Ú Zende Vea Aôndo Kpa?
Ú Zende Vea Aôndo Kpa?
“Hiden a iyol ijime er u zenden vea Aôndo wou la.”—MIKA 6:8.
1, 2. Er nan ve a fatyô u tôôn gbenda u Yehova a eren kwagh a vese la karen sha ú ormaren u a lu tesen wan u kiriki zende laa?
WAN u kiriki u henen zende kighir mough tile sha ngu kunden angahar, tsô ter na dugh ave maa un kpa nalegh ave gba tôôn angahar ér una za kôr ave a ter na la. Alaghga kwagh u wan ne a er la una lu se ankwagh u kiriki, kpa hen ngô na man ter na yô, ka ve zegekwagh u nan ve ishimaveren. Mbamaren mban mba veren ashe keghen shighe u vea hii u duen zende vea wan ve yô. Shi mba veren ishima ér vea kura wan ve shi vea wase un sha igbenda kpishi zan zan una kar ganden or.
2 Kape Yehova Aôndo kpa kwagh u ior nav mba shin tar la a gbe un ishima je la. Sha shighe ugen la a ôr kwagh u ior nav Iserael shin Eferaim ér: “M tese Eferaim u zenden, M kôr ve sha ave Am . . . M urugh ve sha kor u or sha ikangenev mbi dooshima.” (Hosea 11:3, 4) Yehova pase iyol na heen ér un ngu Ter u lun a dooshima u a tesen wan na u kiriki zende yô, nahan zum u wan la a gbe yô ka un kôr un, un wa shin ikyum. Yehova, Ormaren u hemban cii la wa iyol kegh kegh u tesen se er se zende yô. Shi doo un u lun vea vese er se lu vesen la. Er ivur Bibilo i kwaghhenen ne a har sha mi la i kaa nahan, se fatyô u zenden vea Aôndo! (Mika 6:8) Kpa u zenden vea Aôndo la inja na ér nyi? Hii nan ve i gbe u se zenden vea naa? Se zende vea Aôndo nena? Man ka averen a nyi se zua a mi sha u zenden vea Aôndo? De se time sha mbampin mba unyiin mban sha adondo adondo.
Inja I u Zenden vea Aôndo Ér Nyi?
3, 4. (a) Hii nan ve gbenda u i er kwagh u zenden vea Aôndo la u lu sha injaa? (b) Inja i u zenden vea Aôndo la ér nyi?
3 Orumace u iyol i inyam man awambe nana fatyô u zenden vea Yehova kpôghôô ga, gadia un ka jijingi je. (Ekesodu 33:20; Yohane 4:24) Nahan Bibilo ka ia ôron kwagh u orumace ngu zenden vea Aôndo yô, i lu sha injakwagh. Gbenda u i̱ er kwagh u zende u orumace vea Aôndo la doo kpen kpen, sha ci u aluer or due han han shin nana lu uma sha hanma shighe cii kpa nana kav injakwagh ne. Gadia ka hanma ijiir, shin ka hanma shighe je a ôr kwagh u iorov uhar mba ve lu zenden imôngo ve ior a fa ga? Injakwagh ne tese mlu u kundu kundu man u kôôsôô, shin kape i lu la ga? Imba mlu u kundu kundu man u kôôsôô ne wase se u kaven inja i u zenden vea Aôndo la. Nahan se time sha kwagh u a lu u zenden vea Aôndo jim jim yô.
4 Umbur mbajighjigh er Enoki man Noa nahan. Hii nan ve i kaa ér ve zenden vea Aôndo? (Genese 5:24; 6:9) Ken Bibilo yô, ishember i “zenden” la, ashighe kpishi ka i lu u dondon ma gbenda u eren kwagh. Enoki man Noa yange ve tsua u eren ishima i Yehova Aôndo. Ve lu er ior mba sha ayange a ve la ga, kpa ve veren ashe a Yehova ér a hemen ve shi ve ungwan imo na kpaa. Yange ve suur sha a na. Ngun tese ér Yehova yange tsuan akaa sha ci ve shinii? Ei. Yehova na uumace ian i tsuan kwagh u ve soo la a ishima ve, man a soo ér “mhen” wase a wase se u yaren tom a iyua ne. (Mbaromanu 12:1; NW ) Kpa, zum u se lu tsuan kwagh u se er yô, doo u se de mhen u Yehova u a hembe mbamhen asev cii la a hemen se. (Anzaakaa 3:5, 6; Yesaia 55:8, 9) Nahan er se lu uma, se lu eren akaa ase nahan, se eren a er Yehova a soo la.
