‘Kure Tom Wou Doo Doo’

‘Kure tom wou doo doo.’—2 TIMOTEU 4:5.

1, 2. Mbakristu cii mbá eren tom u ivangeli, nahan kpa, kanyi Ruamabera a soo ér mbatamen ve ere?

 ÚNGU or u yôôn angwe u Tartoro? Aluer ka nahan yô, wuese Yehova Aôndo kpishi sha ian i vesen i ú lu a mi ne. Ú ngu ortamen ken tiônnongo? Iaven i ortamen la kpaa ka iaven i civirigh igen i Yehova a ver ú sha mi yô. Nahan kpa, gba u se fa ser ka mfe u takerada, shin mfe u fan kwaghôron la a ne ve or kom u lun or u pasen kwagh shin ortamen ken tiônnongo ga. Ka Yehova ka a na ve se kuma u eren tom u pasen kwagh ye, shi nomso mbagen ken vese mba mbakuran sha ci u ve er sha atindiakaa agen a Ruamabera a tese la vough.—2 Mbakorinte 3:5, 6; 1 Timoteu 3:1-7.

² Mbakristu mba ve tsegh ayol a ve sha ci u Yehova cii mbá eren tom u ivangeli, kpa gba u mbatamen vea hemba veren ikyav i dedoo sha u eren tom ne. Aôndo man Kristu kua Mbashiada mba Yehova cii mba nengen tom u mbatamen “mba ve lu pasen kwaghaôndo shi ve lu tesen kpaa la.” (1 Timoteu 5:17; Mbaefese 5:23; Mbaheberu 6:10-12) Gba kpee u ortamen nana tesen ityesen i dedoo i ken jijingi sha hanma shighe cii, apostoli Paulu yange kaa a orkuran Timoteu wener: “Shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô. Vea tôô ato a ve sha kwagh u mimi la kera vea gema vea ver sha ukwaghhir. Kpa we yô, kundu ishima sha akaa cii, taver ishima sha ican you; er tom u ivangeli, kure u doo doo.”—2 Timoteu 4:3-5.

3. Ka nyi i gbe u orkuran nana er sha er atesen a aiegh a vihi mlu u ken jijingi u tiônnongo ga?

³ U orkuran nana ver ishima ér atesen a aiegh vihi mlu u ken jijingi u tiônnongo ga yô, gba kpee u nana er sha kwaghwan u Paulu a we ér, “kundu ishima sha akaa cii, . . . er tom u ivangeli, kure u doo doo” la. (2 Timoteu 4:5) Gba u ortamen nana ‘kure tom u nan doo doo.’ Gba kpee u nana er tom u nan vie vie, shi nana er ú doo doo kpaa. Ortamen u nan eren tom u nan doo doo yô, ka nan ver ishima nan nenge ér nan er ityom i nan cii vie vie, nan undu ma tom ken inya, shin nan er ú nan shi uwegh ga. Imba or la nan ngu jighjigh sha ankwagh u kiriki kpaa.—Luka 12:48; 16:10.

4. Kanyi ia wase se u eren tom u ivangeli ne kuren ú doo doo?

⁴ Ú ngu wer saa se vihi shighe kpishi ken tom u kwaghpasen ve se er ú se kure doo doo ga, kpa kwagh u una wase se u kuren tom wase doo doo yô ka sha u yaren tom a shighe wase sha inja. Aluer se Mbakristu cii se mba eren tom ne a uwegh gban shio yô, se zua a mbamtsera ker. U ortamen nana lu a shighe kpishi u pasen kwagh yô, gba u nana lu or u eren akaa sha inja, nana ver akaa a nan soo u eren la sha alô sha alô, shi nana fa ityom i i gbe u nana na mbagenev man er nana er kwagh ne yô. (Mbaheberu 13:17) Ortamen u nan lu a ityom i eren kpishi kpaa gba u nana er tom u pasen kwagh, di er Nehemia kpa yange sue tom u maan girgar u Yerusalem la nahan. (Nehemia 5:16) Gba u mbacivir Yehova cii vea eren tom u pasen kwagh u Tartor ne hanma shighe cii.—1 Mbakorinte 9:16-18.

