Tar Ne Ua Lu Ken Mzough Je Kpa?

TAR NE UA LU KEN MZOUGH. Kwagh shon doo ungwan tsôô. Man ka kwagh u hanma or nan lu tômon je ne gaa? Kape i lu je la, i tume adu sha kwagh u mzough je gande ôron. Mbahemenev mba tar ne er mkohol sha kwagh ne kwa kimbir kimbir. Ken uwer u Agusutu 2000 la, mbahemenev mba kwaghaôndo mba hemban 1,000 er mkohol u keren bem ken iyagh ki Mzough u Ityar Cii ken gar u New York. I yila mkohol la er Millennium World Peace Summit. Yange ve lam sha akaa a a lu zan iyol sha tar yô. Nahan kpa, mkohol shon shi gema tese ken igbar ér kwagh nzughul sha tar gba ica. U tesen ikyav yô, mbafanatindi a Mbamusulumi tsema tsema mba ken Yerusalem venda u zan mkohol ne ér tica u Mbayuda ugen kpa ngu zan yum. Mbagenev di gba num za her ga ér i nzughul a Dalai Lama, orhemen u nongo u kwaghaôndo ugen yum. Gadia i hen ér aluer i de ikpuror ne za mkohol ne sha ayange a ahar a hiihii la yô, una va a ayôôso sha u lamen sha tar u China.

Ka ker ken uwer u Oktoba 2003 yô, ityar 21 i i kase ityeku u Pacific la nyôr idyu sha kwagh u kurayol zum u ve za mkohol u ve mba eren kasua imôngo ken tar u Thailand yô. Mba yer mkohol ne ér Asia-Pacific Economic Cooperation (APEC). Ve kaa ér vea bee a iniongo i eren ipila kera vindi vindi shi ve due a igbenda i vea seer u van a mkpeyol sha tar yô. Nahan kpa, er i lu eren mkohol zan a mi ave la je, mbagen lu gban ahon sha kwagh u orhemen tar ugen ôr sha Mbayuda la ér ngu lahan a laha kweior shon.

Er Nan Ve Mzough a Lu Ga?

Er i ndera tumen adu sha kwagh u van a bem nahan kpa, ieren yô se mba nengen a mi ga. Shin er mbakpishiv ve lu keren bem sha afatyô ve nahan kpa, er nan ve tar ne u lu ken ayôôso zan zan ken derianyom u sha 21 nee?

Kwagh u orhemen ugen ken mba ve za mkohol u APEC la ôr la war nan ikyaa sha mpin shon. A kaa wener, “Kwagh u a lu yô ior soo ityar ve ngee yum.” Uumace cii uve ityough ken ave a tan vanger aa ityar ve. Hanma nongoior man hanma zwa cii ngu keren u lun sha tseeneke u ú. Kwagh u ityar i lu keren u lun sha tseeneke u í la mough nungwa sha gesa man hua yô, kwagh er kera doo ga. Ashighe kpishi ior ka ve ver mzehemen u tar ve ken hemen u mkpeyol u tar sha won cii la.

Orpasalmi ôr kwagh u ior mba hemban soon tar ve a ityar i ior mbagenev la wener, ka “bouange u timin” ior. (Pasalmi 91:3) Kwagh ne ngu inja er ka angev mbu van ior a ican kpishi nahan. Kwagh u or soon tar u nan kpishi geman kôron mbagenev ihyom ne hii ka kwagh u nyian a mi ga. Nyian ne kpa kwagh u tar u or doon nan ishima ne ngu zan hemen u van a mpav, man mbahemenev mba tar ne kan shio u yangen kwagh ne.

