‘Mbaasemaleghlegh Vea Ya Dyako u Tar’ Nena?

“ALAGHGA tsô ú vande ungwan mkaanem ma Yesu ma kundunyol ma yange kaa wener ‘mbaasemaleghlegh vea ya dyako u tar’ la. Kpa ú nenge kwagh u ior mbagenev ve lu eren a tar ungun man a uumace er ve nahan ne yô, ú hen wer kanyi dyako mbaasemaleghlegh shi vea va ya sha wono?”—Mateu 5:5; Pasalmi 37:11.

Kwase Shiada ugen, iti na ér Myriam, yange yar tom a mpin ne sha u hiin iliam a orgen ken Bibilo. Or u á lam a na la kaa ér, aluer Yesu una er ityendezwa nahan yô, alaghga tar ua kuma u lun di dyako i or a ya di je, ua lu ijiir i í vihi í cii i hingir ice ga yô.

Or ne ôr kwagh ne vangertiôr kpen kpen. Kpa se mba a ityôkyaa i lun a imba ishimaveren laa? Sha mimi yô, se mba a mi, gadia Bibilo na se atôakyaa a vesen a se na jighjigh ser ityendezwa la ia kure sha mi vough yô. Jim je yô, mkur u ityendezwa la zua kôôsôô sha awashima u Aôndo a orumace kua tar ungun ne la. Shi mba kaan a vese ér kwagh u Aôndo a we ishima u eren yô, una er keng a bunde ga. (Yesaia 55:11) Nahan yô, kanyi jighilii Aôndo vande wan ishima ér una er sha ci u orumacee, man una er kwagh ne una kure nan?

Awashima u Tsôron u Aôndo a Tar Ne

Yehova Aôndo yange tema tsô gba gban tar ga, á gba ú lu sha ityôkyaa je. “Gadia kape TER A kaa ne, Un u A gbe Usha—ka Un man A lu Aôndo ye—u A maa tar man A er u kpaa la, ka Un A ver u ye; A gba u er u̱ lu gbilin dang ga, A maa u sha er ior ve̱ tema sha u: Ka Mo M lu TER ye, mô ugen ngu ga.” (Yesaia 45:18) Nahan, i gba tar jighilii sha ci u uumace ve lu sha ú yô. Heela tseegh ga, ka awashima u Aôndo u tar u lu ya u orumace gbem sha won. “U tim tar sha amagh a u, sha er u̱ de tenger mayange ga yô.”—Pasalmi 104:5; 119:90.

Kwagh u Aôndo ôr a uumace mba hiihii la kpa ka ikyav i tesen kwagh u Aôndo a we ishima ér una er a tar yô. Yehova kaa a Adam man Ifa wener: “Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” (Genese 1:28) Gba u Tar u Aôndo na Adam man Ifa ér ve nengen sha ú la ua lu ya ve kua ya u ônov vev gbem sha won. Ka nahan ve anyom nga karen uderi imôngo yô, orpasalmi ugen kaa ér: “Usha ka Usha mba TER, kpa tar yô, A na ônov mba iorov” ye.—Pasalmi 115:16.

Kwagh u yange gba u Adam man Ifa man ônov vev vea er ve, ishimaveren i kpilighyol ne ia kure sha ve yô, lu u hanmô ve nana lumun a Yehova Aôndo, Orgban man Or u Nan Uma, ér ngu Orhemen ve Uhembancii shi vea lumun u dondon atindi á na kpaa. Zum u Yehova wa or tindi ne kpa yer un kwagh môm ga, a kaa a na ér: “Hanma kon u ken sule ne, gbaa yan u tsô, kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.” (Genese 2:16, 17) Alu ka u Adam man Ifa vea za hemen u lun ken sule u Eden la her yô, gba u vea kura tindi u í na ve u taver ga shi wanger wang la. Aluer ve er kwagh nahan yô, vea lu tesen ér mba a iwuese sha hanma kwagh u Ter u sha a er sha ci ve la cii.