5. Doo u se nenge tom wase u pasen kwagh ne nena?

⁵ Nenge er se lu a tom u saanyol ú yôôn angwe u Tartor ú i ver ú sha la sha wono! Sha kpôô yô, doo se kpishi er se lu a ian i civirigh i pasen loho u dedoo tar sha won cii, cii man mkur una va la. (Mateu 24:14) Er se yen nahan kpa, mkaanem ma Paulu man ma taver se ishima, ma kaa ér: “Se mba a kwagh u injaa ne ken ikav mbi inyaav; nahan agee a hemban la ka a Aôndo, ka ken vese a dugh ga.” (2 Mbakorinte 4:7) Aôndo una lumun mcivir u se lu civir un la, kpa saa una na se tahav man kwaghfan ve se fatyô u civir un ye.—1 Mbakorinte 1:26-31.

 U Tesen Iengem i Aôndo

6. Ka mkposo u nyi a lu hen atô u Iserael u sha marami la vea Iserael u ken jijingi la?

⁶ Paulu ôr kwagh u Mbakristu mba i shigh ve mkurem la kaa wener ka Aôndo a “gem se se kom u lun mbatomov sha ikuryan i he” la ye. Apostoli Paulu pase mkposo u ikyuryan i he i Yesu Kristu ya vea Iserael u ken jijingi la a ikyuryan i tse i Tindi i i ya vea Iserael u sha marami sha ikyev i Mose la. Paulu seer pasen wener zum u Mose hide sha Uwo u Sinai a Atindi a Pue la, ishigh nagh engem je gande Mbaiserael u kenger un sha ishi jighilii. Shighe karen yô, kwagh u vesen ugen gema er, gadia i “cighir ve asema,” nahan ashe a asema ve pir. Kpa zum u yange vea civir Yehova sha ishima i môm yô, ashe a asema ve a bugh. Paulu ôr kwagh ugen sha kwagh u tom u mba i ye ikyuryan i he a ve la kaa wener: “Se cii se kera mba a ikondo i yisan sha ishi ga se mba nengen iengem i Ter.” (2 Mbakorinte 3:6-8, 14-18; Ekesodu 34:29-35) Nyian kpaa “iyôngo igen” i Yesu la ngi a ian i civirigh i tesen ior iengem i Yehova.—Yohane 10:16.

7. Uumace vea tese iengem i Aôndo nena?

⁷ Or môm nana fatyô u nengen a ishigh ki Aôndo shi lun uma ga, nahan a er nan ve uumace mba ve lu mbaasorabo ne vea tese iengem na? (Ekesodu 33:20) Yehova ngu Aôndo u iengem tseegh ga, ngu a awashima u engem kpaa, awashima shon yô, ka u una yar tom a Tartor na, una paa hementor na iyol. Mimi u sha kwagh u Tartor la lu môm ken “uzegembaakaav mba Aôndo” mba yange ior mba icighan jijingi haa sha a ve sha iyange i Pentekosti ken inyom i 33 S.W. la ve yôô yô. (Aerenakaa 2:11) Icighan jijingi hemen ve nahan ve er tom u i wa ve sha ikyev la ve kure ú doo doo.—Aerenakaa 1:8.

8. Paulu yange kange ishima u eren tom u pasen kwagh la nena?

⁸ Paulu yange kange ishima lumun wener kwagh môm tsô a yange un u eren tom u ivangeli kuren ú doo doo ga. Á nger wener: “Er se lu a tom ne sha mhôônom ma i zungu se la yô, asema kera nga yinan se ga. Kpa se venda akaa a kunya a ken myer la, se mba zenden sha atseregh ga, se mba kôron mkaanem ma Aôndo geman a mi ga, kpa se mba duen a mimi ken igbar, se mba pasen ayol a ase sha ci u imo i ken ishima i hanma or sha ishigh ki Aôndo.” (2 Mbakorinte 4:1, 2) Se mba pasen mimi shi samber a iwanger i ken jijingi hanma ijiir cii sha u eren tom shon u Paulu a yer ér “tom ne” la.

9, 10. Se fatyô u tesen ior iengem i Yehova nena?

