Num-zwaa Er Nan Ve U Lu Kwaghbo?

“Ka han man ityav mbi dugh ken a vene? Man shi ka han man iniumsuwen kpaa i dugh hen a vene?”—YAKOBU 4:1.

 LU AKUMAUTYA a Mbaroma a á lu nôngon ityav la, Yakobu, un u lu môm ken mba ve nger Bibilo la pine á kwagh ga; shi lu tôvon una fa er i hii ve Anomaior a Mbayuda a sha derianyom u hiihii S.W. la lu nôngon ityav ga. Kpa lu ôron kwagh u ayôôso a hen atô u iorov kpuaa, er iorov uhar nahan. Er nan ve kwagh gba un sha ayôôso angan nahana? Sha ci u iyongo i̱ lun a or ka kwaghbo di er ityav mbi nôngon nahan. Nenge ase ikyav i kwagh ne sha akaa a ken Bibilo ne.

Ônov mba tertamen Yakob yange ve kôr anngô ve Yosev ihyom, tsô ve tee un ken kpan. (Genese 37:4–28) Shi ka tse yô, Tor Saulu soo u wuan Davidi. Sha ci u nyi? Sha ci u Davidi nyian un ishima. (1 Samuel 18:7–11; 23:14, 15) Ken derianyom u hiihii la kpa, kasev Mbakristu mbagenev uhar, Yuodia man Suntuki lu iyongo ayol a ve, je yô bem kera fa lun ken nongo u Kristu ga sha ci u iyongo la.—Mbafilipi 4:2.

Ken ashighe a a sember karen la, iyongo ia zua orgen a orgen yô, nan tsuwa ihô shin nan tôô gbuuka a nan. Ashighe kpishi ayôôso ne a kure ken ku or shin i vihi or iyol kehelee je nan gba iwan. Kpa ayange ne yô, ior mba hembe nôngon num-zwaa. Shin er num ne ú hee or awambe inya ga nahan kpa, ngu ve a ishima yuan kpishi, shi ngu panden or iciviryolough. Ka mba ishôôgh ve hembe yan ican ken imba ‘uitya’ ngin nahan ye.

Nenge ase ikyav sha kwagh ugen u a er anyom a karen ken ijime la. Pastô ugen ken côôci i Anglican wa ugen kwagh iyol ér á ya inyaregh ki côôci. Kwagh ne va ve a ayôôso je ayôôso ne due tembe, iyouadua i ve hemen i la kpa pav ker. Mbagenev de zan adua sha ayange a i we pastô u ve ker un ihyom la adua yô. Ken masejime yô, vea za adua kpa i lu kwagh u or a lam a orgen ga. Ka ze deghôô yô, ayôôso ne gba kera, gadia pastô u kaa ér ugen la ya inyaregh ki côôci la un kpa i kaa ér a er idya.

Bishôp u vesen u ken gar u Canterbury ken tar u Ingila zamber a upastô mban ér ve hime iyongo la. Á yila num-zwaa ve la ér ka “kyansa,” shi á kaa ér ka “kwagh u van a aheen sha iti i Ter Wase.” Ken inyom i 1997 la pastô môm ken upastô mban mem tom. Ugen la mem ga zan zan anyom a na a memen tom kar kuman. Nahan kpa lu sha iyangemar na, ken uwer u Agusutu 7, 2001 la mem tom ye; lu anyom 70 sha iyange la. Pipaabaver i í yer ér The Church of England Newspaper la kaa ér iyange i pastô ne mem tom la lu iyange i iniongo i “Orjighjigh” Victricius. Ka an nan lu “Orjighjigh” Victricius? Un lu bishôp u ken derianyom u sha unyiin la; í kaa ér yange i gbidye un kpishi sha ci u á venda u nyôron shoja zan ityav yum. Pipaabaver ne pase mkposo u inja i orjighjigh ne a inja i pastô u mase memen tom ne, ér: “A nôngo num-zwaa ken iyouadua je a wa ikyo ga.”

Lun er upastô mban er sha kwaghwan u ken Mbaromanu 12:17, 18 la yô, iyongo ma lu ve ga shi ma ve nyôr a mbagenev ken iyongo ve ne kpaa ga. Ijiir la kaa ér: “De oron iyev i ifer sha ifer ga. Ver nen ishima u eren akaa a dedoo sha ishigh ki ior cii. Aluer a fatyô yô, lu nen bem a ior cii ape kwagh wen a lu sha mi la.”

We di ye? Or ka nana hii ú yô, ishima ka i vihi ú ker ú gba zôhôn tuhwan nan na? Shin ka ú ôr kwagh a nan kundu kundu shi ú kegh iyol u himen iyongo shono? Ka wea er or kwagh yô, ú gba palegh nan henen ken ishima you wer, kwagh shon una hungur nan tsô iyongo la ia kuree? Shin ka u zamber a nan fese wer nana ya ú anyi? Aluer ka we ú lu zamber or wer nana ya ú anyi, shin ka we ú ye or anyi kpa, kohol cii yô, aluer ú ngu keren bem yô, ú zua a mkpeyol. Iyongo i i lu se a orgen ica i gbe je kpa, Bibilo ia wase se se hime i̱.