Inja i Dedoo Ngi i Na Ityesen i Aôndo i Hingir Kwagh u Hweegh

MARIA ka gumkwase u ken gar u Kransnoyarsk ken tar u Russia. A fa atsam a wan kpishi, je yô tica na yange wa un iti ken mbaatsamev mba makeranta u Maria zaan la. Maria nengen nahan yô maa á mough á za kohol tica na ugen á pase un sha icivir wener una fatyô u wan atsam agen ga. Sha ci u nyi ve ôr nahana? Sha ci u jighjigh u nan na u a har sha Bibilo la lumun un u wan atsam a kwaghaôndo ga. Kwagh ne kpiligh tica ne iyol tsô a kaa ér, ‘U wan atsam wuese Aôndo kpa maa hingir kwaghbo?’

Tsô Maria maa ôr un er i hii ve aluer mba wan icam i wuese Aôndo u Mbautar ve un una wa imba icam ngira nahan ga yô. Á bugh Bibilo na á pase un er Aôndo man Yesu Kristu ve lu kposo, ve lu Aôndo môm ga yô, man er cighan jijingi di a gem a lu tahav mbu tomov mbu Aôndo yô. (Mateu 26:39; Yohane 14:28; Aerenakaa 4:31) Maria kaa nahan wener: “Er yange kwagh ne er nahan je kpa, tica la tswamem ga. Atica a hen makeranta wase kpishi doo inja kpen kpen. Nga soon ér se eren ku ku ku sha kwagh ga.”

Sha shighe u Maria lu henen makeranta la cii, atica na man mba ve nyer klase môm a na la za hemen u nan un icivir sha kwagh u yange er ne. Maria kaa wener: “Akaawan a Bibilo wasem ken uma wam kpishi. Iyange i m lu been makeranta la, i nam iyua sha ci u inja yam i mimi man ieren yam i eren kwagh sha inja sha inja la. Mbamaren av kpa, makeranta nger washika sugh ve sha er ve yese wan ve u kwase tsembelee yô.”

I er Maria batisema sha iyange i Agusutu 18, inyom i 2001 la. Maria kaa wener: “Saan mo iyol kpishi er m lu a ian i civir Yehova, Aôndo u dedoo nahan!” Ikyaior i i lu Mbashiada mba Yehova sha tar jimin cii ne mba eren sha mkaanem ma ma lu ken Titu 2:10 la, ijiir la kaa ér: “Hingir kwagh u hweegh sha ityesen i Aôndo Oryiman wase sha akaa cii.”

[Picture on page 32]

Maria man mbamaren nav shighe u á er batisema la

[Picture on page 32]

Washika u iwuese man Takerada u tesen ér or ngu a inja i dedoo