U Ngu Jighjigh Sha Akaa Cii Kpa?
U Ngu Jighjigh Sha Akaa Cii Kpa?
“U nan lu jighjigh sha ankwagh u kiriki yô, nana lu jighjigh sha kwagh u vesen kpaa.”—LUKA 16:10.
1. Ka sha gbenda môm u nyi Yehova a lu jighjighi?
IYANGE ka ia due ia kôndon sha tembe nahan mure u ikyon i gbe la a eren nena? Mure la kpa ka a geman a iyange ityô! Kape iniôngon i uumace man uityendezwa vev kpa ve gem er ka mure je la. Kpa Yehova Aôndo yô, gem mayange ga. Orhenen Yakobu yila un ér “Ter u iwanger,” shi a kaa ér: “Un yô, ma mgem ngu ken a Na ga, shin mure u mgem tsô kpaa ga.” (Yakobu 1:17) Yehova gem ga, shi se fatyô u haren sha a na, kua sha akaa a kiriki je kpaa. Ngu “Aôndo u jighjigh.”—Duteronomi 32:4.
2. (a) Hii nan ve i doo u se tôv ayol a ase se nenge aluer se mba jighjigh yôô? (b) Ka mbampin mba sha kwagh u jighjigh mba nyi se time sha mini?
2 Aôndo nengen jighjigh u mbatomov nav nena? Nengen jighjigh ve vough er ngise Davidi kpa nenge nahan. Davidi ôr kwagh ve ér: “Ashe am aa lu sha mbamimi mba shin tar, sha u vea lu a mo imôngo yô; or u nan zenden sha gbenda u lun a acôghor a wan iyol ga yô, ka nan je nana erem tom ye.” (Pasalmi 101:6) Aeren a jighjigh a mbatomov mba Yehova la doo un ishima. Ka nahan ve apostoli Paulu nger ér: “Kwagh ugen u i veren ishima sha mi hen mbakarenkwar yô, ka u ve̱ lu ior mba jighjigh” ye. (1 Mbakorinte 4:2) U lun jighjigh la inja na ér nyi? Ka sha igbenda nyi nahan i doo u se eren kwagh sha jighjighi? Aluer se mba “zenden sha gbenda u lun a acôghor a wan iyol ga” la yô, ka mbamtsera mba nyi nahan se zua a mini?
U Lun Jighjigh Kanyi?
3. Kanyi ia tese ér se mba jighjighi?
3 Mbaheberu 3:5 kaa ér, “Mose lu ortom u jighjigh.” Profeti Mose lu orjighjigh sha nyi gbenda? Yange i kaa a na ér a tim tabernakel, í tese un hanma kwagh u una er yô, ‘Mose er er TER kaa un nahan vough.’ (Ekesodu 40:16) Er se lu mbacivir Yehova yô, ka se tese ser se mba jighjigh sha u ungwan imo na. Kwagh ne wa u tilen sha mimi hen Yehova zum u se tagher a ameen a vesen kpa ker. Kpa u ngu wer ka u tilen sha mimi zum u se tagher a ameen a vesen shi hemban a la tseegh una tese ér se mba jighjigh ga. Yesu kaa ér, “U nan lu jighjigh sha ankwagh u kiriki yô, nana lu jighjigh sha kwagh u vesen kpaa; man shi u nan lu perapera sha ankwagh u kiriki ga yô, kwagh u vesen kpaa nana lu perapera sha mi ga.” (Luka 16:10) Gba u se lu jighjigh sha akaa a i lu inja er ka a kiriki je kpaa.
4, 5. Aluer se mba jighjigh sha ‘akaa a kiriki’ yô, kwagh la una tese ér nyi?