⁹ Paulu ôr kwagh u or u nan lu Imbor i iwanger i kpôô kpôô man i ken jijingi la kaa wener: “Ka Aôndo u A kaa er, iwanger i̱ wanger ken ime la, A lu tan iwanger ken asema ase ye, sha u mkav u iengem i Aôndo i sha ishigh ki Kristu la i̱ wanger se yô.” (2 Mbakorinte 4:6; Genese 1:2-5) Er se lu sha ian i vesen i se lu mbatomov mba Aôndo nahan, se lu nen wang sha er se tese iengem i Yehova er ijingi nahan yô.

¹⁰ Mayange je uumace mba ve lu ken ime i ken jijingi vea nenge a iengem i Yehova shin iengem i i dugh hen Yesu Kristu, ua lu Mose Uhemban la ga. Kpa se mbacivir Yehova yô, se mba zough a iwanger i iengem i Aôndo ken Ruamabera, shi ka se tese mbagenev kpa iwanger ne. Saa ior mba ve lu ken ime i ken jijingi hegen vea lumun iwanger i i dugh hen Aôndo la ve vea war mtim u a lu van la ye. Nahan se er nen sha tindi u Aôndo a we ér se ta iwanger i wanger ken ime la a iember, man sha gbashima sha er ior vea civir Yehova yô.

 Iwanger You i Wanger sha Shighe u Ú Lu Henen Bibilo a Ior La

11. Yesu kaa ér nyi sha kwagh u mwanger u iwanger yase, man ka gbenda u nyi nahan se na ve iwanger yase ia wanger ken tom wase u pasen kwagha?

¹¹ Yesu kaa a mbahenen nav ér: “Ne mba iwanger i tar. Gar u i maa un sha igungu, lu myer ga. Man mba te imenger mba cirin kapu sha mi ga, kpa ka i ver sha daar u pendan imenger sha mi, nahan i wanger mba ve lu ken iyou la cii je. Kape ne kpaa iwanger yen i̱ wanger sha ishigh ki iorough la, sha u ve̱ nenge aeren a en a dedoo man ve̱ civir Ter wen u A lu Sha yô.” (Mateu 5:14-16) Aeren ase a dedoo aa urugh mbagenev u va civir Aôndo. (1 Peteru 2:12) Agbar a pasen kwagh inja er kwaghpasen u sha uya uya man kwaghpasen u ian a due la bugh se aan kpishi a se na ve iwanger yase ia wanger yô. Kwagh u vesen ugen u i gbe u se er yô, ka u se tesen ior iwanger i ken jijingi i i dugh ken Mkaanem ma Aôndo la, sha u henen Bibilo a ior ken uyaav vev tsema tsema. U henen Bibilo a ior ka gbenda u injaa kpishi u se er tom u ivangeli ne se kure ú doo doo yô. Ka mbamhen mba nyi i dugh a mi mba vea wase se u henen Bibilo a ior sha er kwaghhenen la una kôr mba mimi a sar ve la ken asema?

12. Msen gba zua a tom u henen Bibilo a ior nena?

¹² Aluer se sôn Yehova ser a wase se se hen Bibilo a ior yô, se mba tesen ser gba se ishima tsung u henen Bibilo a ior. Shi se mba tesen ser se fa ser gba hange hange u se wase ior ve zua a mfe u Aôndo. (Esekiel 33:7-9) Yehova kegh a kegh iyol u ungwan mbamsen asev, shi veren iniôngon yase i se lu eren tom u pasen kwagh ne doo doo. (1 Yohane 5:14, 15) Kpa, u se eren msen sônon ser se zua a or u se henen Bibilo a nan tseegh kuma ga. Zum u se zough a or u se henen Bibilo a nan yô, gba u se er msen sha mbamzeyol mba nan shi se time sha mlu u nan kpaa, kwagh ne una wase se se fa gbenda u hanma kwa yô se hen kwagh a nan tsembelee yô.—Mbaromanu 12:12.