 Ityar kpishi fa er mdoo u tar u or doon nan ishima man asaren a ior a ken ishima a lu amise a mbamzeyol mba tar ne yô. Ikyav i tesen yô, orvesen Thant, u ngise lu akawe u Mzough u Ityar Cii la kaa wener: “Mbamzeyol mba ka se tagher a mi nyian kpishi mba tseren se sha ci u ibumegh yasegh . . . Môm ken ve yô ka kwagh u or henen kwagh u tar u nan tseegh, ‘a lu shami shin shami ga kpaa la.’ ” Nahan cii kpa, ityar tume ityough ken asaren a ve ainge kpishi, mba keren a ker u lun sha tseeneke ve her di tsô. Mba ve lu di sha tseeneke ve la kpa soo u oghom uwegh cukuu tsô kpaa ga. Ikyav i tesen yô, ipipaabaver i i yer ér International Herald Tribune la ôr kwagh u Mzough u Ityar i Yuropa ér: “Kwagh u keren ér saa se hemba mbagen keng la ka kwagh u vesen u a lu zan hemen ken ityar i Yuropa yô, kwagh ne kua mhen u henen ér tar ugen ngu nyighen ugen la kpaa. Hegen je kpa ityar kpishi i i lu ken Mzough ne ia fatyô u den ér tar ugen u sha kov u ú u kar u hemen ú ga.”

Bibilo i i lu Mkaanem ma Aôndo la ôr kwagh u hemen u orumace shami vough nahan ér: “Or ka nana lu a tahav sha orgen yô, nan eren nan ican.” (Orpasenkwagh 8:9) M-pav u i pav tar ker avur avur ne na yô, ikweior kua ior asange asange mba nengen er kwaghôron u Bibilo a lu kuren sha mi vough yô. Bibilo kaa ér: “Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.”—Anzaakaa 18:1.

Mayange Orgban wase u a hembe fan se ne ver ishigh wener se ver ugomoti asev shin se hemen ayol a ase ga. Kpa u veren ugomoti asev la tese ér kwagh gba orumace sha awashima u Aôndo ga, shi se lumun a kwagh u i kaa ér hanma kwagh cii ngu sha ikyev na la kpaa ga. Pasalmi 95:3–5 kaa ér: “TER ka Aôndo u vesen, ka Tor u vesen u hemban mbaaôndo mbagenev ca je. Ka sha ikev Na man ajiir a zan a shin tar a lu ye; ityouv mbi iwoov kpaa ka mbi Nav je. Zegemnger ka u Na, ka Un A gbe un ye; ka ave Na man lu er tareghnyaagh ye.” Aôndo ka Tor jighilii u hanma or cii nana ver ashe a na yô. Kwagh u uumace ve lu keren ér vea hemen ayol a ve la de gema  ka ahendan jim ve lu hendan a Aôndo ye.—Pasalmi 2:2.

Kanyi i Gbe u Se Eree?

Kwagh u una na ve tar ua lu ken mzough yô ka u lun a orhemen môm u nana er kwagh sha ci u mkpeyol u ior cii yô. Ior mba kaven kwagh kpishi nenge a kwagh ne nahan. Er ve lu a mhen ne nahan kpa, ashighe kpishi ka ve yem keren bem hen ijiir i i lu shami ga yô. Ikyav i tesen yô, ior kpishi kua mbahemenev mba ukwaghaôndo je kpaa ka ve shi taver ior asema ér ka Mzough u Ityar Cii una zua tar ken mzough môm ye. Nahan kpa, mbamzough mba orumace a ver cii, vea lu a mbamhen mba dedoo nan kpa, mayange je mba a fatyô u been a mbamzeyol mba orumace ga. Kpa kwagh u mbamzough mban kpishi ve gem ve tese yô, ka m-pav u a lu hen atô u ityar wue wue la.

Bibilo ta se icin ér se de veren ishima ser ma mzough u uumace a yima se ga. I̱ kaa ér: “De suur nen sha mbatarev, sha wan u or u iwasen i lu her a na ga la ze.” (Pasalmi 146:3) Nahan se kera mba a mba ishimaverenkeghen ser tar ne ua lu a mzough imôngo je gaa? Ka nahan ga cii. Gbenda ngu.