4 U lun jighjigh sha ‘akaa a kiriki’ ayange ayange la ka kwagh u injaa sha ci u atôakaa ahar. Hiihii yô, kwagh ne ka a tese er se nengen hementor u Yehova yô. Hen ase sha ikyaa i mtil sha mimi i Adam man Ifa, uumace mba uhar mba hiihii mbara yange ve tagher a mi la. Kwagh u í kaa a ve ér ve er la lu kwagh u ganden ve tahav ken inya ga. Shin er i na ve ian i yan hanma kon u ken sule la nahan kpa, i tsegha di kon môm tseegh tsô ér ve de ye ga, ka “kon u mfe u fan kwagh u dedoo man kwagh u bo” je la. (Genese 2:16, 17) Luun er yange nom man kwase u hiihii la vea ongo imo i Aôndo yô, ma ve tese ér ve sue hementor u Yehova. Aluer se mba dondon akaawan a Yehova ayange ayange yô, se lu tesen ser se ta ikyaa a hementor u Yehova.
5 Kwagh u sha uhar yô, ieren yase sha ‘akaa a kiriki’ ia tese kwagh u se er zum u se tagher a ‘akaa a vesen’ yô. Sha gbaa ne yô, time ase sha kwagh u yange er Daniel man akar a na atar a jighjigh la, ka Hanania man Mishael man Asaria je la. Yange i kôr ve i yem a ve uikyangen ken tar u Babilon ken inyom i 617 Cii man Shighe u Yesu la. Shighe u ve lu agumaior, alaghga je yô ve lu anyom pue kar a kar tseegh la, i za ver ve ken ya u Tor Nebukadinesar. Er ve lu ken ya u Tor yô i “ver ve kwar u kwaghyan u tor hanma iyange, man u wain u á maan yô, er, i̱ tese ve anyom atar, man sha mbee u shighe la, ve̱ er tor tom.”—Daniel 1:3–5.
6. Ka ikyaren i nyi Daniel man Mbaheberu mbagen utar, mba ve lu akar a na la tagher a mi ken ya u tor u Babilono?
6 Kpa kwaghyan u tor ne, gema va agumaior a Mbaheberu a anyiin ne a mzeyol. A shi nan kpa akaayan agen a Tindi u Mose tswer kpa lu ken kwaghyan u tor na ve la. (Duteronomi 14:3–20) Alaghga yange i sôngo inyam i kwaghyan u Tor tsembelee i haa awambe inya ga, nahan yange vea ye imba inyam la yô, ma ve per Tindi u Aôndo. (Duteronomi 12:23–25) Shi alaghga yange i vande nan mbaaôndo naagh a kwaghyan shon, gadia Mbababilon yange vea tema kwaghyan imôngo yô ve vande eren nahan cii ve ve ya ye.
7. M-ongo u Daniel man akar a na a atar ungwa imo i Aôndo la tese nyi?
7 A shi nan kpa, kwaghyan u hangen lu ior mba ken ya u tor u Babilon kwagh keng ga. Kpa Daniel man akar a na kange ishima ér mayange vea hôngor ayol a ve sha u yan kwaghyan u Tindi u Aôndo tswer Mbaiserael ér ve de ye ga la ga. Kwagh ne lu ikyaa i i bende a mtil sha mimi ve man jighjigh ve hen Aôndo yô. Nahan ve sôn ér i na ve ikyayue vea yaan kua mngerem kpaa, tsô i na ve. (Daniel 1:9–14) Ior mbagenev nyian vea nenge ér kwagh u agumaior a anyiin ne er la ka kwagh u injaa ga. Kpa m-ongo u ve ungwa imo i Aôndo la tese vegher u ve tile sha ikyaa i hementor u Yehova la.
8. (a) Yange i kar jighjigh u Mbaheberu mba utar mbara sha gbenda u vesen nena? (b) Ikyaren la yange i za i kure nena, man kwagh la tese se nyi?
8 Jighjigh u Daniel man akar a na a atar lu a mi sha kwagh u lu inja er ka ankwagh u kiriki la wa ve ago iyol a wan ishima a ikyaren igen i vesen. Bugh Daniel ityough 3 nahan ôr iyol you nenge er Mbaheberu mba utar mbara yange ve venda u civir eev mbu zenaria mbu Tor Nebukadinesar ver la, nahan gba u a wua ve yô. Zum u i kôr ve i va a ve sha ishigh ki tor yô, ve kaa a na gbar gbar ér: “Aluer Aôndo wase u se civir Un la Una fatyô u yiman se yô, Una yima se ken atse a usu u yeghen ker la kua sha ave ou kpaa, tor. A lu nahan ga kpaa, fa kwagh ne, tor, sé civir mbaaôndo ou ga, man shi eev mbu zenaria mbu u ver la kpaa, sé civir mbu ga.” (Daniel 3:17, 18) Yehova yange yima ve je he? Ior mba ve kôr agumaior ne ve kende ken use la kar hia kera, kpa Mbaheberu mba utar mba jighjigh mban yô, kwagh er ve ga, benden tsô kpa usu bende ve iyol ga! Er ve vanden eren kwagh sha jighjigh yô, kwagh la wase ve u tilen dông zum u ve tagher a imeen i vesen yô. Kwagh ne tese er i doo u se lu jighjigh sha akaa a kiriki ga zee?
