DOOSHIMA U AÔNDO Zua Ve

KWAGH môm u yange í tím tiônnongo u Kristu ken derianyom u hiihii u Shighe Wase ne ve ior fa un a mi tseer tseer yô, lu mzough u ior mba ken tiônnongo lu a mi la, shin er ve due sha ajiir kposo kposo nahan kpaa. Ve mba shon mba ve civir Aôndo u mimi ne, ve due ken ityar i ken Ashia man Yuropa man Afrika kpaa. Shi ityom i ve vanden eren man mbamlu vev kpa lu kposo kposo—mbagenev vande lun upristi, mbagenev lu ushoja, mbagenev yô lu ikpan man mbayevese ityav, mbagenev di lu mba eren tomavee kua mbafantakerada man mbakasuav kpaa. Mbagenev lu Mbayuda, mbagenev lu Atôatyev. Mbagen kpishi kpishi vande lun mbaidyarev kua nomso mba yaven a nomso mbagenev man mbahundenmsôrom man mbaiv shin mbanumungbenda. Kpa, mba va hingir Mbakristu yô, ve undu aeren a ve a bo la, ve zua kangenaa ken jighjigh u nan môm.

Kanyi yange i wase kwaghaôndo u Kristu u sha derianyom u hiihii la ve, fatyô u kohol ambaaior ne cica cii veren ve ijiir i môm ken mzougho? Er nan ve ve lu bem bem ayol a ve man a ior mbagenev kpaa? Er nan ve ve nyôron iyol ken ayôôso a eren man num nôngon ga? Man ka nyi kwagh i̱ ne ve kwaghaôndo u Kristu  u ngise la á kaha kposo a ukwaghaôndo mba vesen mba sha ayange a ase ne yum nahana?

Kanyi Yange i̱ Zua Mba ken Tiônnongo Ve Lu Imôngo?

Mbananjighjigh mba sha derianyom u hiihii la lu ken mzough sha ci u Aôndo doo ve ishima. Mbakristu mbara yange ve fa er i gbe kpee u Yehova, Aôndo u mimi una doo ve ishima a ishima ve cii man a uma ve cii man a mfe ve cii kpaa yô. Ikyav i tesen yô, í tindi Peteru, un u lu Oryuda la ér á za ortyôtyev ugen inya, man sha ieren i Mbayuda yô, yange ma za ikyua a or ne ga cii. Kpa er Yehova doo un ishima yô, dooshima ne mgbegha un nahan a za ityom ne. Peteru man Mbakristu mba ngise mbagenev lu ikyua a Aôndo, gadia ve fa Un sha mimi je, ve fa akaa a sha ishima na man aa sha ishima na ga la kpaa. Mbacivir Aôndo cica cii va mase kaven er Yehova a soo ér ve̱ ‘zua ve̱ lu ishima i môm man mhen môm kpaa’ nahan.—1 Mbakorinte 1:10; Mateu 22:37; Aerenakaa 10:1–35.

Shi jighjigh u Mbakristu na Yesu Kristu la kpaa lu kwaghgen u seer zuan ve imôngo yô. Ve soo ér vea dondo un sha mimi. Gadia á wa ve tindi ér: “Doo nen ayol a en . . . er ne doom ishima nahan . . . Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:34, 35) Gba u dooshima ve ne una lu sha ikparashe ga, kpa una gema a lu dooshima u or nan iyol i nan. Nahan kanyi ia gema a due ken dooshima ve nee? Yesu er msen sha ci u mba ve na un jighjigh la wener: “M eren msen . . . sha u ve cii ve̱ lu kwagh môm, er We Ter, U lu ken a Mo, Mo kpaa M lu ken a We nahan, sha u ve kpaa ve̱ lu ken a vese.”—Yohane 17:20, 21; 1 Peteru 2:21.

Yehova yange haa mbacivir un mba mimi mbara icighan jijingi na. Jijingi ne wase ve ve lu ken mzough. Shi á wase ve ve kav atesen a Bibilo aa atôônanongo cii lumun a mi la. Mbacivir Yehova cii lu pasen loho môm—loho shon yô lu mtsegh u Tartor u Mesiya ua tsegha iti i Yehova la, Tartor shon u ú lu gomoti u sha, u̱ una hemen orumace la. Mbakristu mba tsuaa mbara fa ér gba u vea lu ior i “tar ne ga.” Ka nahan ve, Mbakristu waan ave sha ayôôso a ior eren shin ityav mbi ior nôngon la ga ye. Ve lu bem bem a ior cii.—Yohane 14:26; 18:36; Mateu 6:9, 10; Aerenakaa 2:1–4; Mbaromanu 12:17–21.

