Ior Mbá Keren Msaanyol

YANGE i pine ior mba ken tar u France man Jamani man Zege Britain man tar u Amerika mpin ugen anyom kar hegen kpuaa ér, “Kanyi ú er ve ú zua a msaanyolo?” Iorov 89 ken iorov deri ken atô u mba i pine ve mpin ne cii kaa ér aluer or ngu gbong gbong yô, a saan nan iyol; iorov 79 ken iorov deri di kaa ér ka ivaa i dedoo shin ikyar i dedoo i ne or msaanyol ye; iorov 62 ken iorov deri kaa ér ka mbamtsera mba yesen ônov; iorov 51 ken iorov deri hen ér aluer or ngu a tom u dedoo yô, a saan nan iyol. Shin er kera yô í kaan a ior ér inyaregh ki ne msaanyol keng ga nahan kpa, iorov 47 ken iorov deri ken atô u mba yange i pine ve mpin ne na jighjigh ér inyaregh ki ne msaanyol. Kwagh ne ka nahana?

Hiihii yô, nenge ase kwagh u i senge ér or nana lu a inyaregh yô, a saan nan iyol la. I tôv sha kwagh u iorov deri môm mba ve hembe inyaregh ken tar u Amerika yô, i nenge ér hemba saan ve iyol a ior mbagenev ga. Heela tseegh ga, ken anyom ikundugber a a kar ne ior kpishi ken tar u Amerika hingir a kwagh ave je nôngo u hemban kwagh u ngise ve lu a mi la kwa har, nahan kpa mba sôron twer u ken ityou tsema tsema kaa ér hemba saan ve iyol hegen a ngise la ga. Ibaver igen je yô, kaa ér: “Ken atô u anyom ikundugber shon ne ior hemba uren a ure cii. Agumaior a a sende ayol a ve kpa hemba ngeen a ngee. Ivaa paven kpa de ishar.” Ken ityar er 50 nahan, mbatôvon sha akaa mba ve time sha kwagh u inyaregh man msaanyol kaa ér mayange je inyaregh ki a fatyô u yamen msaanyol ga.

Kwagh u sha uhar yô, akaa er gbong gbong u iyolough man ivaa i dedoo kua tom u dedoo nahan ka akaa a hange hange a a na or msaanyol nena? Sha kpôô yô, aluer gba u or a lu a akaa ne keng keng ve á saan nan iyol yô, ior umiliôn umiliôn mba ve lu uange man mba ivaa ve i doo ga la yô vea er nena sha wono? Man gema kasev man noov mba ve lu a ônov ga kua shi nomso man kasev mba ve lu a tom u dedoo ga la ye? Amba a ior ne cii ka u mayange je vea tsa a zua a msaanyol ga shinii? Man aluer mlu u mba i senge ér saan ve iyol hegen sha ci u mba gbong gbong man mba ivaa ve i lu a zayol shio la kôr gema nahan msaanyol ve la maa una bee?

Se Mba Keren Msaanyol Ape Se Zua a Mi Je Kpa?

Hanma or soo msaanyol. Kwagh ne kpiligh se iyol ga, gadia í kaa ér un u a gbe or la ka “Aôndo u i wuese” shin u saan saan man Aôndo yange er or sha inja i mlu na. (1 Timoteu 1:11; Genese 1:26, 27) Nahan yô, msaanyol u uumace ve keren ne ka kwagh u sha gbaaôndo je. Nahan kpa, ior kpishi fa er u lun a msaanyol i lu inja vough er u nôngon wer ú kusu waarawa ken uwe nahan—ka u osough u haa inya je i ngôôr ga.

Nahan kpa, alaghga tsô, ka er mbagenev ve lu keren msaanyol kpoghuloo ve ve lu zuan a mi ga ye shinii? Eric Hoffer, orfankwagh tsula u a henen sha kwagh u mlu u ior yô, nenge wener ka nahan. Á kaa ér: “Msaanyol u ior ve keren la ka kwagh u vesen môm u a gem a ne ior ishima vihin yô.” Kwagh ne ka mimi aluer se ker msaanyol sha gbenda u vough ga yô, se va a va ahenge shi se ure kpaa. Akaa inja er u keren ser se lu mbainyarev man u keren itizan man pati u eren kpoghuloo shi keren shagba shin uyôughyôughmbaakaav shin u wan ayol a ase ikyo shi u pirin asaren a ase ave ave nahan cii nga ne msaanyol ga. Ka nahan yô, ior mbagenev lumun mhen u kwase u ngeren ityakerada ugen u i lu inja er a nzughul kpishi ne, kwase ne kaa ér: “Aluer se de u keren msaanyol yô, a gema a kpe se iyol doo doo je”!

Kwagh ugen u a doo yô, kwaghtôvon u i tér sha mhii u kwaghngeren ne ne tese ér iorov 40 ken iorov deri ken atô u ior mba i tôv ve la nenge ér ior mba zough a msaanyol sha u eren kwagh u dedoo a mbagenev shi wasen ve kpaa. Man iorov 25 ken iorov deri di kaa ér jighjigh u nan man kwaghaôndo u eren ka kwagh u vesen u a ne ior msaanyol yô.