13. Kanyi ia wase se ve se hen Bibilo a ior tsema tsema?

¹³ Cii man se hen Bibilo a or tsembelee yô, saa se vande henen hanma iaven i i gbe u se hen a nan la iyol yase vindi vindi. Aluer se nenge ser se mba kanen shio u henen Bibilo a or yô, doo u se ver ishima se nenge gbenda u hanma sati yô, ortamen u hemen Takerada u Henen hen Tiônnongo la ka a hen hanma iaven i takerada u i tsough u henen la yô. Ashighe agen yô, se fatyô u duen kwaghpasen a mbapasenkwagh u Tartor mba ve zough a mbamtsera mba dedoo sha u henen Bibilo a ior yô. U hemban cii yô, doo u se dondo ieren man gbenda u Yesu Kristu yange pasen ior kwagh la.

14. Se ôr kwagh una kôr or u se henen Bibilo a nan la ken ishima nena?

¹⁴ Yange i doo Yesu tsung u eren ishima i Ter na, shi ôron ior kwagh u Aôndo. (Pasalmi 40:8) Lu ishima legh legh, shi ôron kwagh kôron mbaungwan a na ken ishima kpaa. (Mateu 11:28-30) Se kpaa se hen nen u ôron kwagh kôron mba se henen Bibilo a ve la ken asema. Cii man se hen kwagh a kôr or ken ishima yô, gba u se fa mlu u nan, nahan se fa er se henen hanma iaven a nan yô. U tesen ikyav yô, aluer or due hen ijiir i ior ve fe kwagh u Bibilo kpishi ga yô, a gba u se fa er se ôr kwagh a nan ve nana lumun ér Bibilo ka takerada u mimi yô. Nahan a gba u se ôr nan avur a ruamabera kpishi shi se pase nan a kpaa.

Wase mba u Henen Bibilo a Ve la Ve Kav Anzaakaa

15, 16. (a) Se wase or u se henen Bibilo a nan u kaven injakwagh i Bibilo i er i taver nan la nena? (b) Aluer i ôr injakwagh ken takerada wase man i̱ taver or u se henen Bibilo a nan yô, gba u se er nyi?

¹⁵ Alaghga or u ú henen Bibilo a nan la nana kav ma injakwagh i i er ken Ruamabera ga. U tesen ikyav yô, alaghga nana kav injakwagh i Yesu yange ôr ér ka i ver imenger sha daar u pendan imenger sha mi la, ga. (Marku 4:21, 22) Yesu lu ôron kwagh u imenger i mkure i ngise i wa mou  ker i tsar la. Yange i tsar imenger la i ver sha daarimenger, nahan i̱ ta iwanger ken iyou ape i ver i̱ her la. Aluer ú time sha kwagh u i er sha “imenger” man “daarimenger” ken takerada u Insight on the Scriptures la yô, ú wase or u ú henen Bibilo a nan la nana seer zuan a iwanger sha injakwagh i Yesu la. * Nenge imba er i lu kwagh u doon kpishi u pasen or u se henen Bibilo a nan la kwagh sha gbenda u nana kav kwagh shon shi nana wuese kpaa sha wono!

¹⁶ Alaghga a ôr injakwagh ken ma takerada ú se henen Bibilo a ior la ia taver or u se henen Bibilo a nan la ú kaven. Ker shighe pase nan injakwagh la i wanger nan, gayô ôr nan injakwagh igen i ia wase nan ve nana kav kwagh u i lu ôron la yô. Alaghga i ôr ken ma takerada ér gba hange hange u nom man kwase vea lu a inja i dedoo shi vea eren hanma kwagh ken ijoughave sha er ivese ve ia za a doo yô. U fatyô u tesen nan ikyav sha or u eren anumbe u nan ker ave sha kor u i te sha aôndo, nan zungur man nan pase ave yô, kpa cii man nan va gba shin inya yô, ikyar u nan kôr nan sha er nana gba ga yô. Aluer injakwagh la taver nan yô, gema tese nan ikyav igen i i tese mtsera u or lun a ikyar i ken ivese i fankwagh, man er i doo u vea eren hanma kwagh ken mzough yô, ôr nan kwagh u iorov uhar mba dughun ikyav mbi kasua shin zege mato, er u môm ka a dugh a gema a na ikyar na, ngula di a kôr a gema a ver kera shi a kegh iyol a mbigen yô.

