Gomoti U Sha Ikyev I Tartor U Aôndo La Hingir Kwagh U Mimi Nyian

Ipipaabaver i ken tar u Australia i í yer ér The Age la i pine ér: “A er nan ve ityar kpishi i í lu a aeren kposo kposo shi igen i hembe zan ikyura a igen ne nahan ia fatyô u lun ken mzough sha wono? I̱ kaa nahan ér kwagh u una zua uumace sha tar cii yô, a lu di ityav mbi tar ugen ua za mough a va ta sha tar u uumace ne di je.”

TAR ugen ua va ta num sha tar u uumacee? Aluer ka u imba num la ia zua akuraior a ken tar ne cii shin ia zua ga kpa, kwaghôron u profeti u ken Bibilo ôr ér ayôôso nga van a aa zua akuraior a sha tar cii gungur môm yô. Ayôôso la aa hii a lu sha tar ungun ga kpa a gema a lu sha tahav mbu shaav.

Tor Davidi u Iserael u sha ayange a tsuaa la tsengaôron kwagh sha kwagh ne. Icighan jijingi na un tahav tsô á kaa wener: “Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la, mba kaan er: Sé tôndo nen ikangenev Vev kera, sé kende nen ikor Ve her a vese kera!” (Pasalmi 2:2, 3; Aerenakaa 4:25, 26) Nenge ase yô, á kaa wener utor mba tar ne vea zua zwa sha u henen akaa num sha Yehova, Orgban u tar jimin cii, man Yesu Kristu, un u á shigh un mkurem, á ver un Tor la. Vea er kwagh ne nena?

Tsegh ku ôron ku Bibilo i er sha alô sha alô man akaaôron a profeti a a kur sha mi la tese ér ka ken inyom i 1914 la, i ver Tartor u Aôndo sha man Yesu Kristu gema lu Tor u ú ye. * Hen shighe la ishima i akuraior a tar ne cii lu i môm tsô. U̱ ma ve wa ayol a ve sha ikyev i hemen u Tartor u Aôndo u he la yô, ve de ve tume ityough nôngon ityav keren mhembe—ve nôngo Ityav mbi Vesen, shin Ityav mbi Tar cii Mbi sha Môm la.

Yehova Aôndo nenge ieren i mbahemenev mba uumace ne nena? “Wen u A tem Sha, ngu sen, TER ngu nahan ve tar. Zum la Una ôr kwagh a ve sha iyugh Na, Una ta ve mciem iyol sha ishima Na i vihin tsung.” Tsô, Yehova una kaa a Wan na, Tor u Tartor u i shigh un mkurem la wener: “Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je. Ú her ve sha tôgh ku iyôgh; Ú hembe ve avur avur er gbande u ormaantyegh nahan.”—Pasalmi 2:4, 5, 8, 9.

A mase hemban akuraior a taver ityough a á lu hendan kwagh a Aôndo la jimin cii sha tôgh ku iyôgh ken ityav mbi Armagedon, shin Har-Magedon. Takerada u Mpase, ú ú mase ken Bibilo la, pase kwagh u mkur ne ér ka “ityav mbi iyange i vesen i Aôndo, Uhembanagee” mbi i lu kohol ‘utor mba tar sha won cii’ imôngo sha ci u mbi yô. (Mpase 16:14, 16) Diabolo una tuur akuraior a tar ne ken ijime, nahan aa kohol imôngo, aa lu a  awashima kpa môm man awashima shon yô ka— sha u nôngon ityav a Aôndo Uhembanagee.

Shighe u uumace vea zua sha u nôngon ityav a Aôndo la ngu mgbôghom ikyua. Kpa kwagh u una gema a er a lan ishima yô, “mzough” ve la una wase ve ma kwagh ga. Kpa una gema a lu mhii u bem u uumace cii ve kegh hegen ica i gbe ne. A er nan ve kwagh a lu nahana? Ken ityav mbi masejime la, Tartor u Aôndo “ua hembe ityartor igen [i shin tar] ne cii avur avur, ua tim i, kpa u yô, ua lu gbem sha won.” (Daniel 2:44) Ka Tartor u Aôndo ua va a gomoti u una samber a bem u uumace ve lu keren la ye, ka ma mzough u orumace ga.

Orhemen u Gomoti u sha Ikyev i Tartor La

Ka Tartor u ior mba asema a mimi ka ve shi sônon ken msen je ne, ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Tartor u Aôndo ka kwagh u ken ishima ga, kpa ka gomoti jighilii u a lu eren akaa a kpilighyol hii sha shighe u i ver ú sha ken inyom i 1914 la je yô. De se time nen sha atôakyaa a injaa agen a á tese ér Tartor u Aôndo ngu eren tom nyian jim jim yô.