Shighe u Adam per tindi u Aôndo wa un man Ifa la sha apera yô, kwagh ne tese ér ve gema ijime a un u a ne ve hanma kwagh la. (Genese 3:6) Mba eren nahan yô, ya ve u lu Paradiso u doon ashe la saa, lu kwagh u mbayev vev kpa vea kera za her ga. (Mbaromanu 5:12) Ihyembeato i ior mba hiihii mban i̱ nzughul a awashima u Aôndo lu a mi ve gba tar laa?

Aôndo U Á Lu a Gema Kposo Ga La

Aôndo yange ôr kwagh sha ikyev i profeti na Malaki kaa wener: “Mo TER M gem kposo ga.” (Malaki 3:6) Orgen u timen ken Bibilo u a lu mar u tar u France u i yer un ér Louis Filion la ngur ôron kwagh sha ivur ne yô, á akaa wener ivur ne zua kôôsôô sha mkur u uityendezwa mba Aôndo. Filion nger wener: “Yehova yange ma tim ior nav  mba hembanato mbara kera, kpa un kor uityendezwa nav, nahan de ér aluer ka nyi je i̱a er kpa, una kura uityendezwa nav.” Mayange Aôndo hungur aa uityendezwa nav ga, ka una er ityendezwa a or, shin ma tar shin aluer ka uumace jimin cii je kpa ngu a nenge ér un er kwagh shami sha shighe u̱ un ver la vough. Ngu “A umbur ikuryan Na gbem,—ka mkaanem ma A kaa sha ci u ikov dubu je ra.”—Pasalmi 105:8.

Tsô se er nan ve se fa ser Yehova gema awashima na u yange lu a mi sha hiihii ve gba tar la ga? Se fa ser á gema awashima na ga, gadia í ôr ken Bibilo, Mkaanem ma Aôndo ér Aôndo wa ishima her u nan uumace mba ve ongo imo na la tar ne. (Pasalmi 25:13; 37:9, 22, 29, 34) Heela tseegh ga, Ruamabera ôr kwagh u ior mba Yehova a ver ve doo doo la ér hanmô ve nana tema bem bem “shin itine i kon u tur u nan, ma or nana kera ta ve mciem iyol ga.” (Mika 4:4; Esekiel 34:28) Mba Yehova a tsough ve yô, vea “maa uya man vea tema keregh, vea kaha ishule i ikon i wain, man vea ya atam a i.” Vea lu ken bem je a kua inyamkyume i ken toho kpaa.—Yesaia 11:6–9; 65:21, 25.

Bibilo tsenga tesen se kwagh u Aôndo a tende zwa ér una va er la sha gbenda ugen kpaa. Zum u Tor Solomon lu sha ikyôn la, tar u Iserael lu ken bem man mkpeyol. Sha hemen na la, “Yuda man Iserael ve tema doo doo, hanma or hen itine i wain i nan, man hen itine i tur i nan, hii hen Dan zan zan za ar hen Bersheba, sha ayange a Solomon la cii.” (1 Utor 4:25) Bibilo kaa ér Yesu ‘hemba Solomon,’ shi orpasalmi ngur ôron kwagh u hemen u Yesu yô, á kaa sha kwaghôron u profeti nahan wener: “Sha ayange na yô, i̱ kpe orperapera iyol, man bem a̱ ngee zan zan uwer ua kera lu ga.” Sha shighe la, “iyiav mbi̱ ngee shin tar sha ityouv mbi iwoov je kpaa, asagher a mbi a̱ hingir war war.”—Luka 11:31; Pasalmi 72:7, 16.

Imo i Yehova Aôndo ia gba ken inya ga, una nenge ér dyako i un tende zwa u nan se la ia lu tseegh ga kpa shi ia dooashe her di er yange i̱ vande lun la nahan. Mkaanem ma Aôndo kaa a vese ken Mpase 21:4 ér, ken tar u he u Aôndo a tende zwa la yô, “una ese [ior] mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” Kwagh u Aôndo á tende zwa u nan se la ka Paradiso jim jim.—Luka 23:43.