Se lu Jighjigh sha “Inyaregh ki Ki lu Perapera Ga” la Nena?
9. Yesu hii ôron ér nyi ve mase ôron kwagh u i nger ken Luka 16:10 laa?
9 Yesu yange hii wan mba ve lu ungwan a na mbara kwagh ér: “Kôr nen akar sha inyaregh ki ki lu perapera ga ne, sha u zum u kia kera lu ga yô, vea rumun ne ken atumbe a tsôron yô.” Been yô maa wa ve kwagh ér aluer or ngu jighjigh sha akaa a kiriki yô, kwagh u vesen kpa nana lu jighjigh sha mi. Yesu shi kaa a ve ér: “Nahan aluer ne kera lu jighjigh ga sha kwagh u inyaregh ki ki lu perapera ga la yô, ka an nana wa ne kwagh u mimi sha ikeve? . . . Ma wanye ngu u nana fatyô u eren uter uhar tom ga; gadia nana kôr ugen ihom, ugen á doo nan ishima; shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.”—Luka 16:9–13.
10. Se tese ser se mba jighjigh sha gbenda u se vihin “inyaregh ki ki lu perapera ga” la nena?
10 Zum u Yesu ôr mkaanem ma i nger ken Luka 16:10 la, lu ôron kwagh u “inyaregh ki ki lu perapera ga” la—ka akaa a se lu a mi je la. I yila á ér akaa a perapera ga, sha ci u á cii nga sha ikyev i uumace mba asorabo, hemban cii je yô inyaregh. Heela tseegh ga, or ka nana lu a isharen i zuan a inyaregh kpishi yô nan hingir u eren aferakaa. Ka se tese ser se mba jighjigh sha u vihin inyaregh yasegh sha kwaghfan. Doo u se vihin ki sha agbilinakaa ga, kpa se vihin ki sha u suen mzehemen u Tartor shi wasen mba ve lu ken ibanave kpaa. Aluer se mba jighjigh sha kwagh ne yô, se ya ikyar a Yehova Aôndo man Yesu Kristu—ve mba ve lu a “atumbe a tsôron” la. Vea nyôr a vese ken ajiir ne, vea na se uma u tsôron sha gayô ken Paradiso shin tar.
11. Hii nan ve i doo u se ôron mba se pasen ve kwagh la ser se mba ngohol iyua i suen tom u pasen kwagh u Mbashiada mba Yehova ve eren tar sha won cii laa?
11 Nenge ase kwagh u ka se na ior ian i eren zum u ka sea na ve Bibilo shin ityakerada i i har sha Bibilo shighe u se lu pasen ve loho u Tartor la. Ka se kaa a ve ser se mba ngohol iyua i suen tom u ior mba Yehova ve lu eren sha tar jimin cii la. Nahan kwagh ne a gema a na ve ian i vihin inyaregh ki ve lu a mi la sha kwaghfan. Shin er Yesu ôr kwagh u i nger ken Luka 16:10 la ver ishigh sha inyar nahan kpa, se fatyô u tôôn kwagh ne ôron sha akaa agen kpaa.
Gba u Se Lu a Ieren i Mimi
12, 13. Ka sha nyi igbenda nahan se er kwagh sha mimi?
