Magdalena Pase Mba Á Lu Klase Môm a Ve La Atesen a Bibilo

ÚSOO wer ú pase mbakov wou mba ne lu klase môm la atesen a Bibilo a ú ne jighjigh a mi la ve̱ fa á doo doo kpa? Magdalena ka iniunkwase i ken tar u Poland i lun anyom 18; ze kôleeji, shi er á lu Orshiada u Yehova yô, ngu a zer pasen mbayevmakeranta mba ve lu klase môm a na la jighjigh u nan na. Nahan ka ve saa pinen un mbampin kposo kposo, inja er, ‘Aluer or ngu Orshiada u Yehova yô, kanyi akaa nahan nana erenee?’ ‘Ne na Yesu Kristu jighjigh kpa?’ Nahan yô una pase mbakov na mban akaa ne nena? Magdalena er msen hen Yehova ér a̱ wase un, maa á er tom sha kwagh u á sôn Yehova la.—Yakobu 1:5.

Iyange igen yô, Magdalena kaa a tica na ugen u á ongo loho na yô wener, una lumun yô a̱ na un ian una tese klase jimin cii tser u vidio u i yer ér Jehovah’s Witnesses—The Organization Behind the Name la. * Tica ne lumun. Magdalena maa ôr mba ken klase na cii wener: “Me lu van a ijende yam igenegh a̱ va tema imôngo a ven er miniti 90 nahan. Una tese ne tser u vidio ugen shi una ôr ne kwagh u Mbashiada mba Yehova kpaa. Ne soo ner á va lam a ven kpa?” Ve lumun kioo. Nahan Magdalena man Wojciech, orpasen ivangeli hanma shighe u á tse ken tom shon yô, gba wan agoyol a teman imôngo ne.

Ve washima ér vea hii imôngo ne sha kwaghôron u á kom miniti 20, u una har sha antakerada u a kaa ér Mbashiada Mba Yehova—Ka Unô Ioro? Kanyi Ve Ne Jighjigh a Mini?* la; vea been kwaghôron yô maa vea na ve ian i pinen mbampin, ve di vea nan mbamlumun sha mi. Vea been yô, vea tese tser u vidio la ken iyou i makeranta u koson ityakerada ker la. Vea na hanma wanyemakeranta u nana va la cii iyua—inja na yô vea wa antyakerada kpuaa kua takerada u i yer ér Questions Young People Ask—Answers That Work,* la man ikyatakerada man umagazin kpaa ken imbyulugh u vesen, vea na hanma ve.

Iyange shon kom yô, mbayevmakeranta 14 mba ve tem klase môm a Magdalena kua tica shon u á na un ian ér a̱ tese tser u vidio la man mbayevmakeranta mbagenev 4 mba ve za takerada u ôron ken iyou i koson ityakerada shighe u imôngo shon la cii tema imôngo ne. Wojciech maa gba mi pasen ve er mbadughunatsam man mbangeren akaa mba ken tar u Poland mbagenev ve yer iti i Yehova ken atsam a ve man akaangeren a ve kpaa yô. Shi á ôr er í nger iti i Aôndo ne ken Katekisema mbatsev mbatsev mba kwaghaôndo u Katoliko kpaa yô. Been yô, maa á pase ve tom u Mbashiada mba Yehova ve eren sha ayange ne yô, á tese ve ufoto mba ubranci vev kposo kposo man mba Ayou ve a Mkohol kpaa.

Kur kwaghôron yô man hanma or gba wan zwa sha akaa a á ôr ve la. Nahan Magdalena man Wojciech gba bughun Bibilo nan mbamlumun vough vough sha mbampin mba i lu pinen ve la. Kwagh ne doo mbayevmakeranta mban kpishi, nahan ve cii ve lumun ér mimi yô, Mbashiada mba Yehova mba pasen ior akaa a ken ityough vev ga. Ka mbampin mbagenev mba nyi nahan í pine ve? Ve di ve na mlumun sha mbampin mban nena?

Mpin: Bibilo ôr akaa kpishi a a wanger ga yô, shi i̱ ôr anzaakaa kpa kpishi, nahan hanma or nana fatyô u pasen akaa aa i̱ er ne sha mnenge u nan. Sha mimi yô, ma or nana fatyô u eren akaa a Bibilo i tese la je kpa?

