyaa i vesen i nyi i ne ve se pasen kwagha?
17 Ityôkyaa i vesen i i ne ve se pasen kwagh sha uya uya, shin se eren tom u pasen kwagh u Mbakristu yô, ka sha ci u isharen i se lu a mi i pasen ior iti i Yehova la. (Ekesodu 9:16; Pasalmi 83:18) U se eren tom ivangeli shi wasen ior mba mimi man mba kwagh u perapera a doo ve ishima hingir mba wuese Yehova la ka kwagh u injaa kpen kpen! Orpasalmi wa icam wener: “Ikaior kua mbayevkasev, utsembaiorov man mbayev kpaa; ve̱ wuese iti i TER, gadia ka iti Na tseegh i kende i sha ye, iengem Na ngi sha, kar tar kua Sha kpaa.”—Pasalmi 148:12, 13.
Se Mba Zough a Mbamtsera sha u Pasen Ivangeli
18. Ka se zua a mbamtsera ken tom ivangeli ne nena?
18 Ka se zua a mbamtsera kposo kposo sha tom ivangeli u se eren ne. Loho u dedoo u se pasen sha uya uya ne ka u wase se u hiden a iyol ijime, hemban cii yô, shighe u ior ka vea ngohol se saan saan ga yô. U se er tom ivangeli ne tsema tsema yô, gba u se lu er Paulu nahan, yange ‘hingir ior hanma kwagh cii, sha u a lu nan nan kpaa, una yima mbagenev yô.’ (1 Mbakorinte 9:19-23) Mfe u se zough a mi ken tom u pasen kwagh la ka a wase se se fa ayom a se pase kwagh yô. Aluer se suur sha Yehova shi se mba ôron kwagh u una doo or u ungwan yô, se mba eren sha kwaghwan u Paulu a we se kwagh ér se er ne, wener: “Kwaghôron wen a̱ luun u doon gbem, u i we bar sha mi yô, sha u fa nen er i doo u nea ôr kwagh a hanma or yô.”—Mbakolose 4:6.
19. Icighan jijingi ka a wase mba eren tom ivangeli nena?
19 Tom ivangeli ne shi ka u mgbegha se se har sha icighan jijingi u Aôndo. (Sekaria 4:6) Zum u Aôndo a ne se icighan jijingi na yô ka se gema se er aeren a jijingi ne vea ior shighe u se lu pasen kwagh yô, aeren shon yô, ka “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” (Mbagalatia 5:22, 23) Aluer se dondo mkôôm u jijingi yô una wase se u eren a ior sha dooshima, shi lun a ior sar sar shi lun a ve ken bem, shi wan ishima a ior shi eren erdoo a ior shi lun a jighjigh u nan man ishima i legh legh shi kôron iyol tsaha shighe u se lu pasen loho u dedoo yô.
20, 21. Aluer se mba eren tom ivangeli hanma shighe yô, ka mbamtsera mba nyi se zua a mini?
20 Er se pasen ivangeli yô, kunya ka u kôr se a ior kpen kpen. Zum u ior ka vea ôr se mbamzeyol vev er angev man mtaver u i taver ve u zuan a tom man mbamzeyol mba ve lu zuan a mi hen ya yô, ka se wa ve kwagh tseegh ga, kpa ka se taver ve ishima shi se ôr ve avur a ruamabera a a sur ve asema yô. Ior mba ve pir ashe ken jijingi kpa ikyav i tese ér perapera doo ve ishima la kpa kwagh ve gba se ishima. (2 Mbakorinte 4:4) Nahan ka a inja kpishi u se wasen mbaasemaamimi mbara ken jijingi je zua ga!
21 Tom u pasen ivangeli hanma shighe ne ka u wase se u veren ishima sha akaa a ken jijingi. (Luka 11:34) Sha kpôô yô, tom ne ua wase se sha ci u aluer se ver ishima sha akaa a ken jijingi ga yô, se gba ken imeen i uyôughyôughmbaakaav mba ve dumbur ken tar yum ne je a taver ga. Apostoli Yohane taver Mbakristu ishima ér: “Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga. Gadia akaa a a lu shin tar cii, isharen i iyolough, man isharen i ashee man ihagh i uma ne, ka a Ter ga, ka a taregh tsô. Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:15-17) Aluer se mba eren tom u ivangeli u Ter ne ngegh hanma shighe cii yô, tar ua kera doo se ishima ga.—1 Mbakorinte 15:58.
Koso Nen Akaa a Injaa Sha
22, 23. (a) Ka akaa a injaa a nyi Mbakristu mba ve lu eren tom ivangeli ne ve lu koson sha? (b) Kwaghhenen u a dondo ne una wase se u eren nyi?
22 Aluer se mba pasen loho u Tartor sha gbashima yô, se zua a mbamtsera mba vea bee mayange ga yô. Yesu ôr kwagh sha kwagh ne kaa ér: “De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga; kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la. Gadia ape kwaghinjaa wou a lu yô, ka her man ishima you kpaa ia lu ye.”—Mateu 6:19-21.
23 Se za nen hemen u koson akaa a injaa sha, gadia se fa ser ma ian i civirigh igen môm tsô hemba ian i se lu Mbashiada mba Yehova, Ter Uhembancii ne ga. (Yesaia 43:10-12) Er se lu eren tom u Aôndo ne yô, se kpaa a saan se iyol er kwase Kristu ugen u lu anyom 90 kpa yange i saan un iyol nahan, á ôr kwagh u mcivir u yange un civir Aôndo ica i gba la nahan wener: “M wuese Yehova kpishi er a lumun tom wam u m er sha ci na ken anyom a m lu uange ne nahan, m zer eren msen mer a lu Terem u dooshima gbem sha won.” Se kpaa aluer mlu u se lu vea Aôndo ne doo se ishima yô, se er tom u ivangeli ne se kure ú doo doo. Kwaghhenen u a dondo ne una wase se se fa er se er tom ivangeli ne se kure ú doo doo yô.
Ú Na Mlumun Wer Nyi?
• Er nan ve i gbe kpee u se er tom ivangeli nee?
• Ka nyi ú lu a mi u ôron sha kwagh u tom u mbaivangeli mba sha ashighe a tsuaa la man mba sha ayange nee?
• Er nan ve se pasen kwagh sha uya uya?
• Ú zua a mtsera ken tom ivangeli u ú lu eren ne nena?
[Study Questions]
[Pictures on page 7]
Nyian kpaa mbaivangeli mbá, mba ve lu eren tom ivangeli a iember er Filibu man ônov nav mba kasev mbara nahan
[Picture on page 11]
Ka ú zua a mtsera sha u pasen mbagenev loho u dedoo nena?