5. Hii nan ve Yesu yange ôr kwagh u seer ishiva sha ayange a uma u oro?
5 Ashighe kpishi Bibilo ka i tôô uma i kar sha zende. Ashighe agen ka i̱ kaa jighilii ér uma ka zende, kpa ashighe agen yô i̱ gema i̱ ôr mkaanem ma tesen ér uma ka zende. U tesen ikyav yô, ken ngeren u hiihii u ken zwa Grika la Yesu kaa ér: “Ka an wen je sha ishima i nyian i nan la, nana fatyô u seer ishiva i môm sha ayange a uma u nan ase?” (Mateu 6:27) Alaghga mkaanem man ma a taver we. Nahan ú pine wer, hii nan ve Yesu a er kwagh u seer “ishiva i môm” sha “ayange a uma” u oro? Gadia ishiva ka ikyaren i ilihen, man ka a ôron kwagh u ayange a uma u or yô ka shighe u nan tse sha won la i lu ôron ye. * A̱ shi nan kpa Yesu yange tôô uma kar sha zende heen. Alaghga tsô kwagh u lu ôron heen jighilii yô ér, aluer ishima nyian se nan nan kpa, se fatyô u seer ishiva i môm sha uma wase u a lu er ka zende la ga. Nahan ka u se kure ikyar ser se fatyô u eren kwagh môm sha kwagh u ilihen i zende ne ga shinii? Mayange ga cii! Se time ase sha mpin wase u sha uhar la hegen, a kaa ér, hii nan ve i gbe u se zenden vea Aôndo?
Hii Nan Ve I Gbe u Se Zenden vea Aôndo?
6, 7. Kwagh gba uumace mba ve yen ne a nyi, man hii nan ve i doo u se suur sha Yehova ser a kure se mgbe nee?
6 I pase ityôkyaa i môm i i ne ve i gbe u se zenden vea Aôndo la ken Yeremia 10:23, ér: “TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.” Nahan se uumace se mba a tahav shin ian i kôôm uma wase ayol a ase ga. Kwagh gba se a hemen je zua ga. Kpa mba ve sendegh ér vea za sha gbenda ve a Aôndo shio yô, gba ken kwaghbo shon môm u Adam man Ifa kpa yange ve gba ker la. Ior mba uhar mba hiihii mbara yange ve nenge ér hemba doon u vea tsuan kwagh u bo man u dedoo ayol a ve. (Genese 3:1–6) Jighilii yô, ian i tsuan kwagh u bo man u dedoo la ngi ‘sha ikyev’ yase ga.
7 U hen wer doo u or a hemen we ken uma wou u a lu inja er ka zende ne ga he? Hanma iyange yô, ka i gba u se tsua akaa a kiriki ga yô a vesen. Agen yô ka a taver kpishi shi a bende a mlu wase u ken hemen man u ior asev kpaa. Nenge ase yô, or u nan lu tamen a vese ica shi nan fe kwagh nan hembe se yô nan kegh iyol u hemen se sha dooshima sha er se tsua kwagh u se er yô! Kpa kwagh ka a er i vihi yô, ior kpishi nyian suur sha mbamhen vev nahan ve nenge ér vea hemen ayol a ve. Ve hungur a kwagh u mimi u i nger ken Anzaakaa 28:26 la, ér: “Or u nan suur sha ishima i nan iyol i nan yô, ka ibumeor je, kpa or u nan zenden sha kwaghfan yô, á yima nan.” Yehova soo ér se palegh kwaghbo u or ka nana suur sha ishima i nan i i we atseregh ve nan zua a mi la. (Yeremia 17:9) A soo ér se zende sha kwaghfan, shi se suur sha a na, gadia un ngu Orhemen man Ortesen se. Aluer se er nahan yô, se zua a mkom sha zende wase u uma ne shi se lu ken mkor kpaa.
8. Isholibo man myen mba ze a vese hana, nahan kpa Yehova wa ishima u eren nyi sha ci wase?
8 Ityôkyaa igen i i ne ve i gbe u se zenden vea Aôndo yô ka sha ci u zende la lihe. Bibilo ôr kwagh u a tser uumace cii yô. Jighilii yô, uumace mba ve yen mban cii mba yemen hen ijiir i môm. Orpasenkwagh 12:5 ôr kwagh u atsan a iyolbeen ka i va a mi yô, ér: “Or ngu zan hen ya u nan u tsôron, man mbazungwen mba zenden sha igbenda.” ‘Ya u tsôron’ ne ka nyi? Ka shin uwar shin pe isholibo man myen ka ve yem a vese la. (Mbaromanu 6:23) Kpa Yehova wa ishima u eren kwagh sha ci wase u a hembe uma u lihen ga u ka se ya ican hii sha iyange yase i mar zan zan ku wase la. (Yobu 14:1) Nahan kpa, ka mba ve zenden vea Aôndo tseegh vea fatyô u zenden gbem sha won er yange i gba se ér se zende la ye. Ka kwagh u ú soo la gaa? Nahan yô, doo u ú zenden vea Ter ú.