Kwagh u hiihii yô, Tartor ne ngu a gbaa u hemen, man ka Tor Yesu Kristu a lu ityough shami ye. Ken inyom i 33 S.W. la, Yehova Aôndo ver Yesu Kristu ér a̱ lu Ityough ki tiônnongo u Kristu. (Mbaefese 1:22) Hii sha shighe la je, Yesu ngu hemen, nahan ngu tesen er un fe hemen yô. Ikyav i tesen yô, zum u zegejen gba ken tar u Yudia ken derianyom u hiihii la yô, tiônnongo u Kristu ker gbenda u wasen anmgbianev vev. I er iwasen ken gar u Antioki nahan i tindi Barnaba man Saulu a mi ér ve za na anmgbianev.—Aerenakaa 11:27–30.

Nahan hegen u i ver gomoti u Tartor a lu eren tom ne je yô, se fa ser Yesu Kristu una hemba hemen sha gbenda u injaa cii. Hanma kwa u aahe a er, inja er—tartenger man iwo i bughur man ijen man ura u nôôn kuhwan akaa kua ijeverahumbe man uraahumbe—nahan cii yô, tiônnongo u Kristu u Mbashiada mba Yehova ngu a ker gbenda fese u wasen mbananjighjigh a ve imôngo man mbagenev mba aahe a tser ve la cii. Ikyav i tesen yô, zum u tar tenger ken tar u El Salvador ken uwer u Janawari man Febewari 2001 yô, i kohol akaa sha u wasen ior ken tar la cii, man Mbashiada mba Yehova mbagen ken tar u Kanada man Guatemala man Amerika kpaa tindi a iwasen. I hide i maa ajiir a civir Aôndo atar kua uyaav mba iorov je hemba 500 ken atô u anshighe kpeghee tseegh.

Ior Mba Vea Lu sha Ikyev i Gomoti u Tartor u Aôndo La

Er i ver Tartor u Aôndo ken inyom i 1914 la je, ngu kohol ior mba vea ya dyako i ú ken atôatyev a tar ne veren vough vough. Kwagh ne ka sha u kuren kwaghôron u profeti u doon tsung u i nger ken takerada u Yesaia la, ér: “Sha ayange a masetyô yô, uwo u iyou i TER [mcivir na u mimi] ua tile dông, ua tav sha ua hemba iwo cii, . . . akuraior cii aa kôndo sha u iuu.” Kwaghôron u profeti ne tese ér “ior kpishi” vea kôndo sha uwo la ér vea za ngohol ityesen man atindi a Yehova.—Yesaia 2:2, 3.

Kwagh ne gema va a nongo u injaa ayange ne—ka mzough u anmgbianev tar sha won cii u Mbakristu mba ve hembe iorov 6,000,000 ken ityar i hemban 230 yô. Shighe u Mbashiada mba Yehova ka vea zua mbamkohol mba ityar ityar yô, ka i kpiligh ior iyol kpishi u nengen a dooshima man bem man mzough u a lu hen atô u ikpelaior i i dugh ken ityar ityar, shi i lu a aeren man ijô kposo kposo la je i gande. (Aerenakaa 10:34, 35) Nahan ú nenge wer saa gomoti u a lu eren tom tsembelee shi a lu kpegher kpe kpegher ga shi a lu kpôô kpôô tseegh una kôr cio u kohol akuraior uderi uderi, veren á imôngo ken bem man mkpeyol ga he?

 Ityesen i Tartor u Aôndo

Hanma gomoti ngu a atindi a ior nav vea dondon yô, man hanma or u nan soo u lun sha ikyev i gomoti la di tsô yô ka i gba u nana kura atindi shon keng keng. Kape Tartor u Aôndo kpa u lu a atindi a i gbe u ior mba vea va lu ken ú la vea hen a fa keng je la. Nahan kpa, u wasen ikpelaior i i dugh sha ajiir wue wue ér ve fa atindi ne la ka tom je zua ga cii. Shi ka gbenda ugen u ú tese ér mimi je Tartor u Aôndo ngu je ne—ityesen i tartor ngi i kôr ior ken asema shi ve gema mbamlu vev kpaa.