12 Apostoli Paulu nger ér: “Se fa dedoo ser, se mba a imo i dedoo ken ishima, sar se u zenden tsembelee sha akaa cii.” (Mbaheberu 13:18) “Akaa cii” a i ter heen ne kua akaa a a gbe a zou sha inyar kpa ker. Ka sea gba injô yô, se kimbi i̱ sha shighe vough, shi kpandegh kpa se mba te sha mimi. Sha ci u nyi? Se mba eren nahan sha ci u imoshima yase, man u hemban cii yô sha ci u Aôndo doo se ishima, shi se soo u dondon akaawan a na kpaa. (Mbaromanu 13:5, 6) Ka sea nenge a kwagh u a lu u wase ga nahan, se er nena? Ka se hide a mi se na or u i lu kwagh u nan la. Ka sea pase or shon ityôkyaa i se hidi nan a kwagh u nan nahan, i lu shiada i dedoo kpen kpen!
13 U lun jighjigh sha akaa cii la wa u eren kwagh sha mimi sha ajiir a se eren tom la kpa ker. Aluer se mba eren tom sha jighjigh yô, kwagh ne una na ior vea soo u fan imba Aôndo u se civir la. Se mba eren tom sha uhwe ga. Kpa ka se gema se er tom taveraa er se mba eren u sha ci u Yehova nahan. (Mbaefese 4:28; Mbakolose 3:23) Ibaver tese ér mbatomov mba ken tar ugen ken Yuropa kpishi ka ve gba angev ga kpa ve za hen ortwer ér a na ve takerada u tesen ér ve gba angev sha er vea bunde tom yô. Kpa mbatomov mba Aôndo mba mimi yô mba nyighen ér vea bunde tom ga. Ashighe agen ka i na Mbashiada mba Yehova mzehemen ken tom sha ieren ve i mimi man tom ve u eren kpoghuloo la.—Anzaakaa 10:4.
U Eren Kwagh sha Jighjigh ken Tomshiren Wase
14, 15. Ka sha igbenda igen i nyi nahan se tese ser se mba jighjigh ken tomshiren wase u Mbakristu laa?
14 Ka se tese jighjigh ken tom u pasen kwagh u i we se sha ikyev la nena? Bibilo kaa ér: “Se naan nen Aôndo nagh ku iwuese gbem sha a Na, ka atam a ityumbujôôgh i pasen iti Na ken igbar je la.” (Mbaheberu 13:15) Gbenda u vesen u se tese jighjigh sha tom u pasen kwagh yô ka u eren u hanma shighe. Kanyi kwagh je ia na ve se de ser uwer jimin u kar a u ôron mbagenev kwagh u Yehova man mbaawashima nav ga sha wono? Aluer se mba duen kwaghpasen hanma shighe yô, kwagh la una wase se sha gbenda ugen kpaa, se seer mfe wase shi se hemba fan u pasen kwagh tsema tsema.
15 Gbenda ugen u dedoo u se tese jighjigh ken tomshiren wase yô, ka u dondon akaawan a i we se sha kwagh u tom shon ken Iyoukura shin Tom Wase ú Tartor la. Ka sea wa ago iyol tsembelee shi sea dondo igbenda i pasen kwagh i í tese se, shin igbenda igen i í zough sha mlu u hen ningir wase nahan, tomshiren wase u hemba zan ikyura ga he? Ka sea zua a or u nan tese isharen ken loho u Tartor ne nahan, se hide se za sôr nan fese kpa? Shi ka sea hii Bibilo i henen a mba ve tese isharen la nahan, se henen i a ve nena? Se mba henen Bibilo a ve nduuruu a uwegh gban shio kpa? Aluer se mba shiren tom wase sha jighjigh yô, ua va se a uma kua mba vea ungwa se la kpaa.—1 Timoteu 4:15, 16.
Lu Paleghaa a Tar
16, 17. Ka sha nyi igbenda nahan se tese ser se mba paleghaa a tara?