Se Zende vea Aôndo Nena?
9. Hii nan ve ashighe agen Yehova yange a yer iyol na hen ior nava, kpa a taver ve ishima ken Yesaia 30:20 ér nyi?
9 Doo u se ver ishima zulee sha mpin u sha utar u se lu timen sha mi hegen ne. A kaa ér, se zende vea Aôndo nena? Se zua a mlumun ken Yesaia 30:20, 21, ijiir la kaa ér: “Ortesen wou u Hembancii una kera yer iyol na ga, kpa ashe ou aa nenge Ortesen wou u Hembancii; ato ou kpaa aa ungwa kwaghôron ken ijime you u kaan er: Ka gbenda je ne, za nen sha u, zum u á sar ne u geman ken iyan shin ken imese la yô.” (NW ) Mkaanem ma Yehova ma taver ior nav ishima ma i nger ken ivur i sha 20 man yange ma a umbur ior nav ér zum u ve hemba un ato yô, lu inja er a yer iyol na hen a ve nahan. (Yesaia 1:15; 59:2) Kpa heen ne Yehova kera yer iyol na ga, a tile sha ishigh ki ior nav tseer tseer. Alaghga kwagh ne una umbur se kwagh u tica u a til sha ishigh ki mbayevmakeranta a lu tesen ve kwagh yô.
10. Ka sha nyi gbenda nahan ú “ungwa kwaghôron” u Ortesen wou u Hembancii “ken ijime you” we?
10 Kpa i gema i ôr kwagh ugen kposo ken ivur i sha 21 la. I kaa ér Yehova ngu van ior nav ken ijime tesen ve gbenda u vea za yô. Mbatimen ken Bibilo kaa ér, alaghga i kar mkaanem man sha gbenda u orkuranilev ka nan dondo sha iyôngo i nan, nan kuran i sha er ia saa toho ga la. Mkaanem man ma zua sha mlu wase nena? Zum u se ker kwaghwan ken Mkaanem ma Aôndo yô, se mba ôron mkaanem ma i nger anyom udubu imôngo yô. Mkaanem mara ma van ken ijime yase sha ci u i nger ma ica i gba. Nahan kpa, ma a inja sha ayange ne vough er sha shighe u i nger ma la nahan. Akaawan a ken Bibilo aa kura se sha akaa a se tsough u eren ayange ayange, shi aa wase se se sôr akaa a se va er ken hemen la kpa se ver vough vough. (Pasalmi 119:105) Aluer se ker akaawan ne sha gbashima shi se dondo a yô, se lu tesen ser Yehova ka Orkuran se. Shi se lu zenden vea Aôndo kpaa.
11. Ka kwaghwan u dedoo u nyi Yehova wa ior nav ken Yeremia 6:16, kpa ve gema ve er nena?
11 Sha mimi yô, se mba den ser Mkaanem ma Aôndo ma hemen se nahan kpa? Ashighe agen ka i doo u hiden gbidyen kwar sha mlu wase nengen. Time ase sha ivur Bibilo i ia wase ú u eren kwagh ne yô, i̱ kaa ér: “TER ngu kaan nahan er: Tile nen sha igbenda, nenge nen, pine nen igbenda i tse, henpe gbenda u doon shi u lu yô, zende nen sha u, tsô nea zua a mmem sha ci u uuma enev.” (Yeremia 6:16) Alaghga mkaanem man ma a umbur se kwagh u or u zan zende u nan za asegh sha akahar a gbenda ve nan til nan lu pinen gbenda yô. Ior mba Yehova mba ken tar u Iserael kpa yange gba u vea er kwagh nahan ken jijingi. Yange gba u vea hide sha “igbenda i tse” la. “Gbenda u doon” shon la lu gbenda u uter vev ngise zenden sha mi yô, kpa ikyurior i Iserael tsume undu ú sha ibume. Kwagh ka a er i vihi yô, Iserael lumun kwaghwan u Yehova wa ve sha dooshima la ga. Ivur la za hemen ér: “Kpa ve kaa er: Ka se ka zenden sha mi ga.” Kpa, sha ayange ase ne yô ior mba Aôndo er nahan ga, ve lumun kwaghwan la.