17. Ka nyi kwagh se hen hen Yesu sha kwagh u anzaakaa?

¹⁷ Aluer se soo ser se ôr or injakwagh yase yô, gba u se vande wan ago iyol tsembelee. Aluer se mba eren nahan yô, se mba tesen ser kwagh u or u se henen Bibilo a nan la gba se ishima. Yesu yange a ôr ior anzaakaa a taver ga sha u tan ior iwanger sha akaa a a taver ve la. Ityesen i Yesu i sha Uwo ngi a anzaakaa a taver ga, shi Bibilo tese ér ityesen na la yange i wase mbaungwan a na kpen kpen. (Mateu 5:1–7:29) Er kwagh u ior gba Yesu ishima yô, yange á washima á ôr ior kwagh i wanger ve.—Mateu 16:5-12.

18. I wa se kwagh ér se er nyi a avur a ruamabera a ken ityakerada yase laa?

¹⁸ Aluer kwagh u ior gba se ishima yô, kwagh la una mgbegha se u “ôron kwagh a ve sha akaa a ken icighanruamabera.” (Aerenakaa 17:2, 3) U se eren kwagh ne yô, gba u se eren msen sha mimi sha shighe u se lu henen kwagh a or yô, shi se fa igbenda i se henen ityakerada i “orkuranya u jighjigh” a lu gberen la a ior yô. (Luka 12:42-44) Ikyav i tesen yô, i nger avur a ruamabera kpishi ken takerada u Mfe u Una Va a Uma u Tsôron La. * Er ian i yen ken takerada ne yô, i tese a tese avur agen a i gbe u a ôr yô. Shighe u se lu henen takerada u ú har sha Bibilo a or yô, doo u se pande se ôr avur agen a i tese ér i ôr la shi se pase nan á kpaa. Ityesen yase jimin cii har sha Mkaanem ma Aôndo, man ma a tahav kpishi. (Mbaheberu 4:12) Hanma kwa u ú lu henen kwagh a or yô, kwaghôron wou a har sha Bibilo, shi ôr avur a i nger hen akumahiange a ú lu ôron la. Wase or u ú lu henen Bibilo a nan la nana kav kwagh u Bibilo i er sha kwagh u ne lu henen la, man er i̱ vende aeren agen kpaa yô. Pase nan mtsera u nana zua a mi sha u ungwan imo i Aôndo yô.—Yesaia 48:17, 18.

Pine Mbampin mba Vea Na Ve Or Nana Hen sha Kwagh Yô

19, 20. (a) Er nan ve i doo u se pine or u se lu henen Bibilo a nan la mbampin mba vea na nana hen sha kwagha? (b) Aluer gba u se seer lamen a or u se lu henen Bibilo a nan la sha ma itinekwagh igen yô, kanyi i gbe u se ere?

¹⁹ Mbampin mba Yesu pinen ior la yange ve  wase ve u henen sha kwagh. (Mateu 17:24-27) Aluer se pine or u se henen Bibilo a nan mbampin mba fan mnenge u nan, mba vea na ishima ia vihi nan ga yô, mbamlumun mba nana na la vea na se fa ishima i nan sha kwagh u se lu henen a nan la. Alaghga mlumun u nana na la una tese ér nan ngu a undu atesen a ruamabera a vende la ga. U tesen ikyav yô, alaghga nana na jighjigh a ityesen i Mbautar la. Ityough ki sha u 3 ki takerada u Mfe la tese ér ishember i “Mbautar” la ngi ken Bibilo ga. I nger avur ken takerada la shi i tese avur a i gbe u a ôr yô, avur ne cii tese ér Yehova ngu kwagh môm a Yesu ga, shi icighan jijingi ka tahav mbu Aôndo, ka or ga. Aluer se ôr avur a Bibilo ne shi se time sha mi vea nan yô, aa ta nan iwanger. Kpa aluer gba u a seer tan nan iwanger yô, kanyi i gbe u a ere? Zum u se hen kwagh a nan kwagen se bee yô, se lam vea nan ken takerada ugen u Mbashiada mba Yehova ve gber yô, inja er antakerada u a kaa ér Should You Believe in the Trinity? la nahan. Se lamen vea nan se been yô, se hide se gba henen takerada u Mfe u se vanden henen a nan la.

