Ú Nengen Wer Ú Gba Kwagh Gaa?

HII shighe u Lena lu iyev la je, henen ér un gba kwagh ga. A kaa wener: “Zum u m lu anye la, ior ve zer kighir mo yaven a mo, kwagh ne na yô, m lu a icivir iyol cuku kpaa ga. Nahan m tôô ken ishima mer m kera ngu sha kwarkyaa ga.” Simone kpaa hen sha kwagh u yange lu iyev ve eren yô, nahan á kaa wener, “Yange i gba lun mo ken ishima dang nahan, m tôô mer m gba kwagh ga.” Ka inja er ior kpishi nyian tôô ér ve gba kwagh ga nahan, nahan ka fe saan ve iyol ga. Mzough ugen u a we mbayev mba kiriki kwagh sha telefon kaa ér, mbayev kpishi mba ve gbidi ve waya kaa ér, “ishima ka i za ve iyol kpishi sha ci u mba a icivir iyol ga.”

Mbatwerev mbagenev kaa ér ior ka ve hii u henen ér ve gba kwagh ga zum u ve nenge ér mbagenev mba eren a ve sha inja ga yô. Or nana fatyô u lun a mhen ne aluer nan ngu zeren zuan a akaa a vihin nan shin aluer mbagenev mba zeren lahan nan shin lamen  a nan dang yô. Aluer ka nyityôkwagh je i ne ve or henen ér nan gba kwagh ga kpa, mhen ne una na nana ule shin nana zua a mbamzeyol mba vihin kpishi. Kwaghtôvon ugen u i sember tôvon sha kwagh u tweregh tese ér mba ve henen ér mba sha kwarkyaa ga la mba ne ayol a ve jighjigh ga, shi mba ne mbagenev jighjigh kpaa ga, kwagh ne ka a na yô ve soo u biishi a mbagenev shin kôron ikyar a ve ga. Kwaghtôvon shon shi kaa ér, “sha nahan yô, ka ve jighilii ka ve tôô igbekera ve musan ityumnya ye.”

Bibilo kaa ér ka ior mba ‘mbamhen shin mbamzeyol ve ngee’ ve ken asema la ve hembe henen ér ve gba kwagh ga ye. (Pasalmi 94:19) Mbá henen ér mayange je vea er kwagh u dedoo sha won ga. Zum u ka vea er kwagh u shin iyol cuku maa ve yem nan iyol ve ibo je. Mbagenev ka vea wuese ve sha akaa a ve er je kpa ken asema a ve yô, ve tôô ér mba aferaior a alaghga ayange sev a hungwa a av yô, a pon aeren a ve yô. Mbagenev kpishi mba ve ne jighjigh ér ma kwagh môm u nan ve msaanyol ngu ga la ka ve nyôr iyol ken ieren i bo i vea kanshio u duen ker yô. Lena, u i vande ôron kwagh na la yange faan yan kwagh ga, sha ci u á shi henen ér un ngu a icivir iyol ga, kwagh ne na yô, zua a bo uange ne. Á kaa wener, “Yange m hen mer me fatyô u been a mbamzeyol av ga.”

Ior mba ‘mbamhen shin mbamzeyol ve ngee’ ve ken asema la vea tsa a due ken mlu la kpa? Ma kwagh ngu u una wase or u nôngon a mbamhen mbara yôô? Atindiakaa man akaawan a injaa nga ken Bibilo a a wase ior kpishi ve hembe mzeyol ne yô. Akaawan shon ka nyi man nyi, man a wase mba ve henen ér ve gba kwagh ga la u zuan a msaanyol nena? Kwaghngeren u a dondo ne pase akaawan shon.