Ibaver I Mbayôôn Tartor

Washika u Alejandra Nger La

WASHIKA U NGEREN ior ka gbenda u dedoo u pasen ior kwaghaôndo ica i gba hegen. Shin er ashighe agen ka a nger or washika kpa í fatyô u fan kwagh u una due ker jighilii ga nahan kpa, mba ve ze hemen u yaren tom a gbenda u pasen ior kwagh ungun ne cii iniôngon ve la ngi umen atam a dedoo. Ve mban cii mba eren tom sha kwaghwan u injaa u Bibilo i we se ne, i̱ kaa ér: “Lôô ivor you pepe, man aikighe kpaa de hiden a uwegh ou ga; gadia u fa i ia doo la ga, shin ka ngin shin ka ngira, shin ihiar cii ia doo u.”—Orpasenkwagh 11:6.

Alejandra ka gumkwase Shiada u a eren tom ken afishi a Mbashiada mba Yehova ken tar u Mexico i kom anyom pue hegen yô. Yange lu a angev mbu kyansa, nahan i lu eren un twev ken iyouci igen. Kpa angev mbun lu hemban gban a gba kera cii, nahan kera fantyô u eren kwagh môm ga. Kpa er Alejandra soo wener una hungur a tom na u pasen ior kwagh la ga yô, á gba mi ngeren uwashika hen ior kposo kposo. A pase kwagh u gbenda u i sôr i ver u henen Bibilo a ior ken uyaav vev gbilin la ken uwashika mban, shi á nger namba u telefon u ngô na kpa keregh. Been yô maa á kura ve cii á na ngô na ér a̱ gbihi sha uya mba or lu hen ya shighe u á dugh kwaghpasen ga la.

Hen shighe shon la, gumkwase ugen ken tar u Guatemala, mba yer iti na ér Diojany, lu za wasen orgen vea kwase na ken gar u Cancún ken tar u Mexico. Er lu ken gar ne la, Mbashiada mba Yehova va pase un kwagh, tsô maa a gba henen Bibilo a ve saan saan je. Ayange nga kar yô, or u Diojany lu sha ikyev na la vea kwase na cii soo u moughon yemen twev ken gar u Mexico City, nahan ve soo ér Diojany kpa a yem a ve imôngo. Kpa wankwase ti soo ga, sha ci u aluer un yem a ve yô, una de henen kwagh a Mbashiada.

Kpa orvesen na la vea kwase na, kaa a na ér: “Ishima i de ze ú iyol ga, Mbashiada mba hanma ijiir cii. Se za sôôn a sôôn ken gar u Mexico City nahan maa se tôv ve ityô je.” Mba er nahan yô, ishima maa gba Diojany shimi, tsô á yem a ve imôngo. Mba za nyer ken gar u Mexico City la yô maa ve gba keren Mbashiada ityô fele fele je. Kpa kwagh ngu a er yô, ve zua a Orshiada môm ga, shin er Mbashiada lu ken gar la je hemba iorov 41,000 shi ve lu a atôônanongo ker je kuma 730 nahan kpaa.

Ishima maa gba zan Diojany iyol, gadia lu zuan a Mbashiada sha er una hide a hii Bibilo i henen a ve ga. Iyange igen yô, kwase u orvesen na yila un kaa ér: “Kwagh er u doon ve! Aôndo wou ungwa mbamsen ou.” Er nahan yô, maa a gema washika a na Diojany, tsô á kaa ér: “Ka Mbashiada ve tindi ú a washika ne ye.” Washika shon ne lu Alejandra nger un ye.

Tsô maa Diojany za ngô u Alejandra man anngô na u kiriki Blanca inya, tsô ve hii Bibilo i henen a na. Usati mba kar kpuaa yô, á kohol Alejandra iyol na, á tema a na ve lam gbem. Alejandra taver un ishima ér a̱ za hemen u henen Bibilo her sha er una zua a mzehemen ken jijingi yô.

Iwer ngi kar kpuaa, ka kom uwer u Julai inyom i 2003 la yô maa Alejandra saa ku; á ver mbananjighjigh a na imôngo ikyav i dedoo i sha kwagh u jighjigh u nan man ishimataver kpen kpen. Iyange i í lu iin un la, Diojany ôr kwagh u kôr ior kpishi sha mtema yô, wener: “Alejandra man tsombor na verem ikyav i dedoo kpen kpen. Nahan m kange ishima hegen mer me icivir Yehova, shi me er batisema fele fele je. M ngu veren ashe keghen iyange i me nenge a Alejandra ken Paradiso la!”

Sha kpôô yô, alaghga se nger or washika una vese ga. Kpa, una fatyô u benden a uma u nan gbem sha won je!