²⁰ Tôô ase wer se pine or u se henen Bibilo a nan mpin nahan nan na mlumun kunda se iyol a nan kpen kpen, shin ishima vihi se ker. Aluer se pine nan mpin sha kwagh u a bende a nan inja er taav u man nahan, shin sha kwagh ugen ua bende a nan yô, se kaa a nan ser se za hemen a kwagh u se lu henen a nan la, nahan se lam vea nan sha kwagh u taav la kwagen. Aluer se fa ser nan ngu a de taav u man gayô se time ken ityakerada i i ôr kwagh sha taav u man la sha er se seer zuan a kwaghwan u se wase nan nana vese ken jijingi yô. Er se lu nôngon ser se ôr kwagh a kôr nan ken ishima yô, se sôn Yehova ser a wase nan nana seer vesen ken jijingi.

21. Aluer se fa igbenda i se tese or u se henen Bibilo a nan la kwagh sha akaa a a ze nan iyol la jighilii yô, kwagh la una wase nan nena?

²¹ Aluer se vande wan ago tsembelee u henen kwagh a or, shi Yehova sue se yô, se fa igbenda i se tese or u se henen Bibilo a nan la kwagh sha akaa a a ze nan iyol la jighilii yô. Se henen kwagh a nan shighe a karen yô, se wase nan sha er mdoo u Aôndo a doo nan ishima la a seer taver a taver yô. Shi se wase nan nana lu a icivir man iwuese sha nongo u Yehova ne. Aluer se wase or u se henen Bibilo a nan u fan ér ‘Aôndo ngu a vese’ yô, a lu kwagh u doon tsung! (1 Mbakorinte 14:24, 25) Nahan se henen nen Bibilo a ior tsema tsema shi se nôngo sha afatyô wase cii se wase ior mbagenev kpaa ve hingir mbahenen mba Yesu.

Kwagh u Injaa u Se Ver Ishima sha mi Yô

22, 23. Kanyi i gbe u se er ve se kure tom wase u pasen kwagh ne doo doo?

²² Gba u se suur sha tahav mbu Yehova a ne se la ve se er tom u pasen kwagh ne se kure ú doo doo ye. Paulu nger Mbakristu mba i shigh ve mkurem a na imôngo mbara washika sha kwagh u tom u pasen kwagh la, á kaa wener: “Kpa se mba a kwagh u injaa ne ken ikav mbi inyaav; nahan agee a hemban la ka a Aôndo, ka ken vese a dugh ga.”—2 Mbakorinte 4:7.

²³ Sea lu môm ken Mbakristu mba i shigh ve mkurem mbara shin sea lu ken “iyôngo igen” la kpaa, se mba er ikyav mbi inyaav mbi taver ga nahan. (Yohane 10:16) Er se lu er ikyav mbi inyaav mbi taver ga nahan kpa, Yehova una na se agee a se er tom u pasen kwagh ne se kure u doo doo, shin aluer ior mough ahendan a vese je kpaa. (Yohane 16:13; Mbafilipi 4:13) Nahan se suur nen sha Yehova vangertiôr, shi se ver nen ishima sha tom u injaa u i we se sha ikyev la, nahan se er nen tom wase se kure nen ú doo doo.

[Footnotes]

Ú Na Mlumun Wer Nyi?

• Gba u mbatamen vea er nyi ve vea er tom u ivangeli vea kure ú doo doo?

• Ka akaa a nyi nahan i gbe u se er ve se hen Bibilo a ior tsema tsema?

• Aluer ú ngu henen Bibilo a or man nan kav injakwagh ga, shin gba u ú seer tan nan iwanger sha ma itinekwagh igen yô, kanyi nahan i gbe u ú eree?

[Study Questions]

[Picture on page 13]

Mbatamen mba ken Kristu ka ve tese anmgbianev ken tiônnongo shi ve wase mbananjighjigh a ve imôngo u pasen kwagh

[Picture on page 15]

Gbenda ugen u se na ve iwanger yase ia wanger yô, ka sha u henen Bibilo a ior