12, 13. (a) Mbadondon Kristu mba i shigh ve mkurem mbara dondo kwaghwan u a lu ken Yeremia 6:16 la nena? (b) Se time sha gbenda u se zenden nyian la nena?
12 Hii ken derianyom u sha 19 la je, mbadondon Kristu mba i shigh ve mkurem la tôô kwaghwan u a lu ken Yeremia 6:16 la kar sha ayol a ve. Nongo u Mbakristu mba i shigh ve mkurem la hemen gbenda sha u hiden sha “igbenda i tse” la a ishima ve i môm. Ve mba er Mbakristu mbaaiev nahan ga, gadia ve dondo “kwaghôron u dedoo” u Yesu Kristu yange ver, u mbadondon nav mba jighjigh mba sha derianyom u hiihii kpa dondon la. (2 Timoteu 1:13) Zan zan nyian kpa mba i shigh ve mkurem mbara mba wasen ayol a ve kua “iyôngo igen” i i lu akar a ve la ér ve dondo gbenda u dedoo u Mbakristu mbaaiev ve vende ne.—Yohane 10:16.
13 Mbakristu mba i shigh ve mkurem mbara mba ne “kwaghyan sha ashighe ashighe,” nahan ve wase ior umiliôn imôngo ve zua a “igbenda i tse” la shi mba zenden vea Aôndo kpaa. (Mateu 24:45–47) We kpa u ngu môm ken ior mba ve lu umiliôn imôngo nee? Aluer u ngu ken ve yô, u er nan ve u tsume u undu gbenda la u dondo gbenda wou ga? Doo u ú timen sha gbenda u uma u ú ze sha mi la sha ashighe ashighe. Aluer u ngu ôron Bibilo man ityakerada i i har sha Bibilo hanma shighe, shi u ngu zan mbamkombo mba Mbakristu mba i shigh ve mkurem ve ser ve ver nyian ne yô, fa wer mba tesen we u zenden vea Aôndo. Man zum u ú hidi a iyol ijime u dondo akaawan a ve ne yô, kwagh ne una tese ér mimi je u ngu zenden vea Aôndo sha “igbenda i tse” la.
Zenden Er Ú “Ngu Nengen a U I Nengen a Na Ga La Nahan”
14. Se tese ken akaa a se tsough u eren la ser Yehova ka or hen a vese jim jim nena?
14 Saa Yehova una lu or jim jim hen a vese ve se fatyô u zenden a na ye. Umbur wer Yehova yange kaa a mbajighjigh mba ken Iserael u tsuaa la ér un yer iyol na hen a ve ga. Nyian kpa, Yehova pase iyol na hen ior nav ér un ngu Ortesen u Hembancii. Kape we kpa Yehova a lu u or jim jim, inja er a tile u sha ishi ngu tesen we kwagh u ú er laa? Aluer se soo u zenden vea Aôndo yô, ka imba jighjigh u nan u i gbe u se lu a mi je la. Mose kpa lu a imba jighjigh la, “gadia a taver ishima er ngu nengen a u i nengen a Na ga la nahan.” (Mbaheberu 11:27) Aluer Yehova ngu or jim jim hen a vese yô, se ker u eren ishima na ken akaa a se tsough u eren cii. U tesen ikyav yô, mhen u eren kwaghbo shi yeren mbatamen mba ken Kristu man tsombor wase a mi la una va se ken ishima tsô kpaa ga. Kpa se gema se nôngon u zenden vea Aôndo sha hanma ian cii, kua shighe u se lu se tswen la kpaa. Se kange ishima er Tor Davidi kpa ngise kange nahan ser: “Me zende a ishima i lun a acôghor a wan iyol ga ken iyou yam.”—Pasalmi 101:2.
15. U kohol imôngo vea anmgbianev asev mba nomso man mba kasev mba ken Kristu la una wase se u nengen Yehova ser ngu or jim jim nena?
15 Yehova fa er se yen shi se lu a iyol i inyam man awambe nahan yô, shi a fa kpaa er ashighe agen ka i taver se kpishi u nan jighjigh a kwagh u se nenge a mi ga la yô. (Pasalmi 103:14) Ngu a wase se kpishi sha er se hemba mzeyol wase ne yô. U tesen ikyav yô, a kohol ‘ior sha ci u iti Na’ ken iniongoior i shin tar cii. (Aerenakaa 15:14) Nahan er se lu civir Yehova imôngo ken mzough yô, se mba taver ayol a ase asema. Ka sea ungwa er Yehova a wase ma anmgbian u nomso shin u kwase nan hembe isheer shin ma imeen nahan, Aôndo wase a hemba lun or jim jim hen a vese cii.—1 Peteru 5:9.