Tartor ne ua er nan ve ua kure zege tom nee? Ua dondo gbenda u mbaapostoli pasen kwagh “ken uya” shi ve tesen ior Mkaanem ma Aôndo asange asange la. (Aerenakaa 5:42; 20:20) Gbenda u ngun ú tesen ior ne za nena? Fada ugen mba yer un ér Jacques Johnson, á ôr kwagh ken pipaabaver i i gberen i̱ kwa môm ken sati ken tar u Kanada sha kwagh u iniôngon i yange un nôngo ér una yàngè kwase ugen a de henen kwagh a Mbashiada mba Yehova ga kpa un kan shio yô. A kaa ér: “Kwagh cier mo iyol kpishi, tsô m kav er me nôngo nan kpa me fatyô ga yô. M mase fan mer kasev Mbashiada mba ve vaan hen kwase u zaan mape môm ga ne, kôr ikyar a na ken iwer i karen imôngo i ve vaan hen a na la taver gande u saghen. Ve zua vea na kangenaa sha u wasen un, lun vea na, shi ve zua sha mhen kpa kangenaa. Ica gba ga tsô maa hingir u lun ken kwaghaôndo ve taveraa, nahan kwagh môm lu u me er sha kwagh ne ga.” Di er loho u ken Bibilo u Mbashiada mba Yehova ve pasen kua ieren ve la i kôr kwase u kera yô lu kwase Katoliko ne ken ishima nahan, kape loho ne ú lu benden a ior umiliôn umiliôn sha tar wuee je ne.

Ityesen i Tartor ne har sha Bibilo, man ngi tesen aeren man atindi a i aa sha kwagh u aeren a dedoo la. Ngi tesen ior ér ve doo ayol a ve, aluer ior vea due hanma ijiir je kpaa, ve na ve civir i í lu i ve yô. (Yohane 13:34, 35) Shi ngi i wase ior u dondon kwaghwan ne, ér: “De hingir nen inja i môm a tar ne ga, kpa i̱ gema ne sha mgem u he u mhen wen sha er né kar er ishima i Aôndo i lu yô man kwagh u a doo man a kom u rumun un man shi a lu vough la kpaa yô.” (Mbaromanu 12:2) Ior umiliôn imôngo mba ve undu uma ve u tse ve gem ve dondon atindi man akaawan a gomoti u Tartor saan saan la zua a bem man msaanyol hegen man ishimaverenkeghen i akaa a ken hemen kpaa.—Mbakolose 3:9–11.

Magazin u Iyoukura ka ikyagh ki tomough ki ki lu zuan ior imôngo sha tar yô. Igbenda i geman kwagh man akeke a gberen kwagh ken ijô wue wue la na yô, mba gberen Iyoukura sha hanma uwer ken ijô 135 man iorov mba hemban 95 ken atô u deri u ior mba ve er i̱ sha tar cii mba er i̱ ken zwa ve u ityôô sha shighe môm.

Orngeren kwagh ugen u a ze adua u Mormon nger ati a ukwaghaôndo mbagenev mba ve hembe eren tom u gberen ityakerada i pasen kwagh a côôci na yô. A nger iti i Iyoukura man Awake!, u i lu Mbashiada mba Yehova ve gberen la wener ka umagazin mba ve hembe ivangeli i pasen cii yô, a kaa ér: “Ma or nana fatyô u wan Iyoukura shin Awake! kwagh iyol ér ve na ior haa iyol inya ga, kpa kwagh u ve gem ve er yô, ve na ior mba tsevaa man m ngu a zua a imba kwagh la ken ityakerada i kwaghaôndo ugen ga cii. Akaa a mimi man a í tim sha mi vindi vindi man a á eren kpôô kpôô a ka i gber ken Iyoukura man Awake! la nga a kundu iyol ôron je i zua ga cii.”

Ikyav tese wanger wanger ér Tartor u Aôndo ngu eren tom kpôô kpôô. Mbashiada mba Yehova mbá pasen mbawanndor a ve “loho u dedoo u tartor ne” saan saan man a ishima i tseen, shi ka ve lôhô ve ér ve kpa ve na ayol a ve sha ikyev i ú. (Mateu 24:14) Imba kwagh la i doo u gaa? We kpa ú zua a averen a a lu sha u kohol imôngo vea ior mba i tese ve u kuran atindi a Tartor, nahan ve lu nôngon u kuran á la. Kpa u hemban yô, ú va hingir u lun sha ikyev i hemen u Tartor ken tar u he u í tende zwa ér “perapera una tema ker” la.—2 Peteru 3:13.

[Footnote]