Ior kpishi mba a fa er Aôndo a ver gomoti kera u a lu a tahav mbu zuan tar ne nahan ga. Bibilo ôr kwagh u Yehova Aôndo ér: “Mo M ver Tor Wam sha icighanwo Wam, Shion. Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je.” (Pasalmi 2:6, 8) Ú nenge yô, ivur i sha 7 la kaa ér Yehova Aôndo ‘ver tor na’ u a yer un ér “Wan Wam” la. Kwagh ne ka orgen kposo ga kpa ka Yesu Kristu, Wan u Aôndo u ken jijingi u hemban cii u a lu a tahav sha akuraior jimin cii la.

Gbenda u A Zua Tar Yô

Ior kpishi fa kwagh u tor u Aôndo a ver sha la ga. Akuraior sôghul sha mhen ve u ve henen ér ve mba a ian i lun sha tseeneke ve la. Nahan kpa, ior mba ve vende mtemtor u Aôndo kua gomoti u a ver sha la cii una tim ve kera. Pasalmi 2:9 ôr kwagh u ior mban kaa ér: “[We, Yesu Kristu] Ú her ve sha tôgh ku iyôgh; Ú hembe ve avur avur er gbande u ormaantyegh nahan.” Akuraior ne aa fa shin aa fa ga kpa nga eren akaa hegen a a yem a ve zan zan vea za tagher vanger a Aôndo yô. Takerada u masejime u Bibilo kaa ér mba kohol ‘utor mba tar sha won cii’ ijiir i môm “sha ci u ityav mbi iyange i vesen i Aôndo, Uhembanagee.” (Mpase 16:14) A tim akuraior kua mbampav vev mbara cii vindi vindi. Kwagh ne una gema a sôr gbenda sha er gomoti u Aôndo una hemen a mzeyol shio yô.

Yehova Aôndo ka Tor u Hemban sha won cii nahan una yar tom a Wan na sha u eren akaa a a na ve tar ne ua lu ken mzough yô. Gomoti u Aôndo una va a mzough u mimi shi una ver mba perapera a doo ve ishima la kpaa. Er nan u ker shighe kpeghee u er Pasalmi 72 ken Bibilo you ga? Pasalmi ne ôr kwaghôron u profeti u a pase kwagh u Wan u Aôndo una hemen ve una er sha ci u uumace yô. Ior vea nenge a mzough u mimi sha tar, man mbamzeyol vev cii vea wanger, aluer ka mbamzeyol mba mkighir a ve a mi shin ipila shin ican shin nyi i nyi je kpaa vea bee kera cii.

Ken tar u u pav ker avur avur ne, mbakpishiv hen ér imba kwagh la ia fatyô u eren ga. Aluer vea hen nahan yô, ve hen ka sha lan. Uityendezwa mba Aôndo mba bundu ga man shi vea bunde ma shighe ken hemen ga. (Yesaia 55:10, 11) Ka u pe nengen a mgem nee? Ka kwagh u ú fatyô yô. Hegen je kpa ior mba mba ve lu keghen shighe u vea nenge a mzough u mimi la yô. Ior mban due ken ityar kposo kposo kpa mba nenge num ga, gema mba a mba ken mzough hegen sha hemen u Aôndo. (Yesaia 2:2–4) Ior mban ka unô? Ka Mbashiada mba Yehova. Er nan ve u dondo ve u ze hen ajiir a ve kombo u civir Aôndo her la ga? Á doo u u lun a ior mba vea wase u ú dondo hemen u Aôndo shi ú lu ken mzough u a tsa kpa una bee mayange ga ne tsô.

[Picture Credit Line on page 3]

Saeed Khan/AFP/Getty Images

[Picture Credit Lines on page 4]

Kwase ngu vaan: Igor Dutina/AFP/Getty Images; mbagbannum sha gbenda: Said Khatib/AFP/Getty Images; umato mba num: Joseph Barrak/AFP/Getty Images