16. U henen kwagh u Yesu la una wase se u zenden vea Aôndo nena?
16 U hemban cii yô, Yehova tese se ikyav i Wan na. Yesu kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yohane 14:6) U timen sha uma u Yesu zum u a lu shin tar la ka gbenda u hemban cii u ua na Yehova a hemba lun or jim jim hen a vese yô. Yesu yange bee Ter na u sha la sha kwaghôron man sha ieren na cii. (Yohane 14:9) Nahan zum u se lu tsuan kwagh u se er yô, doo u se kpe iyol se hen sha kwagh u á lu Yesu ve maa a er yô. Aluer se mba henen sha kwagh zulee shi se mba eren msen cii ve tsuan kwagh u se er yô, se mba dondon sha angahar a Kristu. (1 Peteru 2:21) Shi se tese ser se mba zenden vea Aôndo.
Ka Averen a Nyi Se Zua a Mini?
17. Aluer se mba zenden sha gbenda u Yehova yô, ka “mmem” u nyi se zua a mini?
17 Aluer se mba zenden vea Yehova Aôndo yô, a kpe se iyol. Umbur ityendezwa i Yehova a er a ior nav sha kwagh u keren “gbenda u doon” la. A kaa ér: “Zende nen sha u, tsô nea zua a mmem sha ci u uuma enev.” (Yeremia 6:16) Inja i “mmem” ér nyi? Ka uma u mkpeyol u lun a uyôughyôughmbaakaava? Ei. Yehova na se kwagh u a hembe uyôughyôughmbaakaav ica yô, man kwagh ne ka kwagh u mba ve hembe inyaregh cii la ve fe zuan a mi ga yô. Inja i u zuan a mmem yô, ka u lun ken bem man iember man mkom u ken jijingi. Aluer u ngu a imba bem la yô, kwagh ne tese ér ú tsua gbenda u hemban doon cii ken uma. Taver u zuan a imba bem la shin tar u u mgbough a mbamzeyol yum ne je gande!
18. Ka averen a nyi Yehova a soo u nan se, man u kange ishima wer u er nyi?
18 Heela tseegh ga, mlu u se lu uma ne kpa ka iveren i numben a mi ga. Aluer se zende aseva kpuaa tseegh kpa hemba u hiin a hii ga kuaa la. Kpa ú ngu wer Yehova wa ishima ér u zende zende u uma wou la tiônôô, hii shighe u ú lu iyev ú lu a gbong gbong iyol la zan zan u kar been iyol a mbamnyoon sha mi ga. Kpa, a soo ér u zua a iveren i hemban cii la. A soo ér u zende vea na gbem sha won! I pase kwagh ne ken Mika 4:5 ér: “Ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.” U soo u zuan a averen ne kpa? U soo u va zuan a uma u Yehova a yer ér “uma jim la” kpa? (1 Timoteu 6:19) Yô, kange ishima wer u zende vea Aôndo nyian man kper man hanma iyange cii zan zan gbem sha won!
[Footnote]
^ Mbamgem mba Bibilo mbagen musan ishember i “ishiva” i i nger ken ivur ne la a ishember igen i tesen shighe. U tesen ikyav yô, mgem u Bibilo i i yer ér The Emphatic Diaglott la kaa ér “iaven i môm.” Mgem u Bibilo i Charles B. Williams a gber, i yer ér, A Translation in the Language of the People la di kaa ér “miniti môm.” Kpa inja i ishemberti i yange i nger ken ngeren u Bibilo u hiihii la ér ishiva, i i lihi i kom nguhar môm man tiôn la.
Ú Na Mlumun Wer Nyi?
• Inja i u zenden vea Aôndo la ér nyi?
• Hii nan ve i gbe hange hange u ú zenden vea Aôndo?
• Ka nyi ia wase ú ú fatyô u zenden vea Aôndo?
• Ka averen a nyi mba ve zenden vea Aôndo ve zough a mini?
[Study Questions]
[Pictures on page 27]
Ka sea ôron Bibilo yô, se ungwa imo i Yehova ken ijime yase ér, “Ka gbenda je ne”
[Picture on page 29]
Se mba zough a kwaghyan u ken jijingi sha shighe vough zum u se ze mbamkombo la