Mbananjighjigh cii lu nôngon sha er bem a̱ lu yô. Ve lu nôngon nena? Yange gba u vea nôngo á eren akaa a Bibilo i̱ tese la. Ka nahan ve apostoli Paulu nger Mbakristu wener: ‘Ve̱ er tseor la kera u a lu sha inja i zende u tsuaa la’ ve̱ gema ve̱ “haa . . . orhe iyol” ye.—Mbaefese 4:22–32.

Ve Za Hemen u Lun ken Mzough

Sha mimi yô, mbananjighjigh mba sha derianyom u hiihii la lu a mbamyen shi ashighe agen je yô akaa yange a er ve a karen mzough ve la. Ikyav i tesen yô, Aerenakaa 6:1–6 pase ér ayôôso lu Mbakristu mba ve lu Mbayuda mba ken Mbagrika la aa Mbakristu mba ve lu Mbaheberu la. Gadia mba ve lu Mbayuda mba ken Mbagrika la nenge ér i wa ve ikyo ga. Kpa er mbaapostoli mba ongo kwagh ne yô, maa ve er kwagh sha mi fese, a msange shio. Shi ayange nga kar yô, anyiman mough sha kwagh ugen u i lu sendegh ér mba ken tiônnongo u Kristu mba ve lu Mbayuda ga la ve eren yô. Nahan í tema í kure kwagh la vough, hanma or kpa yem a ahan zwa.—Aerenakaa 15:1–29.

Akav a tesen angan cii tese se ér tiônnongo u Kristu u sha derianyom u hiihii la de ér anyiman a va ve a mpav, kweior u ngun u lu kwagh u ú, u ngura ú lu kwagh u ú ga, shin hanma or nana kôr ityesen i nan gbang gbang nana lu a mi ga. Er nan ve kwagh lu nahan ga? Sha ci u Mbakristu mba tsuaa mbara lu eren akaa a van a mzough, inja na yô, Yehova doo ve ishima shi ve na Yesu Kristu  jighjigh shi ve doo ayol a ve, ve tangen iyol ga shi ve lumun ér icighan jijingi a̱ hemen ve, shi ve cica cii ve lu a mkav môm u atesen a Bibilo, shi ve waan iyol ve keghen a kegh u sôron anza ve kpaa, nahan akaa ne cii kange ve gbang gbang ve lu ken mzough, ve lu bem bem ayol a ve.

Sha Ayange Ne Kpa Ior Mbá Civir Aôndo ken Mzough

Ior vea fatyô u lun ken mzough imba la nahan nyian kpa? Akaa a yange zua Mbakristu mba tsuaa mbara aa fatyô u shi zuan ior mba ken kwaghaôndo môm hegen kpa? Aa fatyô u wasen ve vea lu ken bem a ior mba kwavyolough ugenegh sha tar jimin cii kpa? Een, aa fatyô! Mbashiada mba Yehova mba ken mzough a anmgbianev vev mba ve lu ken ityar je i hembe 230 sha tar jimin cii la. Man ka akaa shon a yange zua Mbakristu mba sha derianyom u hiihii la ve kpa a zough ve ye.

Kwagh u vesen u á wase Mbashiada mba Yehova ve ve lu ken mzough yô, ka mne u ve ne ayol a ve sha ci u Yehova Aôndo la. Kwagh ne inja na yô mlu ve ka una lu nan nan kpa ve shi nôngon ér vea tile sha mimi sha ishigh nagh. Yesu Kristu kpaa Mbashiada mba Yehova na un jighjigh, shi ve lumun atesen a na la kpaa. Mbananjighjigh a ve imôngo doo ve ishima sha mimi shi mba pasen ior loho u dedoo u Tartor u Aôndo la zwa môm ken ityar i ve lu ker cii. Saan ve iyol kpishi u ôron ior mba ken ukwaghaôndo mbagenev man mba ken akuraior kposo kposo kua ityar man iniongo kposo kposo kwagh u Tartor shon ne. Shi Mbashiada mba Yehova mba we ave sha akaa a taregh ga, nahan kwagh ne wase ve yô akaa a orumace a lu a mpav sha mi kpishi, er pati u eren man aeren a ityôô man mlu u ior man kasua nahan la vihi mlu ve ga. Mbashiada cica cii mba eren akaa a van a mzough sha m-er u ve lu eren atindiakaa a Bibilo la.