Er Se Er Ve Se Zua a Dyako U Aôndo Á Tende Zwa U Nan Se la Yô

A gema tar ne ua hingir paradiso sha ikyev i gomoti u Tartor u sha, man Yesu Kristu una lu Tor u Tartor la. (Mateu 6:9, 10) Kwagh u Tartor la ua hii eren yô, ua “tim mba ve lu vihin tar la.” (Mpase 11:18; Daniel 2:44) Nahan kwaghôron u profeti u a kaa ér: “Mseer u tarkuran kua bem vea lu a ikighir je ga” la, una kure sha Yesu Kristu, un u a lu “Wantor u Bem” la. (Yesaia 9:6, 7) Shighe u Tartor ua lu hemen la, uumace umiliôn umiliôn kua mba a hide a nder ve shin ku la cii vea zua a ian i  yan dyako u tar ne.—Yohane 5:28, 29; Aerenakaa 24:15.

Ka unô vea kuma u yan dyako u doon kpishi nee? Time ase sha mkaanem ma Yesu man ne, ma kaa ér: “Saan mba ve lu a ishima i legh legh la iyol, gadia tar ua lu dyako ve je.” (Mateu 5:5) Ikyav i ishember i ishima i legh legh shin u hiden a iyol ijime la ér nyi? Udikishenali pase ishember i ishima legh legh shin iyol i hiden a mi ijime la ér, ka u eren a or kundu kundu shin u eren kwagh akuma akuma man u lamen kpishi ga, shi taver ityou kpaa ga. Nahan kpa, ikyav i ishemberti i ken zwa Grika i í er kwagh u í heen ne za shimi hemba nahan. Takerada u William Barclay á nger i yer ú ér New Testament Wordbook la kaa ér, ishember la “ngi a mlu u eren kwagh a or legh legh, kpa dugh mlu u legh legh u ieren ne kera yô, ngi a tahav er ka iyôgh nahan.” I̱ tese mhen u or, u ngu a wase nan u wan ishima a ican a u wan kwagh ishima a orgen shin keren u oron iyev shio, man kwagh ngu a lu nahan sha ci u nan ya ikyar kangenaa vea Aôndo, nahan ikyaryan ne di ngi i gema i hingir imbor i nan nan agee.—Yesaia 12:2; Mbafilipi 4:13.

Or u nan lu a ishima i legh legh ka nan hide a iyol i nan jime nan dondo atindi a Aôndo sha hanma kwagh ken uma u nan cii; nan sendegh ér saa nana er kwagh sha mnenge u nan keng shin mbamnenge mba ior mbagen ga. Shi ka or u nan ngohol ityesen, u Yehova a fatyô u tesen nan kwagh yô. Orpasalmi Davidi lu nger wener: “[Yehova] Una hemen mbaasemaleghlegh sha u eren jighilii; Una tese mbaasemaleghlegh gbenda Na.”—Pasalmi 25:9; Anzaakaa 3:5, 6.

Nahan we ú lu ken “mbaasemaleghlegh” mba vea ya dyako u tar ne la kpa? We kpa ú fatyô u lun a ishimaveren wer, ú va ya dyako u tar u paradiso shi ú lu sha ú gbem sha won, aluer ú fa Yehova man awashima na sha u henen mkaanem nam gban uwer ga shi ú ngu eren sha kwagh u ú hen la kpaa yô.—Yohane 17:3.

[Picture on pages 4, 5]

Bem man mkpeyol u lu zum u mtemtor u Solomon la tese se ikyav i dyako i í tende zwa u nan se la

[Credit Lines]

Foto u iyôngo man igyungu i i lu ken ijime la: I zua a mi sha ikyev i Pictorial Archive (Near Eastern History) Est.; Foto u iwen i engem i ken tar u Arabia: I zua a mi sha ikyev i Hai-Bar, Yotvata, Israel; Foto u or u kahan sule: I zua a mi sha ikyev i Garo Nalbandian

[Picture on page 5]

Tar u perapera u he ngu keghen se—ú lu ker kpa?