16 Yesu yange er msen hen Aôndo ôr kwagh u mbahenen nav kaa ér: “M na ve kwaghôron Wou, kpa tar kôr ve ihom, sha ci u ve lu ior i tar ne ga yô, er Mo kpaa M lu or u tar ne ga nahan. M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer. Ve mba ior i tar ne ga, er Mo kpaa M lu or u tar ne ga nahan.” (Yohane 17:14–16) Se fatyô u kangen ishima gbang lun paleghaa a tar sha akaa a vesen amba er u wan ave sha akaa a taregh ga, man u palegh uiniongo mba ukwaghaôndo ve eren la kua gado ve man ijimba i eren kpaa. Kpa akaa a kiriki di ye? Mase zan tar ngu nyôron a vese ken akaa angan a mfe wase shio? Ikyav i tesen yô, aluer se wa ikyo sha kwagh u iyolwuhan yase ga yô se de wuhan iyol sha icivir shin sha inja! Aluer se mba jighjigh yô, iyolwuhan yase ‘ia luun sha kwaghfan man akuma akuma kpaa.’ (1 Timoteu 2:9, 10) “Se mba nan ityôkwagh i nôngon gbev sha ma gbenda môm je ga, sha u i̱ de teren tom wase sha kwagh u dang ga yô, kpa se mba pasen ayol a ase ken akaa cii je er se lu mbatomov mba Aôndo yô.”—2 Mbakorinte 6:3, 4.
17 Er i lu isharen yase u nan Yehova icivir yô, se mba woho iyol sha inja zum u se lu zan mbamkombo mba tiônnongo yô. Man kape ka sea zaan mbamkombo mba vesen amba er mbamkohol mba kiriki man mba vesen kpa se wuha iyol je la. Doo u se wuha iyol ia zua sha kwagh u se lu eren la shi ia lu sha inja kpaa. Kwagh ne una lu shiada hen mba ve lu nengen kwagh u se lu eren la. Mbatyomov mba shaav kpa mba nengen ityom yase vough er ngise ve nengen i Paulu man Mbakristu mbagenev nahan. (1 Mbakorinte 4:9) Nahan doo u hanma shighe yô, iyol wuhan yase ia lu sha inja. Mbagenev yô vea nenge ér u lun jighjigh sha kwagh er ikyondo i huan nahan ka ankwagh u kiriki, kpa hen Aôndo yô, ka zege kwagh.
Averen a Mbajighjigh Vea Zua a Mi Yô
18, 19. Ka averen a nyi aluer se mba jighjigh yô se zua a mini?
18 I yila Mbakristu mba mimi ér “mbatomov mba mimi mba sha mrumun u sha mhôôn u Aôndo sha igbenda kposo kposo.” Sha nahan yô, mba haren “sha agee a Aôndo A ne” ve la. (1 Peteru 4:10, 11) Heela tseegh ga, er se lu mbatomov yô, i wa se kwagh sha ikyev u i lu u wase ga yô—ka mlumun u sha mhôôn u Aôndo a tese sha igbenda kposo kposo kua ken tomshiren wase kpaa la. Aluer se har sha “agee a hemban” a Aôndo a ne la yô, se lu tesen ser se mba mbatomov mba mimi. (2 Mbakorinte 4:7) Kwagh ne ka gbenda u dedoo u tsaase se sha er se fatyô u tagher a hanma imeen i ia va sha a vese ken hemen cii yô!
19 Orpasalmi yange wa icam ér: “TER, A̱ doo ne ishima, ne mba i doo Un a ven la cii; TER koson mbamimi.” (Pasalmi 31:23) Nahan se kange nen ishima se za nen hemen u tilen sha jighjigh, gadia Yehova ka ‘Oryiman u ior cii, jim yô, ka u mbananjighjigh.’—1 Timoteu 4:10.
Baver We Kpa?
• Hii nan ve i doo u se lu ‘jighjigh sha akaa a kiriki’?
• Ka nena se tese ser se mba jighjigh
sha u lun a ieren i mimi?
ken tomshiren wase?
sha kwagh u lun paleghaa a tara?
[Study Questions]
[Pictures on page 12]
Aluer se mba jighjigh sha ankwagh u kiriki yô, se lu jighjigh sha kwagh u vesen kpaa
[Picture on page 15]
“Zenden tsembelee sha akaa cii”
[Picture on page 15]
Gbenda u dedoo u tesen ser se mba jighjigh yô, ka u wan ago iyol tsembelee duen kwaghpasen
[Picture on page 16]
Iyol wuhan you man hwe wou a luun akuma akuma