Mlumun: Mbagenev kaa ér Bibilo ngi er ka gbande u or nana fatyô u kuhwan amar a nan soo cii a mi nahan. Kpa hen nen ase sha kwagh ne: Aluer or  nger kwagh man ú fa kwagh shon ga nahan, a lu ú pe zuan a iwanger yô, hemba doon u ú pine nan ga zee? Uumace ka ve nger ityakerada, ve kar ve kpe, kpa Yehova Aôndo, u i lu un je á nger Bibilo la yô ngu uma her. (Mbaromanu 1:20; 1 Mbakorinte 8:5, 6) Ivur Bibilo i̱ gbe tilen kwagh u i̱ tswen ga, ngi i lu a avur agen a a kase i̱ keng, nahan avur ne nga a wase se u fan kwagh u ivur shon i lu ôron jighilii yô. Bee kera yô, ashighe kpishi Bibilo ngi i ôr kwagh môm tseegh ajiir imôngo, nahan aluer se tôô avur kposo kposo a a er kwagh shon se kar á se nenge yô, kwagh ne una wase se. Aôndo una wase se se zua a mkav, a lu inja vough er á tema a vese ngu pasen se ruamabera nahan. Aluer se er nahan yô, se fa ishima na shi se er i̱ er Bibilo i tese se nahan, shin ka nahan ga?

Mpin: Kanyi i lu mkposo u Mbakristu man Mbashiada mba Yehova?

Mlumun: Se mba Mbakristu! Mbashiada mba Yehova mba sengen a senge sha ikpazwa ér ve mba Mbakristu ga, kpa mba nenge kpoghuloo u eren sha jighjigh u nan ve man sha akaa a Aôndo a lu tesen ve sha ci u iwasen ve la kpaa. (Yesaia 48:17, 18) Er atesen a ve cii a har sha Bibilo yô, ve fa ér ka ve ve lu a mimi ye.—Mateu 7:13, 14, 21–23.

Mpin: Er nan ve ka ne kohol or, fan kpa ne fa nan ga ve ne gba sendegh ér ne lam a nanaa? U eren kwagh nahan ka u kighir a kighir mbagenev ér ve lumun atesen a en ga zee?

Mlumun: Ne hen ner aluer ne mba zan mape angahar maa or va kohol ne sha godobi lam a ven sha icivir, pine ne mhen wen sha ma kwagh nahan ka kwaghbo je nan er ye shinii? (Yeremia 5:1; Sefania 2:2, 3) (Wojciech man Magdalena maa mough sha tese ve ikyav er yange ve tile sha godobi ve lu pinen ior mhen ve sha kwagh u ura u ú sember nôôn kuan ior akaa kpishi ken tar u Poland la, vea nenge ér Aôndo wa ior mba mngerem kua ve akaa la ikyo shin á wa ve ikyo ga yô.) Yange sea pine or kwagh nana ôron se mnenge u nan cii yô, maa se bugh Bibilo se ôr nan. Kpa aluer nan soo u lamen a vese ga yô, se kaa a nan ser saa shighe ugen, maa se yem ayasegh. (Mateu 10:11–14) Nahan kpa ka u kighir or ér nana lam a vese laa? Shin ne nenge ner, ior ve de lamen ayol a ve?

Mpin: Er nan ve ne eren uiniongo mba memyol mba ior ve eren la ga?

Mlumun: Ka iniongo i Bibilo i kaa ér se umbur la tseegh se umbur ye—ka M-umbur u ku u Yesu Kristu je la. (1 Mbakorinte 11:23–26) Aluer ne soo u fan ape uiniongo mba memyol mba ior ve eren la ve dugh ityô yô, nenge nen uzege mba ityakerada mba pasen asemberakaa mba i yer ér encyclopedia la kua ityakerada igen i i er kwagh u uiniongo mban sha mimi yô. Nahan ne mase fan er i hii ve se eren uiniongo mban ga yô.—2 Mbakorinte 6:14–18.

Yange ve pine mbampin mbagenev kpaa kpishi shi í na ve mbamlumun sha mi cica cii. Iliam ne i lihe gôgônan je yô maa í kera tese tser la sha iyange la ga, í ver iyange igen.

Mbayevmakeranta mban ungwa akaa ne nahan ve er nena? Magdalena kaa wener: “Mbayevmakeranta mbagenev mba ka ve hiin mo a hii shi ve nahan mbagenev tar je kpa pine mbampin mba dedoo, nahan kpiligh mo iyol kpishi. Kera yô, mba kaan ér Aôndo ngu ga, kpa zum u se tema imôngo a ve la ve ôr akaa a tesen ér ve na Aôndo jighjigh!” Ve cica cii ve ngohol iyua i í na ve la saan saan—í na ve ityakerada 35, man antyakerada 63 kua umagazin 34.

Sha kpôô yô, imôngo teman i ken makeranta ne ume atam a dedoo kpen kpen! Imôngo ne wase mba Magdalena a tem klase môm a ve la, ve seer fan Mbashiada mba Yehova, kpa lu cii la ga, í wase agumaior ne kpishi u henen sha ityôkyaa í ve lu uma yô. Nahan we kpa, ú nenge wer hemba doon u ú seer tan mba ve lu klase môm a we la iwanger sha kwagh u jighjigh wou u nan la ga he?

[Footnote]

[Picture on page 31]

Magdalena man Wojciech mba wan agoyol sha kwagh u vea za ôr yô