“Se Soo U Lumun Ser, ‘Een!’ ”

AFISHI a nengen sha tom u Mbashiada mba Yehova ken Najeria sember zuan a washika ugen, ka kwagh u i nger ker je i tende i nger shin heen ne:

“Wan wase Anderson kpe zum u a lu anyom 14 la. Cii ku na yô, tuhwa ikyegh inya ihiar. Yange soo wener vea vese yô, ma un tee ma un er iyua a inyaregh kira hen afishi a nengen sha gbaatom sha ci u tom kwaghpasen u i lu pasen sha tar cii la. Kpa ku wua un cii ve kuma u teen ye.

“Er i lu isharen na u tindin a inyaregh shin afishi a nengen sha gbaatom yô, se mbamaren nav se koso an ikyegh ne vese nahan se tee í. Nahan se mba tindin ne a iyua i Anderson ne. Se mba a vangertiôr ser ica a kera gba ga tsô shi se nenge a Anderson er Yehova a tende zwa nahan. Zum u una pine se aluer sea er ishima na yô, se soo u lumun ser ‘Een!’ se tee ikyegh ne se tindi a inyaregh shin afishi a gbaatom. Sha mimi yô, se mba veren ashe a Anderson tseegh ga kpa kua ‘ikpela i mbashiada i vesen’ i a nder i̱ shin ku la kpaa.”—Mbaheberu 12:1; Yohane 5:28, 29.

Er washika ne a tese wang nahan, jighjigh u nan ken mnder u shin ku ka ishimaverenkeghen i i lu suen Mbakristu mba mimi cii yô. Ka tsombor u Anderson tseegh ga, icombor igen umiliôn umiliôn kpaa ia lu ember zum u ia nenge a ior vev mba doon ve ishima mba orihyom u i yer ér ku wua la!—1 Mbakorinte 15:24–26.

Ishimaveren i surun ishima i mnder u shin ku i Mkaanem ma Aôndo ma lu a mi ne ka môm ken akaa a kpilighyol kpishi a ica a kera gba ga tsô a er ken tar u he u perapera sha ikyev i Tartor u Aôndo la. (2 Peteru 3:13) Bibilo ôr kwagh u Aôndo una er sha ci u ior sha ayange la kaa ér: “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.