Mzough Ve La Ngu Urugh Mbagenev

Ashighe kpishi mzough u Mbashiada ne ngu a urugh ior a va a ve ken nongo ve. Se tese ikyav sha kwase ugen, mba yer un ér Ilse, * un ngise lu kwase tseghan u ken côôci i Katoliko, eren tom ken iyaagh ki côôci la ki gen ken tar u Jamani. Kanyi yange i doo un ken Mbashiada mba Yehova ve hingir or ve? Ilse kaa wener: “Er i gbe je m ngu a nenge a ior ve doo inja er ve nahan ga. Mba nenge ityav ga; mba bul or kpaa ga. Ve soo ér vea wase ior ve̱ ya dyako u paradiso u Tartor u Aôndo ua va a mi shin tar ne la, ve̱ tema ker saan saan.”

Ikyav i tesen igen yô, ka orgen u í yer un ér Günther la, un lu orshoja u tar u Jamani u í tindi un ityav ken tar u France shighe u ityav mbi tar cii mbi sha uhar la. Iyange igen yô, pastô u côôci i Protestanti igen lu eren kwe shojaa u Günther kpa lu ker la adua. Pastô ne sôn Aôndo ér a̱ ver ve doo doo, a̱ kura ve shi a̱ na ve mhembe kpaa. Mba been adua yô, Günther yem za tile kura mape. Á wa ajingi a na a nengen akaa ken ica la, tsô á nenge mbaihyomov vev haa keela gbir gbir pastô ugen di lu eren ve adua. Ayange nga va kar yô, Günther ôr kwagh kaa wener: “Beem keng er pastô ugen la kpa lu sônon Aôndo ér a̱ ver ve doo doo, a̱ kura ve shi a̱ na ve mhembe nahan. Taver mo kpishi, m fa er i hii ve Mbakristu lu vegher ne man vegher la, lu nôngon ityav ayol a ve ga.” Kwagh u yange er ne lu Günther ken ishima her zan zan. Nahan va zough a Mbashiada mba Yehova, mba ve nenge ityav ga la yô, maa a nyôr nongo ve u ú tser tar jimin cii ne.

Orgen mba yer un ér Ashok vea kwase ugen, iti na ér Feema, yange ve eren kwaghaôndo ugen sha Ityoughkitaregh. Ve maa iyou i cuku hen ya ve, i̱ ve civir an-aôndo ugen ker yô. Kpa er tsombor ve va ya ican a icôron uange igen yô, maa akperan hii u lun ve sha kwaghaôndo ve la. Ashok man Feema lam a Mbashiada mba Yehova, nahan atesen a Bibilo a í ôr ve la doo ve, shi dooshima u Mbashiada ve lu a mi la kpa doo ve. Nahan ve hingir mbapasenkwagh u Tartor u Yehova sha gbashima hegen.

Ilse man Günther man Ashok man Feema cii ve zua vea anmgbianev vev mbagenev mba ve lu Mbashiada mba Yehova umiliôn umiliôn tar sha won jimin cii la. Ve na ityendezwa i Bibilo i̱ er ér akaa shon a a zough Mbashiada nyian ve ve lu civir Aôndo imôngo la, ica a gba ga tsô aa zua uumace mba ve ongo imo i Aôndo la cica cii. Nahan ior vea kera eren akaa a vihin a mbagenev ken iti i kwaghaôndo shin akaa a van a mpav ga. Tar jimin cii ua lu ken mzough, ior cica cii vea lu civir Yehova, Aôndo u mimi.—Mpase 21:4, 5.

[Footnote]

[Pictures on pages 4, 5]

Mbakristu mba tsuaa mbara lu ken mzough shin er ve due sha ajiir kposo kposo nahan kpa